“Mì diọnukunsọ Lẹgba, ewọ nasọ họ̀n sọn mì dè.”​—JAKỌBU 4:7.

1, 2. Etẹwẹ mí dona yọnẹn gando Satani po aovi lẹ po go?

GBẸNINỌ to aihọn yọyọ Jehovah tọn mẹ na vivi taun. To whenẹnu, mí na wá zan gbẹzan he Jiwheyẹwhe ko lẹndai sọn dowhenu. Ṣigba todin whẹ́, mí gbẹ́ to gbẹnọ to aihọn de mẹ he tin to aṣẹpipa Satani po aovi etọn lẹ po tọn glọ. (2 Kọlintinu lẹ 4:4) Dile etlẹ yindọ mí ma sọgan mọ yé, mí yọnẹn dọ yé tin bosọ dohuhlọn taun.

2 To weta ehe mẹ, mí na gbadopọnna lehe mí sọgan gbọṣi adà Jehovah tọn mẹ bo basi hihọ́na míde sọn Satani si do. Jehovah dopà dọ emi na gọalọna mí. Amọ́, mí dona yọ́n ayiha gigẹdẹ he Satani po aovi lẹ po nọ yizan nado doyẹklọ mí bo yangbé mítọn lẹ.

“DI KINNIKINNI DE HE TO LÌLÌ”

3. Etẹwẹ Lẹgba jlo nado wà na mí?

3 Satani sọalọakọ́n dọ whẹwhinwhẹ́n ṣejannabi tọn lẹ wutu wẹ gbẹtọvi lẹ do to Jehovah sẹ́n podọ dọ mí ma nasọ sẹ̀n Ẹn ba eyin nulẹ wá vẹawuna mí. (Hia Jobu 2:4, 5.) Whenue mẹde jlo na plọnnu gando Jehovah go, Satani po aovi lẹ po nọ doayi e go bo nọ tẹnpọn nado hẹnalọdotena ẹn. Homẹ nọ gble yé eyin mẹde klan ede do wiwe na Jehovah bo yí baptẹm. Biblu yí Lẹgba jlẹdo “kinnikinni de he to lìlì bo to mẹhe e na tlẹndu dín” go.  (1 Pita 5:8) Ojlo Satani tọn wẹ nado hẹn haṣinṣan mítọn hẹ Jehovah gble.​—Salmu lẹ 7:1, 2; 2 Timoti 3:12.

Homẹ nọ gble Satani eyin mí klan míde do wiwe na Jehovah

4, 5. (a) Etẹwẹ Satani ma gán wà? (b) Etẹwẹ e zẹẹmẹdo nado “diọnukunsọ Lẹgba”?

4 Ṣigba, mí ma dona dibuna Satani po aovi etọn lẹ po. Jehovah ko de dogbó na nuhe yé gán wà na mí. Jehovah dopà dọ Klistiani nugbo susu, yèdọ “gbẹtọ susugege de” na lùn “nukunbibia daho lọ” tọ́n. (Osọhia 7:9, 14) Nude ma tin he Lẹgba gán wà nado hẹnalọdotena enẹ, na Jehovah to hihọ́-basina omẹ Etọn lẹ.

 5 Eyin mí gbọṣi adà Jehovah tọn mẹ, Satani ma sọgan hẹn haṣinṣan he mí tindo hẹ Ẹ gble. Ohó Jiwheyẹwhe tọn na mí jide dọmọ: “Jehovah tin hẹ mì dile e na dẹnsọ bọ mìwlẹ na gbọṣi e dè.” (2 Otànnugbo lẹ 15:2; hia 1 Kọlintinu lẹ 10:13.) Sunnu po yọnnu nugbonọ hohowhenu tọn susu lẹ po taidi Abẹli, Enọku, Noa, Sala po Mose po wẹ diọnukunsọ Lẹgba bo nọ adà Jehovah tọn mẹ. (Heblu lẹ 11:4-40) Mílọsu gán wà nudopolọ. Ohó Jiwheyẹwhe tọn dopagbe dọmọ: “Mì diọnukunsọ Lẹgba, ewọ nasọ họ̀n sọn mì dè.”​—Jakọbu 4:7.

“AHIDIDI HE MÍ TINDO”

6. Nawẹ Satani nọ yangbé mítọn gbọn?

6 Dile etlẹ yindọ Satani yọnẹn dọ Jehovah ko de dogbó na nuhe e sọgan wà na mí, e na gbẹ́ tẹnpọn janwẹ nado hẹn haṣinṣan he mí tindo hẹ Jiwheyẹwhe gble. To egbehe, Lẹgba nọ yangbé mítọn to aliho voovo mẹ, podọ ayiha gigẹdẹ he e ko yizan na owhe fọtọ́n susu lẹ wẹ e gbẹ́ to yiyizan. Etẹwẹ yin delẹ to ayiha gigẹdẹ enẹlẹ mẹ?

7. Naegbọn Satani do nọ yangbé omẹ Jehovah tọn lẹ tọn?

7 Apọsteli Johanu wlan dọmọ: “Aihọn lọ pete tin to huhlọn mẹylankan lọ tọn glọ.” (1 Johanu 5:19) Satani ko hẹn aihọn ylankan ehe biọ anademẹ etọn glọ podọ homẹ etọn na hùn nado deanana omẹ Jehovah tọn lẹ lọsu. (Mika 4:1; Johanu 15:19; Osọhia 12:12, 17) Lẹgba yọnẹn dọ azán kaka de ma pò to gbàn ji na emi, enẹwutu e to kọgbidina dopodopo mítọn sinsinyẹn ma nado yin nugbonọ na Jiwheyẹwhe. To whedelẹnu, Lẹgba nọ yangbé mítọn tlọlọ, amọ́ to ojlẹ devo lẹ mẹ, e nọ yí yẹdoklọmẹ zan.

8. Etẹwẹ Klistiani dopodopo dona hẹn do ayiha mẹ?

 8 Efesunu lẹ 6:12 dọna mí dọmọ: “Ahididi he mí tindo [yin] sọta huhlọn gbigbọ ylankan olọn tọn lẹ.” Klistiani dopodopo wẹ dona hoavùn sọta Lẹgba po aovi lẹ po. Mí dona hẹn do ayiha mẹ dọ mẹhe ko klan yede do wiwe na Jehovah lẹpo wẹ to avùn ehe hò. To wekanhlanmẹ apọsteli Paulu tọn hlan Klistiani Efesu tọn lẹ mẹ, e dotuhomẹna yé whla atọ̀n “nado nọte gligli.”​—Efesunu lẹ 6:11, 13, 14.

9. Etẹwẹ Satani po aovi lẹ po nọ tẹnpọn nado wà na mí?

9 Aliho voovo mẹ wẹ Satani po aovi lẹ po nọ tẹnpọn nado klọ mí te. Nugbo lọ dọ mí duto mẹtẹnpọn Satani tọn de ji ma dohia dọ mí ma sọgan jai jẹ devo mẹ. Lẹgba nọ tẹnpọn nado yọ́n awugbopo mítọn lẹ nado sọgan de mọ̀donú he e na yí do wle mí. Amọ́, mí gàn nọma jai jẹ omọ̀ Lẹgba tọn lẹ mẹ, na Biblu ko plọnnu mí gando yé go. (2 Kọlintinu lẹ 2:11; pọ́n Nudọnamẹ Dogọ 31.) Dopo to yé mẹ wẹ aovinuwiwa.

NỌLA NA AOVI LẸ

10. (a) Etẹwẹ yin aovinuwiwa? (b) Nukun tẹwẹ Jehovah nọ yí do pọ́n aovinuwiwa?

10 Aovinuwiwa bẹ nujijlẹ depope he nọ hẹnmẹ biọ hodọdopọ mẹ hẹ aovi lẹ hẹn, yèdọ nudelẹ taidi dọṣẹdidọ, azé, fákinkan kavi tintẹnpọn nado dọho hẹ oṣiọ lẹ. Biblu dọna mí dọ aovinuwiwa yin “osùnú de,” podọ mí ma sọgan nọ doalọ to aovinuwiwa po sinsẹ̀n-bibasi Jehovah tọn po mẹ to ojlẹ dopolọ mẹ. (Deutelonomi 18:10-12; Osọhia 21:8) Klistiani lẹ dona dapana wunmẹ aovinuwiwa tọn lẹpo.​—Lomunu lẹ 12:9.

11. Fitẹ wẹ tlintlindo dindin gando nujijlẹ go gán plan mí jẹ?

11 Satani yọnẹn dọ eyin mí nọ tindo ojlo to nujijlẹ lẹ  mẹ, e na bọawuna ẹn nado dọ̀n mí biọ aovinuwiwa mẹ. Aovinuwiwa wunmẹ lẹpo wẹ gán hẹn haṣinṣan mítọn hẹ Jehovah gble.

SATANI NỌ TẸNPỌN NADO DOYẸKLỌ MÍ

12. Nawẹ Satani nọ tẹnpọn nado hẹn nulẹnpọn mítọn flu gbọn?

12 Satani nọ tẹnpọn nado hẹn gbẹtọ lẹ biọ bẹwlu mẹ. E nọ fọ́n ayihaawe dote to ohò mẹlẹ tọn mẹ vudevude kakajẹ whenue yé nọ wá “ylọ dagbe dọ oylan podọ oylan dọ dagbe.” (Isaia 5:20) Lẹgba nọ na tuli pọndohlan lọ dọ ayinamẹ Biblu tọn lẹ ma yọ́n-na-yizan podọ dọ mí na do ayajẹ hugan eyin mí gbẹkọ nujinọtedo Jiwheyẹwhe tọn lẹ go.

13. Nawẹ Satani ko tẹnpọn nado fọ́n ayihaawe dote gbọn?

13 Dopo to ayiha gigẹdẹ Satani tọn he nọ wazọ́n hugan lẹ mẹ wẹ ayihaawe finfọndote. E ko to yíyí i zan din e ma pọ́. To jipa Edẹni tọn mẹ, e tẹnpọn nado fọ́n ayihaawe dote to whenue e kanse Evi dọ: “Be nugbo wẹ dọ Jiwheyẹwhe ko dọ dọ mì ma dona dù sọn depope to atin jipa lọ tọn lẹ mẹ ya?” (Jenẹsisi 3:1) To nukọn mẹ to ojlẹ Jobu tọn mẹ, Satani kanse Jehovah to angẹli lẹ nukọn dọ: “Be tata wẹ Jobu do dibusi Jiwheyẹwhe ya?” (Jobu 1:9) To baptẹm Jesu tọn godo, Satani whlé e pọ́n gbọn didọ dali dọmọ: “Eyin hiẹ yin visunnu Jiwheyẹwhe tọn de, dọna zannu ehelẹ dọ yé ni lẹzun akla.”​—Matiu 4:3.

14. Nawẹ Satani sọgan hẹn mẹlẹ tindo ayihaawe gando owù aovinuwiwa tọn lẹ go gbọn?

14 To egbehe, Lẹgba gbẹ́ zindonukọn nado nọ fọ́n ayihaawe dote. E nọ hẹn aovinuwiwa wunmẹ delẹ sọawuhia di nutata de poun, na mẹlẹ nido nọ kanse yede eyin nude ylan to aovinuwiwa mẹ nugbonugbo.  Klistiani delẹ tlẹ ko yí nukunpẹvi do pọ́n owù he e bẹhẹn lẹ. (2 Kọlintinu lẹ 11:3) Enẹwutu, etẹwẹ mí gán wà nado basi hihọ́na míde? Nawẹ mí gán hẹn ẹn diun dọ ayiha gigẹdẹ Satani tọn lẹ ma to nuyiwa do mí ji gbọn? Gbọ mí ni gbadopọnna adà awe delẹ he mẹ mí sọgan yin yẹdoklọ te: enẹ wẹ ayidedai po nukunpedomẹgo dotowhé tọn po.

SATANI NỌ YÍ OJLO JỌWAMỌ TỌN MÍTỌN LẸ DO KLỌ MÍ

15. Nawẹ ayidedai mítọn lẹ gán hẹn mí nado jẹ kọndopọ tindo hẹ aovi lẹ ji gbọn?

15 To egbehe, sinima, video, nupinpọn televiziọn ji tọn, aihundida ọdinatẹẹ ji tọn po nọtẹn Intẹnẹt tọn susu po wẹ nọ bẹ aovinuwiwa, majiki po nujijlẹ voovo lẹ po hẹn. Mẹsusu wẹ nọ mọ onú enẹlẹ taidi ayidedai he ma do owù lẹ bo ma nọ yọnẹn dọ owù daho wẹ dotẹnmẹ nina aovi lẹ nado biọ gbẹzan yetọn mẹ nọ hẹnwa. Mẹde gán sọ jẹ mahẹ tindo ji to aovinuwiwa mẹ gbọn nudelẹ gblamẹ taidi ginganjẹ odù he jọ mẹdopodopo (horoscope) go, alọpahomẹ pinpọn, numọ namẹ po ohia lẹ mimọ to odlọ mẹ po. Lẹgba nọ ze owù lọ lẹ whlá bo nọ tẹnpọn nado hẹn onú enẹlẹ sọawuhia di nujiawu, awuvivinu kavi ayidedai de poun. Mẹde tlẹ sọgan lẹndọ nude ma ylan to e mẹ nado pọ́n nuhe bẹ aovinuwiwa kavi nujijlẹ hẹn de, eyin ewọ lọsu ma ko gbẹ́ doalọ to aovinuwiwa mẹ tlọlọ. Naegbọn nulẹnpọn mọnkọ do yin owùnu?​—1 Kọlintinu lẹ 10:12.

16. Naegbọn mí dona gbẹ́ ayidedai he bẹ nujijlẹ hẹn lẹ dai?

16 Satani po aovi lẹ po ma gán mọnú jẹ ahun mítọn mẹ. Amọ́, nudide he mí nọ basi na míde podọ na whẹndo mítọn lẹ, kakajẹ ayidedai he mí nọ de lẹ ji, gán  zọ́n bọ yé na yọ́n ojlo po aliho nulẹnpọn tọn mítọn lẹ po. Eyin mí nọ de sinima, nuhiho kavi owe he dọhodo afinyọnnuwiwa, bojijlẹ, nuyiwadomẹji aovi lẹ tọn, azétọ lẹ, nubode lẹ kavi onú mọnkọtọn devo lẹ ji, Satani po aovi lẹ po na yọnẹn dọ mí to tlintlindo dín gando yé go. To whenẹnu, yé gán tẹnpọn nado hẹn mí tlọ biọ aovinuwiwa mẹ petepete.​—Hia Galatianu lẹ 6:7.

17. Nawẹ Satani sọgan yí ojlo mítọn nado tindo agbasalilo dagbe zan gbọn?

17 Satani gán sọ yí ojlo mítọn nado tindo agbasalilo dagbe zan. To egbehe, mẹsusu wẹ ma tindo agbasalilo dagbe. Mẹde sọgan ko tẹ́n nukunpedomẹgo voovo  lẹ pọ́n ganṣo bo ma mọ pọngbọ. (Malku 5:25, 26) E tlẹ gán jẹflumẹ bo wleawufo nado tẹ́n nudepope pọ́n. Ṣigba taidi Klistiani, mí dona tin to aṣeji ma nado de nukunpedomẹgo depope he bẹ “nujijlẹ” hẹn.​—Isaia 1:13.

Nọ ganjẹ Jehovah go to whenue a to azọ̀njẹ

18. Aliho nukunpedomẹgo tọn tẹlẹ wẹ Klistiani de dona gbẹ́ dai?

18 To Islaeli hohowhenu tọn mẹ, mẹdelẹ nọ yí “nujijlẹ” lẹ zan. Jehovah dọna yé dọmọ: “Eyin mì kẹ̀ alọpahomẹ mìtọn lẹ, n’nọ whlá nukunmẹ ṣie do mì. Dile etlẹ yindọ mì nọ hodẹ̀ susu, n’ma nọ dotoai.” (Isaia 1:15) Pọ́n bo​—Jehovah ma tlẹ nọ dotoaina odẹ̀ yetọn lẹ! Mí ma jlo na wà nudepope he gán hẹn haṣinṣan he mí tindo hẹ Jehovah gble bo glọnalina ẹn nado gọalọna mí, titengbe to whenue mí to azọ̀njẹ. (Salmu lẹ 41:3) Enẹwutu, mí dona dindona eyin nukunpedomẹgo he ji mí to nulẹnpọn do lọ tindo kanṣiṣa depope hẹ aovinuwiwa kavi huhlọn he hugan jọwamọ tọn lẹ. (Matiu 6:13) Eyin e yọnbasi dọ ni yinmọ, be mí dona gbẹ́ ẹ dai!​—Pọ́n Nudọnamẹ Dogọ 32.

OTÀN HE GANDO AOVI LẸ GO LẸ

19. Nawẹ Lẹgba nọ dobuna mẹsusu gbọn?

19 Mẹdelẹ nọ lẹndọ Lẹgba po aovi lẹ po ma yin omẹ nujọnu tọn lẹ, amọ́ mẹdevo lẹ yọnẹn dọ yé tin, na numimọ mẹdetiti tọn he yé ko tindo lẹ wutu. Mẹsusu nọ to budina gbigbọ ylankan lẹ bo nọ lẹzun afanumẹ na aṣa wunmẹ delẹ. Mẹdevo lẹ nọ pìntàn gando nuylankan he yé nọ dọ dọ aovi lẹ nọ wà na gbẹtọvi lẹ go bo nọ gbọnmọ dali dobu homẹ na mẹlẹ. Otàn ehelẹ nọ saba fọnjlodotena mẹlẹ bọ yé nọ to jejeji nado vọ́ yé dọna mẹdevo lẹ. Enẹ nọ zọ́n bọ mẹsusu nọ dibuna Lẹgba.

20. Nawẹ mí sọgan hẹn lalo Satani tọn lẹ gbayipe gbọn?

20 Lẹnnupọndo ehe ji​—Satani jlo dọ mẹlẹ ni nọ dibuna  ẹn. (2 Tẹsalonikanu lẹ 2:9, 10) Lalonọ de wẹ ewọ bọ e sọ yọ́n lehe e sọgan yinuwado ahun mẹhe nọ tindo ojlo to aovinuwiwa mẹ lẹ tọn ji bo hẹn yé nado yí nuhe ma yin nugbo na taun tọn lẹ sè do. Omẹ enẹlẹ gán nọ pìntàn nuhe yé lẹndọ emi mọ bo sè lẹ tọn. Lehe mẹlẹ to otàn ehelẹ vọ́ pìn do, mọ wẹ yé nọ to osin do e ji do niyẹn. Mí ma jlo na gọalọna Satani nado dobu homẹ na mẹlẹ gbọn otàn mọnkọtọn lẹ hinhẹn gbayipe dali.​—Johanu 8:44; 2 Timoti 2:16.

21. Kakati nado nọ pìntàn gando aovi lẹ go, etẹlẹ ji wẹ mí gán nọ dọhodo?

21 Eyin dopo to omẹ Jehovah tọn lẹ mẹ ko tindo kanṣiṣa hẹ aovi lẹ pọ́n, e ma dona nọ to otàn enẹlẹ pìn na mẹdevo lẹ taidi ayidedai de poun. Omẹ Jehovah tọn lẹ ma dona dibuna nudepope he Lẹgba po aovi etọn lẹ po gán wà. Kakatimọ, mí nọ ze ayiha do Jesu po huhlọn he Jehovah ko na ẹn po ji. (Heblu lẹ 12:2) Jesu ma pìntàn na devi etọn lẹ gando aovi lẹ go nado deayidai pọ́n gbede. Owẹ̀n Ahọluduta lọ tọn po “nujiawu Jiwheyẹwhe tọn lẹ” po ji wẹ e ze ayiha do.​—Owalọ lẹ 2:11; Luku 8:1; Lomunu lẹ 1:11, 12.

22. Etẹwẹ a magbe nado wà?

22 Mí ni ma wọn gbede blo dọ yanwle Satani tọn wẹ nado hẹn haṣinṣan mítọn hẹ Jehovah gble. Nulẹpo wẹ e na jlo na tẹnpọn nado jẹ yanwle enẹ kọ̀n. Amọ́, mí yọ́n ayiha gigẹdẹ Lẹgba tọn lẹ podọ gbemima mítọn wẹ nado nọavùnte sọta wunmẹ aovinuwiwa tọn lẹpo. Mí ma na “hùn dotẹnmẹ dote na Lẹgba” nado dekanpona gbemima mítọn. (Hia Efesunu lẹ 4:27.) Mọwẹ, eyin mí diọnukunsọ Lẹgba, mí na yin hihọ́-basina sọn omọ̀ etọn lẹpo mẹ bo na tin to hihọ́ Jehovah tọn glọ.​—Efesunu lẹ 6:11.