Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Gblọndo Na Kanbiọ 10 He Jọja lẹ Nọ Kanse

 KANBIỌ 9

Be N’Dona Yise Dọ Nulẹ Tin Yededenu Wẹ Ya?

Be N’Dona Yise Dọ Nulẹ Tin Yededenu Wẹ Ya?

NUHEWUTU E DO YIN NUJỌNU

Eyin nulẹ tin yededenu nugbo, be ogbẹ̀ ma tindo lẹndai nujọnu tọn de. Eyin nulẹ yin didá nugbo, be mí sọgan mọ gblọndo pekọhẹnwanamẹ tọn lẹ gando ogbẹ̀ po sọgodo po go.

ETẸWẸ A NA WÀ?

Pọ́n nujijọ ehe: Alex biọ bẹwlu mẹ. Jiwheyẹwhe po nudida po mẹ wẹ e yise te. Ṣigba to egbehe, mẹplọntọ etọn dopo dọ po nujikudo po dọ nulẹ tin yededenu wẹ, podọ dọ dodinnanu lẹnunnuyọnẹn tọn he họnwun ji wẹ enẹ sinai do. Alex ma jlo na do ede hia di gugutọ. E dọna ede dọ, ‘Eyin lẹnunnuyọnẹntọ lẹ wẹ dọ dọ nulẹ tin yededenu, mẹnu wẹ yẹn yin bo na jẹagọdo?’

Eyin hiẹ wẹ yin Alex, be a na yise dọ nulẹ tin yededenu na kandai lẹ dọ mọ poun wutu ya?

YIAGBỌJI BO LẸNNUPỌN!

Mẹhe jlo na dọho gando nuyise nulẹ tin yededenu po nudida po tọn go lẹpo nọ saba dọ nuhe yé yise to whenuena yé ma yọ́n nuhewutu yé do yí i sè.

  • Mẹdelẹ yise to nudida mẹ poun na nuhe yè plọn yé to ṣọṣi niyẹn.

  • Mẹdevo lẹ yise to nulẹ tin yededenu mẹ poun na nuhe yè plọn yé to wehọmẹ niyẹn.

 KANBIỌ ṢIDOPO DELẸ

Biblu dọmọ: “Ohọ̀ lẹpo wẹ nọ yin gbigbá gbọn mẹde dali, ṣigba mẹhe basi nulẹpo wẹ Jiwheyẹwhe.” (Heblu lẹ 3:4) Be e sọgbe dọ yè ni yí enẹ sè ya?

Nado dọ dọ Mẹdatọ de ma tin yin nulunu taidi nado dọ dọ mẹde ma gbá ohọ̀ ehe

NUHE MẸDELẸ NỌ DỌ: Nudidọ daho ajiji mẹ tọn de wẹ hẹn wẹkẹ lọ wá aimẹ.

1. Etẹ kavi mẹnu wẹ hẹn nudidọ daho ehe wá?

2. Linlẹn tẹwẹ sọgbe hugan—dọ nulẹ wá aimẹ na yede wẹ kavi mẹde wẹ dá yé?

NUHE MẸDELẸ NỌ DỌ: Kanlin mẹ wẹ gbẹtọvi lẹ jọ sọn.

3. Eyin gbẹtọ jọ sọn kanlin mẹ—di apajlẹ sọn ozín lẹ mẹ—naegbọn gbẹtọvi lẹ do tindo nugopipe hugan ozín enẹlẹ sọmọ?

4. Naegbọn e do nọ vẹawu sọmọ nado mọnukunnujẹ ogbẹ̀ nutogbẹ̀ pẹvi pete lẹ tọn mẹ?

NUHE MẸDELẸ NỌ DỌ: Kunnudenu lẹ dohia dọ nulẹ tin yededenu.

5. Be mẹhe nọ dọ mọ lẹ ko gbadopọnna kunnudenu lọ lẹ na yede ya?

6. Omẹ nẹmu wẹ ko yise dọ nulẹ tin yededenu na yè ko dọna yé poun dọ nuhe mẹ gbẹtọ nuyọnẹntọ lẹpo yise te niyẹn wutu?

“Eyin a to zọnlinzin gbọn zungbo de mẹ bo mọ ohọ̀ whanpẹnọ de, be a na dọ dọ: ‘Ehe jiawu mọọ! Atin lẹ wẹ na ko flẹ na yede kaka bo do ohọ̀ lọ ai.’ Enẹ ma sọgan jọ! E ma na yọnbasi. Enẹwutu, naegbọn mí na yise dọ nuhe to wẹkẹ lọ mẹ lẹpo wá aimẹ na yede wẹ?”—Julia.

“Mí ni dọ dọ mẹde dọna we dọ maṣinu wezinzin tọn de wú bọ wesin gbàpe gbọn adó po ozà lẹ po go bọ wezẹhomẹ daho de sọ wá aimẹ poun. Be a na yise ya?”—Gwen.

NAEGBỌN A DONA YISE TO JIWHEYẸWHE MẸ?

 Biblu na tuli we nado nọ yí “huhlọn nulẹnpọn tọn” towe zan. (Lomunu lẹ 12:1) Enẹ dohia dọ yise towe to Jiwheyẹwhe mẹ ma dona sinai do nuhe bọdego lẹ ji poun

  • NUMỌTOLANMẸ (N’nọ lẹn poun dọ huhlọn he hú jọwamọ tọn de dona tin)

  • NUYIWADOMẸJI MẸDEVO LẸ TỌN (N’tin to lẹdo sinsẹ̀n tọn de mẹ)

  • KỌGBIDINAMẸ (Mẹjitọ ṣie lẹ wẹ plọn mi dọ Jiwheyẹwhe tin—n’ma sọgan jẹagọdo)

Kakatimọ, a dona tindo whẹwhinwhẹ́n dolido lẹ na nuyise towe.

“Eyin n’to todoaina mẹplọntọ ṣie to klasi bọ e to zẹẹmẹ basi do lehe nulẹ nọ yì do to agbasa mítọn mẹ ji, n’nọ mọdọ ayihaawe matin dọ Jiwheyẹwhe tin. Awutugonu mítọn dopodopo wẹ do azọ́n etọn, podọ mí ma tlẹ nọ saba doayi azọ́nwiwa yetọn go. Nado dọ hójọhó, agbasa gbẹtọ tọn jiawu taun!”—Teresa.

“Eyin n’mọ agahun, bato, kavi mọto de, n’nọ kanse dee dọ, ‘Mẹnu wẹ basi i?’ Di apajlẹ, e na biọ nuyọnẹn taun nado basi mọto, na nuyizan flinflin voovo lẹ wẹ dona wazọ́n ganji na mọto lọ nido wazọ́n. Enẹwutu, eyin mọto dona yin bibasi gbọn mẹde dali, e dohia dọ mẹde wẹ basi gbẹtọ lọsu.”—Richard.

“Dile n’to lẹnunnuyọnẹn plọn sọ, mọ wẹ n’nọ mọdọ kunnudenu lẹ ma tin dọ nulẹ tin yededenu do niyẹn. . . . Na yẹn tọn, e nọ bọawu nado ‘yise’ dọ Mẹdatọ de tin hugan nado yise dọ nulẹ tin yededenu.”—Anthony.

LẸNNUPỌN

Mahopọnna owhe susu he lẹnunnuyọnẹntọ lẹ ko yí do basi dodinnanu, yé ma ko kọngbedopọ do zẹẹmẹ tangan de ji gando nuplọnmẹ nulẹ tin yededenu tọn go. Eyin lẹnunnuyọnẹntọ lẹ ma sọgan kọngbedopọ do nuplọnmẹ nulẹ tin yededenu tọn ji—bọ yewlẹ wẹ ka yin nuyọnẹntọ hugan—be e ma jẹ dọ a ni tindo ayihaawe gando nuplọnmẹ ehe go ya?