Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

WETA WIAWE

Gbẹzan He Nọ Hẹn Homẹhun Jiwheyẹwhe

Gbẹzan He Nọ Hẹn Homẹhun Jiwheyẹwhe

Nawẹ hiẹ sọgan lẹzun họntọn Jiwheyẹwhe tọn gbọn?

Aliho tẹ mẹ wẹ avùnnukundiọsọmẹ Satani tọn gando gowe te?

Walọ tẹlẹ wẹ ma nọ hẹn homẹhun Jehovah?

Nawẹ hiẹ sọgan zan gbẹzan he nọ hẹn homẹhun Jiwheyẹwhe gbọn?

OMẸ nankọ wẹ hiẹ na de taidi họntọn? E yọnbasi taun dọ a na jlo nado dogbẹ́ hẹ mẹhe tindo pọndohlan, ojlo, po nujinọtedo dopolọ lẹ po hẹ we. Podọ hiẹ na jlo nado dọnsẹpọ mẹhe tindo jẹhẹnu dagbe lẹ, taidi nugbodidọ po homẹdagbe po.

2 Whenuho dohia dọ Jiwheyẹwhe ko de gbẹtọvi delẹ taidi họntọn vivẹ́ etọn lẹ. Di apajlẹ, Jehovah ylọ Ablaham dọ họntọn etọn. (Isaia 41:8; Jakobu 2:23) Jiwheyẹwhe dlẹnalọdo Davidi taidi “omẹ ayiha ṣie tọn” na ewọ yin gbẹtọ he nkọ Jehovah nọ yiwanna wutu. (Owalọ lẹ 13:22) Podọ Jehovah pọ́n yẹwhegán Daniẹli hlan taidi ‘omẹ yiwanna tlala.’—Daniẹli 9:23.

3Naegbọn Jehovah pọ́n Ablaham, Davidi, po Daniẹli po hlan taidi họntọn vivẹ́ etọn lẹ? E dọna Ablaham dọ: “Na hiẹ yí ogbè ṣie sè wutu.” (Gẹnẹsisi 22:18) Jehovah nọ dọnsẹpọ mẹhe yí whiwhẹ do wà nuhe e biọ to yé si lẹ. E dọna Islaẹlivi lẹ dọmọ: “Mì nọ tuntoai hlan ogbè ṣie, yẹn nasọ yin Jiwheyẹwhe mìtọn, mìwlẹ nasọ yin omẹ ṣie lẹ.” (Jẹlemia 7:23) Eyin hiẹ setonuna Jehovah, hiẹ lọsu sọgan lẹzun họntọn etọn!

JEHOVAH NỌ HẸN HỌNTỌN ETỌN LẸ LODO

4Lẹnnupọndo ale he họntọnjiji hẹ Jiwheyẹwhe na hẹnwa lẹ ji. Biblu dọ dọ Jehovah nọ to dotẹnmẹ hundote lẹ dín “nado do ede hia [taidi] huhlọnnọ na ayiha yé mẹhe tọn yin pipé hlan e dè lẹ tọn.” (2 Otannugbo lẹ 16:9) Nawẹ Jehovah sọgan do huhlọn etọn hia do ota towe mẹ gbọn? Dopo to aliho he mẹ e nọ wà ehe te yin didohia to Psalm 32:8 mẹ, fie mí hia te dọmọ: “Yẹn [Jehovah] na plọn we, yẹn nasọ yí afọ towe do ali he ji hiẹ na gbọ̀n: yẹn na yí nukun ṣie do dewé hẹ we.”

5Hogbe zodolanmẹnamẹ tọn nankọ die gando lehe Jehovah nọ penukundo omẹ etọn lẹ go gbọn! Ewọ na wleawuna anademẹ he hiẹ tindo nuhudo etọn bo nasọ penukundo gowe dile hiẹ to anademẹ lọ hodo. Jiwheyẹwhe jlo na gọalọna we nado duto whlepọn podọ mẹtẹnpọn he pehẹ a te lẹ ji. (Psalm 55:22) Enẹwutu eyin hiẹ to Jehovah sẹ̀n po ahundopo po, hiẹ sọgan deji taidi psalm-kàntọ lọ he wlan dọmọ: “Yẹn ko ze OKLUNỌ do nukọn ṣie whepoponu: na e tin to adusi ṣie mẹ wutu, yè ma na diọtẹnna mi.” (Psalm 16:8; 63:8) Mọwẹ, Jehovah sọgan gọalọna we nado zan gbẹzan he na hẹn homẹhun in. Ṣigba, dile hiẹ yọnẹn do, kẹntọ Jiwheyẹwhe tọn de tin he jlo nado glọnalina we ma nado wà ojlo ehe.

AVÙNNUKUNDIỌSỌMẸ SATANI TỌN

6Weta 11tọ owe ehe tọn basi zẹẹmẹ lehe Satani Lẹgba diọnukunsọ nupojipetọ-yinyin Jiwheyẹwhe tọn do tọn. Satani sawhẹ lalodido tọn dokọna Jiwheyẹwhe bo dohia dọ owhẹ̀ Jehovah tọn ma whẹ́n na e ma na dotẹnmẹ Adam po Evi po nado nọ basi nudide dagbe po oylan po tọn na yedelẹ wutu. To whenuena Adam po Evi po ko waylando godo bọ okún yetọn jẹ aigba ji gọ́ ji, Satani fọ́n ayihaawe dote gando mẹwhinwhàn gbẹtọvi lẹpo tọn go. ‘E ma yin wanyina Jiwheyẹwhe wẹ nọ hẹn gbẹtọ lẹ nado sẹ̀n ẹn gba,’ wẹ Satani dọ. ‘Na mi dotẹnmẹ, yẹn sọgan gọkọna mẹlẹpo sọn dè we.’ Whenuho Job tọn dohia dọ linlẹn Satani tọn niyẹn. Mẹnu wẹ nọ yin Job, podọ nawẹ avùnnukundiọsọmẹ Satani tọn gando ewọ go gbọn?

7Job nọgbẹ̀ to nudi owhe 3 600 die wayi. Dawe dagbe de wẹ ewọ, na Jehovah dọmọ: “Mẹde matin di i to aigba ji, omẹ pipé de podọ jlọjlọ de, ode he dibusi Jiwheyẹwhe, bosọ họnsi oylan.” (Job 1:8) Homẹ Jiwheyẹwhe tọn hùn do Job go.

8Satani fọ́n ayihaawe dote gando nuhewutu Job do to Jiwheyẹwhe sẹ̀n go. Lẹgba dọna Jehovah dọmọ: “Hiẹ ma ko basi sopá de lẹdo e [Job], podọ lẹdo owhé etọn, podọ lẹdo ehe e tindo lẹpo, to adà lẹpo ji? Hiẹ ko dona azọ́n alọ etọn lẹ tọn, podọ yè hẹn nubẹpli etọn sudeji to aigba lọ ji. Ṣigba dealọ towe jẹgbonu lo, bo doalọ popo he e tindo go, e bo nasọ gbẹ́ we dai to nukun towe mẹ.”—Job 1:10, 11.

9Satani dọ̀nnu dọ Job to Jiwheyẹwhe sẹ̀n na dona he mọyi e te lẹ wutu. Lẹgba sọ dọ dọ eyin Job yin whiwhlepọn, ewọ na lẹkọ sọn Jiwheyẹwhe godo. Nawẹ Jehovah yinuwa hlan avùnnukundiọsọmẹ Satani tọn gbọn? To whenuena e yindọ whẹho lọ gando mẹwhinwhàn Job tọn go, Jehovah na dotẹnmẹ Satani nado whlé Job pọ́n. Gbọnmọ dali, e na yin didohia hezeheze eyin Job tindo owanyi na Jiwheyẹwhe, kavi lala.

JOB YIN WHIWHLEPỌN

10Satani whlé Job pọ́n to aliho voovo mẹ. Delẹ to kanlin Job tọn lẹ mẹ yin finfin, podọ devo lẹ yin hùhù. Suhugan to afanumẹ etọn lẹ mẹ yin hùhù. Ehe hẹn nuhahun akuẹzinzan tọn wá. Nugbajẹmẹji devo jọ to whenuena ovi ao Job tọn lẹpo kú to yujẹhọn de whenu. Ṣigba, mahopọnna nujijọ ylankan ehelẹ, “Job ma waylando, kavi yí nulú do dowhẹ Jiwheyẹwhe.”—Job 1:22.

Job yin didona na e yin nugbonọ wutu

Job yin didona na e yin nugbonọ wutu

11Agbọ́ ma ko pé Satani gba. E na ko lẹndọ dile etlẹ yindọ Job sọgan doakọnna hẹnbu nutindo, afanumẹ, po ovi etọn lẹ tọn po, ewọ na lẹ́ sọn Jiwheyẹwhe godo eyin e jẹazọ̀n. Jehovah na dotẹnmẹ Satani nado doazọ̀n ylankan de Job, yèdọ azọ̀n awufiẹsa tọn de. Ṣigba ehe lọsu ga ma hẹn Job nado gbẹ́ Jiwheyẹwhe dai gba. Kakatimọ, e dọ po nujikudo po dọmọ: “Kaka yẹn [na] kú yẹn ma na de walọpipe ṣie sọn dee gba.”—Job 27:5.

12Job ma yọnẹn dọ Satani wẹ hẹn tukla lẹ wá e ji gba. Na e ma yọ́n nudepope gando avùnnukundiọsọmẹ Lẹgba tọn sọta nupojipetọ-yinyin Jehovah tọn go wutu, Job lẹndọ Jiwheyẹwhe wẹ to nuhahun etọn lẹ hẹnwa. (Job 6:4; 16:11-14) Etomọṣo, e hẹn tenọgligo hlan Jehovah. Podọ nugbonọ-yinyin Job tọn do whẹsadokọnamẹ Satani tọn dọ Job to Jiwheyẹwhe sẹ̀n na whẹwhinwhẹ́n ṣejannabi tọn lẹ wutu hia nado yin lalo!

13Nugbonọ-yinyin Job tọn hẹn Jehovah nado na gblọndo nujọnu tọn hlan avùnnukundiọsọmẹ mẹmasi Satani tọn. Na nugbo tọn, họntọn Jehovah tọn wẹ Job yin, podọ Jiwheyẹwhe dona ẹn na nugbonọ-yinyin etọn.—Job 42:12-17.

LEHE E GANDO GOWE DO

14E ma yin Job kẹdẹ go wẹ whẹho nugbonọ-yinyin na Jiwheyẹwhe tọn he Satani fọndote gando gba. E gando hiẹ lọsu go ga. Ehe yin didohia hezeheze to Howhinwhẹn lẹ 27:11 mẹ, fie Ohó Jehovah tọn dọ te dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.” Ohó ehelẹ, heyin kinkàn owhe kanweko susu to okú Job tọn godo, dohia dọ Satani gbẹ́ pò to Jiwheyẹwhe vlẹko bosọ to whẹsadokọna devizọnwatọ Etọn lẹ. Eyin mí zan gbẹzan he hẹn homẹhun Jehovah, e na dohia dọ mí to alọgọ nado na gblọndo na whẹsadokọnamẹ lalo Satani tọn, podọ to aliho enẹ mẹ mí to Jiwheyẹwhe hẹn jaya. Etẹwẹ hiẹ lẹn gando enẹ go? Be e ma na yin homẹhunnu nado tindo mahẹ to gblọndonina na whẹsadokọnamẹ lalo Lẹgba tọn mẹ, eyin etlẹ zẹẹmẹdo diọdo delẹ bibasi to gbẹzan towe mẹ ya?

15Doayi e go dọ Satani dọmọ: ‘Ehe gbẹtọ tindo lẹpo wẹ e na jo na ogbẹ̀ etọn.’ (Job 2:4) Gbọn hogbe lọ “gbẹtọ” yiyizan dali, Satani hẹn ẹn họnwun dọ whẹsadokọnamẹ etọn ma yin hlan Job kẹdẹ gba ṣigba hlan gbẹtọvi lẹpo. Onú agokun titengbe de wẹ enẹ yin. Satani ko fọ́n ayihaawe dote gando nugbonọ-yinyin towe na Jiwheyẹwhe go. Lẹgba jlo dọ to awusinyẹnnamẹnu lẹ whenu hiẹ ni vẹtolina Jiwheyẹwhe bo gbẹ́ aliho dodo lọ dai. Nawẹ Satani sọgan dovivẹnu nado wà ehe gbọn?

16Dile mí dọhodeji to Weta 10tọ mẹ do, Satani nọ yí aliho voovo lẹ zan nado tẹnpọn bo gọkọna gbẹtọ lẹ sọn Jiwheyẹwhe dè. Aliho dopo wẹ yindọ, e nọ yangbé “di kinnikinni he to lìlì…bo to mẹhe e na tlẹndu dín.” (1 Pita 5:8) Enẹwutu nuyiwadomẹji Satani tọn sọgan yin mimọ to whenuena họntọn lẹ, hẹnnumẹ lẹ, kavi mẹdevo lẹ jẹagọdo vivẹnu towe nado plọn Biblu bo yí nuhe plọn a te lẹ do yizan mẹ.* (Johanu 15:19, 20) Aliho devo wẹ yindọ, Satani “nọ diọada zun angẹli hinhọ́n tọn.” (2 Kọlintinu lẹ 11:14) Lẹgba sọgan yí ayiha wintinwintin zan nado klọ we sọn aliho he nọ hẹn homẹhun Jiwheyẹwhe ji. E sọgan yí gbigbọjọ zan ga, vlavo nado hẹn we lẹndọ hiẹ ma sọgan jẹ nubiọtomẹsi he na hẹn homẹ Jiwheyẹwhe tọn hùn lẹ kọ̀n gbede. (Howhinwhẹn lẹ 24:10) Vlavo Satani to nuyiwa taidi “kinnikinni he to lìlì” de wẹo kavi e to nuyiwa taidi “angẹli hinhọ́n tọn,” avùnnukundiọsọmẹ etọn ma ko diọ gba: E dọ dọ eyin hiẹ pehẹ whlepọn kavi mẹtẹnpọn lẹ, a na doalọtena Jiwheyẹwhe sinsẹ̀n. Nawẹ hiẹ sọgan na gblọndo na avùnnukundiọsọmẹ etọn bo yin nugbonọ hlan Jiwheyẹwhe, dile Job wà do gbọn?

TONUSISENA OSẸ́N JEHOVAH TỌN LẸ

17Hiẹ sọgan na gblọndo na avùnnukundiọsọmẹ Satani tọn eyin hiẹ zan gbẹzan he hẹn homẹhun Jiwheyẹwhe. Etẹwẹ ehe bẹhẹn? Biblu na gblọndo dọmọ: “Hiẹ…na yí ayiha towe lẹpo, po alindọn towe lẹpo po, po hlọnhlọn towe lẹpo po, do yiwanna OKLUNỌ lọ Jiwheyẹwhe towe.” (Deutelonomi 6:5) Dile owanyi towe na Jiwheyẹwhe to whinwhẹ́n deji, ojlo lọ nado setonuna nubiọtomẹsi etọn lẹ na gọ́ ahun towe mẹ. Apọsteli Johanu wlan dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn.” Eyin hiẹ yí ahun towe lẹpo do yiwanna Jehovah, a na mọdọ “osẹ́n etọn masọ yin nupẹnagbanmẹ gba.”—1 Johanu 5:3.

18Etẹwẹ yin osẹ́n Jehovah tọn lẹ? Delẹ bẹ walọ he mí dona dapana lẹ hẹn. Di apajlẹ, doayi apotin he hosọ etọn yin “Nọla Na Nuhe Jehovah Gbẹwanna Lẹ” go. Walọ he Biblu gblewhẹdo tlọlọ lẹ yin sislẹ do finẹ. To tintan whenu, delẹ to walọyizan he yin sislẹ lẹ mẹ sọgan taidi nuhe ma ylan sọmọ. Ṣigba eyin hiẹ lẹnayihamẹpọndo wefọ lọ lẹ ji, e yọnbasi dọ a na mọ nuyọnẹn he tin to osẹ́n Jehovah tọn lẹ mẹ. E sọgan vẹawuna we taun nado diọ walọyizan towe lẹ. Ṣigba, eyin hiẹ zan gbẹzan he nọ hẹn homẹhun Jiwheyẹwhe, a na tindo pekọ po ayajẹ susu po. (Isaia 48:17, 18) Podọ nubiọtomẹsi ehe ma zẹ̀ nugopipe towe go gba. Etẹwutu mí do dọmọ?

NỌLA NA NUHE JEHOVAH GBẸWANNA LẸ

Jaguda-gbẹ́ awe
Asu po asi po de to ahàn po siga po nù
Nawe de he to ajojẹ
  • Mẹhuhu.—Eksọdusi 20:13; 21:22, 23.
  • Fẹnnuwiwa zanhẹmẹ tọn.—Levitiku 20:10, 13, 15, 16; Lomunu lẹ 1:24, 26, 27, 32; 1 Kọlintinu lẹ 6:9, 10.
  • Afinyọnnuwiwa.—Deutelonomi 18:9-13; 1 Kọlintinu lẹ 10:21, 22; Galatianu lẹ 5:20, 21.
  • Boṣiọ-sinsẹ̀n.—1 Kọlintinu lẹ 10:14.
  • Ahànnumu.—1 Kọlintinu lẹ 5:11.
  • Ajojijẹ.—Levitiku 6:2, 4; Efesunu lẹ 4:28.
  • Lalodido.—Howhinwhẹn lẹ 6:16, 19; Kọlọsinu lẹ 3:9; Osọhia 22:15.
  • Nukunkẹn.—1 Kọlintinu lẹ 5:11.
  • Danuwiwa.—Psalm 11:5; Howhinwhẹn lẹ 22:24, 25; Malaki 2:16; Galatianu lẹ 5:20, 21.
  • Hogbe gbigble.—Levitiku 19:16; Efesunu lẹ 5:4; Kọlọsinu lẹ 3:8.
  • Ohùn ṣiṣizan.—Gẹnẹsisi 9:4; Owalọ lẹ 15:20, 28, 29.
  • Gbigbẹ́ nado penukundo whẹndo mẹtọn go.—1 Timoti 5:8.
  • Alọdido to awhàn kavi nudindọn tonudidọ aihọn ehe tọn mẹ.—Isaia 2:4; Johanu 6:15; 17:16.
  • Taba kavi nuhe nọ yin yiylọdọ amasin-adínọ ayidedai tọn nùnù.—Malku 15:23; 2 Kọlintinu lẹ 7:1.

19Jehovah ma nọ donukun nususu to mí si hugan nuhe go mí pé gba. (Deutelonomi 30:11-14) E yọ́n nugopipe po dogbó mítọn lẹ po hú mílọsu. (Psalm 103:14) Humọ, Jehovah sọgan na mí huhlọn nado setonuna ẹn. Apọsteli Paulu wlan dọmọ: “Nugbonọ wẹ Jiwheyẹwhe, mẹhe ma na dike yè ni whlé mì pọ́n hú ehe mì sọgan hẹn; ṣigba ewọ na deali de po whlepọn lọ po ga nado gán, na mìwlẹ nido tin sọgan nado doakọnna ẹn.” (1 Kọlintinu lẹ 10:13) Jehovah sọgan na we ‘huhlọn hugan jọwamọ tọn’ nado gọalọna we nado doakọnna. (2 Kọlintinu lẹ 4:7) To whenuena Paulu ko doakọnna whlepọn susu godo, e sọgan dọmọ: “Yẹn sọgan wà onú popo gbọn Klisti he to huhlọnna mi mẹ.”—Filippinu lẹ 4:13.

AWUWIWLENA JẸHẸNU LẸ HE NỌ HẸN HOMẸHUN JIWHEYẸWHE

20Na nugbo tọn, homẹ Jehovah tọn hinhẹn hùn biọ nususu hugan laninọ na nuhe e gbẹwanna lẹ. Hiẹ sọ dona yiwanna nuhe ewọ yiwanna lẹ. (Lomunu lẹ 12:9) Be e ma nọ bọawu na we hugan nado dọnsẹpọ mẹhe tindo pọndohlan, ojlo, po nujinọtedo dopolọ lẹ po hẹ we ya? Mọwẹ e te na Jehovah lọsu ga. Enẹwutu plọn nado yiwanna nuhe Jehovah yiwanna lẹ. Delẹ to onú ehelẹ mẹ yin zẹẹmẹ etọn basi to Psalm 15:1-5 mẹ, fie mí hia gando mẹhe Jiwheyẹwhe nọ ylọdọ họntọn etọn lẹ go te. Họntọn Jehovah tọn lẹ nọ do nuhe Biblu ylọdọ “sinsẹ́n gbigbọ tọn” hia. E bẹ jẹhẹnu lẹ hẹn taidi “owanyi, ayajẹ, jijọho, linsinyẹn, homẹdagbe, dagbewà, nugbowà [kavi yise], walọmimiọn, mawazẹjlẹgo.”—Galatianu lẹ 5:22, 23.

21Biblu hihia po pinplọn ẹn to gbesisọmẹ po na gọalọna we nado wleawuna jẹhẹnu Jiwheyẹwhe tọn lẹ. Podọ nubiọtomẹsi Jiwheyẹwhe tọn lẹ pinplọn na gọalọna we nado hẹn linlẹn towe lẹ wá kọndopọmẹ hẹ linlẹn Jiwheyẹwhe tọn. (Isaia 30:20, 21) Lehe hiẹ hẹn owanyi towe na Jehovah lodo sọ, mọwẹ ojlo towe nado zan gbẹzan he hẹn homẹhun Jiwheyẹwhe na siso do niyẹn.

22E nọ biọ vivẹnu nado zan gbẹzan he nọ hẹn homẹhun Jehovah. Biblu yí diọdo gbẹzan tọn bibasi jlẹdo kinklọn gbẹtọ-yinyin hoho tọn dai bo yí yọyọ lọ dogo go. (Kọlọsinu lẹ 3:9, 10) Ṣigba gando osẹ́n Jehovah tọn lẹ go, psalm-kàntọ lọ wlan dọmọ: “To sisọ yé whlá mẹ wẹ ale susu te.” (Psalm 19:11) Hiẹ lọsu na mọdọ gbẹninọ to aliho he hẹn homẹhun Jiwheyẹwhe mẹ yin alenu susu tlala. Gbọn mọwiwà dali, hiẹ na na gblọndo na avùnnukundiọsọmẹ Satani tọn bo nasọ hẹn Jehovah jaya!

NUHE BIBLU PLỌN MÍ LẸ

  • Hiẹ sọgan lẹzun họntọn Jiwheyẹwhe tọn gbọn tonusisena ẹn dali.—Jakobu 2:23.
  • Satani ko diọavunnukunsọ tenọgligo hinhẹn gbẹtọvi lẹpo tọn.—Job 1:8, 10, 11; 2:4; Howhinwhẹn lẹ 27:11.
  • Mí dona nọla na walọyizan depope he ma nọ hẹn homẹhun Jiwheyẹwhe.—1 Kọlintinu lẹ 6:9, 10.
  • Mí sọgan hẹn homẹhun Jehovah eyin mí gbẹwanna nuhe ewọ gbẹwanna lẹ bo yiwanna nuhe e yiwanna lẹ.—Lomunu lẹ 12:9.

*  Ehe ma zẹẹmẹdo dọ Satani nọ deanana mẹhe diọnukunsọ we lẹ tlọlọ gba. Ṣigba Satani wẹ yẹwhe titonu ehe tọn, podọ aihọn lọ blebu tin to huhlọn etọn glọ. (2 Kọlintinu lẹ 4:4; 1 Johanu 5:19) Enẹwutu mí sọgan donukun dọ e ma yin mẹlẹpo wẹ na kẹalọyi gbẹninọ towe sọgbe hẹ ojlo Jiwheyẹwhe tọn gba, mẹdelẹ na jẹagọdo we.


Kanbiọ Nupinplọn Tọn Lẹ

1, 2. Donù gbẹtọ he Jehovah pọnhlan taidi họntọn vivẹ́ etọn delẹ go.

3. Naegbọn Jehovah de mẹdelẹ nado yin họntọn etọn?

4, 5. Nawẹ Jehovah nọ do huhlọn etọn hia do ota omẹ etọn lẹ tọn mẹ gbọn?

6. Owhẹ̀ tẹwẹ Satani sadokọna gbẹtọvi lẹ?

7, 8. (a) Etẹwẹ hẹn Job gbọnvo to gbẹtọvi lẹpo mẹ to ojlẹ etọn mẹ? (b) Nawẹ Satani fọ́n ayihaawe dote gando nuhewutu Job do to Jiwheyẹwhe sẹ̀n go gbọn?

9. Nawẹ Jehovah yinuwa hlan avùnnukundiọsọmẹ Satani tọn gbọn, podọ etẹwutu?

10. Whlepọn tẹlẹ wẹ Job pehẹ, podọ nawẹ e yinuwa gbọn?

11. (a) Owhẹ̀ awetọ tẹwẹ Satani sadokọna Job, podọ nawẹ Jehovah yinuwa gbọn? (b) Nawẹ Job yinuwa hlan azọ̀n sinsinyẹn awufiẹsa tọn etọn gbọn?

12. Nawẹ Job na gblọndo na avùnnukundiọsọmẹ Lẹgba tọn gbọn?

13. Etẹwẹ jọ na Job yin nugbonọ na Jiwheyẹwhe wutu?

14, 15. Naegbọn mí sọgan dọ dọ avùnnukundiọsọmẹ Satani tọn sọta Job gando gbẹtọvi lẹpo go?

16. (a) Aliho tẹlẹ wẹ Satani nọ yizan nado gọkọna gbẹtọ lẹ sọn Jiwheyẹwhe dè? (b) Nawẹ Lẹgba sọgan yí aliho ehelẹ zan sọta hiẹ lọsu gbọn?

17. Whẹwhinwhẹ́n titengbe tẹ wutu wẹ mí dona setonuna osẹ́n Jehovah tọn lẹ?

18, 19. (a) Etẹwẹ yin delẹ to osẹ́n Jehovah tọn lẹ mẹ? (Pọ́n apotin.) (b) Nawẹ mí wagbọn do yọnẹn dọ Jiwheyẹwhe ma to nususu hugan biọ to mí si?

20. Jẹhẹnu Jiwheyẹwhe tọn tẹlẹ wẹ hiẹ dona wleawuna, podọ naegbọn jẹhẹnu ehelẹ do yin onú titengbe?

21. Etẹwẹ na gọalọna we nado wleawuna jẹhẹnu Jiwheyẹwhe tọn lẹ?

22. Ale tẹwẹ hiẹ na mọyi eyin a zan gbẹzan he hẹn homẹhun Jiwheyẹwhe?