Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Sọgan Plọn Mí?

 WETA 10

Nugbo lọ Gando Angẹli lẹ Go

Nugbo lọ Gando Angẹli lẹ Go

1. Naegbọn mí dona plọnnu gando angẹli lẹ go?

JEHOVAH jlo dọ mí ni yọ́n whẹndo etọn. Angẹli lẹ yin hagbẹ whẹndo Jiwheyẹwhe tọn. To Biblu mẹ, yé nọ yin yiylọdọ “visunnu Jiwheyẹwhe tọn lẹ.” (Jobu 38:7) Etẹwẹ angẹli lẹ nọ wà? Nawẹ yé gọalọna gbẹtọ lẹ to hohowhenu gbọn? Podọ be yé sọgan gọalọna mí todin ya?—Pọ́n Nudọnamẹ Dogọ 8tọ.

2. Fie wẹ angẹli lẹ wá sọn? Angẹli nẹmu wẹ yin didá?

2 Mí dona yọ́n fie angẹli lẹ wá sọn. Kolosinu lẹ 1:16 dọna mí dọ whenue Jehovah dá Jesu godo wẹ “nudevo lẹpo yin didá . . . to olọn mẹ podọ to aigba ji.” Enẹ bẹ angẹli lẹ lọsu hẹn. Angẹli nẹmu wẹ yin didá? Biblu dọ dọ angẹli livi donu kanweko lẹ wẹ tin.—Salmu lẹ 103:20; Osọhia 5:11.

3. Etẹwẹ Jobu 38:4-7 plọn mí gando angẹli lẹ go?

3 Biblu sọ plọn mí dọ Jehovah ko dá angẹli lẹ whẹpo do wá dá aigba. Numọtolanmẹ tẹwẹ angẹli lẹ tindo to whenue aigba yin didá? Owe Jobu tọn dọna mí dọ yé gọ́ na ayajẹ. Whẹndo he to kọndopọ mẹ bo nọ sẹ̀n Jehovah dopọ de wẹ yé yin.—Jobu 38:4-7.

ANGẸLI LẸ NỌ GỌALỌNA OMẸ JIWHEYẸWHE TỌN LẸ

4. Nawẹ mí wagbọn do yọnẹn dọ angẹli lẹ nọ tindo ojlo to gbẹtọvi lẹ mẹ?

4 Sọn dowhenu wẹ angẹli lẹ ko nọ tindo ojlo to gbẹtọvi lẹ mẹ podọ to lẹndai Jehovah tọn na aigba po gbẹtọvi lẹ po mẹ. (Howhinwhẹn lẹ 8:30, 31; 1 Pita 1:11, 12) E na  ko blawuna yé taun to whenue Adam po Evi po ṣiatẹ. Awubla yetọn na tlẹ sọ sinyẹn taun todin nado mọdọ suhugan gbẹtọvi lẹ tọn wẹ ma nọ setonuna Jehovah. Ṣigba, eyin mẹde lẹnvọjọ bo lẹkọwa Jiwheyẹwhe dè, angẹli lẹ nọ jaya. (Luku 15:10) Angẹli lẹ nọ tindo ojlo to mẹhe to Jiwheyẹwhe sẹ̀n lẹ mẹ taun. Jehovah nọ yí angẹli lẹ zan  nado gọalọna devizọnwatọ etọn he to aigba ji lẹ bo basi hihọ́na yé. (Heblu lẹ 1:7, 14) Gbọ mí ni pọ́n apajlẹ delẹ he do enẹ hia.

“Jiwheyẹwhe ṣie do angẹli etọn hlan bo bọnùdo na kinnikinni lẹ.”Daniẹli 6:22

5. Nawẹ angẹli lẹ gọalọna devizọnwatọ Jiwheyẹwhe tọn lẹ to hohowhenu gbọn?

5 Jehovah do angẹli awe hlan nado gọalọna Lọti po whẹndo etọn po nado họ̀ngán to whenue tòdaho Sodọmi po Gomọla po tọn lẹ yin vivasudo. (Jenẹsisi 19:15, 16) To owhe kanweko susu godo, yẹwhegán Daniẹli yin dindlan do odò kinnikinni lẹ tọn mẹ, amọ́ yé ma gbleawuna ẹn, na “Jiwheyẹwhe . . . do angẹli etọn hlan bo bọnùdo na kinnikinni lẹ.” (Daniẹli 6:22) To nukọn mẹ, whenue apọsteli Pita yin wiwle do gànmẹ, Jehovah do angẹli de hlan nado tún in dote. (Owalọ lẹ 12:6-11) Angẹli lẹ sọ gọalọna Jesu to whenue e tin to aigba ji. Di apajlẹ, to baptẹm etọn godo, “angẹli lẹ to lizọnyina ẹn.” (Malku 1:13) Ojlẹ vude whẹpo Jesu do yin hùhù, angẹli de wá “hẹn ẹn lodo.”—Luku 22:43.

6. (a) Nawẹ mí wagbọn do yọnẹn dọ angẹli lẹ nọ gọalọna omẹ Jiwheyẹwhe tọn lẹ to egbehe? (b) Kanbiọ tẹlẹ wẹ mí na dín gblọndo na todin?

6 To egbehe, angẹli lẹ masọ nọ sọawuhia gbẹtọvi lẹ ba. Amọ́, Jiwheyẹwhe gbẹ́ nọ yí angẹli lẹ zan nado gọalọna devizọnwatọ etọn lẹ. Biblu dọmọ: “Angẹli Jehovah tọn nọ dosla lẹdo mẹhe nọ dibusi Jiwheyẹwhe lẹpo, bosọ nọ whlẹn yé gán.” (Salmu lẹ 34:7) Naegbọn mí do tindo nuhudo hihọ́-basinamẹ tọn? Na mí tindo kẹntọ huhlọnnọ delẹ he jlo na gbleawuna mí wutu wẹ. Kẹntọ tẹlẹ wẹ? Fie wẹ yé wá sọn? Nawẹ yé nọ tẹnpọn nado gbleawuna mí gbọn? Nado mọ gblọndo na kanbiọ enẹlẹ, gbọ mí ni pọ́n nuhe jọ ojlẹ vude to whenue Adam po Evi po yin didá godo.

 KẸNTỌ MAYINUKUNDOMỌ MÍTỌN LẸ

7. Etẹwẹ yẹdoklọmẹ Satani tọn ko hẹn gbẹtọ lẹ nado wà?

7 Mí plọn to Weta 3tọ mẹ dọ angẹli de ṣiatẹ sọta Jiwheyẹwhe bo jlo na dugán do mẹdevo lẹ ji. Biblu ylọ ẹ dọ Satani Lẹgba. (Osọhia 12:9) Satani sọ jlo dọ mẹdevo lẹ ni ṣiatẹ sọta Jiwheyẹwhe ga. E penugo nado doyẹklọ Evi, podọ sọn whenẹnu e ko doyẹklọ suhugan gbẹtọvi lẹ tọn. Ṣigba, mẹdelẹ taidi Abẹli, Enọku po Noa po yin nugbonọ na Jehovah.—Heblu lẹ 11:4, 5, 7.

8. (a) Nawẹ angẹli delẹ wá lẹzun aovi lẹ gbọn? (b) Etẹwẹ aovi lẹ wà nado họ̀ngán sọn Singigọ lọ mẹ?

8 To ojlẹ Noa tọn mẹ, angẹli delẹ ṣiatẹ bo tọ́n sọn fihe yé nọ nọ̀ to olọn mẹ nado wá nọgbẹ̀ to aigba ji taidi gbẹtọvi. Etẹwutu? Biblu dọna mí dọ, na yé jlo na dà asi sọn gbẹtọvi lẹ mẹ wutu wẹ. (Hia Jenẹsisi 6:2.) Amọ́, e ma sọgbe na angẹli lẹ nado wàmọ. (Juda 6) Taidi angẹli ylankan enẹlẹ, suhugan gbẹtọvi he nọgbẹ̀ to ojlẹ enẹ mẹ lẹ tọn wẹ gblezọn bo nọ wadanu. Enẹwutu, Jehovah magbe nado và mẹylankan lẹ sudo gbọn singigọ de hinhẹnwa aigba lọ pete ji dali. Ṣigba, e whlẹn devizọnwatọ nugbonọ etọn lẹ. (Jenẹsisi 7:17, 23) Angẹli ylankan lọ lẹ lẹkọyi olọn mẹ nado họ̀ngán. Biblu ylọ angẹli ylankan enẹlẹ dọ aovi lẹ. Yé de nado kọnawudopọ hẹ Satani to atẹṣiṣi etọn mẹ, bọ Lẹgba lẹzun ogán yetọn.—Matiu 9:34.

9. (a) Etẹwẹ jọ do aovi lẹ go to whenue yé lẹkọyi olọn mẹ? (b) Etẹwẹ mí na gbadopọnna din?

9 Na aovi enẹlẹ ko ṣiatẹ wutu, Jehovah masọ kẹalọyi yé do whẹndo etọn mẹ ba. (2 Pita 2:4) Aovi lẹ masọ sọgan diọwunmẹ zun gbẹtọvi ba, ṣigba yé gbẹ́ “to aigba fininọ lẹpo klọ.” (Osọhia 12:9; 1 Johanu 5:19) Todin, gbọ mí ni gbadopọnna lehe yé nọ penugo nado klọ mẹsusu sọmọ do.—Hia 2 Kọlintinu lẹ 2:11.

 LEHE AOVI LẸ NỌ KLỌMẸ GBỌN

10. Nawẹ aovi lẹ nọ domọwle gbẹtọ lẹ gbọn?

10 Aliho susu mẹ wẹ aovi lẹ nọ klọmẹ te. Eyin gbẹtọ lẹ jlo na biọ kanṣiṣa mẹ hẹ aovi lẹ, yé nọ tẹnpọn nado dọho hẹ yé tlọlọ kavi gbọn mẹde gblamẹ, vlavo amanuwatọ de kavi afinyọnnọ de. Kanṣiṣa tintindo hẹ aovi lẹ nọ yin yiylọdọ aovinuwiwa kavi afinyọnnuwiwa. Ṣigba, Biblu degbena mí dọ mí dona nọla petepete na nudepope he tindo kanṣiṣa hẹ aovi lẹ. (Galatianu lẹ 5:19-21) Etẹwutu? Kẹdẹdile gbéyantọ de nọ yí omọ̀ de zan nado wle kanlin lẹ do, aovi lẹ nọ yí ayiha gigẹdẹ lẹ zan nado domọwle gbẹtọ lẹ bo deanana yé.—Pọ́n Nudọnamẹ Dogọ 26tọ.

11. Etẹwẹ yin dọṣẹdidọ, podọ naegbọn mí dona dapana ẹn?

11 Dopo to ayiha gigẹdẹ yetọn lẹ mẹ wẹ dọṣẹdidọ. Enẹ wẹ tintẹnpọn nado yí huhlọn he hugan jọwamọ tọn lẹ zan nado dindona sọgodo kavi nude he búdò-domẹ. Mẹde sọgan tẹnpọn nado wà ehe gbọn sunwhlẹvu lẹ pinpọn, fákinkan, numọ namẹ, ohia lẹ mimọ to odlọ mẹ kavi alọpahomẹ pinpọn dali. Mẹsusu nọ lẹndọ owù de ma to onú mọnkọtọn lẹ mẹ, ṣigba lalo wẹ. Owùnu daho lẹ wẹ yé yin. Di apajlẹ, Biblu dohia dọ aovi lẹ po dọṣẹdọtọ lẹ po wẹ nọ wazọ́n alọ to alọmẹ. To Owalọ lẹ 16:16-18 mẹ, mí hia otàn “aovi dọṣẹdidọ tọn de” tọn he gọalọna viyọnnu de nado nọ ‘dọ dọṣẹ.’ To whenue apọsteli Paulu yàn aovi lọ jẹgbonu, viyọnnu lọ hẹn nugopipe dọṣẹdidọ tọn etọn bu.

12. (a) Naegbọn tintẹnpọn nado dọho hẹ oṣiọ lẹ do yin owùnu? (b) Etẹwutu devizọnwatọ Jiwheyẹwhe tọn lẹ ma nọ doalọ to aovinuwiwa lẹ mẹ?

12 Aovi lẹ sọ nọ yí ayiha gigẹdẹ devo zan nado domọwle gbẹtọ lẹ. Yé nọ tẹnpọn nado hẹn mí yise dọ e yọnbasi nado dọho hẹ oṣiọ lẹ, podọ dọ mẹhe ko kú lẹ gbẹ́ to gbẹnọ to fidevo bo sọgan dọho hẹ mí kavi gbleawuna mí.  Di apajlẹ, eyin họntọn kavi hẹnnumẹ mẹde tọn kú, e sọgan yì afinyọnnuwatọ de, vlavo kẹnsinọ de dè, he na dọna ẹn dọ e gán dọho hẹ omẹ etọn he ko kú lọ. Kẹnsinọ lọ sọgan dọ nuhe fọnjlodotenamẹ de na mẹlọ gando họntọn kavi hẹnnumẹ etọn he ko kú lọ go bo tlẹ sọgan dọho di mẹkúkú lọ. (1 Samuẹli 28:3-19) Aṣa ṣiọdidi tọn susu wẹ sọ sinai do nuyise lọ ji dọ oṣiọ lẹ gbẹ́ to gbẹnọ to fidevo. Delẹ to aṣa enẹlẹ mẹ wẹ agọ́wiwa to ṣiọdidi whenu, oṣiọ-nuwiwa whemẹwhemẹ tọn lẹ, oyẹsu fifọna oṣiọ, asuhọ̀-ninọ, kavi nuwiwa zándidlọ tọn wunmẹ delẹ. Eyin Klistiani lẹ gbẹ́ nado doalọ to aṣa enẹlẹ mẹ, hẹnnumẹ kavi kọmẹnu yetọn lẹ sọgan mọhodọdo yé go, zun yé, kavi sánkanna haṣinṣan yetọn hẹ yé petepete. Ṣigba, Klistiani lẹ yọnẹn dọ oṣiọ lẹ ma to gbẹnọ to fidevo. Mí ma sọgan dọho hẹ yé, podọ yé ma gán gbleawuna mí. (Salmu lẹ 115:17) Họ́ dewe. Ma tẹnpọn gbede nado dọho hẹ oṣiọ lẹ kavi aovi lẹ blo, podọ a doalọ to aovinuwiwa lẹ mẹ gbede blo.—Hia Deutelonomi 18:10, 11; Isaia 8:19.

13. Etẹwẹ susu mẹhe ko nọ dibuna aovi lẹ dai lẹ tọn ko penugo nado wà?

13 Gbọnvona dọ aovi lẹ nọ doyẹklọ gbẹtọ lẹ, yé sọ nọ dobuna yé. To egbehe, Satani po aovi etọn lẹ po yọnẹn dọ “whenu gli de” wẹ pò na yé whẹpo Jiwheyẹwhe nado de yé sẹ̀ sọn aigba ji, enẹwutu wẹ danuwiwa po kanyinylan yetọn po do to jijideji todin hugan gbede pọ́n. (Osọhia 12:12, 17) Ṣigba, fọtọ́n susu mẹhe ko nọ dibuna aovi lẹ dai lẹ tọn wẹ masọ to budina yé ba. Nawẹ yé wagbọn do tún yede dote sọn obu aovi lẹ tọn si?

NỌAVÙNTE SỌTA AOVI LẸ BO YÍ DEWE SỌN YÉ SI

14. Taidi Klistiani owhe kanweko tintan tọn lẹ, nawẹ mí sọgan yí míde sọn aovi lẹ si gbọn?

14 Biblu do lehe mí sọgan nọavùnte sọta aovi lẹ bo yí  míde sọn yé si gbọn hia mí. Di apajlẹ, mẹhe nọ nọ̀ tòdaho Efesu tọn mẹ delẹ ko nọ dọho hẹ aovi lẹ dai whẹpo do wá yọ́n nugbo lọ. Nawẹ yé yí yede sọn aovi lẹ si gbọn? Biblu dọmọ: “Susu mẹhe yin nujlẹtọ lẹ tọn bẹ owe yetọn lẹ pli bo mẹ̀ yé to mẹlẹpo nukọn.” (Owalọ lẹ 19:19) Na yé jlo na lẹzun Klistiani wutu, yé mẹ̀ owe yetọn he gando nujijlẹ go lẹpo. Afọdide dopolọ wẹ mílọsu dona ze to egbehe. Mẹdepope he jlo na sẹ̀n Jehovah dona bẹ nuhe to e si bo tindo kanṣiṣa hẹ aovi lẹpo dlan. Ehe bẹ owe, linlinwe, owe he nọ do odù he jọ mẹdopodopo hia (horoscope), sinima, nuhiho, aihundida, podọ etlẹ yin fọto he nọ do majiki, nuwiwa aovi lẹ tọn kavi nujijlẹ lẹ hia di nuhe ma do owù kavi di awuvivinu lẹ hẹn. E sọ bẹ nuhe mẹlẹ nọ do kavi sìn do agbasa nado glo nuylankan lẹ hẹn.—1 Kọlintinu lẹ 10:21.

15. Nudevo tẹwẹ mí sọ dona wà nado nọavùnte sọta Satani po aovi lẹ po?

15 Owhe delẹ to whenue omẹ Efesu tọn lẹ ko mẹ̀ owe nujijlẹ tọn yetọn lẹ godo, apọsteli Paulu wlan dọ yé gbẹ́ dona ‘diahi’ bo hoavùn “sọta huhlọn gbigbọ ylankan” tọn lẹ. (Efesunu lẹ 6:12) Mọwẹ, dile etlẹ yindọ yé ko mẹ̀ owe yetọn lẹ, aovi lẹ gbẹ́ to tintẹnpọn nado yinuwado yé ji. Enẹwutu, nudevo tẹwẹ yé sọ dona wà? Paulu dọna yé dọmọ: “Mì ze awọ̀yinu daho yise tọn, ehe mì sọgan yí do ṣimiyọ́n [kavi, doalọtena] ogá miyọ́nnọ mẹylankan lọ tọn lẹpo.” (Efesunu lẹ 6:16) Kẹdẹdile awọ̀yinu de nọ basi hihọ́na awhànfuntọ de to awhàngbenu do, yise mítọn sọgan basi hihọ́na mí. Eyin mí deji mlẹnmlẹn dọ Jehovah sọgan basi hihọ́na mí, mí na penugo nado nọavùnte sọta Satani po aovi lẹ po.—Matiu 17:20.

16. Nawẹ mí sọgan hẹn yise mítọn to Jehovah mẹ lodo dogọ gbọn?

16 Nawẹ mí sọgan hẹn yise mítọn to Jehovah mẹ lodo  dogọ gbọn? Mí dona nọ hia Biblu egbesọegbesọ bo plọn nado nọ ganjẹ Jehovah go nado mọ hihọ́. Eyin mí dejido Jehovah go nugbonugbo, Satani po aovi lẹ po ma na penugo nado gbleawuna mí.—1 Johanu 5:5.

17. Nudevo tẹwẹ na basi hihọ́na mí sọn aovi lẹ si?

17 Nudevo tẹwẹ Klistiani Efesu tọn lẹ sọ dona wà? Aovinuwiwa kẹdẹ wẹ gọ́ tòdaho he mẹ yé te lọ. Enẹwutu, Paulu dọna yé dọ: ‘To ninọmẹ lẹpo mẹ, mì nọ gbọṣi odẹ̀ mẹ.’ (Efesunu lẹ 6:18 ) Yé dona nọ biọ hihọ́ Jehovah tọn to whelẹponu. Bọ míwlẹ lo? Mílọsu to gbẹnọ to aihọn he gọ́ na aovinuwiwa de mẹ. Enẹwutu, mí dona nọ biọ hihọ́ Jehovah tọn, bo nọ yí oyín etọn zan to whenue mí to dẹ̀ho. (Hia Howhinwhẹn lẹ 18:10.) Eyin mí zindonukọn nado nọ biọ to Jehovah si dọ e ni whlẹn mí sọn Satani si, ewọ na sè odẹ̀ mítọn.—Salmu lẹ 145:19; Matiu 6:13.

18, 19. (a) Nawẹ mí sọgan gbawhàn Satani po aovi lẹ po tọn gbọn? (b) Kanbiọ tẹwẹ mí na mọ gblọndo na to weta he bọdego mẹ?

18 Eyin mí bẹ nuhe to mí si bo tindo kanṣiṣa hẹ aovinuwiwa lẹpo dlan bo ganjẹ hihọ́-basinamẹ Jehovah tọn go, mí sọgan nọavùnte sọta Satani po aovi lẹ po. Mí ma dona dibuna yé. (Hia Jakọbu 4:7, 8.) Jehovah dohuhlọn taun hú aovi lẹ. E sayana yé to azán Noa tọn gbè, e nasọ và yé sudo to sọgodo. (Juda 6) Flindọ, e ma yin míwlẹ ṣo wẹ to avùn lọ hò. Jehovah yí angẹli etọn lẹ do to hihọ́ basina mí. (2 Ahọlu lẹ 6:15-17) Mí sọgan deji dọ po alọgọ Jehovah tọn po, mí na gbawhàn Satani po aovi lẹ po tọn.—1 Pita 5:6, 7; 2 Pita 2:9.

19 Ṣigba, eyin Satani po aovi lẹ po to awufiẹsa hẹnwa sọmọ, naegbọn Jiwheyẹwhe ma ko và yé sudo kakajẹ din? Mí na mọ gblọndo kanbiọ enẹ tọn to weta he bọdego mẹ.