Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Gblọndo Na Kanbiọ 10 He Jọja lẹ Nọ Kanse

 KANBIỌ 5

Eyin Yè to Nukunvando Mi to Wehọmẹ Lo?

Eyin Yè to Nukunvando Mi to Wehọmẹ Lo?

NUHEWUTU E DO YIN NUJỌNU

Lehe a yinuwa do na hẹn nulẹ pọnte—kavi ylan deji.

ETẸWẸ A NA WÀ?

Pọ́n nujijọ ehe: Thomas masọ jlo na yì wehọmẹ gbede ba. Ehe lẹpo bẹjẹeji to osun atọ̀n die whenue wehọmẹvigbẹ́ etọn lẹ jẹ hinhẹn ẹn gble ji. Yé sọ wá sù-yín na ẹn. Dopo to hagbẹ Thomas tọn lẹ mẹ sọgan gbì owe etọn lẹ sọn alọ mẹ na ẹn bo yinuwa taidi dọ e ma yọnẹn kavi mẹdevo sọgan sisẹ́ ẹ bọ eyin Thomas lilẹ́, e ma nọ yọ́n mẹhe wàmọ. To osọ he wayi, nukunvandomẹ lọ tlẹ sọ sinyẹn deji to whenue mẹde sin-adán na Thomas to Intẹnẹt ji . . .

Eyin hiẹ wẹ yin Thomas, etẹwẹ a na wà?

YIAGBỌJI BO LẸNNUPỌN!

A gbẹ́ sọgan yí nude wà! Na nugbo tọn, a sọgan duto nukunvandomẹtọ lẹ ji matin avùnhiho. Gbọnna?

  •   MA GBLỌN-ADÁN BLO. Biblu dọmọ: “Nulunọ nọ túntún numọtolanmẹ etọn lẹpo jẹgbonu, ṣigba, nuyọnẹntọ nọ gbọn homẹfa dali dava popolẹpo.” (Howhinwhẹn lẹ 29:11) Eyin a nọ fahomẹ ganji—nukunvandomẹtọ lẹ na gbọjọ.

  • MA YIAHỌSU BLO. Biblu dọmọ: “Mì nọ yí oylan do suahọ oylan tọn na mẹdepope blo.” (Lomunu lẹ 12:17) Ahọsuyiyi na hẹn ninọmẹ lọ ylan dogọ poun wẹ.

  • MA ZE DEWE DO OWÙ MẸ BLO. Biblu dọmọ: “Zinzintọ nọ mọ owù hlan bo nọ whlá ede.” (Howhinwhẹn lẹ 22:3) Nọ tẹnpọn nado dapana mẹhe nọ hẹn nuhahun wá lẹ gọna ninọmẹ he mẹ yè sọgan vannukundo we te lẹ.

  • NA GBLỌNDO MADONUKUN DE. Biblu dọmọ: “Gblọndo he yin nina po ogbè dẹẹdẹ po nọ lilẹ́ adi sẹ̀.” (Howhinwhẹn lẹ 15:1) A tlẹ sọgan yìn aslan. Di apajlẹ, eyin nukunvandomẹtọ de zun we dọ a klo gbau, a sọgan ze abọ́ bo dọ, “Lehe n’te jlo we wẹ ya?”

  • NABỌẸ BO TỌ́N SỌN FINẸ. Nora owhe 19 mẹvi de dọmọ: “Abọẹninọ nọ dohia dọ a whèwhín bosọ dohuhlọn hú mẹhe to nukunvando we lọ. E nọ dohia dọ a nọ duto dewe ji—jẹhẹnu de he nukunvandomẹtọ lọ ma tindo.”—2 Timoti 2:24.

  • GBOADỌ. Nukunvandomẹtọ lẹ nọ saba doayi mẹhe ma nọ dejido yede go bo ma nọ penugo nado yiavùnlọna yede lẹ go. Amọ́ nukunvandomẹtọ susu wẹ na joagọ eyin yé mọdọ a ma dibuna yé paali.

  • DỌNA MẸDE. Mẹplọntọ wehọmẹ tọn hoho de dọmọ: “Tuli he n’na na mẹdepope he yè to nukunvando wẹ nado jẹwhẹ. Nuhe sọgbe lọ niyẹn, podọ mọwiwà sọgan zọ́n bọ mẹdevo lẹ ma na yin nukunvando ba.”

Adọgbigbo na na we huhlọn he nukunvandomẹtọ lẹ ma nọ tindo