Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 125

Yè Plan Jesu Yì Annas Dè, Enẹgodo Yì Kaifa Dè

Yè Plan Jesu Yì Annas Dè, Enẹgodo Yì Kaifa Dè

MATIU 26:57-68 MALKU 14:53-65 LUKU 22:54, 63-65 JOHANU 18:13, 14, 19-24

  • JESU YIN PINPLAN YÌ YẸWHENỌGÁN DAI TỌN ANNAS DÈ

  • WHẸDIDA HE MA SỌGBE HẸ OSẸ́N DE GBỌN HAGBẸ WHẸDATẸN DAHO JU LẸ TỌN DALI

Tlolo he Jesu yin biblá di sẹ́nhẹngbatọ de godo, e yin pinplan yì Annas dè, yèdọ mẹhe yin yẹwhenọgán to ojlẹ he mẹ Jesu hẹn awuji mẹplọntọ lẹ to tẹmpli mẹ to jọja whenu. (Luku 2:42, 47) To nukọn mẹ, delẹ to ovi Annas tọn lẹ mẹ sẹ̀n taidi yẹwhenọgán, bọ todin ovisu etọn Kaifa wẹ to otẹn enẹ mẹ.

To whenue Jesu to owhé Annas tọn gbè, Kaifa mọ whenu nado pli hagbẹ Whẹdatẹn Daho lọ tọn lẹ. Whẹdatẹn enẹ bẹ hagbẹ 71 hẹn, ehe mẹ yẹwhenọgán lọ po mẹdevo he ko nọ otẹn enẹ mẹ pọ́n lẹ po tin te.

Annas kanhose Jesu “gando devi etọn lẹ go podọ gando nuplọnmẹ etọn go.” Jesu gblọn poun dọmọ: “Yẹn ko dọhona aihọn lọ to gbangba. Whepoponu wẹ yẹn nọ plọnmẹ to sinagọgu mẹ podọ to tẹmpli mẹ, fihe Ju lẹpo nọ pli do; yẹn masọ dọ nudepope to nuglọ. Naegbọn hiẹ do to hokanse mi? Kanhose mẹhe ko sè nuhe yẹn dọna yé lẹ.”—Johanu 18:19-21.

Ponọ de he to ote to finẹ hotómẹ na Jesu bo gbẹnuna ẹn dọmọ: “Be mọ wẹ hiẹ na na gblọndo yẹwhenọgán lọ do ya?” Ṣigba na Jesu yọnẹn dọ emi ma ko ṣinuwa wutu, e gblọn dọmọ: “Eyin nuhe yẹn dọ ylan, dọ nuhe ylan to e mẹ lọ na mi; ṣigba eyin nuhe yẹn dọ lọ sọgbe, naegbọn hiẹ do linú mi?” (Johanu 18:22, 23) To whenẹnu, Annas biọ dọ Jesu ni yin hinhẹn yì ovisu etọn Kaifa dè.

Todin, mẹhe yin hagbẹ Whẹdatẹn Daho lọ tọn pete lẹ—enẹ wẹ yẹwhenọgán he to gandu to alọnu, sunnu mẹho lẹ, po wekantọ lẹ po—ko plidopọ. Yé pli to owhé Kaifa tọn gbè. E ma sọgbe hẹ osẹ́n nado dọ owhẹ̀ mọnkọtọn to ozán he mẹ hùnwhẹ Juwayi tọn nọ yin dùdù te, ṣigba ehe ma glọnalina yé nado hẹn lẹndai ylankan yetọn di.

E na vẹawu dọ pipli ehe ni dawhẹ jijlọ. To whenue Jesu fọ́n Lazalọsi sọnku godo, Whẹdatẹn Daho lọ basi dide dọ Jesu dona kú. (Johanu 11:47-53) Podọ to azán delẹ die, sinsẹ̀ngán lẹ ko blasé nado wle Jesu bo hù i. (Matiu 26:3, 4) Mọwẹ, owhẹ̀ okú tọn ko yin didá na Jesu whẹpo owhẹ̀ etọn tlẹ do bẹjẹeji!

Gbọnvona dọ nuhe wà yé te ma sọgbe hẹ osẹ́n, yẹwhenọgán lọ lẹ po mẹdevo lẹ po to Whẹdatẹn lọ mẹ sọ to tintẹnpọn nado mọ kunnudetọ he na dekunnu lalo sọta Jesu nado sawhẹdokọna ẹn lẹ. Yé mọ mẹsusu, ṣigba kunnudide omẹ enẹlẹ tọn sọta yede. To godo mẹ, omẹ awe sẹwá nukọn bo dọmọ: “Mí sè bọ e dọ dọ, ‘Yẹn na họ́ tẹmpli ehe, he yin bibasi po alọ po bo na gbá devo he ma yin bibasi po alọ po to azán atọ̀n gblamẹ.’” (Malku 14:58) Etomọṣo, kunnudide dawe ehelẹ lọsu tọn ma tlẹ yin nudopolọ.

Kaifa kanse Jesu dọmọ: “Hiẹ ma gblọn nudepope wẹ? Etẹwẹ hiẹ lọsu lẹn gando kunnu he omẹ ehelẹ to dide sọta we go?” (Malku 14:60) Jesu ma kẹnù gando whẹsadokọnamẹ lalo enẹ go, ehe kunnudetọ he hopàdọ yetọn lẹ ma sọgbe hẹ yedelẹ to didọ. Enẹwutu, Yẹwhenọgán Kaifa kàn ayiha gigẹdẹ devo.

Kaifa yọnẹn dọ homẹ nọ gble Ju lẹ taun eyin mẹde sọalọakọ́n dọ emi yin Visunnu Jiwheyẹwhe tọn. To ojlẹ de mẹ wayi, to whenue Jesu ko ylọ Jiwheyẹwhe dọ Otọ́ etọn godo, Ju lẹ jlo na hù i na yé dọ dọ ewọ “to ede hẹn sọzẹn hẹ Jiwheyẹwhe.” (Johanu 5:17, 18; 10:31-39) Na Kaifa ko doayi numọtolanmẹ enẹlẹ go wutu, e yí ayiha gigẹdẹ do kanse Jesu dọmọ: “Yẹn biọ to hiẹ si nado yí Jiwheyẹwhe ogbẹ̀nọ lọ do whlé nado dọna mí eyin hiẹ wẹ Klisti lọ, yèdọ Visunnu Jiwheyẹwhe tọn!” (Matiu 26:63) Na nugbo tọn, Jesu ko do ede hia taidi Visunnu Jiwheyẹwhe tọn. (Johanu 3:18; 5:25; 11:4) Eyin e ma wàmọ todin, enẹ sọgan dohia dọ ewọ to mimọ́n dọ emi yin Visunnu Jiwheyẹwhe tọn podọ Klisti lọ. Enẹwutu, Jesu dọmọ: “Yẹn wẹ, mìwlẹ nasọ mọ Visunnu gbẹtọ tọn to aisinsin to adusilọ huhlọn tọn mẹ bọ e nasọ ja to aslọ olọn tọn lẹ mẹ.”—Malku 14:62.

Whenẹnu, Kaifa yí zingidi do tlẹ́n awugbó etọn lẹ, bo dawhá dọmọ: “E zánnu! Etẹwẹ mí gbẹ́ pò to kunnudetọ lẹ dín na? Mì pọ́n! Mì ko sè nùzinzan lọ todin. Etẹwẹ mìwlẹ lẹn?” Whẹdatẹn Daho lọ dawhẹ agọ̀ dọmọ: “E jẹna okú.”—Matiu 26:65, 66.

Enẹgodo, yé jẹ Jesu yí do davlẹ ji bosọ jẹ akotokún lì i ji. Mẹdevo lẹ hotómẹ na ẹn bosọ túntán do nukunmẹ na ẹn. To whenue yé ṣinyọnnudo nukunmẹ na ẹn pete bo hotómẹ na ẹn godo, yé dọ po mẹṣanko po dọmọ: “Dọ dọdai! Mẹnu wẹ linú we?” (Luku 22:64) Visunnu Jiwheyẹwhe tọn wẹ yé to nuyiwa hẹ po kanyinylan po to whẹdida zánhomẹ tọn he ma sọgbe hẹ osẹ́n de tẹnmẹ niyẹn!