Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Jesu—Aliho lọ, Nugbo lọ po Ogbẹ̀ Po

 WETA 18

Jesu to Jijideji bọ Johanu to Didepo

Jesu to Jijideji bọ Johanu to Didepo

MATIU 4:12 MALKU 6:17-20 LUKU 3:19, 20 JOHANU 3:22–4:3

  • DEVI JESU TỌN LẸ TO GBẸTỌ LẸ BAPTIZI

  • JOHANU BAPTIZITỌ LỌ YIN WIWLE DO GÀNMẸ

To whenue Jesu po devi etọn lẹ po ko basi hùnwhẹ Juwayi tọn to amakikọ-whenu owhe 30 W.M. tọn godo, yé tọ́n sọn Jelusalẹm. Ṣigba, yé ma lẹkọyi owhé yetọn lẹ gbè to Galili tlọlọ gba. Yé yì otò Jude tọn mẹ bo baptizi mẹsusu to finẹ. Johanu Baptizitọ lọ lọsu ko to azọ́n mọnkọtọn de wà sọn nudi owhe dopo die, bọ delẹ to devi etọn lẹ mẹ gbẹ́ pò to e dè, vlavo to agbàdo Tọ̀sisa Jọdani tọn mẹ.

Jesu lọsu ma baptizi mẹdepope—devi etọn lẹ wẹ nọ wàmọ to anademẹ etọn glọ. To ojlẹ enẹ mẹ to lizọnyizọn Jesu tọn whenu, Jesu po Johanu po to nuplọn Ju he ko lẹnvọjọ sọn ylando yetọn mẹ lẹ, yèdọ ylando he yé ko wà sọta alẹnu Osẹ́n Jiwheyẹwhe tọn lẹ.—Owalọ lẹ 19:4.

Ṣigba, devi Johanu tọn lẹ jẹ awuwhàn ji bo to lewu gando Jesu go dọmọ: “Dawe [Jesu] he wá dè we . . . to gbẹtọ lẹ baptizi, mẹlẹpo sọ to e dè yì.” (Johanu 3:26) Etomọṣo, Johanu ma whànwu. Kọdetọn dagbe Jesu tọn hẹn homẹ etọn hùn bọ e jlo dọ devi etọn lẹ lọsu ni hùnhomẹ ga. Johanu flinnu yé dọmọ: “Mìlọsu lẹ dekunnu dọ yẹn ko nọ dọ dọ, yẹn ma yin Klisti lọ gba, ṣigba yè do mi hlan jẹnukọnna ewọ wẹ.” E zinnudo ehe ji gbọn apajlẹ he mẹlẹpo sọgan mọnukunnujẹemẹ de nina dali dọmọ: “Mẹhe tindo asiyọyọ lọ wẹ asisunọ yọyọ lọ. Ṣigba, to whenue họntọn asisunọ yọyọ lọ tọn ṣite bo sè ohó etọn, e nọ tindo ayajẹ daho na e ko sè ogbè asisunọ yọyọ lọ tọn wutu. Enẹwutu, ayajẹ ṣie ehe ko yin hinhẹn gọ́.”—Johanu 3:28, 29.

Kẹdẹdi họntọn asisunọ yọyọ lọ tọn, homẹ Johanu tọn hùn to osun delẹ die wayi to whenue e do devi etọn lẹ hia Jesu. Delẹ to yé mẹ hodo Jesu bo nasọ yin dide gbọn gbigbọ wiwe dali to nukọn mẹ. Johanu jlo dọ devi etọn dintọn lẹ lọsu ni hodo Jesu. Na nugbo tọn, lẹndai Johanu tọn wẹ nado jla aliho do na lizọnyizọn Klisti tọn. Johanu basi zẹẹmẹ dọmọ: “Ewọ dona to jijideji, ṣigba yẹn dona to didepo.”—Johanu 3:30.

To godo mẹ, mẹdevo he sọ nọ yin Johanu bo ko jẹ Jesu hodo ji dai wá wlan gando fie Jesu wá sọn po adà tangan he e yiwà to whlẹngán gbẹtọvi lẹ tọn mẹ po go dọmọ: “Ewọ he wá sọn aga klohu mẹhe pò lẹpo. . . . Otọ́ yiwanna Visunnu lọ bo ko yí nulẹpo do alọ etọn mẹ. Mẹhe nọ do yise hia to Visunnu lọ mẹ tindo ogbẹ̀ madopodo; mẹhe nọ vẹtolina Visunnu lọ ma na mọ ogbẹ̀, ṣigba homẹgble Jiwheyẹwhe tọn nọ gbọṣi e ji.” (Johanu 3:31, 35, 36) Nugbo titengbe de niyẹn he gbẹtọ lẹ dona yọnẹn!

E ma dẹn he Johanu Baptizitọ lọ dohia dọ adà he yiwà emi te po azọ́n emitọn po na depò bọ Ahọlu Hẹlọdi wle e. Hẹlọdi ko yí Hẹlọdia he yin asi nọvisunnu daa etọn Filippi tọn bo dà ẹ. Whenue Johanu de ayọdide etọn gbà to gbangba, Hẹlọdi sú i do gànpamẹ. To whenue Jesu sè dọ Johanu ko yin wiwle, ewọ po devi etọn lẹ po tlọ́n Jude bo “tọ́nyi Galili.”—Matiu 4:12; Malku 1:14.