Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

WETA WIDOPO

Naegbọn Jiwheyẹwhe Na Dotẹnmẹ Yajiji?

Naegbọn Jiwheyẹwhe Na Dotẹnmẹ Yajiji?

Be Jiwheyẹwhe wẹ nọ hẹn yajiji he to aihọn mẹ lẹ wá ya?

Whẹho tẹwẹ yin finfọndote to jipa Edẹni tọn mẹ?

Nawẹ Jiwheyẹwhe na vọ́ hẹngble he yajiji gbẹtọvi tọn ko hẹnwa lẹ jlado gbọn?

TO AWHÀNFUNFUN sinsinyẹn de godo to aigba he awhàn ko gbakija de ji, oṣiọ fọtọ́n susu yọnnu lẹ po ovi he ma yin awhànfuntọ lẹ po tọn yin didi dopọ do yọdò dopo mẹ bọ satin flinflin lẹ yin tùntùnte lẹdo yọdò lọ. Satin dopodopo tindo nukinkan lọ: “Etẹ dódó die?” To whedelẹnu kanbiọ awubla tọn mọnkọtọn wẹ suhugan gbẹtọ lẹ tọn nọ saba kanse. Kanbiọ awubla tọn enẹ wẹ gbẹtọ lẹ nọ kanse to whenuena awhàn, nugbajẹmẹji, azọ̀n, kavi sẹ́nhẹngba hẹn okú wá na mẹvivẹ yetọn, hẹn owhé yetọn gble, kavi hẹn yajiji sinsinyẹn wá yé ji to aliho devo lẹ mẹ. Yé nọ jlo nado yọ́n nuhewutu onú ylankan mọnkọtọn lẹ jọ do yé go.

2 Naegbọn Jiwheyẹwhe na dotẹnmẹ yajiji? Eyin Jehovah yin Jiwheyẹwhe ganhunupotọ, owanyinọ, nuyọnẹntọ, po dodonọ po, naegbọn aihọn do gọ́ na wangbẹna po mawadodo po? Be onú ehelẹ ko paṣa hiẹ lọsu pọ́n ya?

3Be e jẹagọ nado kàn nuhewutu Jiwheyẹwhe na dotẹnmẹ yajiji sè wẹ? Mẹdelẹ nọ hanú dọ kanbiọ mọnkọtọn lẹ kinkanse zẹẹmẹdo dọ yé ma tindo yise he lodo kavi dọ mẹmasi didohia wẹ e yin hlan Jiwheyẹwhe. Ṣigba, eyin hiẹ to Biblu hia, a na mọdọ omẹ nugbonọ he dibusi Jiwheyẹwhe delẹ ko kàn kanbiọ mọnkọtọn lẹ sè. Di apajlẹ, yẹwhegán Habbakuk kanse Jehovah dọmọ: “Etẹwutu wẹ hiẹ to onú ylankan dohia mi, bosọ to hunyanhunyan kẹdẹ pọ́n zọnmii? Podọ etẹwutu hẹngble po danuwiwa po tin to nukọn ṣie, podọ etẹwutu nutlọ do tin, podọ etẹwutu nudindọn sinsinyẹn do gbayipe?”—Habbakuk 1:3, NW.

Jehovah na hẹn yajiji lẹpo wá opodo

Ṣiọdidi de

4Be Jehovah gblewhẹdo Habbakuk yẹwhegán nugbonọ lọ na kanbiọ etọn lẹ wutu wẹ? Paali. Kakatimọ, Jiwheyẹwhe dike bọ ohó ahundoponọ Habbakuk tọn lẹ yin kinkàndai to Biblu mẹ. Jiwheyẹwhe sọ gọalọna ẹn nado mọnukunnujẹ whẹho lọ lẹ mẹ hezeheze bosọ hẹn yise etọn lodo. Nuhe Jehovah jlo na wà na hiẹ lọsu niyẹn. Flindọ, Biblu plọn mí dọ “ewọ to tukla mìtọn jẹ.” (1 Pita 5:7) Jiwheyẹwhe gbẹwanna kanyinylan po yajiji he nọ dekọtọn sọn e mẹ po hugan gbẹtọvi depope. (Isaia 55:8, 9) To whelọnu lo, naegbọn yajiji do sù sọmọ to aihọn mẹ?

NAEGBỌN YAJIJI DO SÙ SỌMỌ?

5Sinsẹ̀nnọ voovo lẹ wẹ ko kàn nuhewutu yajiji do sù sọmọ sè sinsẹ̀ngán po mẹplọntọ yetọn lẹ po. Gblọndo yetọn nọ saba yindọ Jiwheyẹwhe wẹ jlo dọ mí ni jiya podọ sọn whenu dindẹn die gbọ́n wẹ ewọ ko magbe nuhe na jọ lẹpo tọn, yèdọ kakajẹ nujijọ ylankan lẹ lọsu ji. Mẹsusu ko yin didọna dọ aliho Jiwheyẹwhe tọn lẹ dabla kavi dọ ewọ wẹ nọ hẹn okú wá na gbẹtọ lẹ—etlẹ yin yọpọvu lẹ ga—na yé nido yì nọpọ́ hẹ ẹ to olọn mẹ. Ṣigba, dile hiẹ ko plọn do, e ma yin Jehovah Jiwheyẹwhe wẹ nọ hẹn nuylankan lẹ wá gba. Biblu dọmọ: “E ni tin dẹ̀n do Jiwheyẹwhe, na ewọ na do wà ylankan; podọ sọn Ganhunupo dè, na ewọ na do wà ylanwa.”—Job 34:10.

6Be hiẹ yọ́n nuhewutu gbẹtọ lẹ nọ gbọn nuṣiwa dali gblewhẹdo Jiwheyẹwhe na yajiji he gbayipe to aihọn mẹ lẹ ya? To whẹho susu mẹ, yé nọ gblewhẹdo Jiwheyẹwhe Ganhunupotọ na yé lẹndọ ewọ wẹ to gandu do aihọn ehe ji wutu. Yé ma yọ́n nugbo he bọawu ṣigba bo yin titengbe he Biblu plọn mí gba. Hiẹ ko plọnnu gando nugbo enẹ go to Weta 3tọ owe ehe tọn mẹ. Na taun tọn, Satani Lẹgba wẹ to gandu do aihọn ehe ji.

7Biblu dọ ẹ hezeheze dọmọ: “Aihọn lẹpo sọ mlọnai to mẹylankan lọ mẹ.” (1 Johanu 5:19) Eyin hiẹ lẹnnupọndeji, be linlẹn enẹ ma sọgbe ya? Aihọn ehe nọ do walọ nudida gbigbọnọ mayinukundomọ he “nọ to aihọn lẹpo klọ” lọ tọn hia. (Osọhia 12:9) Satani yin wangbẹnamẹtọ, mẹklọtọ, po kanylantọ po. Na aihọn lọ tin to anademẹ etọn glọ wutu e gọ́ na wangbẹna, oklọ, po kanyinylan po. Dopo to whẹwhinwhẹ́n he wutu yajiji do sù sọmọ lẹ mẹ niyẹn.

8Whẹwhinwhẹ́n awetọ he wutu yajiji do sù sọmọ wẹ yindọ, dile mí dọhodeji to Weta 3tọ mẹ do, gbẹtọvi lẹ ko yin mapenọ podọ ylandonọ sọn atẹṣiṣi jipa Edẹni mẹ tọn lọ whenu gbọ́n. Ojlo vẹkuvẹku gbẹtọvi ylandonọ lẹ tọn wẹ nado dugán, podọ ehe nọ dekọtọn do awhàn, kọgbidinamẹ, po yajiji po mẹ. (Yẹwhehodọtọ 4:1; 8:9) Whẹwhinwhẹ́n atọ̀ntọ he wutu yajiji do tin wẹ “ojlẹ po kosọ po.” (Yẹwhehodọtọ 9:11) To aihọn he mẹ Jehovah ma to gandu taidi hihọ́-basinamẹtọ de te, gbẹtọ lẹ sọgan jiya na yé gbọn kosọ dali tin to nọtẹn de mẹ to ojlẹ nujijọ ylankan de tọn whenu wutu.

9Homẹmiọnnamẹnu wẹ e yin nado yọnẹn dọ Jiwheyẹwhe ma nọ hẹn yajiji wá gba. E ma yin ewọ wẹ nọ hẹn awhàn, sẹ́nhẹngba, kọgbidinamẹ, kavi nugbajẹmẹji jọwamọ tọn he nọ dekọtọn do yajiji mẹ na gbẹtọ lẹ wá gba. Etomọṣo, e jẹ dọ mí ni yọnẹn, Naegbọn Jehovah na dotẹnmẹ yajiji nado gbayipe? Eyin ewọ wẹ Ganhunupotọ lọ, be e tindo huhlọn nado doalọtena ẹn. To whelọnu lo, naegbọn ewọ ma ko yí huhlọn enẹ zan? Mí yọnẹn ganji dọ owanyinọ wẹ Jiwheyẹwhe, enẹwutu, e dona tindo whẹwhinwhẹ́n dagbe na abọẹninọ etọn.—1 Johanu 4:8.

WHẸHO TITENGBE DE YIN FINFỌNDOTE

10Nado sọgan yọ́n nuhewutu Jiwheyẹwhe na dotẹnmẹ yajiji, mí dona lẹnnupọn yigodo jẹ ojlẹ he mẹ yajiji bẹjẹeji te. Kanbiọ titengbe de fọndote to whenuena Satani hẹn Adam po Evi po nado vẹtolina Jehovah. Satani ma tindo ayihaawe gando huhlọn Jehovah tọn go gba. Satani tlẹ yọnẹn dọ huhlọn Jehovah tọn ma tindo dogbó. Enẹwutu, jlọjẹ Jehovah tọn nado dugán wẹ e jẹagọdo. Na e ylọ Jiwheyẹwhe dọ lalonọ he nọ whlá onú dagbe lẹ do mẹjidugando etọn lẹ wutu, Satani to didohia dọ Jehovah yin ogán ylankan. (Gẹnẹsisi 3:2-5) Nuhe dọ Satani te poun wẹ yindọ gbẹtọvi lẹ sọgan nọ fẹẹmẹ matin gandudomẹji Jiwheyẹwhe tọn. Ehe yin nukundidiọsọ nupojipetọ-yinyin Jehovah tọn, yèdọ jlọjẹ etọn nado dugán.

11Adam po Evi po ṣiatẹ sọta Jehovah. To hogbe devo mẹ, nuhe dọ yé te wẹ yindọ: “Mí ma tindo nuhudo gandudu Jehovah tọn. Mí sọgan basi nudide dagbe po oylan po tọn na míde.” Nawẹ Jehovah sọgan didẹ whẹho enẹ gbọn? Nawẹ e sọgan dohia nudida nuyọnẹntọ lẹpo dọ lalo do wẹ atẹṣitọ lọ lẹ te podọ dọ aliho gandudu tọn etọn wẹ yin dagbe hugan lọ gbọn? Mẹde sọgan dọ dọ Jiwheyẹwhe dona ko và atẹṣitọ lọ lẹ sudo poun bo dá mẹdevo lẹ. Ṣigba Jehovah ko dọ lẹndai etọn nado hẹn okún Adam po Evi po tọn gọ́ aigba nukunmẹ, podọ ewọ jlo dọ yé ni nọgbẹ̀ to paladisi mẹ to aigba ji. (Gẹnẹsisi 1:28) Jehovah nọ hẹn lẹndai etọn lẹ di to whepoponu. (Isaia 55:10, 11) Gbọnvona enẹ, atẹṣitọ lọ lẹ vivasudo to Edẹni ma na ko na gblọndo na whẹho he yin finfọndote gando jlọjẹ Jehovah tọn nado dugán go gba.

Mẹplọntọ de po wehọmẹvi etọn lẹ po

Be wehọmẹvi lọ pegan hú mẹplọntọ lọ wẹ?

12Mì gbọ mí ni lẹnnupọndo apajlẹ de ji. Mí ni dọ dọ mẹplọntọ de to hodọna wehọmẹvi etọn lẹ do lehe nuhahun sinsinyẹn de sọgan yin dididẹ gbọn ji. Wehọmẹvi he sewé ṣigba yin atẹṣitọ de sọalọakọ́n dọ aliho he mẹplọntọ lọ to yiyizan nado didẹ nuhahun lọ ma sọgbe, bo to didohia dọ mẹplọntọ lọ ma penugo. Atẹṣitọ ehe kudeji dọ emi sọgan didẹ nuhahun lọ to aliho dagbe hugan de mẹ. Wehọmẹvi delẹ lẹndọ nuhe dọ atẹṣitọ lọ te lẹ sọgbe, bọ yelọsu lẹzun atẹṣitọ. Etẹwẹ mẹplọntọ lọ dona wà? Eyin ewọ yàn atẹṣitọ lọ lẹ sọn klasi, nuyiwadomẹji tẹwẹ enẹ na tindo do wehọmẹvi he pò lẹ ji? Be yé ma na yise dọ nuhe wehọmẹvi lọ po mẹhe kọnawudopọ hẹ ẹ to atẹṣiṣi mẹ lẹ po dọ sọgbe ya? Wehọmẹvi he pò to klasi lẹpo sọgan hẹn sisi he yé tindo na mẹplọntọ lọ bu, bo na lẹndọ budi wẹ ewọ te ma nado yin didegbà. Ṣigba mí ni dọ dọ mẹplọntọ lọ na dotẹnmẹ atẹṣitọ lọ nado dohia mẹhe to klasi lọ lẹ lehe ewọ na didẹ nuhahun lọ do.

13Nuhe Jehovah ko wà sọgbe hẹ nuhe mẹplọntọ lọ wà. Flindọ e ma yin mẹhe ṣiatẹ to Edẹni mẹ lẹ kẹdẹ go wẹ whẹho lọ gando gba. Angẹli livi susu wẹ ze nukun dai bo to nupọn. (Job 38:7; Daniẹli 7:10) Lehe Jehovah penukundo atẹṣiṣi lọ go do na yinuwado angẹli enẹlẹ ji tlala podọ do nudida nuyọnẹntọ lẹpo ji to godo mẹ. Enẹwutu, etẹwẹ Jehovah wà? E ko na dotẹnmẹ Satani nado do lehe e sọgan dugán do gbẹtọvi lẹ ji gbọn hia. Jiwheyẹwhe ko sọ na dotẹnmẹ gbẹtọvi lẹ nado dugán do yede ji to anademẹ Satani tọn glọ.

14Mẹplọntọ he ji mí dọhodo to apajlẹ lọ mẹ yọnẹn dọ lalo do wẹ atẹṣitọ lọ po wehọmẹvi he nọgodona ẹn lẹ po te. Ṣigba e sọ yọnẹn dọ dotẹnmẹ nina yé nado do kunnudenu yetọn hia na wà dagbe na mẹhe to klasi lọ mẹ lẹpo. Eyin atẹṣitọ lọ lẹ gboawupo, wehọmẹvi nugbonọ lẹpo na mọdọ mẹplọntọ lọ kẹdẹ wẹ pegan nado deanana klasi lọ. Eyin mẹplọntọ lọ yàn atẹṣitọ depope sọn klasi to enẹgodo, yé na yọ́n nuhewutu e wàmọ. Mọdopolọ, Jehovah yọnẹn dọ gbẹtọvi po angẹli ahundoponọ lẹ po na mọaleyi eyin yé mọdọ Satani po atẹṣitọ hatọ etọn lẹ po gboawupo podọ dọ gbẹtọvi lẹ ma sọgan dugán do yedelẹ ji. Taidi Jẹlemia hohowhenu tọn, yé na plọn nugbo titengbe ehe dọ: “OKLUNỌ E, yẹn yọnẹn dọ aliho gbẹtọ tọn ma tin to ewọ lọsu mẹ gba: e ma tin to mẹhe to zọnlinzin mẹ nado do afọdide etọn lẹ gba.”—Jẹlemia 10:23.

NAEGBỌN E DO DẸN SỌMỌ?

15To whelọnu lo, naegbọn Jehovah do dike na yajiji ni dẹn to aimẹ sọmọ? Podọ naegbọn ewọ ma nọ glọnalina nujijọ ylankan lẹ? Eyọn, lẹnnupọndo onú awe he mẹplọntọ he ji mí dọhodo lọ ma na wà lẹ ji. Tintan, e ma na gbẹ́ dọ wehọmẹvi atẹṣitọ lọ ni ma na kunnudenu etọn blo. Awetọ, mẹplọntọ lọ ma na gọalọna atẹṣitọ lọ nado na kunnudenu etọn. Mọdopolọ, lẹnnupọndo onú awe he Jehovah ko magbe ma nado wà lẹ ji. Tintan, e ma glọnalina Satani po mẹhe kọnawudopọ hẹ ẹ lẹ po nado dohia dọ nuhe yé dọ sọgbe. Enẹwutu, e yin dandan nado na yé whenu. To owhe fọtọ́n susu whenuho gbẹtọ tọn gblamẹ, gbẹtọvi lẹ ko penugo nado tẹ́n gandudu wunmẹ voovo lẹ pọ́n. Gbẹtọvi lẹ ko tindo nukọnyiyi susu to lẹnunnuyọnẹn po azọ́nyinyọnẹn devo lẹ po mẹ, ṣigba whẹdida mawadodo, ohẹ́n, sẹ́nhẹngba, po awhàn po ko gbayipe zẹjlẹgo. E ko sọawuhia mlẹnmlẹn todin dọ gandudu gbẹtọ tọn ko gboawupo.

16Awetọ, Jehovah ma ko gọalọna Satani nado dugán do aihọn ehe ji. Di dohia, eyin Jiwheyẹwhe nọ glọnalina sẹ́nhẹngba ylankan lẹ, be enẹ ma na dohia dọ ewọ to alọgọna atẹṣitọ lọ lẹ ya? Be enẹ ma na dohia dọ Jiwheyẹwhe to jijlo dọ gbẹtọ lẹ ni yise dọ vlavo yé sọgan dugán do yedelẹ ji matin awugble ya? Eyin Jehovah yinuwa to aliho mọnkọtọn mẹ, ewọ na tindo mahẹ to lalo lọ mẹ. Ṣigba, “e glo Jiwheyẹwhe nado dolalo.”—Heblu lẹ 6:18.

Jiwheyẹwhe na gọalọna we nado doakọnna yajiji

Ohó Jiwheyẹwhe tọn to homẹmiọnna nawe de

17To whelọnu lo, etẹwẹ na yin wiwà gando hẹngble he atẹṣiṣi sọta Jiwheyẹwhe ko hẹnwa aimẹ sọn whenẹnu gbọ́n lọ lẹpo go? Mí dona flindọ ganhunupotọ wẹ Jehovah. Enẹwutu, e penugo bo nasọ jla nuhe yajiji gbẹtọvi tọn ko hẹngble lẹpo do. Dile mí ko plọn do, aigba hinhẹnzun Paladisi na vọ́ nudepope he ko yin hinhẹngble to planẹti mítọn ji lẹpo jlado. Yise tintindo to avọ́sinsan ofligọ Jesu tọn mẹ na de nuyiwadomẹji he ylando nọ tindo do mí ji lẹpo sẹ̀, podọ fọnsọnku na vọ́ nuhe okú ko hẹngble lẹpo jlado. Gbọnmọ dali, Jiwheyẹwhe na yí Jesu zan “na e nido gbà azọ́n Lẹgba tọn sudo.” (1 Johanu 3:8) Jehovah na basi ehe lẹpo to ojlẹ sisọ etọn mẹ. Mí sọgan jaya dọ e ma yawu yinuwa, na homẹfa etọn ko hùn dotẹnmẹ dote na mí nado plọn nugbo lọ podọ nado sẹ̀n ẹn. (2 Pita 3:9, 10) Todin, Jiwheyẹwhe to sinsẹ̀n-basitọ ahundoponọ lẹ bẹpli bosọ to alọgọna yé nado doakọnna yajiji depope he yé sọgan pehẹ to aihọn he gọ́ na tukla ehe mẹ.—Johanu 4:23; 1 Kọlintinu lẹ 10:13.

18Mẹde sọgan kanse dọ, Be yajiji ehe lẹpo ma na ko yin didapana eyin Jiwheyẹwhe ko dá Adam po Evi po to aliho de mẹ bọ yé ma sọgan ṣiatẹ ya? Nado na gblọndo kanbiọ enẹ tọn, hiẹ dona flin nunina họakuẹ de he Jehovah ko na we.

NAWẸ HIẸ NA YÍ NUNINA HE JIWHEYẸWHE NA WE LỌ ZAN GBỌN?

19Dile mí ko plọn to Weta 5tọ mẹ do, gbẹtọ yin didá po ojlo mẹdekannu tọn po. Be hiẹ yọ́n lehe nunina enẹ họakuẹ sọ ya? Jiwheyẹwhe dá kanlin madosọha lẹ, podọ nuyọnẹn jọwamọ tọn wẹ nọ deanana yé. (Howhinwhẹn lẹ 30:24) Gbẹtọ ko basi maṣinu lẹ he ma nọ lẹnnupọn ṣigba nọ yin anadena nado nọ hodo aliho nuyiwa tọn de. Be homẹ mítọn na hùn eyin Jiwheyẹwhe ko basi mí domọ ya? Lala, homẹ mítọn hùn dọ mí tindo mẹdekannujẹ nado basi nudide lẹ gando gbẹtọ alọpa he mí jlo na yin, yanwle gbẹ̀mẹ tọn mítọn, mẹhe mí na jihọntọn hẹ, po mọmọ po sọyi go. Homẹ mítọn hùn dọ mí tin to mẹdekannu jẹ obá de mẹ, podọ nuhe Jiwheyẹwhe jlo dọ mí ni tindo niyẹn.

20Jehovah ma nọ tindo homẹhun to sinsẹ̀nzọn he yè hẹnmẹ gánnugánnu nado wà mẹ. (2 Kọlintinu lẹ 9:7) Di dohia: Etẹwẹ na hẹn homẹhun mẹjitọ de hugan—eyin ovi de dọna ẹn dọ “A basi” na mẹde dọna ẹn nado dọ mọ wutu kavi eyin e dọ ẹ to jọwamọ-liho sọn ahun mẹ? Enẹwutu, onú titengbe lọ wẹ yindọ, Nawẹ hiẹ na yí mẹdekannujẹ he Jehovah ko na we lọ zan gbọn? Satani, Adam, po Evi po ṣì mẹdekannujẹ he yé tindo lọ zan pete. Yé gbẹ́ Jehovah Jiwheyẹwhe dai. Etẹwẹ hiẹ na wà?

21Hiẹ tindo dotẹnmẹ hundote nado yí nunina jiawu mẹdekannujẹ tọn lọ zan to aliho dagbe hugan mẹ. Hiẹ sọgan kọnawudopọ hẹ gbẹtọ livi susu he ko basi nudide nado nọ̀ adà Jehovah tọn mẹ lẹ. Yé hẹn homẹhun Jiwheyẹwhe na yé yí zohunhun do to Satani dohia di lalonọ podọ di gandutọ he ko gboawupo mlẹnmlẹn de. (Howhinwhẹn lẹ 27:11) Hiẹ lọsu sọgan wàmọ eyin a basi nudide nado hodo aliho gbẹzan tọn he sọgbe lọ. Weta he bọdego na dọhodo ehe ji.

NUHE BIBLU PLỌN MÍ LẸ

  • E ma yin Jiwheyẹwhe wẹ nọ hẹn ninọmẹ ylankan he to aihọn mẹ lẹ wá gba.—Job 34:10.
  • Satani jẹagọdo jlọjẹ Jehovah tọn nado dugán to whenuena e ylọ Jiwheyẹwhe dọ lalonọ podọ dọ Ewọ nọ whlá onú dagbe do mẹjidugando Etọn lẹ.—Gẹnẹsisi 3:2-5.
  • Jehovah na yí Ovi etọn, yèdọ Ogán Ahọluduta Mẹssia tọn lọ zan, nado hẹn yajiji gbẹtọvi tọn lẹpo wá opodo podọ nado vọ́ nuhe e ko hẹngble lẹ jlado.—1 Johanu 3:8.

Kanbiọ Nupinplọn Tọn Lẹ

1, 2. Yajiji tẹlẹ wẹ gbẹtọ lẹ nọ pehẹ to egbehe, podọ kanbiọ tẹlẹ wẹ ehelẹ nọ hẹn mẹsusu nado kanse?

3, 4. (a) Etẹwẹ dohia dọ e ma ylan nado kàn nuhewutu Jiwheyẹwhe jo dotẹnmẹ do na yajiji sè? (b) Nukun tẹwẹ Jehovah nọ yí do pọ́n kanyinylan po yajiji po?

5. To whedelẹnu, zẹẹmẹ tẹlẹ wẹ nọ yin nina nado basi zẹẹmẹ yajiji gbẹtọvi lẹ tọn, ṣigba etẹwẹ Biblu plọn mí?

6. Naegbọn mẹsusu nọ gbọn nuṣiwa dali gblewhẹdo Jiwheyẹwhe na yajiji he to aihọn mẹ lẹ?

7, 8. (a) Nawẹ aihọn nọ do walọ mẹhe to gandu do e ji tọn hia gbọn? (b) Nawẹ mapenọ-yinyin gbẹtọ tọn gọna “ojlẹ po kosọ po” nọ dekọtọn do yajiji mẹ gbọn?

9. Naegbọn mí dona deji dọ Jehovah tindo whẹwhinwhẹ́n dagbe na dotẹnmẹ jijodo na yajiji?

10. Etẹwẹ Satani jẹagọdo, podọ to aliho tẹ mẹ?

11. Naegbọn Jehovah ma và atẹṣitọ lọ lẹ sudo poun to Edẹni?

12, 13. Na apajlẹ nuhewutu Jehovah ko na dotẹnmẹ Satani nado to gandu do aihọn ehe ji podọ nuhewutu Jiwheyẹwhe na dotẹnmẹ gbẹtọ lẹ nado to gandu do yede ji tọn.

14. Alemọyi tẹwẹ na dekọtọn sọn dotẹnmẹ he Jehovah na gbẹtọvi lẹ nado dugán do yedelẹ ji mẹ?

15, 16. (a) Naegbọn Jehovah do dike na yajiji ni dẹn to aimẹ sọmọ? (b) Naegbọn Jehovah ma nọ glọnalina sẹ́nhẹngba ylankan lẹ?

17, 18. Etẹwẹ Jehovah na wà gando hẹngble he ko dekọtọn sọn gandudu gbẹtọvi lẹ tọn po nuyiwadomẹji Satani tọn lẹ po mẹ go?

19. Nunina họakuẹ tẹwẹ Jehovah na mí, podọ naegbọn mí dona yọ́n pinpẹn etọn?

20, 21. Nawẹ mí sọgan yí nunina mẹdekannujẹ tọn he mí tindo lọ zan to aliho dagbe hugan mẹ gbọn, podọ naegbọn mí dona jlo nado wàmọ?

Plọnnu Dogọ

Naegbọn Mí Dona Plọn Biblu?

Biblu to alọgọna gbẹtọ livi susu lẹdo aihọn pé nado mọ gblọndo na kanbiọ tangan gbẹ̀mẹ tọn lẹ. Hiẹ lọsu jlo na tin to yé mẹ ya?