Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Sọgan Plọn Mí?

 WETA 6

Fitẹ Wẹ Mí Nọ Yì to Whenue Mí Kú?

Fitẹ Wẹ Mí Nọ Yì to Whenue Mí Kú?

1-3. Kanbiọ tẹlẹ wẹ mẹlẹ nọ kanse gando okú go, podọ gblọndo tẹlẹ wẹ sinsẹ̀n susu nọ na na kanbiọ enẹlẹ?

BIBLU dopà dọ azán dopo na wá pé bọ “okú ma nasọ tin ba.” (Osọhia 21:4) To Weta 5tọ mẹ, mí plọn dọ ofligọ lọ hẹn ẹn yọnbasi na mí nado mọ ogbẹ̀ madopodo yí. Ṣigba todin whẹ́, gbẹtọ lẹ gbẹ́ to kúkú. (Yẹwhehodọtọ 9:5) Enẹwutu, dopo to kanbiọ titengbe hugan he mí nọ kanse míde lẹ mẹ wẹ, Etẹwẹ nọ jọ do mí go to whenue mí kú?

2 Gblọndo kanbiọ enẹ tọn nọ duahunmẹna mí taun to whenue mẹyiwanna mítọn de kú. Mí sọgan nọ kanse dọ: ‘Fitẹ wẹ e yì taun? Be e to mimọ mí hlan wẹ ya? Be e gán gọalọna mí ya? Be mí na wá gọ̀ ẹ mọ gbèdopo ya?’

3 Gblọndo voovo wẹ sinsẹ̀n lẹ nọ na na kanbiọ enẹlẹ. Mẹdelẹ nọ plọnmẹ dọ eyin mẹdagbe de wẹ a yin, a na yì olọn mẹ, ṣigba eyin mẹylankan wẹ a yin, a na yì zòmẹ. Mẹdelẹ nọ dọ dọ eyin mẹde kú, e nọ lẹzun gbigbọ de bo nọ yì nọpọ́ hẹ hagbẹ whẹndo etọn tọn he ko kú jẹnukọnna ẹn lẹ. Podọ mẹdevo lẹ nọ dọ dọ to whenue mẹde ko kú bo yin whẹdana godo, e nọ yin vivọji kavi nọ gọwá ogbẹ̀ po agbasa devo po, vlavo taidi gbẹtọ kavi kanlin.

4. Linlẹn tangan tẹ ji wẹ nuplọnmẹ sinsẹ̀n lẹ tọn gando okú go nọ sinai do?

4 E taidi dọ nuhe sinsẹ̀n lẹ nọ plọnmẹ gbọnvona yede taun. Ṣigba, diblayin nuplọnmẹ yemẹpo tọn wẹ sinai do linlẹn tangan dopolọ ji. Yé nọ plọnmẹ dọ eyin mẹde kú, apadewhe etọn gbẹ́ nọ pò to ogbẹ̀. Be nugbo wẹ ya?

 FITẸ WẸ MÍ NỌ YÌ TO WHENUE MÍ KÚ?

5, 6. Etẹwẹ nọ jọ do mí go to whenue mí kú?

5 Jehovah yọ́n nuhe nọ jọ do mí go to whenue mí kú, podọ e dọna mí dọ eyin mẹde kú, gbẹninọ etọn nọ wá vivọnu. Adà awetọ pete ogbẹ̀ tọn wẹ okú yin. Enẹwutu, eyin mẹde kú, numọtolanmẹ po oflin etọn lẹ po ma nọ gbọṣi aimẹ to fidevo. * Eyin mí kú, mí masọ sọgan mọnú, sènu kavi lẹnnupọn ba.

6 Ahọlu Sọlomọni wlan dọ “oṣiọ lẹ ma yọ́n nudepope.” Oṣiọ lẹ ma gán yiwannamẹ kavi gbẹwannamẹ, podọ “azọ́n ma tin, tito ma tin, oyọnẹn ma tin, podọ nuyọnẹn ma tin to Yọdò mẹ.” (Hia Yẹwhehodọtọ 9:5, 6, 10.) Humọ, to Salmu lẹ 146:4 mẹ, Biblu dọna mí dọ eyin mẹde kú, “linlẹn etọn lẹ nọ sudo.”

NUHE JESU DỌ GANDO OKÚ GO

Jehovah dá gbẹtọvi lẹ nado nọgbẹ̀ kakadoi to aigba ji

7. Etẹwẹ Jesu dọ gando okú go?

7 Whenue họntọn vivẹ́ etọn Lazalọsi kú, Jesu dọna devi etọn lẹ dọmọ: “Lazalọsi họntọn mítọn to amlọndọ.” Amọ́, e ma yin amlọn gbọjẹyíyí tọn hodọ wẹ Jesu te. E yidogọ dọmọ: “Lazalọsi ko kú.” (Johanu 11:11-14) Gbọnmọ dali, Jesu yí okú jlẹdo amlọn go. E ma dọ dọ Lazalọsi ko tin to olọn mẹ kavi dọ e ko tin hẹ hagbẹ whẹndo etọn tọn he ko kú jẹnukọn lẹ. Podọ e ma dọ dọ Lazalọsi to yaji to zòmẹ kavi dọ e ko yin vivọji taidi gbẹtọvi devo kavi kanlin de. Lala, nudi amlọn he yìkànmẹ taun de dọ́ wẹ Lazalọsi te. Wefọ devo lẹ sọ yí okú jlẹdo amlọn yìkànmẹ de go. Biblu dọ dọ whenue Stefani yin hùhù, “e damlọn to okú mẹ.” (Owalọ lẹ 7:60) Apọsteli  Paulu lọsu wlan dọ Klistiani delẹ ko “damlọn to okú mẹ.”—1 Kọlintinu lẹ 15:6.

8. Nawẹ mí wagbọn do yọnẹn dọ Jiwheyẹwhe ma dá gbẹtọvi lẹ nado nọ kú?

8 Be Jiwheyẹwhe dá Adam po Evi po na yé nido wá kú to godo mẹ wẹ ya? Lala! Jehovah dá yé nado duvivi ogbẹ̀ tọn kakadoi po agbasalilo pipé de po. Whenue Jehovah dá gbẹtọvi lẹ, e ze ojlo lọ nado nọgbẹ̀ kakadoi do ahun yetọn mẹ. (Yẹwhehodọtọ 3:11) Mẹjitọ de ma nọ jlo dọ ovi etọn ni poyọnho bo kú to nukun etọn mẹ, mọjanwẹ Jehovah lọsu ma nọ jlo do niyẹn. Ṣigba, eyin Jiwheyẹwhe  dá mí nado nọgbẹ̀ kakadoi, naegbọn mí do nọ kú?

NAEGBỌN MÍ DO NỌ KÚ?

9. Etẹwutu gbedide he Jehovah na Adam po Evi po lọ do sọgbe hẹ lẹnpọn dagbe?

9 To jipa Edẹni tọn mẹ, Jehovah dọna Adam dọ: “Hiẹ sọgan dù sinsẹ́n atin he tin to jipa lọ mẹ lẹpo tọn gọ́ho. Ṣigba, na nuhe dù atin oyọnẹn dagbe po oylan po tọn, hiẹ ma dona dù sinsẹ́n etọn, na to azán he gbè hiẹ dù sọn e mẹ te, na jide tọn, hiẹ na kú.” (Jenẹsisi 2:9, 16, 17) E ma vẹawu nado setonuna gbedide he họnwun enẹ, podọ Jehovah tindo jlọjẹ nado magbe dagbe po oylan po tọn na Adam po Evi po. Eyin yé setonuna Jehovah, yé na dohia ẹ dọ yé nọ na sisi aṣẹpipa etọn. Enẹ nasọ do obá he mẹ yé yọ́n pinpẹn nuhe e ko na yé lẹpo tọn jẹ hia.

10, 11. (a) Nawẹ Satani doyẹklọ Adam po Evi po gbọn? (b) Naegbọn nude ma gán suwhẹna nuyiwa Adam po Evi po tọn?

10 E blawu dọ Adam po Evi po de nado vẹtolina Jehovah. Satani dọna Evi dọ: “Be nugbo wẹ dọ Jiwheyẹwhe ko dọ dọ mì ma dona dù sọn depope to atin jipa lọ tọn lẹ mẹ ya?” Evi gblọn dọmọ: “Mí sọgan dù sọn sinsẹ́n atin jipa lọ tọn lẹ mẹ. Ṣigba, Jiwheyẹwhe ko dọ gando sinsẹ́n atin he tin to jipa lọ ṣẹnṣẹn tọn go dọ: ‘Mì ma dona dù sọn e mẹ paali, mì ma dona doalọ e go; e ma yinmọ, mì na kú.’”—Jenẹsisi 3:1-3.

11 Whenẹnu wẹ Satani dọmọ: “Na jide tọn, mì ma na kú gba. Na Jiwheyẹwhe yọnẹn dọ gbeegbe mì dù sọn e mẹ te, nukun mìtọn nasọ hùn bọ mìwlẹ na taidi Jiwheyẹwhe bo na nọ yọ́n dagbe po oylan po.” (Jenẹsisi 3:4-6) Satani jlo dọ Evi ni lẹndọ ewọ lọsu sọgan magbe dagbe po oylan po tọn na ede. To ojlẹ dopolọ mẹ, e dolalo na ẹn gando nuhe na jọ eyin e vẹtoli go. Satani dọna Evi dọ e  ma na kú, enẹwutu Evi dù sọn atin-sinsẹ́n lọ mẹ bosọ na asu etọn to godo mẹ. Adam po Evi po yọnẹn dọ Jehovah ko gbẹ́ na yé ma nado dù atin-sinsẹ́n lọ. Whenue yé dù sọn e mẹ, yé de nado vẹtolina gbedide de he họnwun bosọ sọgbe hẹ lẹnpọn dagbe. Gbọnmọ dali, yé dohia dọ yé ma tindo sisi na Otọ́ olọn mẹ tọn owanyinọ yetọn. Nude ma gán suwhẹna nuyiwa yetọn!

12. Naegbọn e do vẹna mí sọmọ dọ Adam po Evi po vẹtolina Jehovah?

12 Lehe e vẹna mí do sọ dọ mẹjitọ mítọn tintan lẹ do mẹmasi hia Mẹdatọ yetọn jẹ obá mọnkọtọn mẹ! Numọtolanmẹ tẹwẹ a na tindo eyin a dovivẹnu vẹkuvẹku nado plọn visunnu po viyọnnu towe po whẹ́n bọ yé wá ṣiatẹ sọta we bo wanu jẹagọdo nuhe a biọ to yé si? Be e ma na vẹna we yì ahun mẹ ya?

Adam wá sọn kọ́gudu mẹ bosọ gọ̀ do kọ́gudu mẹ

13. Etẹ dọ wẹ Jehovah te to whenue e dọ dọ “kọ́gudu mẹ wẹ hiẹ nasọ gọ̀ do”?

13 Whenue Adam po Evi po vẹtoli, yé hẹn dotẹnmẹ hundote lọ nado nọgbẹ̀ kakadoi bu. Jehovah ko dọna Adam dọ: “Na kọ́gudu wẹ hiẹ podọ kọ́gudu mẹ wẹ hiẹ nasọ gọ̀ do.” (Hia Jenẹsisi 3:19.) Enẹ zẹẹmẹdo dọ Adam nasọ vọ́ lẹzun kọ́gudu, taidi dọ e ma ko yin didá pọ́n wẹ nkọ. (Jenẹsisi 2:7) To ylando Adam tọn godo, e kú bo masọ tin ba.

14. Naegbọn mí do nọ kú?

14 Eyin Adam po Evi po ko setonuna Jiwheyẹwhe  wẹ, yé na gbẹ́ pò to ogbẹ̀ kakajẹ egbé. Ṣigba, whenue yé vẹtoli, yé waylando bo wá kú to godo mẹ. Ylando taidi azọ̀nylankan de he mí dugu etọn sọn mẹjitọ mítọn tintan lẹ dè. Mímẹpo wẹ yin jiji di ylandonọ, enẹ wẹ zọ́n bọ mí do nọ kú. (Lomunu lẹ 5:12) Ṣigba, e ma yin enẹ wẹ lẹndai Jiwheyẹwhe tọn na gbẹtọvi lẹ. Jiwheyẹwhe ma jlo pọ́n gbede dọ gbẹtọ lẹ ni nọ kú, enẹwutu Biblu ylọ okú dọ “kẹntọ.”—1 Kọlintinu lẹ 15:26.

NUGBO LỌ NỌ HẸN MÍ JẸ MẸDEKANNU

15. Nawẹ nugbo lọ yinyọnẹn gando okú go nọ hẹn mí jẹ mẹdekannu gbọn?

15 Nugbo lọ yinyọnẹn gando okú go nọ hẹn mí jẹ mẹdekannu sọn linlẹn agọ̀ susu si. Biblu plọn mí dọ oṣiọ lẹ ma nọ mọ awufiẹsa kavi blawu. Mí ma gán dọhona yé, mọ yelọsu ma gán dọhona mí. Mí ma gán gọalọna oṣiọ lẹ, podọ yelọsu ma gán gọalọna mí. Yé ma gán gbleawuna mí, enẹwutu mí ma dona nọ dibuna yé. Amọ́, sinsẹ̀n susu nọ dọna mí dọ oṣiọ lẹ to gbẹnọ to fidevo bọ mí gán gọalọna yé eyin mí sú akuẹ yẹwhenọ lẹ kavi mẹhe nọ yin pinpọnhlan di mẹwiwe lẹ. Ṣigba, na mí yọ́n nugbo lọ gando okú go wutu, lalo enẹlẹ ma nọ hẹn mí buali.

16. Lalo tẹwẹ sinsẹ̀n susu nọ plọnmẹ gando oṣiọ lẹ go?

16 Satani nọ yí sinsẹ̀n lalo zan nado doyẹklọ mí bo hẹn mí lẹndọ oṣiọ lẹ gbẹ́ pò to ogbẹ̀. Di apajlẹ, sinsẹ̀n delẹ nọ plọnmẹ dọ eyin mí kú, apadewhe mítọn nọ yì nọgbẹ̀ to fidevo. Be nuhe sinsẹ̀n towe nọ plọn we niyẹn ya, kavi nuhe Biblu dọ gando oṣiọ lẹ go wẹ e nọ plọn we? Satani nọ yí lalo zan nado gọkọna mẹlẹ sọn Jehovah dè.

17. Naegbọn linlẹn lọ dọ gbẹtọ lẹ nọ yin yasana to zòmẹ do kọnmasin do Jehovah go?

17 Nuhe sinsẹ̀n susu nọ plọnmẹ nọ hẹnmẹ jọsi taun.  Di apajlẹ, mẹdelẹ nọ plọnmẹ dọ mẹylankan lẹ na yin yasana kakadoi to miyọ́n mẹ to zòmẹ. Lalo enẹ kọnmasin do Jehovah go. Ewọ ma na dike gbẹtọ lẹ ni jiya domọ pọ́n gbede! (Hia 1 Johanu 4:8.) Etẹwẹ a na lẹn gando mẹde go he ja mẹplọnlọ do ovi etọn go gbé bo ze alọ ovi lọ tọn do miyọ́n mẹ? Be e ma yin okànọ wẹ a na yí i do mọ ya? A ma na jlo na jihọntọn hẹ omẹ mọnkọtọn. Nuhe Satani jlo dọ mí ni lẹn gando Jehovah go pẹẹ niyẹn!

18. Etẹwutu mí ma dona dibuna oṣiọ lẹ?

18 Sinsẹ̀n delẹ nọ dọna mí dọ eyin mẹde kú, e nọ lẹzun gbigbọ. Sinsẹ̀n mọnkọtọn lẹ nọ plọnmẹ dọ mí dona nọ na sisi gbigbọ enẹlẹ bo tlẹ nọ dibuna yé, na yé gán lẹzun họntọn he na nọ gọalọna mí kavi kẹntọ ylankan lẹ wutu. Mẹsusu wẹ nọ yí lalo enẹ sè. Yé nọ dibuna oṣiọ lẹ, enẹwutu yé nọ sẹ̀n yé kakati nado sẹ̀n Jehovah. Flindọ oṣiọ lẹ ma gán tindo numọtolanmẹ kavi lẹnnupọn, enẹwutu mí ma dona dibuna yé. Jehovah wẹ Mẹdatọ mítọn. Ewọ wẹ Jiwheyẹwhe nugbo lọ, podọ ewọ kẹdẹ wẹ mí dona nọ sẹ̀n.—Osọhia 4:11.

19. Nawẹ nugbo lọ yinyọnẹn gando okú go nọ gọalọna mí gbọn?

19 Whenue mí yọ́n nugbo lọ gando okú go, mí nọ jẹ mẹdekannu sọn lalo sinsẹ̀n tọn lẹ si. Nugbo ehe sọ nọ gọalọna mí nado mọnukunnujẹ opagbe dagbedagbe he Jehovah ko do gando ogbẹ̀ mítọn po sọgodo mítọn po go lẹ mẹ.

20. Etẹwẹ mí na plọn to weta he bọdego mẹ?

20 To ojlẹ dindẹn die, devizọnwatọ Jiwheyẹwhe tọn he nọ yin Jobu kanse dọmọ: “Eyin gbẹtọ de kú, be e sọgan gọwá nọgbẹ̀?” (Jobu 14:14) Be mẹhe ko kú de sọgan gọwá nọgbẹ̀ nugbonugbo ya? Gblọndo he Jiwheyẹwhe na na kanbiọ ehe to Biblu mẹ fọnjlodotenamẹ taun. Mí na dọhodeji to weta he bọdego mẹ.

^ huk. 5 Mẹdelẹ yise dọ alindọn kavi gbigbọ de nọ tọ́n sọn mẹhe kú de mẹ bo nọ zindonukọn nado to gbẹnọ. Nado mọ nudọnamẹ dogọ gando ehe go, pọ́n Nudọnamẹ Dogọ 17tọ po 18tọ po.