Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Gblọndo Na Kanbiọ 10 He Jọja lẹ Nọ Kanse

 KANBIỌ 4

Nawẹ N’Sọgan Vọ́ Nuṣiwa Ṣie lẹ Jlado Gbọn?

Nawẹ N’Sọgan Vọ́ Nuṣiwa Ṣie lẹ Jlado Gbọn?

NUHEWUTU E DO YIN NUJỌNU

Eyin a nọ yigbe nuṣiwa towe lẹ tọn, ehe na zọ́n bọ yè na nọ pọ́n we hlan di mẹhe whèwhín podọ mẹhe go yè sọgan dejido.

ETẸWẸ A NA WÀ?

Pọ́n nujijọ ehe: Tim to aihunda hẹ họntọn etọn lẹ bo yìn bọlu de he gbà fleṣe kọmẹnu de tọn hányán.

Eyin hiẹ wẹ yin Tim, etẹwẹ a na wà?

YIAGBỌJI BO LẸNNUPỌN!

A SỌGAN WÀ ONÚ ATỌ̀N:

  1. Họ̀n.

  2. Dowhẹ mẹdevo.

  3. Dọ nuhe jọ lọ na kọmẹnu lọ bo dọna ẹn dọ emi na vọ́ ẹ jlado.

E sọgan bọawu nado de Afọdide A lọ. Amọ́ e na yọ́n nado nọ yigbe nuṣiwa towe tọn—vlavo eyin a gbà fleṣe de hányán kavi a hẹn nudevo de gble.

 ONÚ ATỌ̀N HE WUTU A DONA NỌ YIGBE NUṢIWA TOWE LẸ TỌN

  1. E sọgbe nado wàmọ.

    Biblu dọmọ: “Mí jlo nado nọ yinuwa po ahundopo po to nulẹpo mẹ.”Heblu lẹ 13:18.

  2. Gbẹtọ lẹ nọ saba jona mẹhe yigbe nuṣiwa yetọn lẹ tọn.

    Biblu dọmọ: “Mẹhe to nuṣinyọndo nuṣiwa etọn lẹ ma na tindo kọdetọn dagbe, ṣigba, mẹdepope he nọ yigbe yetọn bo nọ jo yé do wẹ lẹblanu na yin didohia.”Howhinwhẹn lẹ 28:13.

  3. Hú popolẹpo, e nọ hẹn homẹhun Jiwheyẹwhe.

    Biblu dọmọ: “Jehovah gbẹwanna mẹhe nọ yinuwa po oklọ po, ṣigba, nugbonọ lẹ wẹ nọ jihọntọn pẹkipẹki hẹ Ẹ.”Howhinwhẹn lẹ 3:32.

Karina he tindo owhe 20 bo to États-Unis tẹnpọn nado whlá tike akuẹ he yè gbò na ẹn tọn do baba etọn to whenue e họ̀nwezun zẹjlego po mọto po. Amọ́ e ma sọgan whlá ẹ kakadoi. Karina dọmọ: “Nudi owhe dopo godo, baba ṣie mọ tike lọ. N’biọ nuhahun sinsinyẹn mẹ!”

Etẹwẹ ehe plọn mí? Karina dọmọ: “Nuṣiwa lẹ whiwhla ma nọ jla nudepope do. E nọ wá gbà janwẹ!”

LEHE A SỌGAN PLỌNNU SỌN NUṢIWA TOWE LẸ MẸ DO

Biblu dọmọ: “Mímẹpo wẹ nọ ṣinuwa whlasusu.” (Jakọbu 3:2, nudọnamẹ odò tọn) Dile mí ko mọ do, e nọ biọ dọ mẹde ni whiwhẹ ede bo whèwhín nado yigbe nuṣiwa etọn lẹ tọn—podọ nado wàmọ to afọdopolọji.

Onú devo wẹ nado nọ plọnnu sọn nuṣiwa mítọn lẹ mẹ. Viyọnnu de he nọ yin Vera dọmọ: “N’nọ tẹnpọn nado plọnnu sọn nuṣiwa dopodopo mẹ, bo nọ dike e ni gọalọna mi nado lẹzun mẹhe whèwhín dogọ nado didẹ ninọmẹ mọnkọtọn to aliho devo mẹ to whedevonu.” Gbọ mí ni pọ́n lehe a sọgan wàmọ do.

A whé kẹkẹ baba towe tọn bo hẹn ẹn gble. Etẹwẹ a na wà?

  • Nabọẹ bo lẹndọ baba towe ma na doayi e go.

  • Dọ nuhe jọ lọ na baba towe.

  • Dọ nuhe jọ lọ na baba towe, amọ́ bo dowhẹ mẹdevo.

A ma dín na mẹtẹnpọn de na a ma plọnnu wutu. Etẹwẹ a na wà?

  • Dọ dọ mẹtẹnpọn lọ wẹ sinyẹn.

  • Yigbe dọ a ma plọnnu wẹ zọ́n bọ a ma dín.

  • Dọ dọ mẹplọntọ towe tindo nude sọta we wẹ zọ́n.

Ayiha zizedo nuṣiwa hoho lẹ ji taidi mẹpọ́nnu he nọ pọ́n godo de pinpọn mapote to whenue a to mọto kùn

 Todin, ze dewe do (1) otẹn baba towe tọn mẹ podọ (2) otẹn mẹplọntọ towe tọn mẹ. Etẹwẹ baba towe po mẹplọntọ towe po na lẹn do gowe eyin a yawu yigbe nuṣiwa towe lẹ tọn? Etẹwẹ yé na lẹn do gowe eyin a ṣinyọnnudo nuṣiwa towe lẹ?

Todin, lẹnnupọndo nuhe a ṣiwà to owhe he wayi mẹ de ji bo na gblọndo kanbiọ he bọdego ehelẹ tọn.

Etẹwẹ yin nuṣiwa lọ? Nawẹ a didẹ ẹ gbọn?

  • N’ṣinyọnnudo e.

  • N’dowhẹ mẹdevo.

  • N’yawu yigbe etọn.

Eyin a ma yigbe nuṣiwa lọ tọn, etẹwẹ wá yin numọtolanmẹ towe to godo mẹ?

  • Homẹ ṣie hùn—n’dù enẹ dọ̀n!

  • E vẹ́ na mi—n’dona ko dọ nugbo lọ.

Nawẹ a sọgan ko didẹ nuhahun lọ ganji gbọn?

Etẹwẹ a plọn sọn nuṣiwa towe mẹ?

ETẸWẸ A LẸN?

Naegbọn mẹdelẹ nọ whleawu nado yigbe nuṣiwa yetọn lẹ tọn?

Etẹwẹ gbẹtọ lẹ na lẹn gando gowe eyin a nọ saba tẹnpọn nado ṣinyọnnudo nuṣiwa towe lẹ, ṣigba etẹwẹ yé na lẹn eyin a nọ yigbe nuṣiwa towe lẹ tọn?Luku 16:10.