Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

WETA TINTAN

Etẹwẹ Yin Nugbo lọ Gando Jiwheyẹwhe Go?

Etẹwẹ Yin Nugbo lọ Gando Jiwheyẹwhe Go?

Be Jiwheyẹwhe nọ hò towe pọ́n nugbonugbo ya?

Omẹ nankọ wẹ Jiwheyẹwhe yin? Be e tindo oyín de ya?

Be e yọnbasi nado dọnsẹpọ Jiwheyẹwhe ya?

BE HIẸ ko doayi aliho he mẹ ovi lẹ nọ kàn kanbiọ lẹ sè te go pọ́n ya? Ovi susu nọ jẹ nukanbiọ ji tlolo he yé jẹ hodọ ji. Po nukunmẹ he to tlintlindo dín de po, yé nọ pọ́n we bo nọ kàn onú lẹ sè taidi: Naegbọn jiwhé do tindo sinmẹ juju? Etẹwẹ yè yí do basi sunwhlẹvu lẹ? Mẹnu wẹ plọn ohàn ohẹ̀ lẹ? Hiẹ sọgan tẹnpọn nado na gblọndo, ṣigba e ma nọ saba bọawu to whepoponu gba. Gblọndo he pọnte hugan he hiẹ na sọgan sọ fọ́n kanbiọ devo dote taidi: Etẹwutu?

2 E ma yin ovi lẹ kẹdẹ wẹ nọ kàn kanbiọ lẹ sè gba. Dile mí to whinwhẹ́n, mí gbẹ́ nọ to kanbiọ lẹ kanse. Mí nọ wà ehe nado sọgan yọ́n lehe mí na yinuwa gbọn, nado yọ́n owù he mí dona dapana lẹ, kavi nado hẹn pekọ wá na tlintlindo díndín mítọn. Ṣigba, e taidi dọ mẹsusu ko doalọtena kanbiọ lẹ kinkanse, titengbe dehe yin nujọnu hugan lẹ. E whè gbau, yé doalọtena gblọndo lẹ díndín.

Ovi de to kanbiọ kanse

3Lẹnnupọndo kanbiọ he tin to wepa owe ehe tọn ji gọna ehe fọndote to hodidọ bẹjẹeji owe ehe tọn mẹ lẹ kavi dehe bẹ weta ehe jẹeji lẹ ji. Kanbiọ enẹlẹ yin delẹ to kanbiọ titengbe hugan he hiẹ sọgan kanse lẹ mẹ. Ṣogan, mẹsusu ko doalọtena tintẹnpọn nado dín gblọndo na kanbiọ ehelẹ. Etẹwutu? Be Biblu na gblọndo kanbiọ ehelẹ tọn ya? Mẹdelẹ lẹndọ e vẹawu nado mọnukunnujẹ gblọndo Biblu tọn lẹ mẹ. Mẹdevo lẹ nọ mọdọ kanbiọ lẹ kinkanse sọgan dekọtọn do winyan kavi mẹdèpo mẹ. Podọ mẹdelẹ wá tadona lọ kọ̀n dọ nukọntọ sinsẹ̀n tọn lẹ po mẹplọntọ lẹ po wẹ sọgan na gblọndo kanbiọ mọnkọtọn lẹ tọn. Etẹwẹ dogbọn hiẹ dali?

4E yọnbasi taun dọ, hiẹ jlo nado mọ gblọndo na kanbiọ titengbe hugan gbẹ̀mẹ tọn lẹ. Matin ayihaawe, hiẹ nọ kanse to whedelẹnu dọmọ: ‘Etẹwẹ yin lẹndai ogbẹ̀ tọn? Be nuhe gbẹninọ bẹhẹn lẹpo die ya? Omẹ nankọ wẹ Jiwheyẹwhe yin taun?’ Onú dagbe wẹ e yin nado kàn kanbiọ mọnkọtọn lẹ sè, podọ onú titengbe wẹ e yin dọ agbọ́ ni ma pé we blo kakajẹ whenue hiẹ mọ gblọndo he sọgbe bo na we pekọ lẹ. Mẹplọntọ he diyin hugan lọ, Jesu Klisti dọmọ: “Mì biọ, yè na na mì; mì dín, mì na mọ, mì húhúhọ̀n, yè nasọ hùn in hlan mì.”—Matiu 7:7.

5Eyin hiẹ to gblọndo kanbiọ titengbe lọ lẹ tọn “dín” zọnmii, hiẹ na mọdọ dodinnanu lọ sọgan hẹn ale wá na we taun. (Howhinwhẹn lẹ 2:1-5) Mahopọnna nuhe mẹdevo lẹ sọgan ko dọna we, gblọndo lẹ tin, podọ hiẹ sọgan mọ gblọndo ehelẹ to Biblu mẹ. E ma vẹawu nado mọnukunnujẹ gblọndo lọ lẹ mẹ. Kakatimọ, yé nọ namẹ todido po ayajẹ po. Podọ yé sọgan gọalọna we nado zan gbẹzan he nọ namẹ pekọ todin. Jẹnukọn whẹ́, mì gbọ mí ni gbadopọnna kanbiọ de he ko gbàhundona mẹsusu.

BE JIWHEYẸWHE YIN MẸTỌNMAHOPỌNTỌ BO MA TINDO AWUVẸMẸ WẸ YA?

6Mẹsusu nọ lẹndọ gblọndo kanbiọ enẹ tọn dona yin mọwẹ. ‘Eyin Jiwheyẹwhe nọ hò mẹtọn pọ́n, be ninọmẹ aihọn tọn ma na ko diọ ya?’ wẹ yé nọ kanse. Eyin mí pọ́n aihọn lọ mẹ lẹdope, mí nọ mọdọ awhàn, wangbẹnamẹ, po yajiji po ko gbayipe. Podọ dopodopo mítọn wẹ nọ jẹazọ̀n, nọ jiya, bo nọ hẹn mẹyiwanna lẹ bu to okú mẹ. Enẹwutu, mẹsusu dọ dọ, ‘Eyin Jiwheyẹwhe nọ hò ninọmẹ po nuhahun mítọn lẹ po pọ́n, be e ma na ko glọnalina onú mọnkọtọn lẹ ya?’

7Ehe tlẹ sọ ylan hugan wẹ yindọ, to whedelẹnu mẹplọntọ sinsẹ̀n tọn lẹ nọ hẹn gbẹtọ lẹ nado lẹndọ Jiwheyẹwhe ma tindo awuvẹmẹ. Gbọnna? To whenuena nujijọ ylankan de jọ, yé nọ dọ dọ ojlo Jiwheyẹwhe tọn wẹ. To hogbe devo mẹ, mẹplọntọ mọnkọtọn lẹ nọ gblewhẹdo Jiwheyẹwhe na nujijọ ylankan he jọ lẹ. Be nugbo wẹ nuhe yin didọ dokọna Jiwheyẹwhe enẹlẹ yin ya? Etẹwẹ Biblu plọn mí taun? Jakobu 1:13 na gblọndo dọmọ: “Whenuena yè whlé mẹde pọ́n, e dọmọ Jiwheyẹwhe dè wẹ yè whlé e pọ́n sọn blo: na yè ma sọgan yí oylan do whlé Jiwheyẹwhe pọ́n gba, mọ e masọ nọ whlé mẹdepope pọ́n.” Enẹwutu e ma yin Jiwheyẹwhe wẹ nọ hẹn onú ylankan he mí to mimọ to aihọn mẹ lẹ wá gba. (Job 34:10-12) Nugbo wẹ dọ, e nọ na dotẹnmẹ onú ylankan lẹ nado jọ. Ṣigba nado na dotẹnmẹ nude nado jọ gbọnvo taun na hinhẹn ẹn wá.

8Di apajlẹ, lẹnnupọndo otọ́ nuyọnẹntọ po owanyinọ he tindo visunnu he ko whẹ́n mẹho bo gbẹ́ pò to whégbè hẹ mẹjitọ etọn lẹ po de ji. To whenuena visunnu lọ ṣiatẹ bo basi nudide nado tọ́nsọn whégbè, otọ́ etọn ma glọnalina ẹn gba. Eyin visunnu lọ zan gbẹzan ylankan bo biọ tukla mẹ; be otọ́ lọ wẹ hẹn visunnu lọ biọ nuhahun mẹ ya? Lala. (Luku 15:11-13) Mọdopolọ, Jiwheyẹwhe ma hẹnalọdotena gbẹtọ lẹ to whenuena yé ko basi nudide nado hodo aliho ylankan gba, ṣigba e ma yin ewọ wẹ hẹn nuhahun he ko dekọtọn lẹ wá gba. Enẹwutu, matin ayihaawe, e ma sọgbe nado gblewhẹdo Jiwheyẹwhe na yajiji gbẹtọvi tọn lẹ.

9Jiwheyẹwhe tindo whẹwhinwhẹ́n na dotẹnmẹ he e na gbẹtọvi lẹ nado hodo aliho ylankan. Taidi Mẹdatọ nuyọnẹntọ po huhlọnnọ mítọn po, e ma yin dandan dọ e ni dọ whẹwhinwhẹ́n etọn lẹ na mí. Ṣigba, na ewọ yin whinwhàn gbọn owanyi dali wutu, e dọ yé na mí. Hiẹ na plọn nususu dogọ gando whẹwhinwhẹ́n ehelẹ go to Weta 11tọ mẹ. Ṣigba, gbọ e ni họnwun na we dọ e ma yin Jiwheyẹwhe wẹ nọ hẹn nuhahun he mí nọ pehẹ lẹ wá gba. Kakatimọ, ewọ wẹ na mí todido dopo gee lọ he na hẹn pọngbọ wá!—Isaia 33:2.

10Humọ, wiwe wẹ Jiwheyẹwhe. (Isaia 6:3) Ehe zẹẹmẹdo dọ ewọ yin mẹwiwe podọ madodiho. E ma yin kanylantọ to aliho depope mẹ. Enẹwutu mí sọgan dejido ewọ go mlẹnmlẹn. Mí ma sọgan tindo jidide mlẹnmlẹn mọnkọtọn do gbẹtọvi he nọ klọmẹ to whedelẹnu go gba. Aṣẹpatọ he tlẹ yin nugbonọ hugan to egbehe lẹ ma nọ saba penugo nado vọ́ nuhe gbẹtọ ylankan hẹngble lẹ jlado gba. Ṣigba Jiwheyẹwhe wẹ yin huhlọnnọ hugan lọ. Ewọ penugo podọ e na vọ́ nuhe kanyinylan ko hẹngble to gbẹtọvi go lẹpo jlado. Eyin Jiwheyẹwhe dádo whẹho gbẹtọvi tọn mẹ, e na wàmọ to aliho de mẹ nado doalọtena ylanwiwa kakadoi!—Psalm 37:9-11.

ETẸWẸ JIWHEYẸWHE NỌ LẸN GANDO WHẸDIDA MAWADODO HE MÍ NỌ PEHẸ LẸ GO?

11Todin, etẹwẹ Jiwheyẹwhe nọ lẹn gando nuhe to jijọ to aihọn mẹ lẹ podọ do hiẹ lọsu titi ji lẹ go? Jẹnukọn whẹ́, Biblu plọnmẹ dọ Jiwheyẹwhe “yiwanna whẹdida [dodo].” (Psalm 37:28) Enẹwutu nuhe yin dagbe po dehe ma sọgbe po nọ duahunmẹna ẹn sisosiso. E gbẹwanna whẹdida mawadodo alọpa lẹpo. Biblu dọ dọ e ‘doadi na Jiwheyẹwhe to ahun etọn mẹ’ to whenuena kanyinylan gbayipe to aihọn mẹ to hohowhenu. (Gẹnẹsisi 6:5, 6) Jiwheyẹwhe ma ko diọ gba. (Malaki 3:6) E gbẹsọ nọ vẹna ẹn nado mọ yajiji he gbayipe to egbehe lẹ. Podọ e nọ vẹna Jiwheyẹwhe eyin gbẹtọ lẹ to yaji. “Ewọ to tukla mìtọn jẹ,” wẹ Biblu dọ.—1 Pita 5:7.

12Nawẹ mí sọgan deji dọ e nọ vẹna Jiwheyẹwhe nado mọ mí to yaji gbọn? Kunnudenu devo die. Biblu plọn mí dọ gbẹtọ yin didá to apajlẹ Jiwheyẹwhe tọn mẹ. (Gẹnẹsisi 1:26) Enẹwutu, nugbo lọ dọ mí tindo jẹhẹnu dagbe lẹ yin kunnudenu dọ Jiwheyẹwhe lọsu tindo jẹhẹnu dagbe lẹ. Di apajlẹ, be homẹ ma nọ gble we eyin gbẹtọ homẹvọnọ lẹ to yaji ya? Eyin whẹdida agọ̀ mọnkọtọn lẹ ma nọ hẹn homẹhun we, bo deji dọ Jiwheyẹwhe lọsu na tindo numọtolanmẹ he tlẹ sinyẹn tlala hugan mọ gando yé go.

13Dopo to onú dagbe hugan he gbẹtọvi tindo lẹ mẹ wẹ nugopipe lọ nado do owanyi hia. Enẹ lọsu yin jẹhẹnu Jiwheyẹwhe tọn. Biblu plọn mí dọ “Jiwheyẹwhe wẹ owanyi.” (1 Johanu 4:8) Mí nọ do owanyi hia na Jiwheyẹwhe lọsu nọ do e hia wutu. Be owanyi na whàn we nado doalọtena yajiji po whẹdida agọ̀ he gbayipe to aihọn mẹ lẹ po ya? Eyin hiẹ tindo huhlọn nado wàmọ, be a na basi i ya? Matin ayihaawe, hiẹ na wàmọ! Enẹwutu hiẹ sọgan deji dọ Jiwheyẹwhe na doalọtena yajiji po whẹdida mawadodo po. Opagbe he yin nùdego to hodidọ bẹjẹeji owe ehe tọn mẹ lẹ ma yin odlọ kavi todido ovọ́ de poun gba. Opagbe Jiwheyẹwhe tọn lẹ na mọ hẹndi dandan! Etomọṣo, nado sọgan tindo yise to opagbe mọnkọtọn lẹ mẹ, hiẹ dona yọ́n nususu gando Jiwheyẹwhe he ko dopagbe ehelẹ go.

JIWHEYẸWHE JLO DỌ HIẸ NI YỌ́N OMẸ NANKỌ HE EWỌ YIN

14Eyin hiẹ jlo dọ mẹde ni jẹakọ hẹ we ganji, etẹwẹ hiẹ na wà? Be hiẹ ma na dọ oyín towe na mẹlọ ya? Be Jiwheyẹwhe tindo oyín de ya? Sinsẹ̀n susu dọ dọ oyín etọn wẹ “Jiwheyẹwhe” kavi “Oklunọ,” ṣigba enẹlẹ ma yin yinkọ etọn taun gba. Tẹnmẹ-yinkọ wẹ yé yin, kẹdẹdile “ahọlu” po “togán” po yin tẹnmẹ-yinkọ lẹ do. Biblu plọn mí dọ Jiwheyẹwhe tindo tẹnmẹ-yinkọ susu. Delẹ to yé mẹ wẹ “Jiwheyẹwhe” podọ “Oklunọ.” Etomọṣo, Biblu sọ plọn mí dọ Jiwheyẹwhe tindo oyín etọn titi: he nọ yin Jehovah. Psalm 83:18 dọmọ: “Hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.” Eyin yinkọ enẹ ma tin to lẹdogbedevomẹ Biblu tọn towe mẹ, hiẹ sọgan yì pọ́n Nudọnamẹ Dogọ owe ehe tọn nado yọ́n nuhewutu e do yinmọ. Ayihaawe ma tin dọ oyín Jiwheyẹwhe tọn sọawuhia whla fọtọ́n susu to alọnuwe Biblu tọn hohowhenu tọn lẹ mẹ. Enẹwutu Jehovah jlo dọ hiẹ ni yọ́n oyín etọn bo nọ yí ì zan. Mí sọgan dọ dọ, ewọ to Biblu yizan nado do ede hia we.

Nawe de to yinkọ ede tọn dọ

Eyin hiẹ jlo dọ mẹde ni jẹakọ hẹ we, be a ma nọ dọ oyín towe na ẹn ya? Jiwheyẹwhe do oyín etọn hia mí to Biblu mẹ

15Jiwheyẹwhe do oyín de na ede he gọ́ na zẹẹmẹ susu. Oyín etọn, Jehovah, zẹẹmẹdo dọ Jiwheyẹwhe sọgan hẹn opagbe depope he e do di bo sọgan hẹn nudepope he e tindo to linlẹn mẹ lẹ ṣẹ.* Oyín vonọtaun de wẹ oyín Jiwheyẹwhe tọn, he ma tindo awetọ. Ewọ kẹdẹ wẹ e jẹna. To aliho susu mẹ, Jehovah ma tindo awetọ. Naegbọn e do yinmọ?

16Mí mọdọ Psalm 83:18 dọ gando Jehovah go dọmọ: ‘Hiẹ dopo kẹdẹ wẹ Gigogán.’ Mọdopolọ, Jehovah dopo kẹdẹ wẹ yin alọdlẹndo taidi “Ganhunupo.” Osọhia 15:3 dọmọ: “Kiklo po nujawu po wẹ azọ́n towe, Oklunọ E Jiwheyẹwhe Ganhunupo; dodo po nugbo po wẹ ali towe, hiẹ Ahọlu [madopodo, NW].” Tẹnmẹ-yinkọ lọ “Ganhunupo” nọ dohia dọ Jehovah wẹ yin huhlọnnọ hugan lọ to gbẹ̀mẹ. Huhlọn etọn matin awetọ; huhlọn etọn wẹ yiaga hugan. Podọ, to linlẹn devo mẹ tẹnmẹ-yinkọ lọ “Ahọlu madopodo” nọ flin mí dọ Jehovah ma tindo awetọ. Ewọ dopo kẹdẹ wẹ ma tindo bibẹ. Psalm 90:2 dọmọ: “Yèdọ sọn madopodo jẹ madopodo [kavi kakadoi], hiẹ wẹ Jiwheyẹwhe.” Be zẹẹmẹ ehelẹ ma jiawu ya?

17Whẹwhinwhẹ́n devo he dohia dọ Jehovah ma tindo awetọ wẹ yindọ ewọ dopo kẹdẹ wẹ yin Mẹdatọ lọ. Mí hia to Osọhia 4:11 mẹ dọmọ: “Oklunọ mítọn podọ Jiwheyẹwhe mítọn, hiẹ wẹ jẹ nado yí gigo, yẹyi, po huhlọn po: na hiẹ wẹ dá onú popo, podọ to ojlo towe mẹ wẹ yé do tin, bọ yè sọ do dá yé.” Nudepope he ji hiẹ sọgan lẹnnupọndo—yèdọ bẹsọn nudida gbigbọnọ mayinukundomọ lẹ ji to olọn mẹ wá jẹ sunwhlẹvu he nọ sọawuhia to jiwhé to zánmẹ lẹ ji, atin-sinsẹ́n lẹ, whèvi he tin to ohù po tọ̀sisa po mẹ lẹ—Jehovah wẹ yin Didatọ onú ehe lẹpo tọn!

BE HIẸ SỌGAN DỌNSẸPỌ JEHOVAH YA?

18Nupinplọn dogbọn jẹhẹnu jiawu Jehovah tọn lẹ dali nọ hẹn mẹdelẹ dibu. Yé nọ dibu dọ Jiwheyẹwhe ko yiaga hugan, bọ yé ma sọgan dọnsẹpọ ẹ kavi tlẹ sọgan yin nujọnu to nukun Jiwheyẹwhe he jiawu mọnkọtọn tọn mẹ pọ́n gbede. Ṣigba be linlẹn ehe sọgbe ya? Nuhe Biblu plọn mí gbọnvo pete na linlẹn enẹ. E dọ gando Jehovah go dọmọ: “Mọ e ma tlẹ dẹn sọn dopodopo mítọn dè gba.” (Owalọ lẹ 17:27) Biblu tlẹ dotuhomẹna mí dọmọ: “Mì sẹpọ Jiwheyẹwhe, ewọ nasọ sẹpọ mì.”—Jakobu 4:8.

Biblu plọn mí dọ Jehovah wẹ yin Didatọ owanyinọ wẹkẹ lọ tọn

Nudida Jiwheyẹwhe tọn lẹ

19Nawẹ hiẹ sọgan dọnsẹpọ Jiwheyẹwhe gbọn? Jẹnukọn whẹ́, zindonukọn to nuhe hiẹ to wiwà ehe mẹ—enẹwẹ nupinplọn dogbọn Jiwheyẹwhe dali. Jesu dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Mọwẹ, Biblu plọn mí dọ nupinplọn dogbọn Jehovah po Jesu po dali nọ dekọtọn do “ogbẹ̀ madopodo” mẹ! Dile e ko yin didọ do, “Jiwheyẹwhe wẹ owanyi.” (1 Johanu 4:16) Jehovah sọ tindo jẹhẹnu dagbedagbe he dọnmẹdogo susu devo lẹ. Di apajlẹ, Biblu dọ dọ Jehovah yin “Jiwheyẹwhe he gọ́ na akọndonanu podọ dagbewanyinọ, awuwhletọ nado sadi, podọ susunọ to lẹblanu po nugbo po mẹ.” (Eksọdusi 34:6) Ewọ yin “dagbe, bosọ nọ wleawu nado jona.” (Psalm 86:5) Jiwheyẹwhe yin linsinyẹntọ. (2 Pita 3:9) Ewọ yin wiwe kavi nugbonọ. (Osọhia 15:4) Dile hiẹ to nususu hia to Biblu mẹ, hiẹ na mọ lehe Jehovah ko dohia do dọ ewọ tindo jẹhẹnu ehelẹ po susu he dọnmẹdogo devo lẹ po.

20Na nugbo tọn, hiẹ ma sọgan mọ Jiwheyẹwhe na gbigbọ mayinukundomọ de wẹ ewọ yin wutu. (Johanu 1:18; 4:24; 1 Timoti 1:17) Ṣigba, eyin hiẹ plọnnu dogbọn ewọ dali sọn Biblu mẹ, hiẹ sọgan wá yọ́n ẹn taidi omẹ nujọnu tọn de. Dile psalm-kàntọ lọ dọ do, hiẹ sọgan “nọ pọ́n whanpẹ [Jehovah] tọn.” (Psalm 27:4; Lomunu lẹ 1:20) Lehe hiẹ plọnnu dogbọn Jehovah dali sọ, mọwẹ ewọ na lẹzun omẹ nujọnu tọn de na we do podọ mọjanwẹ hiẹ na tindo whẹwhinwhẹ́n susu nado yiwanna ẹn bosọ dọnsẹpọ ẹ do niyẹn.

Otọ́ de po visunnu etọn po

Owanyi he otọ́ dagbe de nọ dohia ovi etọn lẹ do lehe owanyi he Otọ́ mítọn olọn mẹ tọn tindo na mí siso sọ hia

21Hiẹ na wá mọnukunnujẹemẹ vudevude nuhewutu Biblu plọn mí nado nọ pọ́n Jehovah taidi Otọ́ mítọn. (Matiu 6:9) E ma yindọ ewọ na ogbẹ̀ mí kẹdẹ wẹ gba ṣigba e sọ jlo dọ mí ni duvivi ogbẹ̀ tọn to gigọ́mẹ—kẹdẹdile otọ́ owanyinọ lẹpo na jlo na ovi yetọn lẹ do. (Psalm 36:9) Biblu sọ plọn mí dọ gbẹtọ lẹ sọgan yin họntọn Jehovah tọn. (Jakobu 2:23) Yí nukun homẹ tọn do pọ́n ehe—yèdọ hiẹ sọgan lẹzun họntọn Didatọ wẹkẹ lọ tọn!

22Dile hiẹ to nususu plọn dogọ sọn Biblu mẹ, a sọgan mọdọ mẹdelẹ he tlẹ nọ lẹn dagbe towe na dọna we dọ hiẹ ni doalọtena nupinplọn towe. Yé sọgan to nuhà dọ hiẹ na diọ nuyise towe lẹ. Ṣigba ma dike mẹdepope ni glọnalina we gbede nado ji họntọn dagbe hugan lọ blo.

23Nugbo wẹ dọ, onú delẹ na tin he mẹ hiẹ ma na mọnukunnujẹ to bẹjẹeji. E nọ biọ whiwhẹ nado biọ alọgọ, ṣigba ma dọ̀n yonu do godo na winyan wutu blo. Jesu dọ dọ onú dagbe wẹ e yin nado tindo whiwhẹ taidi ovi pẹvi de. (Matiu 18:2-4) Podọ dile mí yọnẹn do, ovi lẹ nọ kàn kanbiọ susu sè. Jiwheyẹwhe jlo dọ hiẹ ni mọ gblọndo na kanbiọ towe lẹ. Biblu na pipà mẹhe nọ tin to jejeji nado plọnnu dogbọn Jiwheyẹwhe dali lẹ. Yé nọ dindona Owe-wiwe lẹ po sọwhiwhe po nado yọnẹn eyin nuhe plọn yé te lẹ yin nugbo.—Owalọ lẹ 17:11.

24Aliho dagbe hugan he mẹ mí nọ plọnnu dogbọn Jehovah dali te wẹ nado gbadopọnna Biblu. E gbọnvona owe devo depope. To aliho tẹ mẹ? Weta he bọdego na dọhodo ehe ji.

NUHE BIBLU PLỌN MÍ LẸ

  • Jiwheyẹwhe nọ hò ninọmẹ towe titi lẹ pọ́n.—1 Pita 5:7.
  • Yinkọ Jiwheyẹwhe tọn nọ yin Jehovah.—Psalm 83:18.
  • Jehovah basi oylọna we nado dọnsẹpọ ẹ.—Jakobu 4:8.
  • Jehovah yin owanyinọ, homẹdagbenọ, po lẹblanunọ po.—Eksọdusi 34:6; 1 Johanu 4:8, 16.

*  Nudọnamẹ dogọ lẹ tin do zẹẹmẹ po lehe oyín Jiwheyẹwhe tọn nọ yin yiylọ gbọn po ji to Nudọnamẹ Dogọ lọ mẹ.


Kanbiọ Nupinplọn Tọn Lẹ

1, 2. Naegbọn e do yin onú dagbe nado nọ kàn kanbiọ lẹ sè?

3. Naegbọn mẹsusu doalọtena tintẹnpọn nado mọ gblọndo na kanbiọ titengbe hugan lẹ?

4, 5. Kanbiọ titengbe hugan tẹlẹ wẹ mí sọgan kanse to gbẹ̀mẹ, podọ etẹwutu mí dona dín gblọndo na yé?

6. Naegbọn mẹsusu nọ lẹndọ yajiji gbẹtọvi lẹ tọn ma nọ duahunmẹna Jiwheyẹwhe?

7. (a) Nawẹ mẹplọntọ sinsẹ̀n tọn lẹ ko hẹn mẹsusu nado lẹndọ Jiwheyẹwhe ma tindo awuvẹmẹ gbọn? (b) Etẹwẹ Biblu plọn mí taun gando whlepọn he mí nọ jiya etọn lẹ go?

8, 9. (a) Apajlẹ tẹwẹ hiẹ sọgan na nado do vogbingbọn he tin to dotẹnmẹ nina nuylankan nado jọ po hinhẹn ẹn wá po ṣẹnṣẹn hia? (b) Naegbọn e ma do sọgbe dọ mí ni mọhodọ do nudide Jiwheyẹwhe tọn nado na dotẹnmẹ gbẹtọvi lẹ nado to tasinyẹn go?

10. Naegbọn mí sọgan deji dọ Jiwheyẹwhe na vọ́ nuhe kanyinylan hẹngble lẹpo jlado?

11. (a) Etẹwẹ Jiwheyẹwhe nọ lẹn gando whẹdida mawadodo go? (b) Etẹwẹ Jiwheyẹwhe nọ lẹn gando yajiji dopodopo mítọn tọn go?

12, 13. (a) Naegbọn mí do tindo jẹhẹnu dagbe lẹ taidi owanyi, podọ nawẹ owanyi nọ yinuwado aliho he mẹ mí nọ pọ́n aihọn lọ te ji gbọn? (b) Naegbọn hiẹ sọgan deji dọ Jiwheyẹwhe na wà nude dandan gando nuhahun aihọn tọn lẹ go?

14. Nawẹ Jiwheyẹwhe nọ yin, podọ etẹwutu mí dona nọ yí oyín enẹ zan?

15. Etẹwẹ yinkọ lọ Jehovah zẹẹmẹdo?

16, 17. Naegbọn mẹdelẹ lẹndọ yé ma sọgan dọnsẹpọ Jiwheyẹwhe pọ́n gbede, ṣigba etẹwẹ Biblu plọn mí?

18. Etẹwẹ mí sọgan plọn gando Jehovah go sọn tẹnmẹ-yinkọ ehelẹ mẹ: (a) “Ganhunupo”? (b) “Ahọlu madopodo”? (c) “Mẹdatọ”?

19. (a) Nawẹ mí sọgan jẹ dindọnsẹpọ Jiwheyẹwhe ji gbọn, podọ ale tẹwẹ mí na mọyi sọn e mẹ? (b) Jẹhẹnu Jiwheyẹwhe tọn tẹlẹ wẹ hiẹ yiwanna hugan?

20-22. (a) Be nugomape mítọn nado mọ Jiwheyẹwhe nọ glọnalina mí nado dọnsẹpọ ẹ wẹ ya? Basi zẹẹmẹ. (b) Etẹwẹ mẹhe tlẹ nọ lẹn dagbe towe delẹ sọgan dọna we nado wà, ṣigba etẹwẹ hiẹ dona wà?

23, 24. (a) Etẹwutu hiẹ dona zindonukọn nado to kanbiọ lẹ kanse gando nuhe plọn a te lẹ go? (b) Etẹ ji wẹ weta he bọdego na dọhodo?

Plọnnu Dogọ

Be Jiwheyẹwhe Tindo Yinkọ de Ya?

Jiwheyẹwhe tindo tẹnmẹ-yinkọ susu taidi Ganhunupotọ, Mẹdatọ, podọ Oklunọ. Amọ́ yinkọ Jiwheyẹwhe tọn titi yin yiyizan nudi whla 7 000 to Biblu mẹ.

Naegbọn Mí Dona Plọn Biblu?

Biblu to alọgọna gbẹtọ livi susu lẹdo aihọn pé nado mọ gblọndo na kanbiọ tangan gbẹ̀mẹ tọn lẹ. Hiẹ lọsu jlo na tin to yé mẹ ya?