Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

WETA FỌTỌ̀N-NUKUNẸNẸ

Gbọṣi Owanyi Jiwheyẹwhe Tọn Mẹ

Gbọṣi Owanyi Jiwheyẹwhe Tọn Mẹ

Etẹwẹ e zẹẹmẹdo nado yiwanna Jiwheyẹwhe?

Nawẹ mí sọgan gbọṣi owanyi Jiwheyẹwhe tọn mẹ gbọn?

Nawẹ Jehovah na dona mẹhe gbọṣi owanyi etọn mẹ lẹ gbọn?

MÍ NI dọ dọ hiẹ to zọnlinzin to aliho de ji to azán yujẹhọn sinsinyẹn tọn de gbè. Jikun sú taun. Abì jẹ zizẹ ji, hẹviosò to awhádo, enẹgodo jikun sinsinyẹn de bẹjẹeji. Hiẹ dowezun, bo jẹ fibẹtado de dín ji vẹkuvẹku. Hiẹ mọ ohọ̀ de to aliho lọ pá. E lodo taun, bọ ohò etọn mẹ hú, bosọ dọnmẹdogo. Lehe hiẹ na yọ́n pinpẹn bẹtẹn enẹ tọn do sọ!

Dawe de to bẹtẹn dín sọn yujẹhọn de nù

Be hiẹ na yí Jehovah do basi fibẹtado towe to ojlẹ hunyanhunyan tọn ehelẹ mẹ ya?

2 Mí to gbẹnọ to ojlẹ yujẹhọn kavi hunyanhunyan sinsinyẹn tọn lẹ mẹ. Ninọmẹ aihọn tọn fọ́n bo to yinylan deji. Ṣigba bẹtẹn hihọ́-basinamẹ tọn de tin, yèdọ fibẹtado de he sọgan whlá mí sọn awugble tẹgbẹ tọn mẹ. Bẹtẹn tẹwẹ? Doayi nuhe Biblu plọn mí go dọmọ: “Yẹn na dọ gbọn OKLUNỌ tọn dali, Ewọ wẹ fibẹtado ṣie podọ figángán ṣie: Jiwheyẹwhe ṣie; ewọ go wẹ yẹn na dotudo.”—Psalm 91:2.

3Yí nukun homẹ tọn do pọ́n enẹ! Jehovah, Didatọ po Nupojipetọ wẹkẹ lọ tọn po, sọgan yin fibẹtado hihọ́-basinamẹ tọn mítọn. Ewọ sọgan basi hihọ́na mí, na e yin huhlọnnọ hugan mẹdepope kavi nudepope he sọgan jlo nado gbleawuna mí. Eyin mí tlẹ yin awugblena, Jehovah sọgan vọ́ nugandomẹgo ylankan lẹpo jlado. Nawẹ mí sọgan yí Jehovah do basi fibẹtado mítọn gbọn? Mí dona dejido ewọ go. Humọ, Ohó Jiwheyẹwhe tọn dotuhomẹna mí dọmọ: “Mì yí mìde whlá to [kavi gbọṣi] owanyi Jiwheyẹwhe tọn mẹ.” (Juda 21) Mọwẹ, mí dona gbọṣi owanyi Jiwheyẹwhe tọn mẹ, bo hẹn haṣinṣan owanyinọ pẹkipẹki de go hẹ Otọ́ olọn mẹ tọn mítọn. To whelọnu lo, mí sọgan tindo nujikudo dọ ewọ wẹ fibẹtado mítọn. Ṣigba nawẹ mí sọgan wleawuna haṣinṣan mọnkọtọn gbọn?

MỌNUKUNNUJẸ OWANYI JIWHEYẸWHE TỌN MẸ BO YINUWA SỌGBE HẸ Ẹ

4Nado gbọṣi owanyi Jiwheyẹwhe tọn mẹ, mí dona mọnukunnujẹ aliho he mẹ Jehovah ko do owanyi etọn hia mí te lẹ mẹ. Lẹnnupọndo delẹ to nuplọnmẹ Biblu tọn lẹ ji he owe ehe ko gọalọna we nado plọn. Taidi Mẹdatọ lọ, Jehovah ko na mí aigba taidi owhé whanpẹnọ mítọn. Ewọ ko yí núdùdù po osin po, adọkunnu dòglọ tọn lẹ, gbẹninọ jiawu kanlin lẹ tọn, po lẹdo whanpẹnọ lẹ po do gọ́ ẹ. Taidi Dowatọ Biblu tọn, Jiwheyẹwhe ko hẹn oyín po jẹhẹnu etọn lẹ po zun yinyọnẹn na mí. Humọ, Ohó etọn dehia dọ ewọ do Ovi yiwanna etọn titi hlan aigba ji, bo dike Jesu ni jiya bo kú na mí. (Johanu 3:16) Podọ etẹwẹ nunina enẹ zẹẹmẹdo na mí? E nọ hẹn mí tindo todido na sọgodo jiawu de.

5Todido mítọn na sọgodo sọ sinai do nudevo he Jiwheyẹwhe ko wà ji. Jehovah ko ze gandudu olọn mẹ tọn de dai, yèdọ Ahọluduta Mẹssia tọn. E na hẹn yajiji lẹpo wá opodo to madẹnmẹ bo na hẹn aigba zun paladisi. Lẹnnupọndo enẹ ji! Mí sọgan nọgbẹ̀ to finẹ to jijọho po ayajẹ po mẹ kakadoi. (Psalm 37:29) Nalete, Jiwheyẹwhe ko na mí anademẹ do lehe mí sọgan nọgbẹ̀ to aliho dagbe hugan mẹ do todin ji. E ko sọ na mí nunina odẹ̀ tọn, yèdọ aliho hodọdopọ hẹ ẹ matin aliglọnnamẹnu depope tọn. Ehelẹ yin kleun de poun to aliho he mẹ Jehovah ko do owanyi hia gbẹtọvi lẹ to paa mẹ podọ na hiẹ lọsu titi te.

6Kanbiọ titengbe he hiẹ dona gbadopọnna wẹ yindọ: Nawẹ yẹn na do pinpẹn-nutọn hia hlan owanyi Jehovah tọn gbọn? Mẹsusu na dọ dọ, “Yẹn lọsu dona yiwanna Jehovah ga.” Be linlẹn he hiẹ lọsu tindo niyẹn ya? Jesu dọ dọ gbedide ehe wẹ klohugan popolẹpo: “Hiẹ na yí ayiha towe lẹpo, podọ alindọn towe lẹpo po nuyọnẹn towe lẹpo po do yiwanna [Jehovah] Jiwheyẹwhe towe.” (Matiu 22:37) E họnwun dọ hiẹ tindo whẹwhinwhẹ́n susu he na hẹn we nado yiwanna Jehovah Jiwheyẹwhe. Ṣigba be numọtolanmẹ lọ dọ hiẹ tindo owanyi mọnkọtọn wẹ nuhe hiẹ dona wà lẹpo nado dohia dọ hiẹ yí ayiha towe lẹpo, podọ alindọn towe lẹpo, po nuyọnẹn towe lẹpo po do yiwanna Jehovah ya?

Okún pọmu tọn de

7Dile e ko yin didohia to Biblu mẹ do, owanyi na Jiwheyẹwhe zẹ̀ numọtolanmẹ de tintindo poun go tlala. Na nugbo tọn, dile etlẹ yindọ numọtolanmẹ lọ dọ mí yiwanna Jehovah yin onú titengbe, numọtolanmẹ enẹ yin bẹjẹeji de poun na owanyi nujọnu tọn tintindo na ẹn. Okún yin dandannu eyin atin-sinsẹ́n he na de sinsẹ́n tọ́n de na wá aimẹ. Ṣigba, eyin atin-sinsẹ́n de jlo we, be a na tindo pekọ eyin mẹde yí okún etọn na we poun ya? Paali! Mọdopolọ, numọtolanmẹ lọ dọ mí yiwanna Jehovah Jiwheyẹwhe yin bẹjẹeji de poun. Biblu plọn mí dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn: osẹ́n etọn masọ yin nupẹnagbanmẹ gba.” (1 Johanu 5:3) Na e nido yin nujọnu, owanyi na Jiwheyẹwhe dona de sinsẹ́n dagbe tọ́n. E dona yin didohia to nuyiwa lẹ mẹ.—Matiu 7:16-20.

8Mí nọ do owanyi mítọn na Jiwheyẹwhe hia to whenuena mí setonuna osẹ́n etọn lẹ bo yí nunọwhinnusẹ́n etọn lẹ do yizan mẹ. Enẹ wiwà ma yin nuhe sinyẹnawu hugan gba. Kakati e ni yin agbanpẹnmẹnu, osẹ́n Jehovah tọn lẹ yin awuwlena nado gọalọna mí nado zan gbẹzan dagbe, ayajẹ tọn, po pekọ tọn po. (Isaia 48:17, 18) Gbọn gbẹninọ to kọndopọmẹ hẹ anademẹ Jehovah tọn dali, mí nọ dohia Otọ́ mítọn olọn mẹ tọn dọ mí yọ́n pinpẹn dagbe he e wà na mí lẹpo tọn. E blawu dọ, omẹ kleun de to aihọn egbehe tọn mẹ wẹ nọ do pinpẹn-nutọn-yinyọnẹn mọnkọtọn hia. Mí ma jlo na yin pinpẹn-nutọn-mayọnẹntọ, taidi mẹdelẹ he nọgbẹ̀ to whenue Jesu tin to aigba ji. Jesu hẹnazọngbọna pòtọnọ ao, ṣigba dopo poun wẹ lẹkọwa nado dopẹ́ na ẹn. (Luku 17:12-17) Matin ayihaawe, mí na jlo nado taidi pinpẹn-nutọn-yọnẹntọ lọ, e ma yin ṣinẹnẹ he ma do pinpẹn-nutọn hia lẹ gba!

9To whelọnu lo, gbedide Jehovah tọn tẹlẹ wẹ mí dona setonuna? Mí ko dọhodo susu ji to owe ehe mẹ, ṣigba mì gbọ mí ni gbadopọnna kleun de. Tonusisena gbedide Jiwheyẹwhe tọn lẹ na gọalọna mí nado gbọṣi owanyi Etọn mẹ.

DỌNSẸPỌ JEHOVAH HÚ GBEDE PỌ́N

10Nupinplọn gando Jehovah go yin afọdide tangan de nado dọnsẹpọ ẹ. Nuwiwa he ma nọ doalọte wẹ e yin. Eyin hiẹ tin to gbonu bo to miyọ́n-hú to ozán avivọ fifá tlala tọn de mẹ, be hiẹ na dike miyọ́n lọ na depò bo ṣí mlẹnmlẹn wẹ ya? Lala. Hiẹ na to nake zedo e mẹ bo na mọdọ miyọ́n lọ to jiji bo hùnmiyọ́n. Nado gbọṣi ogbẹ̀ e sọgan biọ dọ a ni dike miyọ́n lọ ni to jiji! Dile nake nọ hẹn miyọ́n nado to jiji do, mọwẹ “oyọnẹn Jiwheyẹwhe tọn” nọ hẹn owanyi mítọn na Jehovah lodo do niyẹn.—Howhinwhẹn lẹ 2:1-5.

Taidi miyọ́n de, owanyi towe na Jehovah tindo nuhudo nake tọn nado sọgan to jiji zọnmii

Dawe de to miyọ́n hú

11Jesu jlo dọ hodotọ etọn lẹ ni hẹn owanyi yetọn na Jehovah podọ na Ohó họakuẹ nugbo Etọn tọn dogbẹ̀ bosọ hẹn ẹn siso dogọ. To fọnsọnku etọn godo, Jesu plọn awe to devi etọn lẹ mẹ gando delẹ to dọdai he tin to Owe-wiwe Heblu tọn lẹ mẹ he yin hinhẹndi to ewọ mẹ lẹ go. Nuyiwadomẹji tẹwẹ ehe tindo? Yé dọ to godo mẹ dọmọ: “Be ayiha mítọn ma hunzo to ohò mítọn mẹ, whenuena e to hodọ hẹ mí to aliho, podọ whenuena e hùn Owe-wiwe hlan mí?”—Luku 24:32.

12To whenuena hiẹ yọ́n nuhe Biblu plọn mí taun lẹ to tintan whenu, be hiẹ ma doayi e go dọ ahun towe gọ́ na ayajẹ, zohunhun, po owanyi na Jiwheyẹwhe po ya? Matin ayihaawe, mọwẹ. Mẹsusu ko tindo numọtolanmẹ dopolọ. Avùnnukundiọsọmẹ lọ todin wẹ nado hẹn owanyi sisosiso enẹ dogbẹ̀ podọ nado hẹn ẹn whẹ́n deji. Mí ma jlo nado hodo nuyiwa aihọn egbehe tọn. Jesu dọ dọdai dọmọ: “Owanyi mẹsusu tọn na lẹzun mimiọn.” (Matiu 24:12) Nawẹ hiẹ sọgan wagbọn bọ owanyi he a tindo na Jehovah podọ na nugbo Biblu tọn ma na miọn?

13Zindonukọn nado to oyọnẹn Jehovah Jiwheyẹwhe po Jesu Klisti tọn po tindo zọnmii. (Johanu 17:3) Lẹnayihamẹpọn, kavi lẹnnupọn sisosiso do nuhe hiẹ plọn sọn Ohó Jiwheyẹwhe tọn mẹ lẹ ji, bo kanse dewe dọmọ: ‘Etẹwẹ ehe plọn mi gando Jehovah Jiwheyẹwhe go? Whẹwhinwhẹ́n yinukọn dogọ tẹwẹ e na mi nado yí ayiha, nuyọnẹn, po alindọn ṣie lẹpo po do yiwanna ẹn?’ (1 Timoti 4:15) Ayihamẹlẹnpọn mọnkọtọn na hẹn owanyi he a tindo na Jehovah siso dogọ.

14Aliho devo nado hẹn owanyi he a tindo na Jehovah gbọṣi aimẹ wẹ dẹ̀hiho to gbesisọmẹ. (1 Tẹsalonikanu lẹ 5:17) To Weta 17tọ owe ehe tọn, mí plọn dọ odẹ̀ yin nunina họakuẹ de sọn Jiwheyẹwhe dè. Kẹdẹdile hodọdopọ dagbe to gbesisọmẹ nọ hẹn haṣinṣan to gbẹtọ lẹ ṣẹnṣẹn lodo do, mọwẹ haṣinṣan mítọn hẹ Jehovah nọ hunzo bo nọ gbọṣi aimẹ do eyin mí nọ hodẹ̀ hlan ẹn to gbesisọmẹ. Onú titengbe wẹ e yin ma nado dike odẹ̀ mítọn lẹ ni lẹzun nuwiwa mọmọ tọn de poun—yèdọ dọvọdọ hogbe he yin pinplọn do tamẹ lẹ tọn he ma wá sọn ahun mẹ kavi he ma tindo zẹẹmẹ nujọnu tọn. Mí dona dọho hẹ Jehovah dile ovi de na dọho hẹ otọ́ owanyinọ de do. Nugbo wẹ dọ, mí dona dọho po sisi po, ṣigba mí dona nọ nọ̀ tlọlọ, bo nọ dọ nugbo, bosọ dọho sọn ahun mẹ wá. (Psalm 62:8) Mọwẹ, oplọn mẹdetiti tọn po odẹ̀ ahundopo tọn po yin adà tangan sinsẹ̀n-bibasi mítọn tọn lẹ, podọ yé nọ gọalọna mí nado gbọṣi owanyi Jiwheyẹwhe tọn mẹ.

TINDO AYAJẸ TO SINSẸ̀N-BIBASI TOWE MẸ

15Oplọn Biblu mẹdetiti tọn po odẹ̀ po yin adà sinsẹ̀n-bibasi mítọn tọn lẹ he mí sọgan basi to nuglọ. Ṣigba, todin, mì gbọ mí ni gbadopọnna adà sinsẹ̀n-bibasi tọn de he mí nọ basi to gbangba: enẹ wẹ hodidọ na mẹdevo lẹ gando nuyise mítọn lẹ go. Be hiẹ ko to nugbo Biblu tọn má hẹ mẹdevo lẹ ya? Eyin mọwẹ, be hiẹ ko duvivi lẹblanulọkẹyi jiawu de tọn. (Luku 1:74) Eyin mí to nugbo he mí plọn gando Jehovah Jiwheyẹwhe go má hẹ mẹdevo lẹ, e dohia dọ mí to azọ́ndenamẹ titengbe he yin nina Klistiani nugbo lẹpo de hẹndi—enẹ wẹ yẹwheho wẹndagbe Ahọluduta Jiwheyẹwhe tọn didọ.—Matiu 24:14; 28:19, 20.

16Apọsteli Paulu pọ́n lizọnyizọn etọn hlan taidi nuhọakuẹ de, bo ylọ ẹ dọ adọkunnu. (2 Kọlintinu lẹ 4:7) Hodidọ na gbẹtọ lẹ gando Jehovah Jiwheyẹwhe po lẹndai etọn lẹ po go wẹ yin azọ́n dagbe hugan he hiẹ sọgan wà. Azọ́nwiwa na Ogán dagbe hugan lọ wẹ e yin, podọ e nọ hẹn ale dagbe hugan lẹ wá. Gbọn mahẹ tintindo to azọ́n ehe mẹ dali, hiẹ to alọgọna gbẹtọ ahunjijlọnọ lẹ nado dọnsẹpọ Otọ́ olọn mẹ tọn mítọn podọ nado wá aliho he planmẹ yì ogbẹ̀ madopodo mẹ ji! Azọ́n devo tẹwẹ sọ sọgan hẹn pekọ wá hú ehe? Humọ, kunnudide gando Jehovah po Ohó etọn po go nọ hẹn yise towe titi jideji bo nọ hẹn owanyi towe na ẹn lodo. Podọ Jehovah nọ yọ́n pinpẹn vivẹnudido towe tọn. (Heblu lẹ 6:10) Alọnu hinhẹn ján to azọ́n mọnkọtọn mẹ nọ gọalọna we nado gbọṣi owanyi Jiwheyẹwhe tọn mẹ.—1 Kọlintinu lẹ 15:58.

17Onú titengbe wẹ e yin nado flindọ azọ́n yẹwhehodidọ Ahọluduta lọ tọn yin nuwiwa niyaniya tọn. Biblu dọmọ: “Nọ dọyẹwheho ohó lọ tọn; do magbọjẹ na dewe.” (2 Timoti 4:2) Naegbọn azọ́n ehe wiwà do yin onú niyaniya tọn sọmọ to egbehe? Ohó Jiwheyẹwhe tọn dọna mí dọmọ: “Azán daho [Jehovah, NW] tọn tin sẹpọ, e tin sẹpọ bosọ to unklẹn susu.” (Zẹfania 1:14) Mọwẹ, ojlẹ he mẹ Jehovah na hẹn titonu ehe blebu wá opodo etọn to sisẹpọ po awuyiya po. Avase dona yin nina gbẹtọ lẹ! Yé dona yọnẹn dọ ojlẹ lọ die nado de Jehovah taidi Nupojipetọ yetọn. Opodo lọ “ma na gọ̀n” kavi gbọwhenu gba.—Habbakuk 2:3.

18Jehovah jlo dọ mí ni basi sinsẹ̀n hlan ẹn to gbangba to pọmẹ hẹ Klistiani nugbo lẹ. Nuhe zọ́n niyẹn bọ Ohó etọn do dọmọ: “Mì gbọ mí nisọ nọ lẹn mínọzo tọn pọ́n nado nọ jlahomẹdona to owanyi po azọ́n dagbe lẹ po mẹ: to ma gbẹ́ opli míde tọn mẹ, dile jijọ mẹdelẹ tọn te; ṣigba mí ni nọ to homẹjladona mínọzo; humọ na le mì mọdọ azán lọ to sisẹpọ.” (Heblu lẹ 10:24, 25) To whenuena mí pli dopọ hẹ yisenọ hatọ lẹ to opli Klistiani tọn lẹ ji, mí nọ tindo dotẹnmẹ hundote jiawu de nado pà bo basi sinsẹ̀n hlan Jiwheyẹwhe owanyinọ mítọn. Mí sọ nọ jlọ mídelẹ dote bo nọ na tuli ode awetọ.

19Dile mí to awukọndopọ hẹ sinsẹ̀ntọ Jehovah tọn devo lẹ, mí nọ hẹn kanṣiṣa owanyi po họntọnjiji po tọn lodo to agun lọ mẹ. Onú titengbe wẹ e yin dọ mí ni nọ doayi jẹhẹnu dagbe mẹdevo lẹ tọn go, dile Jehovah nọ dín jẹhẹnu dagbe mítọn lẹ do. Ma donukun pipé sọn yisenọ hatọ towe lẹ si blo. Flindọ whinwhẹ́n gbigbọmẹ tọn mẹlẹpo tọn ma yin dopolọ podọ mímẹpo wẹ nọ ṣinuwa. (Kọlọsinu lẹ 3:13) Dín nado wleawuna họntọnjiji pẹkipẹki hẹ mẹhe yiwanna Jehovah sisosiso lẹ, podọ hiẹ na mọdọ a jẹ whinwhẹ́n to gbigbọ-liho ji. Na nugbo tọn, sinsẹ̀n-bibasi hlan Jehovah to pọmẹ hẹ mẹmẹsunnu po mẹmẹyọnnu gbigbọmẹ tọn towe lẹ po na gọalọna we nado gbọṣi owanyi Jiwheyẹwhe tọn mẹ. Nawẹ Jehovah nọ dona mẹhe sẹ̀n ẹn po nugbonọ-yinyin po bo gbọnmọ dali gbọṣi owanyi etọn mẹ lẹ gbọn?

DOVIVẸNU NA “OGBẸ̀ NUGBONUGBO” LỌ

20Jehovah nọ dona devizọnwatọ nugbonọ etọn lẹ po ogbẹ̀ po, ṣigba ogbẹ̀ alọpa tẹwẹ? Eyọn, be hiẹ to ogbẹ̀ todin nugbonugbo ya? E họnwun dọ suhugan mítọn wẹ na yigbe dọ mọwẹ. Depope he e na yin, mí nọ gbọ̀, mí nọ dùnú, bo nọ nùsin. Na jide tọn, ogbẹ̀ wẹ mí tin te. Podọ to ojlẹ he ayiha mítọn jai te taun lẹ mẹ, mí tlẹ sọgan dọ dọ, “Nuhe nọ yin yiylọdọ ogbẹ̀ nugbonugbo lọ die!” Ṣigba, Biblu dohia dọ to linlẹn nujọnu tọn de mẹ, gbẹtọvi depope ma to ogbẹ̀ nugbonugbo lọ zan to egbehe gba.

Whẹndo de to vivi paladisi tọn dù

Jehovah jlo dọ hiẹ ni duvivi “ogbẹ̀ nugbonugbo” lọ tọn. Be hiẹ na wàmọ ya?

21Ohó Jiwheyẹwhe tọn dotuhomẹna mí nado “hẹn ogbẹ̀ lọ go ehe yin ogbẹ̀ nugbonugbo.” (1 Timoti 6:19) Hogbe enẹlẹ dohia dọ “ogbẹ̀ nugbonugbo” lọ yin nuhe mí donukun nado mọyi to sọgodo. Mọwẹ, to whenuena mí yin pipé, mí na tin to ogbẹ̀ to linlẹn gigọ́ hogbe lọ tọn mẹ mlẹnmlẹn, na mí na penugo nado nọgbẹ̀ sọgbe hẹ linlẹn dowhenu Jiwheyẹwhe tọn. To whenuena mí na to gbẹnọ to paladisi mẹ to aigba ji to agbasalilo pipé, jijọho, po ayajẹ po mẹ, mí na wá duvivi “ogbẹ̀ nugbonugbo” lọ tọn to godo mẹ—yèdọ ogbẹ̀ madopodo. (1 Timoti 6:12) Be e ma yin todido jiawu de wẹ enẹ yin ya?

22Nawẹ mí sọgan ‘hẹn ogbẹ̀ nugbonugbo lọ go’ gbọn? To lẹdo hodidọ dopolọ tọn mẹ, Paulu dotuhomẹna Klistiani lẹ nado “nọ wà dagbe” podọ nado “sù to azọ́n dagbe lẹ mẹ.” (1 Timoti 6:18) To whelọnu lo, e họnwun dọ, enẹ sinai titengbe do lehe mí nọ yí nugbo he mí ko plọn sọn Biblu mẹ lẹ do yizan mẹ do ji. Ṣigba, be didọ wẹ Paulu te dọ mí na tindo “ogbẹ̀ nugbonugbo” lọ gbọn azọ́n dagbe lẹ wiwà dali ya? Lala, na nukundido jiawu mọnkọtọn sinai do ‘nukundagbe majẹhẹ’ mimọyi mítọn sọn Jiwheyẹwhe dè ji. (Lomunu lẹ 5:15) Ṣigba, Jehovah nọ hùnhomẹ nado dona mẹhe to sinsẹ̀n ẹn po nugbonọ-yinyin po lẹ. E jlo dọ hiẹ ni tindo “ogbẹ̀ nugbonugbo” lọ. Ogbẹ̀ madopodo he na gọ́ na ayajẹ, po jijọho po mọnkọtọn to tepọn mẹhe gbọṣi owanyi Jiwheyẹwhe tọn mẹ lẹ.

23Dopodopo mítọn na wà dagbe nado kanse ede dọ, ‘Be yẹn to Jiwheyẹwhe sẹ̀n sọgbe hẹ nuplọnmẹ he to Biblu mẹ lẹ ya?’ Eyin gblọndo mítọn nọ dohia to egbesọegbesọ dọ mọwẹ, enẹ dohia dọ mí tin to aliho he sọgbe lọ ji. Mí sọgan tindo nujikudo dọ Jehovah wẹ fibẹtado mítọn. E na whlá omẹ nugbonọ etọn lẹ sọn nugbajẹmẹji godo tọn he na wá titonu hoho ehe ji mẹ. Jehovah nasọ hẹn mí biọ titonu yọyọ gigonọ he ko to yakẹ todin lọ mẹ. Lehe e na yin homẹhunnu de nado mọ ojlẹ enẹ do sọ! Podọ lehe e na yin homẹhunnu na mí dọ mí basi nudide dagbe to azán godo tọn ehelẹ mẹ do sọ! Eyin hiẹ basi nudide mọnkọtọn todin, hiẹ na duvivi “ogbẹ̀ nugbonugbo” lọ tọn, yèdọ ogbẹ̀ mavọmavọ, sọgbe hẹ linlẹn dowhenu Jehovah Jiwheyẹwhe tọn.

NUHE BIBLU PLỌN MÍ LẸ

  • Mí nọ dohia dọ mí tindo owanyi nujọnu tọn na Jiwheyẹwhe gbọn tonusisena gbedide etọn lẹ po nunọwhinnusẹ́n etọn lẹ yíyí do yizan mẹ po dali.—1 Johanu 5:3.
  • Ohó Jiwheyẹwhe tọn pinplọn, dẹ̀hiho hlan Jehovah po ahundopo po, nupinplọn mẹdevo lẹ gando ewọ go, podọ sinsẹ̀n-bibasi hlan ẹn to opli Klistiani tọn lẹ ji na gọalọna mí nado gbọṣi owanyi Jiwheyẹwhe tọn mẹ.—Matiu 24:14; 28:19, 20; Johanu 17:3; 1 Tẹsalonikanu lẹ 5:17; Heblu lẹ 10:24, 25.
  • Mẹhe gbọṣi owanyi Jiwheyẹwhe tọn mẹ lẹ tindo todido nado duvivi “ogbẹ̀ nugbonugbo” lọ tọn.—1 Timoti 6:12, 19; Juda 21.

Kanbiọ Nupinplọn Tọn Lẹ

1, 2. Fie wẹ mí sọgan mọ fibẹtado whlẹngán tọn de te to egbehe?

3. Nawẹ mí sọgan yí Jehovah do basi fibẹtado mítọn gbọn?

4, 5. Etẹwẹ yin delẹ to aliho he mẹ Jehovah ko do owanyi hia mí te lẹ mẹ?

6. Nawẹ hiẹ sọgan dohia dọ a yọ́n pinpẹn owanyi he Jehovah ko dohia we tọn gbọn?

7. Be numọtolanmẹ de tintindo poun ko pé nado dọ dọ hiẹ yiwanna Jiwheyẹwhe ya? Basi zẹẹmẹ.

8, 9. Nawẹ mí sọgan do owanyi po pinpẹn-nutọn-yinyọnẹn po hia na Jiwheyẹwhe gbọn?

10. Basi zẹẹmẹ nuhewutu e yin onú titengbe nado to oyọnẹn he gando Jehovah Jiwheyẹwhe go tindo zọnmii tọn.

11. Nuyiwadomẹji tẹwẹ nuplọnmẹ Jesu tọn lẹ tindo do hodotọ etọn lẹ ji?

12, 13. (a) To gbẹtọ susu lẹ ṣẹnṣẹn to egbehe, etẹwẹ ko jọ do owanyi na Jiwheyẹwhe podọ na Biblu go? (b) Nawẹ mí sọgan wagbọn bọ owanyi he mí tindo ma na miọn?

14. Nawẹ odẹ̀ sọgan gọalọna mí nado hẹn owanyi he mí tindo na Jehovah gbọṣi aimẹ gbọn?

15, 16. Naegbọn e do sọgbe dọ mí sọgan pọ́n azọ́n yẹwhehodidọ Ahọluduta lọ tọn hlan taidi lẹblanulọkẹyi po adọkunnu de po?

17. Naegbọn lizọnyizọn Klistiani tọn do yin azọ́n niyaniya tọn to egbehe?

18. Naegbọn mí dona basi sinsẹ̀n hlan Jehovah to gbangba to pọmẹ hẹ Klistiani nugbo lẹ?

19. Nawẹ mí sọgan hẹn kanṣiṣa owanyi tọn lodo to agun Klistiani tọn mẹ gbọn?

20, 21. Etẹwẹ “ogbẹ̀ nugbonugbo” lọ yin, podọ naegbọn e do yin todido jiawu de?

22. Nawẹ hiẹ sọgan ‘hẹn ogbẹ̀ nugbonugbo lọ go’ gbọn?

23. Naegbọn e do yin onú titengbe nado gbọṣi owanyi Jiwheyẹwhe tọn mẹ?