Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

WETA FỌTỌ̀N

Sinsẹ̀n-Bibasi He Jiwheyẹwhe Nọ Kẹalọyi

Sinsẹ̀n-Bibasi He Jiwheyẹwhe Nọ Kẹalọyi

Be sinsẹ̀n lẹpo wẹ nọ hẹn homẹhun Jiwheyẹwhe ya?

Nawẹ mí sọgan yọ́n sinsẹ̀n nugbo lọ gbọn?

Mẹnu lẹ wẹ yin sinsẹ̀n-basitọ nugbo Jiwheyẹwhe tọn to aigba ji to egbehe?

JEHOVAH JIWHEYẸWHE nọ hò mítọn pọ́n tlala bosọ nọ jlo dọ mí ni mọaleyi sọn anademẹ owanyinọ etọn mẹ. Eyin mí sẹ̀n ẹn to aliho he sọgbe mẹ, mí na tindo ayajẹ bo na dapana nuhahun gbẹ̀mẹ tọn susu. Mí nasọ tindo dona po alọgọ etọn po. (Isaia 48:17) Ṣigba, sinsẹ̀n kanweko susu wẹ tin he dọ dọ emi nọ plọnmẹ nugbo gando Jiwheyẹwhe go. Ṣogan, nuplọnmẹ yetọn gando mẹhe Jiwheyẹwhe yin po nuhe ewọ nọ donukun sọn mí si lẹ po go gbọnvo tlala.

2 Nawẹ a sọgan yọ́n aliho he sọgbe lọ he mẹ hiẹ na sẹ̀n Jehovah te gbọn? E ma biọ dọ hiẹ ni dindona nuplọnmẹ sinsẹ̀n lẹpo tọn bo yí ode jlẹdo dego gba. Nuhe hiẹ dona wà poun wẹ yindọ a dona dindona nuhe Biblu plọn mí taun gando sinsẹ̀n-bibasi nugbo go. Di apajlẹ: To otò susu mẹ, akuẹ he mayin akuẹ-jọ-akuẹ lẹ nọ yin bibasi gbayipe. Eyin azọ́n yin didena we nado ṣinyan akuẹ he mayin akuẹ-jọ-akuẹ mọnkọtọn lẹ dovo, nawẹ hiẹ na yọ́n akuẹ mọnkọtọn lẹ gbọn? Be hiẹ na tẹnpọn nado plọn wunmẹ akuẹ lọ tọn he tin lẹpo do apọ̀nmẹ wẹ ya? Lala. Nuyọnẹnnu wẹ e na yin dọ hiẹ ni plọn bo yọ́n akuẹ-jọ-akuẹ lẹ. Eyin a ko yọ́n akuẹ-jọ-akuẹ lẹ, e na bọawu todin nado yọ́n akuẹ he mayin akuẹ-jọ-akuẹ lẹ. Mọdopolọ, eyin mí plọn lehe mí sọgan yọ́n sinsẹ̀n nugbo lọ do, e na bọawu na mí nado sọgan yọ́n sinsẹ̀n he yin lalo lẹ.

3Onú titengbe wẹ e yin dọ mí ni sẹ̀n Jehovah to aliho he mẹ ewọ kẹalọyi te. Mẹsusu wẹ yise dọ homẹ Jiwheyẹwhe tọn nọ hùn do sinsẹ̀n lẹpo go, ṣigba Biblu ma plọnmẹ enẹ gba. Podọ e ma tlẹ ko pé nado sọalọakọ́n nado yin Klistiani de poun gba. Jesu dọmọ: “E ma yin mẹdepope he ylọ mi, Oklunọ, Oklunọ, wẹ na biọ ahọludu olọn tọn mẹ gba; adavo ewọ he wà ojlo Otọ́ ṣie he tin to olọn mẹ tọn.” Enẹwutu, nado yin alọkẹyi gbọn Jiwheyẹwhe dali, mí dona plọn nuhe Jiwheyẹwhe biọ to mí si bosọ basi i. Jesu ylọ mẹhe ma wà ojlo Jiwheyẹwhe tọn lẹ dọ “azọ́n ylankan watọ” lẹ. (Matiu 7:21-23) Taidi akuẹ he mayin akuẹ-jọ-akuẹ, sinsẹ̀n lalo ma tindo nuhọakuẹ depope. Dehe tlẹ sọ ylanhu wẹ yindọ, sinsẹ̀n mọnkọtọn yin owùnu taun.

4Mẹhe tin to aigba ji lẹpo wẹ Jehovah hùn dotẹnmẹ dotena nado mọ ogbẹ̀ madopodo yí. Ṣigba nado tindo ogbẹ̀ mavọmavọ to Paladisi mẹ, mí dona sẹ̀n Jiwheyẹwhe to aliho he sọgbe mẹ todin bosọ zan gbẹzan he ewọ kẹalọyi. E blawu dọ, mẹsusu gbẹ́ nado wàmọ. Enẹ wẹ zọ́n bọ Jesu dọmọ: “Mì gbọ̀n họntonu bibó mẹ biọ whégbè, na gbigblo wẹ họntonu lọ, gblagada sọ wẹ ali lọ, he hẹnmẹ yì dindọn mẹ, susu sọ wẹ yé he to zọnlinzin gbọn finẹ lẹ. Na bibó wẹ họntonu lọ, jijlọ sọ wẹ ali lọ, he hẹnmẹ yì ogbẹ̀ mẹ, pẹvide wẹ yé he dín in mọ lẹ.” (Matiu 7:13, 14) Sinsẹ̀n nugbo nọ planmẹ yì ogbẹ̀ madopodo mẹ. Sinsẹ̀n lalo nọ planmẹ yì vasudo mẹ. Jehovah ma jlo dọ mẹdepope ni yin vivasudo, enẹwutu wẹ e to dotẹnmẹ hundote na gbẹtọ lẹ to filẹpo nado plọnnu gando ewọ go. (2 Pita 3:9) Enẹwutu, e họnwun dọ aliho he mẹ mí to Jiwheyẹwhe sẹ̀n te sọgan dekọtọn do ogbẹ̀ kavi okú mẹ na mí.

LEHE MÍ SỌGAN YỌ́N SINSẸ̀N NUGBO LỌ GBỌN

5Nawẹ ‘aliho he planmẹ yì ogbẹ̀ mẹ lọ’ sọgan yin mimọ gbọn? Jesu dọ dọ sinsẹ̀n nugbo lọ na sọawuhia to gbẹzan mẹhe to bibasi i lẹ tọn mẹ. E dọmọ: “Mì na yọ́n yé gbọn sinsẹ́n yetọn mẹ.…Atin dagbe lẹpo nọ hẹn sinsẹ́n dagbe jẹgbonu.” (Matiu 7:16, 17) To hogbe devo mẹ, mẹhe to sinsẹ̀n nugbo lọ basi lẹ na yin yinyọnẹn gbọn nuyise po walọyizan yetọn lẹ po dali. Dile etlẹ yindọ yé ma yin mẹpipe podọ yé nọ ṣinuwa, sinsẹ̀ntọ nugbonọ lẹ taidi pipli de nọ dovivẹnu nado wà ojlo Jiwheyẹwhe tọn. Mì gbọ mí ni gbadopọnna adà voovo ṣidopo he nọ do mẹhe to sinsẹ̀n nugbo lọ basi lẹ hia.

MẸHE TO JIWHEYẸWHE NUGBO LỌ SẸ̀N LẸ

  • nọ ze nuplọnmẹ yetọn lẹ sinai do Biblu ji
  • nọ sẹ̀n Jehovah kẹdẹ bo nọ hẹn oyín etọn zun yinyọnẹn
  • nọ tindo owanyi nujọnu tọn na ode awetọ
  • nọ kẹalọyi Jesu taidi mẹhe gblamẹ Jiwheyẹwhe na whlẹn gbẹtọvi lẹ gán te
  • ma yin apadewhe aihọn tọn
  • nọ lá Ahọluduta lọ taidi todido dopo akàn lọ
Omẹ akọ̀ voovo lẹ tọn to Jiwheyẹwhe sẹ̀n to pọmẹ

6Devizọnwatọ Jiwheyẹwhe tọn lẹ nọ ze nuplọnmẹ yetọn lẹ sinai do Biblu ji. Biblu lọsu dọmọ: “Owe-wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ, na nuplọnmẹ he tin to dodo mẹ: na Jiwheyẹwhe gbẹtọ nido pegan, he yè hẹn sọgbe mlẹnmlẹn hlan azọ́n dagbe lẹpo.” (2 Timoti 3:16, 17) Apọsteli Paulu wlanwe hlan Klistiani hatọ lẹ dọmọ: “Whenuena mì yí ohó Jiwheyẹwhe tọn, ehe mì sè sọn mí dè, mì ma yí ì di ohó gbẹtọ tọn gba, ṣigba le e te to nugbo mẹ, ohó Jiwheyẹwhe tọn.” (1 Tẹsalonikanu lẹ 2:13) Enẹwutu, nuyise po nuwiwa sinsẹ̀n nugbo lọ tọn lẹ po ma nọ sinai do pọndohlan kavi aṣa gbẹtọ tọn lẹ ji gba. Yé nọ sinai do Ohó gbọdo Jiwheyẹwhe tọn, yèdọ Biblu ji.

7Jesu Klisti ze apajlẹ he sọgbe lọ dai gbọn nuplọnmẹ etọn lẹ zize sinai do Ohó Jiwheyẹwhe tọn ji dali. E dọ to odẹ̀ mẹ hlan Otọ́ olọn mẹ tọn etọn dọmọ: “Ohó towe wẹ nugbo.” (Johanu 17:17) Jesu tindo yise to Ohó Jiwheyẹwhe tọn mẹ, podọ nuhe e plọnmẹ lẹpo sọgbe hẹ Owe-wiwe. Jesu nọ dọ whlasusu dọmọ: “Yè ko wlanwe etọn dọ.” (Matiu 4:4, 7, 10) Enẹgodo Jesu nọ de wefọ de. Mọdopolọ, to egbehe omẹ Jiwheyẹwhe tọn lẹ ma nọ plọnmẹ linlẹn yedetiti tọn lẹ gba. Yé yise dọ Biblu yin Ohó Jiwheyẹwhe tọn, podọ yé nọ ze nuplọnmẹ yetọn lẹ sinai do nuhe e dọ lẹ ji gligli.

8Mẹhe to sinsẹ̀n nugbo lọ basi lẹ nọ sẹ̀n Jehovah kẹdẹ bo nọ hẹn yinkọ etọn zun yinyọnẹn. Jesu lá dọmọ: “Hiẹ na litaina Oklunọ [Jehovah] Jiwheyẹwhe towe, ewọ dopo kẹdẹ wẹ hiẹ na nọ sẹ̀n.” (Matiu 4:10) Gbọnmọ dali, Jehovah kẹdẹ wẹ devizọnwatọ Jiwheyẹwhe tọn lẹ nọ sẹ̀n. Sinsẹ̀n-bibasi ehe bẹ oyín Jiwheyẹwhe nugbo lọ tọn po omẹ nankọ he ewọ yin po hinhẹnzun yinyọnẹn na gbẹtọ lẹ hẹn. Psalm 83:18 dọmọ: “Hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.” Jesu ze apajlẹ dai to alọgigọna mẹdevo lẹ nado wá yọ́n Jiwheyẹwhe mẹ, dile ewọ dọ to odẹ̀ mẹ do dọmọ: “Yẹn ko do oyín towe hia mẹhe hiẹ na mi sọn aihọn mẹ lẹ.” (Johanu 17:6) Mọdopolọ, to egbehe sinsẹ̀n-basitọ nugbo lẹ nọ plọnnu mẹdevo lẹ gando oyín Jiwheyẹwhe tọn, lẹndai etọn lẹ, po jẹhẹnu etọn lẹ po go.

9Omẹ Jiwheyẹwhe tọn lẹ nọ do owanyi nujọnu tọn he ma tindo ṣejannabi hia ode awetọ. Jesu dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.” (Johanu 13:35) Klistiani owhe kanweko tintan tọn lẹ tindo owanyi mọnkọtọn na yenọzo. Owanyi he Jiwheyẹwhe jlo dọ mí ni tindo nọ duto vogbingbọn sinmẹ agbasa tọn, lẹdo tọn, po aliglọnnamẹnu akọta tọn lẹ po ji bo nọ kọ̀n gbẹtọ lẹ dopọ do kanṣiṣa mẹmẹsunnu-yinyin nugbo tọn he ma yọ́n klan de mẹ. (Kọlọsinu lẹ 3:14) Hagbẹ sinsẹ̀n lalo tọn lẹ ma tindo mẹmẹsunnu-yinyin owanyinọ mọnkọtọn. Nawẹ mí yọ́n enẹ gbọn? Yé nọ hù ode awetọ na wiwọ́ akọta kavi hẹnnu tọn lẹ wutu. Klistiani nugbo lẹ ma nọ ze adanwànu nado hù mẹmẹsunnu Klistiani hatọ yetọn kavi mẹdevo depope gba. Biblu dọmọ: “Ehe mẹ wẹ yè to ovi Jiwheyẹwhe tọn lẹ sọhia te, po ovi Lẹgba tọn lẹ po: mẹdepope he ma wà dodo, e ma jọ sọn Jiwheyẹwhe dè gba, kavi ewọ he ma yiwanna mẹmẹsunnu etọn.…Mí ni yiwanna mínọzo. E ma yin taidi Kaini, he jọ sọn mẹylankan lọ dè, bo hù nọvisunnu etọn gba.”—1 Johanu 3:10-12; 4:20, 21.

10Nugbo wẹ dọ, owanyi nujọnu tọn ma nọte do gbigbẹ́ nado hù mẹdevo lẹ kẹdẹ ji gba. Klistiani nugbo lẹ nọ gbọn ṣejannabi matindo dali yí whenu, huhlọn, po nutindo yetọn lẹ po zan nado gọalọ bo na tuli ode awetọ yetọn. (Heblu lẹ 10:24, 25) Yé nọ gọalọna ode awetọ to ojlẹ ayimajai tọn mẹ, bo nọ yinuwa hẹ mẹdevo lẹ po nugbodidọ po. Na nugbo tọn, yé nọ yí ayinamẹ Biblu tọn do yizan mẹ to gbẹzan yetọn mẹ nado “nọ wà dagbe hlan mẹpopo.”—Galatianu lẹ 6:10.

11Klistiani nugbo lẹ kẹalọyi Jesu Klisti taidi mẹhe Jiwheyẹwhe yizan nado whlẹn mí gán. Biblu dọmọ: “Whlẹngán masọ tin to mẹdevo dè; na oyín de ma tin to olọn glọ he yè namẹ to gbẹtọ mẹ he yè nado whlẹn mí gán.” (Owalọ lẹ 4:12) Dile mí mọ to Weta 5tọ mẹ do, Jesu na ogbẹ̀ etọn taidi avọ́sinsan na gbẹtọ tonusetọ lẹ. (Matiu 20:28) Humọ, Jesu wẹ yin Ahọlu dide Jiwheyẹwhe tọn to Ahọluduta olọn mẹ tọn he na dugán do aigba lọ blebu ji mẹ. Podọ Jiwheyẹwhe biọ dọ mí ni setonuna Jesu bo yí nuplọnmẹ etọn lẹ do yizan mẹ eyin mí jlo ogbẹ̀ madopodo. Enẹwutu wẹ Biblu do dọmọ: “Mẹhe yise to Ovi mẹ tindo ogbẹ̀ madopodo: mẹhe ma yise to Ovi mẹ ma to na mọ ogbẹ̀.”—Johanu 3:36.

12Sinsẹ̀n-basitọ nugbo lẹ ma yin apadewhe aihọn tọn. To whenuena e tin to whẹdọtẹn to ogán Lomu tọn Pilati nukọn, Jesu dọmọ: “Ahọludu ṣie ma yin aihọn he tọn gba.” (Johanu 18:36) Mahopọnna otò depope he mẹ yé te, hodotọ nugbo Jesu tọn lẹ yin mẹmẹglọ na Ahọluduta olọn mẹ tọn etọn podọ enẹwutu yé nọ nọ̀ kada mlẹnmlẹn to whẹho tonudidọ aihọn tọn lẹ mẹ. Yé ma nọ tindo mahẹ to nudindọn etọn lẹ mẹ. Etomọṣo, devizọnwatọ Jehovah tọn lẹ ma nọ glọnalina nudide he mẹdevo lẹ basi gando awukinkọndopọ hẹ ogbẹ́ tonudidọ tọn de, yinkọ zizedai nado dugán, kavi vòbibla go. Podọ dile etlẹ yindọ sinsẹ̀n-basitọ nugbo Jiwheyẹwhe tọn lẹ tin to kada gando tonudidọ go, yé nọ setonuna osẹ́n otò tọn lẹ. Etẹwutu? Na Ohó Jiwheyẹwhe tọn degbena yé nado “yin mẹmẹglọ” na “huhlọn daho lẹ” he to gandu. (Lomunu lẹ 13:1) Eyin nuhe Jiwheyẹwhe biọ po nuhe titonu tonudidọ tọn biọ po wá sọta yede, sinsẹ̀n-basitọ nugbo lẹ nọ hodo apajlẹ apọsteli lẹ tọn, mẹhe dọmọ: “Míwlẹ ma hà nọma setonuna Jiwheyẹwhe hú gbẹtọ.”—Owalọ lẹ 5:29; Malku 12:17.

13Hodotọ nugbo Jesu tọn lẹ nọ dọyẹwheho dọ Ahọluduta Jiwheyẹwhe tọn wẹ yin todido dopo akàn lọ na gbẹtọvi lẹ. Jesu dọ dọdai dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:14) Kakati nado na tuli gbẹtọ lẹ nado ganjẹ gandudu gbẹtọ tọn lẹ go nado didẹ nuhahun yetọn, hodotọ nugbo Jesu Klisti tọn lẹ nọ lá Ahọluduta olọn mẹ Jiwheyẹwhe tọn taidi todido dopo kẹdẹ lọ na gbẹtọvi lẹ. (Psalm 146:3) Jesu plọn mí nado hodẹ̀ na gandudu dagbe hugan enẹ to whenuena e dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Ohó Jiwheyẹwhe tọn dọ dọdai dọ Ahọluduta olọn mẹ tọn ehe “na gbà ahọludu do flinflin bo sú ahọludu he [tin todin] lẹpo do, ewọ bo nasọ nọte kakadoi.”—Daniẹli 2:44.

14Gando nuhe mí ko gbadopọnna wayi todin lẹ go, kanse dewe dọmọ: ‘Pipli sinsẹ̀n tọn tẹwẹ nọ ze nuplọnmẹ etọn lẹpo sinai do Biblu ji bosọ hẹn oyín Jehovah tọn zun yinyọnẹn? Pipli tẹwẹ nọ do owanyi hia dile Jehovah jlo do, nọ do yise hia to Jesu mẹ, ma yin apadewhe aihọn tọn, bo nọ lá dọ Ahọluduta Jiwheyẹwhe tọn kẹdẹ wẹ yin todido nujọnu tọn dopo akàn lọ na gbẹtọvi lẹ? To pipli sinsẹ̀n tọn he tin to aihọn mẹ lẹpo mẹ, detẹ wẹ jẹ nubiọtomẹsi ehe lẹpo kọ̀n?’ Kunnudenu lẹ dohia hezeheze dọ Kunnudetọ Jehovah tọn lẹ wẹ.—Isaia 43:10-12.

Eyin hiẹ sẹ̀n Jehovah to pọmẹ hẹ omẹ etọn lẹ, hiẹ na mọale susu tlala yí hugan nuhe hiẹ jodo lẹ

Omẹ akọ̀ voovo lẹ tọn yin họntọn lẹ

ETẸWẸ HIẸ NA WÀ?

15Yise tintindo to Jiwheyẹwhe mẹ poun ma ko pé nado hẹn homẹhun in. Na taun tọn, Biblu dọ dọ aovi lẹ lọsu tlẹ yise dọ Jiwheyẹwhe tin. (Jakobu 2:19) Nalete, e họnwun dọ yé ma nọ wà ojlo Jiwheyẹwhe tọn bo masọ yin alọkẹyi gbọn ewọ dali. Eyin Jiwheyẹwhe na kẹalọyi mí, e ma ko pé nado yise dọ e tin poun gba, ṣigba mí sọ dona nọ wà ojlo etọn ga. Mí sọ dona klan míde dolá na sinsẹ̀n lalo bosọ tẹdo sinsẹ̀n-bibasi nugbo go.

16Apọsteli Paulu dohia dọ mí ma dona tindo mahẹ to sinsẹ̀n-bibasi lalo mẹ. E wlanwe dọmọ: “Oklunọ, dọmọ, mì tọ́nsọn ṣẹnṣẹn yetọn, bo nọ olá, mì gàn do onú mawé go blo; yẹn nasọ yí mì.” (2 Kọlintinu lẹ 6:17; Isaia 52:11) Enẹwutu Klistiani nugbo lẹ nọ dapana nudepope he yin kinkọndopọ hẹ sinsẹ̀n-bibasi lalo.

17Biblu dohia dọ sinsẹ̀n lalo wunmẹ lẹpo wẹ yin apadewhe “Babilọni Daho” lọ tọn.* (Osọhia 17:5) Yinkọ enẹ flin mí tòdaho Babilọni hohowhenu tọn, fie sinsẹ̀n lalo bẹjẹeji sọn to Singigọ azán Noa gbè tọn godo. Susu nuplọnmẹ po aṣa he gbayipe to sinsẹ̀n lalo mẹ todin lẹ po tọn ko bẹjẹeji sọn whenu dindẹn die to Babilọni. Di apajlẹ, Babilọninu lẹ nọ sẹ̀n yẹwhe atọ̀n-to-dopomẹ, kavi atọ̀n topọ. To egbehe, sinsẹ̀n-nuplọnmẹ tangan sinsẹ̀n susu tọn wẹ Atọ̀n-to-dopomẹ yin. Ṣigba Biblu plọn mí hezeheze dọ Jiwheyẹwhe nugbo dopo wẹ tin, yèdọ Jehovah, podọ Ovi etọn wẹ Jesu Klisti yin. (Johanu 17:3) Babilọninu lẹ sọ yise dọ gbẹtọ lẹ tindo alindọn jọmaku he nọ lùn okú tọ́n bo sọgan jiya to nọtẹn yasanamẹ tọn de mẹ. To egbehe, suhugan sinsẹ̀n lẹ tọn wẹ nọ plọnmẹ dọ alindọn kavi gbigbọ jọmaku sọgan jiya to olọnzomẹ.

18To whenuena e yindọ sinsẹ̀n-bibasi Babilọni hohowhenu tọn gbayipe gbọ̀n aigba lẹpo ji, Babilọni Daho egbezangbe tọn sọgan yin yiylọ po gbesisọ po dọ ahọluigba aihọn tọn heyin sinsẹ̀n lalo tọn. Podọ Jiwheyẹwhe ko dọ dọdai dọ ahọluigba sinsẹ̀n lalo tọn ehe na wá opodo to ajijimẹ. (Osọhia 18:8) Be a mọ nuhewutu e yin nujọnu dọ a ni nọla na adà Babilọni Daho lọ tọn lẹpo ya? Jehovah Jiwheyẹwhe jlo dọ hiẹ ni “tọ́nsọn e mẹ” po awuyiya po whẹpo e nido dẹ̀n gbau.—Osọhia 18:4.

19Taidi kọdetọn de na nudide towe nado tọ́nsọn sinsẹ̀n lalo mẹ, mẹdelẹ sọgan doalọtena gbẹdido hẹ we. Ṣigba, eyin hiẹ to sinsẹ̀n basi hlan Jehovah to pọmẹ hẹ omẹ etọn lẹ, hiẹ na mọale susu tlala yí hugan nuhe hiẹ jodo lẹ. Taidi devi fliflimẹ Jesu tọn he jo onú devo lẹ do nado hodo e lẹ, hiẹ na wá tindo mẹmẹsunnu po mẹmẹyọnnu gbigbọmẹ tọn susu lẹ po. Hiẹ na wá yin apadewhe whẹndo daho lẹdo aihọn pé livi susu Klistiani nugbo lẹ tọn, he nọ do owanyi nujọnu tọn hia we. Podọ hiẹ na tindo todido jiawu ogbẹ̀ madopodo tọn “to aihọn [kavi titonu] he ja mẹ.” (Malku 10:28-30) Vlavo to nukọnmẹ, mẹhe jẹagọdo we na nuyise towe wutu lẹ na wá kẹalọyi nuhe Biblu plọnmẹ lẹ bo na lẹzun sinsẹ̀n-basitọ Jehovah tọn lẹ.

20Biblu plọn mí dọ Jiwheyẹwhe na hẹn titonu ylankan ehe wá opodo to madẹnmẹ bo na yí aihọn yọyọ dodowiwa tọn de he ji Ahọluduta etọn na dugán do do diọtẹnna ẹn. (2 Pita 3:9, 13) Lehe aihọn enẹ na jiawu do sọ! Podọ to titonu yọyọ dodowiwa tọn enẹ mẹ, sinsẹ̀n dopo gee wẹ na tin, yèdọ sinsẹ̀n-bibasi nugbo dopo. Be e ma na yin nuyọnẹnnu nado ze afọdide he jẹ lẹ nado wá kọnawudopọ hẹ sinsẹ̀n-basitọ nugbo lẹ todin ya?

NUHE BIBLU PLỌN MÍ LẸ

  • Sinsẹ̀n nugbo dopo akàn wẹ tin.—Matiu 7:13, 14.
  • Sinsẹ̀n nugbo nọ yin yinyọnẹn gbọn nuplọnmẹ po walọ etọn lẹ po dali.—Matiu 7:16, 17.
  • Kunnudetọ Jehovah tọn lẹ nọ basi sinsẹ̀n he Jiwheyẹwhe kẹalọyi.—Isaia 43:10.

*  Na nudọnamẹ dogọ gando nuhewutu Babilọni Daho lọ nọtena ahọluigba aihọn tọn heyin sinsẹ̀n lalo tọn go, pọ́n Nudọnamẹ Dogọ.


Kanbiọ Nupinplọn Tọn Lẹ

1. Ale tẹlẹ wẹ mí na mọyi eyin mí sẹ̀n Jiwheyẹwhe to aliho he sọgbe mẹ?

2. Nawẹ mí sọgan yọ́n aliho he sọgbe lọ he mẹ mí na sẹ̀n Jehovah te gbọn, podọ apajlẹ tẹwẹ gọalọna mí nado mọnukunnujẹ ehe mẹ?

3. To gbesisọmẹ hẹ nuhe Jesu dọ, etẹwẹ mí dona wà eyin mí jlo na yin alọkẹyi gbọn Jiwheyẹwhe dali?

4. Etẹwẹ ohó Jesu tọn gando aliho awe lẹ go zẹẹmẹdo, podọ fie wẹ aliho dopodopo planmẹ yì?

5. Nawẹ mí sọgan yọ́n mẹhe to sinsẹ̀n nugbo lọ basi lẹ gbọn?

6, 7. Nukun tẹwẹ devizọnwatọ Jiwheyẹwhe tọn lẹ nọ yí do pọ́n Biblu, podọ nawẹ Jesu ze apajlẹ dai to whẹho ehe mẹ gbọn?

8. Etẹwẹ sinsẹ̀n-bibasi hlan Jehovah bẹhẹn?

9, 10. To aliho tẹlẹ mẹ wẹ Klistiani nugbo lẹ nọ do owanyi hia ode awetọ yetọn te?

11. Naegbọn e do yin onú titengbe nado kẹalọyi Jesu Klisti taidi mẹhe Jiwheyẹwhe yizan nado whlẹn mí gán?

12. Etẹwẹ apadewhe aihọn tọn mayin bẹhẹn?

13. Nukun tẹwẹ hodotọ nugbo Jesu tọn lẹ nọ yí do pọ́n Ahọluduta Jiwheyẹwhe tọn, podọ enẹwutu, afọdide tẹwẹ yé nọ ze?

14. Pipli sinsẹ̀n tọn tẹwẹ hiẹ mọdọ e jẹ nubiọtomẹsi lẹ na sinsẹ̀n-bibasi nugbo kọ̀n?

15. Gbọnvona yise tintindo dọ Jiwheyẹwhe tin, etẹwẹ ewọ sọ nọ biọ dogọ?

16. Etẹwẹ mí dona wà eyin mí nọ tindo mahẹ to sinsẹ̀n lalo mẹ?

17, 18. Etẹwẹ “Babilọni Daho” lọ yin, podọ naegbọn e do yin onú niyaniya tọn de nado “tọ́nsọn e mẹ”?

19. Ale tẹlẹ wẹ hiẹ na mọyi eyin a sẹ̀n Jehovah?

20. Etẹwẹ yin todido sinsẹ̀n-basitọ nugbo lẹ tọn to sọgodo?