Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

NUDỌNAMẸ DOGỌ

Whẹdazan—Etẹwẹ E Yin?

Whẹdazan—Etẹwẹ E Yin?

NUKUN tẹwẹ hiẹ nọ yí do pọ́n Whẹdazan? Mẹsusu lẹndọ dopodopo alindọn liva liva lẹ tọn na yin hinhẹnwa ofìn Jiwheyẹwhe tọn nukọn debọdo-dego, bọ mẹdopodopo na yin whẹdana to finẹ. Mẹdelẹ na yin didona nado dugbẹ to olọn mẹ, podọ mẹdevo lẹ na yin whẹgbledo nado yin yasana kakadoi. Ṣigba, Biblu do ojlẹ ehe hia to aliho he gbọnvo pete mẹ. Ohó Jiwheyẹwhe tọn basi zẹẹmẹ etọn taidi ojlẹ todido po hẹngọwa po tọn, e ma yin ojlẹ budonamẹ tọn gba.

Mí hia zẹẹmẹ he apọsteli Johanu basi gando Whẹdazan go to Osọhia 20:11, 12 mẹ dọmọ: “Yẹn sọ mọ ofìn wewe daho de, po ewọ he sinai to e ji po, nukọn mẹhe tọn aigba po olọn po họnyi te; yè masọ mọ tẹnmẹ de na yé ba. Yẹn sọ mọ oṣiọ lẹ, pẹvi po daho po, yé ṣite to Jiwheyẹwhe nukọn; yè hùn owe lẹ dai; yè sọ hùn owe devo de dai, he yin owe ogbẹ̀ tọn; yè sọ dawhẹna oṣiọ lẹ sọn nuhe yè wlan do owe lẹ lọ mẹ lẹ mẹ, kẹdẹdi azọ́n yetọn lẹ.” Be a doayi Whẹdatọ he yin nùdego tofi lọ go ya?

Jehovah Jiwheyẹwhe wẹ Whẹdatọ daho hugan gbẹtọ tọn. Ṣigba, e deazọ́n whẹdida tọn ehe lọ na mẹdevo. Sọgbe hẹ Owalọ lẹ 17:31, apọsteli Paulu dọ dọ Jiwheyẹwhe “ko de azán de, ehe mẹ ewọ na dawhẹna aihọn to dodo mẹ to dawe he ewọ ko do de mẹ.” Jesu Klisti he yin finfọnsọnku lọ wẹ yin Whẹdatọ dide ehe. (Johanu 5:22) To whelọnu lo, whetẹnu wẹ Whẹdazan lọ na bẹjẹeji? Nawẹ e na dẹnsọ?

Owe Osọhia tọn dohia dọ Whẹdazan na bẹjẹeji to awhàn Amagẹdọni tọn godo, to whenuena titonu Satani tọn ehe na ko yin vivasudo.* (Osọhia 16:14, 16; 19:19-20:3) To Amagẹdọni godo, Satani po aovi etọn lẹ po na yin ginglọndo odò mapote mẹ na owhe fọtọ́n. To ojlẹ enẹ mẹ, whédutọgbẹ́ olọn mẹ tọn 144 000 lẹ na yin whẹdatọ bo nasọ duahọlu hẹ “Jesu họ̀ owhe fọtọ́n.” (Osọhia 14:1-3; 20:1-4; Lomunu lẹ 8:17) Whẹdazan ma yin nuwiwa plaplaji tọn he na dẹn na ganhiho 24 de poun gba. E na dẹn-to-aimẹ na owhe fọtọ́n.

To ojlẹ owhe fọtọ́n tọn enẹ lọ whenu, Jesu Klisti na “dawhẹna mẹhe to ogbẹ̀ po oṣiọ lẹ po.” (2 Timoti 4:1) “Mẹhe to ogbẹ̀” lẹ na yin “gbẹtọ susugege” lọ he lùn Amagẹdọni tọ́n. (Osọhia 7:9-17) Apọsteli Johanu sọ mọ ‘oṣiọ lẹ to ote to ofìn’ whẹdida tọn nukọn. Dile Jesu dopagbe etọn do, “mẹhe tin to yọdò [oflin tọn] mẹ lẹpo na sè ogbè [Klisti tọn], bo na tọnjẹgbonu” gbọn fọnsọnku dali. (Johanu 5:28, 29; Owalọ lẹ 24:15) Ṣigba to dodonu tẹ ji wẹ mẹlẹpo na yin whẹdana te?

Sọgbe hẹ numimọ apọsteli Johanu tọn, “yè hùn owe lẹ dai,” podọ “yè sọ dawhẹna oṣiọ lẹ sọn nuhe yè wlan do owe lẹ lọ mẹ lẹ mẹ, kẹdẹdi azọ́n yetọn.” Be kandai walọ he gbẹtọ lẹ ko zan whẹpo do kú tọn wẹ tin to owe ehelẹ mẹ ya? Lala, whẹdida ma na yin zize sinai do nuhe gbẹtọ lẹ wà whẹpo do kú ji gba. Nawẹ mí wagbọn do yọnẹn? Biblu dọmọ: “Yè suwhẹna ewọ he kú sọn ylando si.” (Lomunu lẹ 6:7) Gbọnmọ dali, mẹhe yin finfọnsọnku lẹ na gọwá ogbẹ̀ matin ylando depope. Enẹwutu owe lọ lẹ dona ko nọtena nubiọtomẹsi dogọ Jiwheyẹwhe tọn lẹ. Nado nọgbẹ̀ kakadoi, mẹhe lùn Amagẹdọni tọ́n lẹ po mẹhe yin finfọnsọnku lẹ po dona setonuna gbedide Jiwheyẹwhe tọn lẹ, gọna nubiọtomẹsi yọyọ depope he Jehovah sọgan dehia to owhe fọtọ́n lọ gblamẹ lẹ. Na enẹ tọn wutu, gbẹtọ lẹ na yin whẹdana to dodonu nuhe yé wà to Whẹdazan whenu lẹ tọn ji.

To Whẹdazan lọ whenu wẹ gbẹtọ liva susu na tindo dotẹnmẹ hundote yetọn tintan nado plọnnu gando ojlo Jiwheyẹwhe tọn go podọ nado nọgbẹ̀ sọgbe hẹ ẹ. Ehe zẹẹmẹdo dọ azọ́n mẹpinplọn tọn pligidi de wẹ na wá aimẹ. Na nugbo tọn, “mẹhe to aihọn mẹ lẹ na plọn dodo.” (Isaia 26:9) Ṣigba, e ma yin mẹlẹpo wẹ na jlo nado nọgbẹ̀ sọgbe hẹ ojlo Jiwheyẹwhe tọn. Isaia 26:10 dọmọ: “Eyin yè do nukundagbe hia mẹylankan, e ma to na plọn dodo: to aigba dodo tọn ji, e na jọ jijọ mawadodo tọn, e ma to na mọ yẹyi daho OKLUNỌ tọn.” Mẹylankan ehelẹ na yin vivasudo mlẹnmlẹn to Whẹdazan whenu.—Isaia 65:20.

To vivọnu Whẹdazan tọn, gbẹtọvi he luntọ́n lẹ na ko “tin to ogbẹ̀” taidi gbẹtọvi pipé. (Osọhia 20:5) Enẹwutu, to Whẹdazan whenu, gbẹtọvi lẹ na yin hinhẹngọwa ninọmẹ pipé dowhenu tọn mẹ. (1 Kọlintinu lẹ 15:24-28) To whelọnu lo, mẹwhlepọn godo tọn na wá aimẹ. Satani na yin tuntundote sọn fie e yin ginglọndo podọ dotẹnmẹ godo tọn na yin nina ẹn nado klọ gbẹtọvi lẹ. (Osọhia 20:3, 7-10) Mẹhe duto ewọ ji lẹ na duvivi opagbe he Biblu do lọ tọn to gigọ́mẹ he dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.” (Psalm 37:29) Mọwẹ, Whẹdazan na yin dona de hlan gbẹtọvi nugbonọ lẹpo!


*  Gando Amagẹdọni go, jaale pọ́n Étude perspicace des Écritures, Bladopọ 2 weda 63-4, 1073-4, po weta 20tọ owe Sẹ̀n Jiwheyẹwhe Nugbo Dopokẹdẹ Lọ tọn po, Kunnudetọ Jehovah tọn lẹ wẹ zín owe awe ehelẹ jẹgbonu.

← Pọ́n weta he gandego