Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Etẹwẹ Biblu Sọgan Plọn Mí?

 WETA 18

Be N’Dona Klan Dee Do Wiwe Na Jiwheyẹwhe bo Yí Baptẹm Wẹ Ya?

Be N’Dona Klan Dee Do Wiwe Na Jiwheyẹwhe bo Yí Baptẹm Wẹ Ya?

1. Etẹwẹ a sọgan nọ kanse dewe todin he a ko yí sọwhiwhe do plọn owe ehe?

OWE ehe pinplọn ko gọalọna we nado yọ́n nugbo Biblu tọn susu, taidi opagbe ogbẹ̀ madopodo tọn he Jiwheyẹwhe do, ninọmẹ oṣiọ lẹ tọn po todido fọnsọnku tọn po. (Yẹwhehodọtọ 9:5; Luku 23:43; Johanu 5:28, 29; Osọhia 21:3, 4) A sọgan ko jẹ opli Kunnudetọ Jehovah tọn lẹ tọn yì ji bo kẹalọyi dọ yewlẹ wẹ to sinsẹ̀n nugbo lọ basi. (Johanu 13:35) A sọgan ko jẹ họntọnji hẹ Jehovah ji vudevude bo magbe dọ ewọ wẹ a jlo na sẹ̀n.  Enẹwutu, a gán nọ kanse dewe dọ, ‘Etẹwẹ n’dona wà din nado sẹ̀n Jiwheyẹwhe?’

2. Etẹwẹ hẹn dawe Etiopianu de tindo ojlo nado yí baptẹm?

2 Nuhe dawe Etiopianu he nọgbẹ̀ to ojlẹ Jesu tọn mẹ de kanse niyẹn. Ojlẹ vude to fọnsọnku Jesu tọn godo, devi Jesu tọn he nọ yin Filipi dọyẹwheho na dawe enẹ. Filipi dohia ẹ dọ Jesu wẹ yin Mẹsia lọ. Nuhe dawe Etiopianu lọ plọn lẹ whàn ẹn sọmọ bọ e dọ to afọdopolọji dọ: “Pọ́n! Osin die; etẹwẹ glọnalina mi nado yin bibaptizi?”—Owalọ lẹ 8:26-36.

3. (a) Gbedide tẹwẹ Jesu na devi etọn lẹ? (b) Nawẹ yè dona yin bibaptizi gbọn?

3 Biblu plọnmẹ hezeheze dọ eyin a jlo na sẹ̀n Jehovah, a dona yí baptẹm. Jesu dọna hodotọ etọn lẹ dọmọ: “Mì yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé.” (Matiu 28:19) Jesu lọsu ze apajlẹ enẹ tọn dai to whenue ewọ lọsu yin bibaptizi. E yin yinylọ́n do osin mẹ mlẹnmlẹn, osin ma yin húnhúnhún do ota na ẹn poun. (Matiu 3:16) To egbehe lọsu, to baptẹm Klistiani de tọn whenu, e dona yin yinylọ́n do osin mẹ mlẹnmlẹn, kavi whèadin yì osin glọ.

4. Etẹwẹ baptẹm yíyí towe nọ dohia mẹdevo lẹ?

4 Baptẹm yíyí towe nọ dohia mẹdevo lẹ dọ a jlo na yin họntọn Jiwheyẹwhe tọn bo sẹ̀n ẹn nugbonugbo. (Salmu lẹ 40:7, 8) Enẹwutu, a gán nọ kanse dewe dọ, ‘Etẹwẹ n’dona wà nado yí baptẹm?’

OYỌNẸN PO YISE PO

5. (a) Etẹlẹ wẹ a dona wà whẹpo a nido sọgan yí baptẹm? (b) Naegbọn opli Klistiani tọn lẹ do yin nujọnu?

5 Whẹpo a nado yí baptẹm, a dona plọn nado yọ́n Jehovah po Jesu po. A ko jẹ enẹ wà ji to whenue a jẹ Biblu plọn ji. (Hia Johanu 17:3.) Amọ́, enẹ ma ko pé. Biblu dọ  dọ a dona “gọ́ na oyọnẹn he pegan” ojlo Jehovah tọn tọn. (Kolosinu lẹ 1:9) Opli Kunnudetọ Jehovah tọn lẹ tọn na gọalọna we nado wleawuna haṣinṣan pẹkipẹki de hẹ Jehovah. Whẹwhinwhẹ́n titengbe dopo niyẹn he wutu a dona nọ yì opli enẹlẹ to gbesisọ mẹ.—Heblu lẹ 10:24, 25.

Whẹpo a nado yí baptẹm, a dona plọn Biblu

6. Obá tẹ mẹ wẹ a dona yọ́n Biblu jẹ whẹpo do yí baptẹm?

6 Nugbo wẹ dọ Jehovah ma biọ dọ a dona yọ́n nuhe to Biblu mẹ lẹpo whẹpo do yí baptẹm. E ma donukun dọ Etiopianu lọ ni yọ́n nulẹpo whẹpo do yin bibaptizi. (Owalọ lẹ 8:30, 31) Podọ mí na zindonukọn nado to nuplọn gando Jiwheyẹwhe go kakadoi. (Yẹwhehodọtọ 3:11) Amọ́, whẹpo a nado yí baptẹm, a dona yọ́n e whè gbau nuplọnmẹ dodonu tọn Biblu tọn lẹ bo kẹalọyi yé.—Heblu lẹ 5:12.

7. Nawẹ Biblu pinplọn towe ko gọalọna we gbọn?

7 Biblu dọmọ: “Matin yise, e ma yọnbasi nado hẹn homẹ Jiwheyẹwhe tọn hùn ganji.” (Heblu lẹ 11:6) Enẹwutu, whẹpo a nado sọgan yí baptẹm, a dona tindo yise. Biblu dọna mí dọ whenue mẹhe nọ nọ̀ tòdaho Kọlinti hohowhenu tọn mẹ delẹ sè nuhe devi Jesu tọn lẹ to pinplọnmẹ, yé “yise bo yin bibaptizi.” (Owalọ lẹ 18:8) Mọdopolọ, Biblu pinplọn towe ko gọalọna we nado tindo yise to opagbe Jiwheyẹwhe tọn lẹ mẹ podọ to huhlọn avọ́sinsan Jesu tọn mẹ, ehe sọgan whlẹn mí sọn ylando po okú po si.—Jọṣua 23:14; Owalọ lẹ 4:12; 2 Timoti 3:16, 17.

NỌ DỌHONA MẸDEVO LẸ GANDO NUGBO BIBLU TỌN LẸ GO

8. Etẹwẹ na whàn we nado dọhona mẹdevo lẹ gando nuhe a ko plọn lẹ go?

8 Dile a to nususu dogọ plọn sọn Biblu mẹ bo to mimọ lehe e to alọgọna we to gbẹzan towe mẹ do,  yise towe na lodo dogọ. A na tindo ojlo nado dọhona mẹdevo lẹ gando nuhe plọn a te lẹ go. (Jelemia 20:9; 2 Kọlintinu lẹ 4:13) Ṣigba, mẹnu lẹ wẹ a dona nọ dọho mọnkọtọn na?

Yise dona whàn we nado má nuyise towe hẹ mẹdevo lẹ

9, 10. (a) Mẹnu lẹ wẹ a sọgan jẹ nuhe a ko plọn lẹ má hẹ ji? (b) Etẹwẹ a dona wà eyin a jlo na jẹ yẹwhehodọ ji hẹ agun lọ?

9 A sọgan jlo nado dọhona hagbẹ whẹndo towe tọn lẹ, gọna họntọn, kọmẹnu, kavi azọ́nwatọgbẹ́ towe lẹ gando nuhe plọn a te lẹ go. Enẹ yọ́n taun, ṣigba tẹnpọn bo nọ wàmọ to aliho he jọmẹ bo gọ́ na owanyi mẹ to whepoponu. To nukọn mẹ, a na wá penugo nado jẹ yẹwhehodọ ji hẹ agun lọ. Eyin a lẹndọ emi ko wleawufo nado jẹ ehe wà ji, a sọgan dọhona Kunnudetọ he to Biblu plọn hẹ we bo dohia ẹ dọ a jlo na tindo mahẹ to azọ́n yẹwhehodidọ tọn mẹ hẹ agun lọ. Eyin ewọ mọdọ a ko wleawufo bọ a sọ to gbẹnọ sọgbe hẹ nujinọtedo Biblu tọn lẹ, to whenẹnu mẹho agun tọn awe na mọ mìmẹ awe lẹ nado dọhodeji.

10 Nawẹ hodọdopọ enẹ na yì do? Mẹho lọ lẹ na dọho hẹ we nado yọnẹn eyin a mọnukunnujẹ nuplọnmẹ dodonu tọn Biblu tọn lẹ mẹ bosọ yí yé sè, eyin a nọ setonuna nuhe Biblu dọ to gbẹzan towe egbesọegbesọ tọn mẹ, podọ eyin a jlo nugbonugbo nado lẹzun dopo to Kunnudetọ Jehovah tọn lẹ mẹ. Flindọ, mẹho lẹ wẹ nọ penukundo hagbẹ agun lọ tọn lẹpo go, yèdọ kakajẹ hiẹ lọsu ji, enẹwutu ma dibu nado dọho hẹ yé blo. (Owalọ lẹ 20:28; 1 Pita 5:2, 3) To hodọdopọ enẹ godo, mẹho lẹ na dọna we eyin a sọgan jẹ yẹwhehodọ ji hẹ agun lọ.

11. Naegbọn e do yin nujọnu sọmọ nado basi diọdo delẹ whẹpo do jẹ yẹwhehodọ ji hẹ agun lọ?

11 Mẹho lẹ sọgan basi zẹẹmẹ na we dọ a gbẹ́ dona  basi diọdo delẹ whẹpo do jẹ yẹwhehodọ ji hẹ agun lọ. Naegbọn e do yin nujọnu sọmọ nado basi diọdo enẹlẹ? Na whenue mí to hodọna mẹdevo lẹ gando Jiwheyẹwhe go, afọ Jiwheyẹwhe tọn zedai wẹ mí te, enẹwutu aliho gbẹninọ tọn mítọn dona gbògbéna ẹn.—1 Kọlintinu lẹ 6:9, 10; Galatianu lẹ 5:19-21.

LẸNVỌJỌ BO DIỌ

12. Naegbọn mẹlẹpo wẹ dona lẹnvọjọ?

12 Nudevo gbẹ́ pò he a dona wà whẹpo a nido sọgan yí baptẹm. Apọsteli Pita dọmọ: “Mì lẹnvọjọ bo diọ, na yè nido súnsún ylando mìtọn lẹ sẹ̀.” (Owalọ lẹ 3:19) Etẹwẹ e zẹẹmẹdo nado lẹnvọjọ? E zẹẹmẹdo dọ nuhe mí ko ṣiwà wayi lẹpo dona vẹna mí yì ahun mẹ. Di apajlẹ, eyin gbẹzan fẹnnuwiwa tọn de wẹ a ko nọ zan dai, a dona lẹnvọjọ todin. Podọ eyin a tlẹ ko tẹnpọn to gbẹzan towe lẹpo mẹ nado nọ wà nuhe sọgbe, a gbẹsọ dona lẹnvọjọ, na mímẹpo wẹ yin ylandonọ bo dona biọ jona Jiwheyẹwhe tọn.—Lomunu lẹ 3:23; 5:12.

13. Etẹwẹ e zẹẹmẹdo nado “diọ”?

13 Be e ko pé dọ nuhe a ṣiwà lẹ ni vẹna we poun ya? Lala. Pita dọ dọ a sọ dona “diọ.” Ehe zẹẹmẹdo dọ a dona gbẹ́ walọyizan hoho he ma sọgbe lẹpo dai bo jẹ nuhe sọgbe wà ji. Di apajlẹ, mí ni dọ dọ a to gbejizọnlinzin jei fihe a ma ko yì pọ́n de. To ojlẹ de godo, a wá doayi e go dọ emi ko buali. Etẹwẹ a na wà? E họnwun dọ a na jẹ dẹẹdẹ zọ̀n ji bo na nọte, bosọ lẹkọ, enẹgodo a na diọ ali jẹ dehe sọgbe lọ ji. Mọdopolọ, dile a to Biblu plọn, a sọgan mọdọ walọ kavi nudelẹ tin to gbẹzan towe mẹ he a dona diọ. Wleawufo nado “diọ,” enẹ wẹ nado basi diọdo he jẹ lẹ, bo jẹ nuhe sọgbe wà ji.

 KLAN DEWE DO WIWE

Be a ko dopà na Jehovah nado sẹ̀n ẹn ya?

14. Nawẹ a na klan dewe do wiwe na Jiwheyẹwhe gbọn?

14 Afọdide titengbe devo he a dona ze whẹpo do yí baptẹm wẹ nado klan dewe do wiwe na Jehovah. Eyin a jlo na klan dewe do wiwe na Jehovah, a dona hodẹ̀ hlan ẹn bo dopà dọ emi na sẹ̀n ewọ kẹdẹ bo ze ojlo etọn wiwà do otẹn tintan mẹ to gbẹzan emitọn mẹ.—Deutelonomi 6:15.

15, 16. Etẹwẹ nọ whàn mẹde nado klan ede do wiwe na Jiwheyẹwhe?

15 Pàdido nado sẹ̀n Jehovah kẹdẹ sọgan yin yiyijlẹdo pàdido nado yí pipotọ gbẹzan towe tọn zan hẹ mẹhe a yiwanna de go. Yí nukun homẹ tọn do pọ́n sunnu de he to họntọn mẹ hẹ yọnnu de. Whenue sunnu lọ wá yọ́n yọnnu lọ ganji, owanyi he e tindo na ẹn nọ jideji bọ e nọ jlo nado dà ẹ. Dile etlẹ yindọ nudide sinsinyẹn de wẹ enẹ yin, sunnu lọ nọ wleawufo nado kẹalọyi azọngban ehe, na e yiwanna yọnnu lọ wutu.

16 Dile a to nuplọn gando Jehovah go, owanyi he a tindo na ẹn ko jideji bọ a jlo na wà nuhe go a pé lẹpo nado sẹ̀n ẹn. Ehe wẹ na whàn we nado hodẹ̀ hlan ẹn bo dopà dọ emi na sẹ̀n ẹn. Biblu dọ dọ mẹdepope he jlo na hodo Jesu dona “mọ́n ede.” (Malku 8:34) Etẹwẹ enẹ zẹẹmẹdo? E zẹẹmẹdo dọ a dona ze tonusisena Jehovah do otẹn tintan mẹ to gbẹzan towe mẹ. Ojlo Jehovah tọn yin nujọnu taun hú ojlo po yanwle towe titi lẹ po.—Hia 1 Pita 4:2.

A DIBU DỌ E MA NA PÀ WE BLO

17. Naegbọn mẹdelẹ ma nọ klan yede do wiwe na Jehovah?

17 Mẹdelẹ ma nọ klan yede do wiwe na Jehovah, na yé nọ dibu dọ yé ma na penugo nado hẹn opà he yé do nado nọ sẹ̀n ẹn lọ di. Yé ma jlo na hẹn Jehovah jẹflumẹ,  kavi yé sọgan nọ lẹndọ eyin yé ma klan yede do wiwe na ẹn, Jehovah ma na biọ to yé si nado dogbè nuyiwa yetọn lẹ tọn.

18. Etẹwẹ na gọalọna we nado duto obu lọ ji dọ emi na wá hẹn Jehovah jẹflumẹ?

18 Owanyi he a tindo na Jehovah na gọalọna we nado duto obu lọ ji dọ emi na wá hẹn ẹn jẹflumẹ. Na a yiwanna ẹn wutu, a na wà nuhe go a pé lẹpo nado hẹn opà he a ko do na ẹn lọ di. (Yẹwhehodọtọ 5:4; Kolosinu lẹ 1:10) Ojlo Jehovah tọn wiwà ma na nọ vẹawu to nukun towe mẹ. Apọsteli Johanu wlan dọmọ: “Na nuhe owanyi Jiwheyẹwhe tọn zẹẹmẹdo die, dọ mí ni yìn gbedide etọn lẹ; ṣogan gbedide etọn lẹ ma pẹnagbànmẹ.”—1 Johanu 5:3.

19. Naegbọn a ma dona dibu nado klan dewe do wiwe na Jehovah?

19 E ma biọ dọ a ni yin mẹpipe whẹpo do klan dewe do wiwe na Jehovah. Ewọ ma nọ donukun nuhe zẹ̀ nugopipe mítọn go sọn mí si pọ́n gbede. (Salmu lẹ 103:14) E na gọalọna we nado wà nuhe sọgbe. (Isaia 41:10) Yí ahun towe lẹpo do dejido Jehovah go, “ewọ nasọ jlọ ali towe lẹ.”—Howhinwhẹn lẹ 3:5, 6.

GBEYIYI GBANGBA TỌN NA WHLẸNGÁN

20. Afọdide tẹwẹ a dona ze to whenue a ko klan dewe do wiwe na Jehovah godo?

20 Be a lẹndọ a ko wleawufo nado klan dewe do wiwe na Jehovah ya? Whenue a na ko klan dewe do wiwe na Jehovah godo wẹ a sọgan ze afọdide he bọdego. A dona yí baptẹm.

21, 22. Nawẹ a sọgan basi “gbeyiyi gbangba tọn” na yise towe gbọn?

21 Dọna mẹhe yin anadenanutọ to pipli mẹho lẹ tọn mẹ to agun towe mẹ dọ a ko klan dewe do wiwe na  Jehovah bo jlo na yí baptẹm. Enẹgodo, ewọ na basi tito bọ mẹho delẹ na gbadopọnna nuplọnmẹ dodonu tọn Biblu tọn lẹ hẹ we. Eyin yé kọngbedopọ dọ a pegan, yé na dọna we dọ a sọgan yí baptẹm to plidopọ Kunnudetọ Jehovah tọn lẹ tọn he na bọdego ji. To plidopọ lọ ji, hodidọ de na yin nina nado basi zẹẹmẹ nuhe baptẹm nọtena tọn. Enẹgodo, hodọtọ lọ na  kàn kanbiọ he bọawu awe sè mẹhe jlo na yí baptẹm lẹ. Gbọn gblọndo nina na kanbiọ enẹlẹ dali, a na basi “gbeyiyi gbangba tọn” na yise towe.—Lomunu lẹ 10:10.

22 To whenẹnu, a na yí baptẹm. A na yin yinylọ́n do osin mẹ mlẹnmlẹn. Baptẹm towe na dohia mẹlẹpo dọ a  ko klan dewe do wiwe na Jehovah bo lẹzun dopo to Kunnudetọ Jehovah tọn lẹ mẹ todin.

NUHE BAPTẸM TOWE NỌTENA

23. Etẹwẹ e zẹẹmẹdo nado yin bibaptizi “to oyín Otọ́ tọn, Visunnu tọn, po gbigbọ wiwe tọn po mẹ”?

23 Jesu dọ dọ devi etọn lẹ na yin bibaptizi “to oyín Otọ́ tọn, Visunnu tọn, po gbigbọ wiwe tọn po mẹ.” (Hia Matiu 28:19.) Etẹwẹ enẹ zẹẹmẹdo? E zẹẹmẹdo dọ a kẹalọyi aṣẹpipa Jehovah tọn po azọngban Jesu tọn to lẹndai Jiwheyẹwhe tọn mẹ po, gọna lehe Jiwheyẹwhe nọ yí gbigbọ wiwe etọn zan nado hẹn ojlo etọn di do.—Salmu lẹ 83:18; Matiu 28:18; Galatianu lẹ 5:22, 23; 2 Pita 1:21.

Gbọn baptẹm yíyí dali, a na dohia dọ a jlo na wà ojlo Jiwheyẹwhe tọn

24, 25. (a) Etẹwẹ baptẹm nọtena? (b) Etẹ ji wẹ mí na dọhodo to weta godo tọn mẹ?

24 Onú titengbe de wẹ baptẹm nọtena. Whenue a yin yinylọ́n do osin mẹ, e dohia dọ a ko kú na nuhe dù aliho gbẹninọ tọn towe hoho lọ, kavi dọ a ko gbẹ́ ẹ dai. Whenue a tọ́n sọn osin lọ mẹ, a na bẹ gbẹzan yọyọ de jẹeji nado wà ojlo Jiwheyẹwhe tọn. Enẹ zẹẹmẹdo dọ a na sẹ̀n Jehovah sọn din sọyi. Flindọ, e ma yin gbẹtọvi, titobasinanu, kavi azọ́n de wẹ a klan dewe do wiwe na. Jehovah wẹ a klan gbẹzan towe do wiwe na.

25 Klandowiwe towe na gọalọna we nado wleawuna haṣinṣan pẹkipẹki de hẹ Jiwheyẹwhe. (Salmu lẹ 25:14) Ehe ma zẹẹmẹdo dọ baptẹm yíyí poun ko pé nado mọ whlẹngán yí gba. Apọsteli Paulu wlan dọ: “Mì nọ yí obu po sisọsisọ po do to azọ́nwa na whlẹngán mìtọn titi.” (Filipinu lẹ 2:12) Bẹjẹeji poun wẹ baptẹm yin. Ṣigba, nawẹ a sọgan gbọṣi adà Jehovah tọn mẹ gbọn? Weta godo tọn owe ehe tọn na na gblọndo na kanbiọ enẹ.