Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Gblọndo Na Kanbiọ 10 He Jọja lẹ Nọ Kanse

 KANBIỌ 6

Nawẹ N’Sọgan Duto Kọgbidinamẹ Hagbẹ Tọn Ji Gbọn?

Nawẹ N’Sọgan Duto Kọgbidinamẹ Hagbẹ Tọn Ji Gbọn?

NUHEWUTU E DO YIN NUJỌNU

Eyin a tindo nujikudo, a na nọ deanana gbẹzan towe kakati nado dike mẹdevo lẹ ni deanana ẹn do otẹn towe mẹ.

ETẸWẸ A NA WÀ?

Pọ́n nujijọ ehe: Dile wehọmẹvigbẹ́ Brian tọn awe to dindọnsẹpọ ẹ, obu jẹeji. Yé ko tẹnpọn nado hẹn ẹn nù siga whla awe to osẹ ehe mẹ. Ehe wẹ na yin whla atọ̀ntọ.

Visunnu tintan dọmọ:

“A ko sọ whlá dewe dofi? Dike ma do ‘họntọn’ de hia we.”

E doalọ apò etọn mẹ bo de nuhe ylọdọ “họntọn” e te lọ tọ́n bosọ dlẹn ẹn do Brian.

Brian mọ siga lọ to alọ visunnu lọ tọn mẹ. Obu sọ di i dogọ.

Brian dọmọ: “Hagbẹ lẹ mì jaale. N’ko dọna mì dọ, n’ma nọ . . .”

Visunnu awetọ yihó dọmọ: “Etẹwẹ yin nuhahun towe? Budi a te wẹ?”

Brian wleawuna adọgbigbo bo dọ: “N’ma to budi.”

Visunnu awetọ plá alọ kọna Brian bo yí ogbè fifá do dọ, “Saa yí poun.”

Visunnu tintan lọ ze siga lọ sẹpọ Brian bo depá na ẹn dọmọ: “Mí ma na dọna mẹdepope. Mí dopà! Mẹde ma na yọnẹn gbede.”

Eyin hiẹ wẹ yin Brian, etẹwẹ a na wà?

 YIAGBỌJI BO LẸNNUPỌN! 

Be hagbẹ Brian tọn lẹ lẹn nuhe wà yé te pọ́n ganji ya? Be yé kudo nudide yetọn lẹ ji ya? E na vẹawu. To paa mẹ, mẹdevo lẹ wẹ na ko yinuwado yé ji. Yé jlo na yin alọkẹyi, enẹwutu yé dike bọ mẹdevo lẹ to anadena yé.

Eyin a wá mọ dewe to ninọmẹ mọnkọtọn mẹ, nawẹ a sọgan yinuwa to aliho devo mẹ bo nọavùnte sọta kọgbidinamẹ hagbẹ tọn gbọn?

  1. WLEAWUDAI

    Biblu dọmọ: “Zinzintọ nọ mọ owù hlan bo nọ whlá ede, ṣigba, wunvinọ nọ dlí biọ e mẹ bo nọ jiya kọdetọn etọn lẹ tọn.”—Howhinwhẹn lẹ 22:3.

    To paa mẹ, a sọgan mọ owù lọ jẹnukọn. Di apajlẹ, mí ni dọ dọ a mọ wehọmẹvigbẹ́ delẹ hlan bọ yé to siga nù. Eyin a wleawudai jẹnukọnna nuhahun lọ, a na penugo nado dudeji.

  2. LẸNNUPỌN

    Biblu dọmọ: “Mì hẹn ayihadawhẹnamẹnu dagbe de go.”—1 Pita 3:16.

    Kanse dewe dọ, ‘Etẹwẹ na jọ do go e to nukọn mẹ eyin n’wà nuhe wà mẹlẹpo te?’ Nugbo wẹ dọ a sọgan mọ nukundagbe hagbẹ towe lẹ tọn na ojlẹ de. Ṣigba, etẹwẹ na yin numọtolanmẹ towe to nukọn mẹ? Be a na jlo nado hẹn yinkọ towe gble na a jlo na hẹn homẹhun klasigbẹ́ towe lẹ wẹ ya?—Eksọdusi 23:2.

  3. BASI DIDE

    Biblu dọmọ: “Nuyọnẹntọ nọ họ́ ede.”—Howhinwhẹn lẹ 14:16.

    E yá wẹo kavi e dẹn wẹo, mí dona basi nudide de bosọ doakọnna kọdetọn etọn lẹ. Biblu donù mẹdelẹ go taidi Josẹfu, Jobu, po Jesu po he basi nudide dagbe lọ. E sọ dọho gando Kaini, Esau po Juda po go, yèdọ mẹhe ma basi nudide dagbe lẹ. Etẹwẹ hiẹ na wà?

Biblu dọmọ: “Nọ yinuwa po nugbonọ-yinyin po.” (Salmu lẹ 37:3) Eyin a ko lẹnnupọndo kọdetọn lọ lẹ ji bo basi nudide towe, e na bọawuna we nado tẹdo gbemima towe go—e nasọ hẹn ale wá.

A hanú blo—e ma yin dandan dọ a ni lẹhogle na hagbẹ towe lẹ. LALA didọ po nujikudo po poun sọgan ko pé. Kavi nado hẹn teninọ nujikudo tọn towe họnwun, a sọgan dọ:

  • “Mì jo mi do!”

  • “Yẹn ma nọ wà onú mọnkọtọn!”

  • “Mì ka yọ́n mi ganji sin!”

Aṣli lọ wẹ nado yawu yinuwa po nujikudo po. Eyin a wàmọ, e na paṣa we dọ hagbẹ towe lẹ na joagọyigodo!

 PIPEHẸ MẸṢANKO

Eyin a joawuna kọgbidinamẹ hagbẹ tọn, a na lẹzun ṣiṣavi he yé to anadena de

Etẹwẹ lo eyin hagbẹ towe lẹ nọ ṣàn we kò? Eyin yé nọ dọ, “Etẹwẹ yin nuhahun towe—budi a te ya?” Yọnẹn poun dọ kọgbidinamẹ hagbẹ tọn wẹ. Nawẹ a sọgan yinuwa gbọn? A sọgan ze afọdide awe delẹ.

  • A sọgan yigbe. (“Mọwẹ, budi wẹ n’te!” Enẹgodo, dọ whẹwhinwhẹ́n towe to kleun mẹ.)

  • A sọgan gọkọna kọgbidinamẹ lọ do mẹlọ ji. Dọ nuhewutu a do gbẹ́, bosọ hẹn hagbẹ towe lẹ lẹnnupọn. (“A ka yọ́n hugan mẹhe nọ nù siga lẹ ma!”)

Eyin hagbẹ towe lẹ gbẹ́ to ohó dín we janwẹ, tọ́n sọn finẹ! Flindọ dile a nọ finẹ dẹn sọ, mọ wẹ kọgbidinamẹ lọ na sinyẹn deji do niyẹn. Ṣigba, eyin a tọ́n sọn finẹ, a na dohia dọ emi ma jlo dọ mẹde ni diọ nuhe emi yin.

Nado dọ hójọhó, a ma sọgan nọma pehẹ kọgbidinamẹ hagbẹ tọn. Ṣigba a sọgan de nuhe a jlo na wà, tẹdo nudide towe go bosọ yinuwa sọgbe hẹ ẹ. Na nugbo tọn, nudide towe wẹ!—Jọṣua 24:15.