Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Etẹwẹ Biblu Sọgan Plọn Mí?

 WETA 3

Etẹwẹ Yin Lẹndai Jiwheyẹwhe Tọn Na Gbẹtọvi Lẹ?

Etẹwẹ Yin Lẹndai Jiwheyẹwhe Tọn Na Gbẹtọvi Lẹ?

1. Etẹwẹ yin lẹndai Jiwheyẹwhe tọn na gbẹtọvi lẹ?

LẸNDAI dagbedagbe de wẹ Jiwheyẹwhe tindo na gbẹtọvi lẹ. E dá sunnu po yọnnu tintan lọ po, yèdọ Adam po Evi po, bo ze yé do jipa whanpẹnọ de mẹ. Lẹndai etọn wẹ yindọ yé ni ji ovi lẹ nado hẹn aigba lọ blebu zun paladisi de bosọ penukundo kanlin lẹ go.—Jenẹsisi 1:28; 2:8, 9, 15; pọ́n Nudọnamẹ Dogọ 6tọ.

2. (a) Nawẹ mí wagbọn do yọnẹn dọ Jiwheyẹwhe na hẹn lẹndai etọn di? (b) Etẹwẹ Biblu dọ gando gbẹninọ kakadoi go?

2 Be a lẹndọ mí na wá nọgbẹ̀ to paladisi mẹ gbèdopo ya? Jehovah dọna mí dọmọ: “Yẹn ko lẹn ẹn dai, yẹn nasọ wà ẹ domọ.” (Isaia 46:9-11; 55:11) Mọwẹ, e na hẹn lẹndai etọn di, podọ nude ma na glọnalina ẹn. Jehovah dọ dọ whẹwhinwhẹ́n de wutu wẹ emi do dá aigba. E “ma dá ẹ to ovọ́ mẹ.” (Isaia 45:18) E jlo dọ gbẹtọvi lẹ ni gọ́ aigba ji. Omẹ nankọ lẹ wẹ Jiwheyẹwhe jlo dọ yé ni nọgbẹ̀ to aigba ji, podọ nawẹ yé na nọ e ji dẹnsọ? Biblu dọmọ: “Dodonọ [kavi tonusetọ] lẹ wẹ na dugu aigba tọn, yé nasọ nọgbẹ̀ to e ji kakadoi.”—Salmu lẹ 37:29; Osọhia 21:3, 4.

3. To whenuena e yindọ gbẹtọ lẹ nọ jẹazọ̀n bo nọ kú, etẹwẹ a sọgan nọ kanse dewe?

3 Ṣigba to egbehe, gbẹtọ lẹ nọ jẹazọ̀n bo nọ kú. To fisusu, yé nọ hoavùn hẹ yede bo nọ hù ode awetọ. E họnwun dọ, e ma yin enẹ wẹ yin lẹndai Jiwheyẹwhe tọn. Eyin mọ wẹ, etẹwẹ zọ́n bọ onú enẹlẹ do  to jijọ? Biblu kẹdẹ wẹ gán na gblọndo kanbiọ enẹ tọn.

KẸNTỌ JIWHEYẸWHE TỌN DE

4, 5. (a) Mẹnu wẹ yí odàn de zan nado dọhona Evi to jipa Edẹni tọn mẹ? (b) Nawẹ gbẹtọ nugbodọtọ de sọgan lẹzun ajotọ gbọn?

4 Biblu dọna mí dọ Jiwheyẹwhe tindo kẹntọ de he “nọ yin yiylọdọ Lẹgba podọ Satani.” Satani yí odàn de zan nado dọhona Evi to jipa Edẹni tọn mẹ. (Osọhia 12:9; Jenẹsisi 3:1) E yinuwa taidi dọ odàn lọ wẹ to hodọ nkọ.—Pọ́n Nudọnamẹ Dogọ 7tọ.

5 Amọ́, be Jiwheyẹwhe lọsu wẹ dá Satani Lẹgba ya? Lala! Angẹli he ko tin to olọn mẹ to whenue Jiwheyẹwhe wleawu aigba tọn dai na Adam po Evi po de wẹ wá diọ bo lẹzun Lẹgba. (Jobu 38:4, 7) Nawẹ enẹ gán jọ gbọn? Eyọn, nawẹ gbẹtọ nugbodọtọ de nọ diọ bo nọ lẹzun ajotọ gbọn? Mẹlọ ma yin jiji di ajotọ. Ṣigba, nuhe ma yin etọn wẹ nọ wá jẹ nukunmẹ biọ na ẹn ji. Dile e to nulẹnpọndeji mapote, ojlo ylankan enẹ nọ sinyẹn dogọ. Bọ eyin dotẹnmẹ de wá hundote, e nọ jẹajo. Ewọ lọsu wẹ diọ ede zun ajotọ.—Hia Jakọbu 1:13-15; pọ́n Nudọnamẹ Dogọ 8tọ.

6. Nawẹ angẹli de wá lẹzun kẹntọ Jiwheyẹwhe tọn gbọn?

6 Nuhe jọ do angẹli enẹ go niyẹn. Whenue Jehovah dá Adam po Evi po, e dọna yé dọ yé ni ji ovi lẹ bo “gọ́ aigba ji.” (Jenẹsisi 1:27, 28) Angẹli enẹ sọgan ko lẹndọ, ‘Omẹ enẹ lẹpo ka sọgan sẹ̀n mi maa, kakati nido yin Jehovah!’ Lehe e zindonukọn nado to nulẹnpọndeji sù sọ, mọ wẹ nuhe yin Jehovah tọn jẹ nukunmẹ biọ na ẹn ji do niyẹn. Angẹli enẹ jlo dọ gbẹtọvi lẹ ni nọ sẹ̀n emi. Enẹwutu, e dolalo na Evi bo doyẹklọ ẹ. (Hia Jenẹsisi 3:1-5.) Gbọnmọ dali, e lẹzun Satani Lẹgba, yèdọ kẹntọ Jiwheyẹwhe tọn.

7. (a) Naegbọn Adam po Evi po do kú? (b) Naegbọn mí do nọ poyọnho bo nọ kú?

 7 Adam po Evi po vẹtolina Jiwheyẹwhe bo dù atin-sinsẹ́n lọ. (Jenẹsisi 2:17; 3:6) Yé waylando sọta Jehovah, podọ to godo mẹ yé kú dile Jehovah ko dọ dọ e na yin do. (Jenẹsisi 3:17-19) Ylandonọ wẹ ovi Adam po Evi po tọn lẹ lọsu, enẹwutu yelọsu nọ kú. (Hia Lomunu lẹ 5:12.) Nado mọnukunnujẹ nuhewutu ovi Adam po Evi po tọn lẹ do yin ylandonọ mẹ, lẹnnupọndo apajlẹ ehe ji. Mí ni dọ dọ a kán owọ́ do sìnnù-panu he wán de mẹ. Owọ́ lọ lọsu na wán dile sìnnù-panu lọ te do janwẹ. Whenue Adam vẹtolina Jiwheyẹwhe, e lẹzun ylandonọ. Na mí yin ovi Adam tọn lẹ wutu, mímẹpo wẹ yin ylandonọ kavi “wán” dile ewọ te do. Podọ na mímẹpo yin ylandonọ wutu, mí nọ poyọnho bo nọ kú.—Lomunu lẹ 3:23; pọ́n Nudọnamẹ Dogọ 9tọ.

8, 9. (a) Etẹwẹ Satani jlo dọ Adam po Evi po ni yise? (b) Etẹwutu Jehovah ma hù atẹṣitọ lọ lẹ to afọdopolọji?

8 Atẹṣiṣi de wẹ Satani fọndote sọta Jehovah to whenue e hẹn Adam po Evi po nado vẹtolina Jiwheyẹwhe. E jlo dọ Adam po Evi po ni yise dọ Jehovah yin lalonọ bosọ yin gandutọ ylankan de he ma to dagbe yetọn dín. Nuhe dọ Satani te wẹ yindọ gbẹtọvi lẹ ma tindo nuhudo dọ Jiwheyẹwhe ni nọ dọ nuhe yé dona wà na yé, podọ Adam po Evi po dona magbe dagbe po oylan po tọn na yede. Todin, etẹwẹ Jehovah na wà? E sọgan ko hù atẹṣitọ lọ lẹ bo doalọtena atẹṣiṣi lọ. Ṣigba, be enẹ na ko dohia dọ lalodo wẹ Satani te ya? Lala.

9 Enẹwutu, Jehovah ma hù atẹṣitọ lọ lẹ to afọdopolọji. Kakatimọ, e na dotẹnmẹ gbẹtọvi lẹ nado deanana yede na ojlẹ de. Gbọnmọ dali, e na họnwun dọ lalonọ wẹ Satani podọ Jehovah yọ́n nuhe na wà dagbe na  gbẹtọ hugan. Mí na wá plọn nususu dogọ gando enẹ go to Weta 11tọ mẹ. Ṣigba, etẹwẹ a lẹn gando nudide Adam po Evi po tọn go? Be owhẹ̀ yetọn whẹ́n nado yí Satani sè bo vẹtolina Jiwheyẹwhe ya? Jehovah wẹ na Adam po Evi po nuhe yé tindo lẹpo. E na yé ogbẹ̀ pipé, jipa whanpẹnọ de po azọ́n he nọ hẹn pekọ wá na yé de po. Amọ́, Satani  uwọ ma ko wà dagbe de na yé pọ́n. Eyin hiẹ wẹ ko tin to otẹn yetọn mẹ, etẹwẹ a na ko wà?

10. Nudide titengbe tẹwẹ dopodopo mítọn dona basi?

10 To egbehe, dopodopo mítọn pannukọn nudide mọnkọtọn de, podọ ogbẹ̀ mítọn sinai do nudide he mí na basi ji. Mí sọgan de nado setonuna Jehovah taidi Ogán mítọn bo gọalọ nado do Satani hia di lalonọ. Kavi mí sọgan de Satani taidi ogán mítọn. (Salmu lẹ 73:28; Hia Howhinwhẹn lẹ 27:11.) Mẹsusu ma nọ setonuna Jiwheyẹwhe to egbehe. Nado dọ hójọhó, e ma tlẹ yin ewọ wẹ ogán aihọn tọn. Eyin e ma ka yin ewọ, mẹnu wẹ lo?

MẸNU WẸ TO GANDU DO AIHỌN JI?

Eyin ahọluduta aihọn tọn lẹpo ma yin Satani tọn dai wẹ, be e sọgan ko ze yé donukọnna Jesu ya?

11, 12. (a) Etẹwẹ nuhe Satani zedonukọnna Jesu dohia? (b) Wefọ tẹlẹ wẹ dohia dọ Satani wẹ to gandu do aihọn lọ ji?

11 Jesu yọ́n mẹhe to gandu do aihọn ji na taun tọn. To gbèdopo, Satani “do ahọluduta aihọn tọn lẹpo po gigo yetọn po hia ẹ.” Enẹgodo, Satani dopà na Jesu dọmọ: “Onú ehe lẹpo wẹ yẹn na na we eyin hiẹ jẹklo bo basi sinsẹ̀n hlan mi whladopo.” (Matiu 4:8, 9; Luku 4:5, 6) Kanse dewe dọ, ‘Eyin ahọluduta enẹlẹ ma yin Satani tọn dai wẹ, be e sọgan ko ze yé donukọnna Jesu ya?’ Lala. Gandudu aihọn tọn lẹpo wẹ to alọ Satani tọn mẹ.

12 Amọ́, a sọgan kanse dọ: ‘Nawẹ Satani gán yin ogán aihọn tọn gbọn? Be e ma yin Jehovah Jiwheyẹwhe Ganhunupotọ lọ wẹ dá wẹkẹ lọ ya?’ (Osọhia 4:11) Mọwẹ, ewọ wẹ, ṣigba Jesu ylọ Satani tlọlọ dọ “ogán aihọn ehe tọn.” (Johanu 12:31; 14:30; 16:11) Apọsteli Paulu ylọ Satani Lẹgba dọ “yẹwhe titonu ehe tọn.” (2 Kọlintinu lẹ 4:3, 4) Podọ apọsteli Johanu wlan dọ “aihọn lọ pete tin to huhlọn mẹylankan lọ tọn glọ.”—1 Johanu 5:19.

 NAWẸ AIHỌN SATANI TỌN NA YIN VIVASUDO GBỌN?

13. Etẹwutu mí tindo nuhudo aihọn yọyọ de tọn?

13 Aihọn fọ́n bo to yinylan deji. Awhàn, mẹhodu, yẹnuwiwa po danuwiwa po kẹdẹ wẹ lẹdo mí pé. Eyin gbẹtọ lẹ tlẹ dovivẹnu depope, yé ma gán didẹ nuhahun ehelẹ. Ṣigba, Jiwheyẹwhe na và aihọn ylankan ehe sudo to madẹnmẹ to awhàn Amagẹdọni tọn whenu bo na yí aihọn yọyọ dodo tọn de do diọtẹnna ẹn.—Osọhia 16:14-16; pọ́n Nudọnamẹ Dogọ 10tọ.

14. Mẹnu wẹ Jiwheyẹwhe de nado yin Ahọlu Ahọluduta Etọn tọn? Dọdai tẹwẹ Biblu dọ gando Jesu go?

14 Jehovah de Jesu Klisti nado yin Ahọlu na gandudu kavi Ahọluduta olọn mẹ tọn Etọn. To owhe fọtọ́n susu die, Biblu dọ dọdai dọ Jesu na dugán di “Ahọvi Jijọho tọn” bọ gandudu etọn ma na wá vivọnu gbede. (Isaia 9:6, 7) Jesu plọn hodotọ etọn lẹ nado nọ hodẹ̀ do gandudu ehe tamẹ to whenue e dọmọ: “Na Ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.” (Matiu 6:10) To Weta 8tọ mẹ, mí na plọnnu gando lehe Ahọluduta Jiwheyẹwhe tọn na diọtẹnna gandudu aihọn tọn lẹ do go. (Hia Daniẹli 2:44.) To godo mẹ, Ahọluduta Jiwheyẹwhe tọn na diọ aigba zun paladisi whanpẹnọ de.—Pọ́n Nudọnamẹ Dogọ 11tọ.

AIHỌN YỌYỌ LỌ KO SẸPỌ!

15. Etẹwẹ yin “aigba yọyọ” lọ?

15 Biblu dopagbe dọmọ: “Olọn yọyọ lẹ po aigba yọyọ de po tin he míwlẹ to tenọpọn, podọ ofi ehelẹ wẹ dodowiwa na nọ nọ̀.” (2 Pita 3:13; Isaia 65:17) To whedelẹnu, Biblu nọ zan hogbe lọ “aigba” nado dlẹnalọdo gbẹtọ he to aigba ji lẹ. (Jenẹsisi 11:1) Enẹwutu, “aigba yọyọ” dodowiwa  tọn lọ nọtena mẹhe nọ setonuna Jiwheyẹwhe bo nọ mọ dona etọn yí lẹpo.

16. Nunina dagbedagbe tẹwẹ Jiwheyẹwhe na na mẹhe na nọgbẹ̀ to aihọn yọyọ etọn mẹ lẹ, podọ etẹwẹ mí dona wà nado mọ nunina ehe yí?

16 Jesu dopagbe dọ mẹhe na nọgbẹ̀ to aihọn yọyọ Jiwheyẹwhe tọn mẹ lẹ na mọ “ogbẹ̀ madopodo” yí. (Malku 10:30) Etẹwẹ mí dona wà nado mọ nunina ehe yí? Jaale hia Johanu 3:16 po 17:3 po nado mọ gblọndo lọ. Todin, gbọ mí ni pọ́n lehe Biblu dọ dọ ogbẹ̀ na te do to Paladisi aigba ji tọn lọ mẹ.

17, 18. Nawẹ mí wagbọn do yọnẹn dọ jijọho na tin to filẹpo to aigba ji bọ mí na tin to hihọ́ glọ?

17 Kanyinylan, awhàn, sẹ́nhẹngba po danuwiwa po na busẹ. Mẹylankan depope ma nasọ pò to aigba ji ba. (Salmu lẹ 37:10, 11) Jiwheyẹwhe na ‘hẹn awhàn wá opodo lẹdo aigba pé.’ (Salmu lẹ 46:9; Isaia 2:4) Mẹhe yiwanna Jiwheyẹwhe bo nọ setonuna ẹn lẹ kẹdẹ wẹ na gọ́ aigba ji. Jijọho na tin kakadoi.—Salmu lẹ 72:7.

18 Omẹ Jehovah tọn lẹ na tin to hihọ́ glọ. To ojlẹ Biblu tọn mẹ, eyin Islaelivi lẹ setonuna Jiwheyẹwhe, yé nọ tin to hihọ́ glọ, na ewọ nọ basi hihọ́na yé. (Levitiku 25:18, 19) To Paladisi mẹ, mí ma na nọ dibuna nude kavi mẹde. Mí na nọ tin to hihọ́ glọ to whepoponu!—Hia Isaia 32:18; Mika 4:4.

19. Etẹwutu mí sọgan deji dọ núdùdù susugege na tin to aihọn yọyọ Jiwheyẹwhe tọn mẹ?

19 Núdùdù susugege na tin. “Jinukun susugege na tin to aigba ji; e na gọfla to osó lẹ ji aga.” (Salmu lẹ 72:16) Jehovah, “yèdọ Jiwheyẹwhe mítọn, na nọ dona mí” bọ “aigba na nọ de sinsẹ́n etọn tọ́n.”—Salmu lẹ 67:6.

20. Nawẹ mí wagbọn do yọnẹn dọ aigba na lẹzun paladisi de?

20 Aigba blebu na lẹzun paladisi de. Gbẹtọ lẹ na  tindo owhé po jipa dagbedagbe lẹ po. (Hia Isaia 65:21-24; Osọhia 11:18.) Aigba blebu na yọnwhanpẹ dile jipa Edẹni tọn te do dai. Jehovah na nọ na mí nuhe sin hudo mí tindo lẹpo to whepoponu. Biblu dọ gando ewọ go dọmọ: “Hiẹ nọ hùn alọ towe bo nọ hẹn pekọ wá na ojlo nutogbẹ̀ lẹpo tọn.”—Salmu lẹ 145:16.

21. Nawẹ mí wagbọn do yọnẹn dọ jijọho na tin to gbẹtọ lẹ po kanlin lẹ po ṣẹnṣẹn?

21 Jijọho na tin to gbẹtọvi lẹ po kanlin lẹ po ṣẹnṣẹn. Kanlin lẹ ma na nọ gbleawuna gbẹtọvi lẹ ba. Ovi pẹvi lẹ na nọ voawu, etlẹ yin hẹ kanlin he nọ ylanhùn taun to egbehe lẹ.—Hia Isaia 11:6-9; 65:25.

22. Etẹwẹ Jesu na wà na mẹhe to azọ̀njẹ lẹ?

22 Mẹde ma nasọ jẹazọ̀n ba. Whenue Jesu tin to aigba ji, e gbọazọ̀nna mẹsusu. (Matiu 9:35; Malku 1:40-42; Johanu 5:5-9) Ṣigba taidi Ahọlu Ahọluduta Jiwheyẹwhe tọn, Jesu na gbọazọ̀nna mẹlẹpo. Mẹde ma nasọ dọ gbede ba dọ: “N’to azọ̀njẹ.”—Isaia 33:24; 35:5, 6.

23. Etẹwẹ Jiwheyẹwhe na wà na mẹhe ko kú lẹ?

23 Oṣiọ lẹ na gọwá ogbẹ̀. Jiwheyẹwhe dopagbe dọ emi na fọ́n gbẹtọ livi susu he ko kú lẹ sọnku. “Fọnsọnku dodonọ lẹ po mawadodonọ lẹ po tọn de na tin.”—Hia Johanu 5:28, 29; Owalọ lẹ 24:15.

24. Etẹwẹ a lẹn gando gbẹninọ to Paladisi mẹ go?

24 Mímẹpo wẹ pannukọn nudide de. Mí sọgan de nado plọnnu gando Jehovah go bo nọ sẹ̀n ẹn, kavi mí sọgan nọ wà nuhe jlo mí poun. Eyin mí de nado sẹ̀n Jehovah, mí sọgan donukun sọgodo dagbe de. Whenue dawe de dọna Jesu dọ ni flin emi to okú emitọn godo, Jesu dopà na ẹn dọmọ: “Hiẹ na tin hẹ mi to Paladisi mẹ.” (Luku 23:43) Gbọ mí ni plọn nususu dogọ gando Jesu Klisti po lehe e na hẹn opagbe dagbedagbe Jiwheyẹwhe tọn lẹ di do po go.