Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

NUDỌNAMẸ DOGỌ

Be Décembre mẹ Wẹ Jesu Yin Jiji te Ya?

Be Décembre mẹ Wẹ Jesu Yin Jiji te Ya?

BIBLU ma dọ jijizan Jesu tọn na mí gba. Ṣigba, e na whẹwhinwhẹ́n dolido he na hẹn mí wá tadona kọ̀n dọ ewọ ma yin jiji to décembre mẹ.

Lẹnnupọndo ninọmẹ aimẹ tọn he nọ tin to ojlẹ owhe tọn enẹ mẹ to Bẹtlẹhẹm, fie Jesu yin jiji te ji. Osun Juvi lẹ tọn he nọ yin Kislẹvi (he sọgbe hẹ novembre/décembre) yin osun he mẹ fifá po jikun po nọ tin te taun. Osun Tebẹti tọn (décembre/janvier) wẹ nọ bọdego. E yin ojlẹ he mẹ aimẹ nọ fá te hugan to whemẹ, podọ osin-agó nọ ja sọn ojlẹ de mẹ jẹ devo mẹ to agbegbe lọ ji. Mì gbọ mí ni pọ́n nuhe Biblu dọna mí gando ninọmẹ aimẹ lẹdo lọ tọn go.

Biblu kantọ Ẹzla dohia dọ Kislẹvi yin osun he mẹ fifá po jikun po nọ sù te taun. To whenuena e ko dọ dọ gbẹtọgun de pli dopọ to Jelusalẹm to “osun ṣinẹnẹtọ [Kislẹvi]…to azán okotọ osun lọ tọn ji” godo, Ẹzla na linlin dọ gbẹtọ lẹ “to sisọsisọ…na jikun daho lọ” wutu. Gando ninọmẹ aimẹ tọn lẹ go to ojlẹ owhe tọn enẹ mẹ, gbẹtọ he pli dopọ lẹ lọsu dọmọ: “E sọ yin ojlẹ jikun susu tọn de, mí masọ tin sọgan nado ṣite to gbonu.” (Ẹzla 10:9, 13; Jẹlemia 36:22) Abajọ lẹngbọhọtọ he nọ nọ̀ lẹdo enẹ mẹ lẹ nọ hẹn ẹn diun dọ yewlẹ po lẹngbọpa yetọn lẹ po ma tin to gbonu to zánmẹ ba to whenuena yé biọ osun décembre tọn mẹ!

Lẹngbọhọtọ lẹ po lẹngbọ yetọn lẹ po

Lẹngbọhọtọ lẹ po lẹngbọpa yetọn lẹ po tin to danji to zánmẹ to whenuena Jesu yin jiji

Ṣigba, Biblu na linlin dọ lẹngbọhọtọ lẹ tin to danji bo to lẹngbọ yetọn lẹ yìn to ozán he mẹ Jesu yin jiji. Na nugbo tọn, Biblu kantọ Luku dohia dọ to ojlẹ enẹ mẹ, lẹngbọhọtọ lẹ tin “to danji [bo] to lẹngbọpa yetọn họ́ to zánmẹ” sẹpọ Bẹtlẹhẹm. (Luku 2:8-12) Doayi e go dọ lẹngbọhọtọ lẹ tin to gbonu, e ma yin nado to sadi to azán lọ gbè poun wẹ gba. Lẹngbọpa yetọn tin to danji to zánmẹ. Be zẹẹmẹ lọ dọ yé tin to gbonu sọgbe hẹ ninọmẹ aimẹ tọn he nọ fá tọ́ntọ́n po jikun po to Bẹtlẹhẹm to décembre mẹ ya? Paali. Enẹwutu ninọmẹ he lẹdo jiji Jesu tọn lẹ dohia dọ ewọ ma yin jiji to décembre mẹ.*

Ohó Jiwheyẹwhe tọn dọ whenue Jesu kú na mí tlọlọ, ṣigba nudọnamẹ kleun de poun wẹ e dọ gando whenue e yin jiji go. Ehe flin mí ohó Ahọlu Sọlọmọni tọn lẹ dọmọ: “Oyín dagbe yọ́n hú nusisá he dewán akuẹgegenu tọn; okúzán hú gbeegbe yè ji omẹ.” (Yẹwhehodọtọ 7:1) Enẹwutu, e ma dona paṣa mí dọ Biblu basi zẹẹmẹ susu gando lizọnyizọn po okú Jesu tọn po go ṣigba bo ma dọ nususu gando ojlẹ jiji etọn tọn go.


*  Na nudọnamẹ dogọ, pọ́n weda 161-4 owe lọ Comment raisonner à partir des Écritures tọn, he Kunnudetọ Jehovah tọn lẹ zinjẹgbonu.

← Pọ́n weta he gandego

Plọnnu Dogọ

KANBIỌ HE MẸSUSU NỌ KANSE LẸ

Naegbọn Kunnudetọ Jehovah Tọn lẹ Ma Nọ Dù Noẹli?

Mẹsusu wẹ nọ dù Noẹli mahopọnna dọ yé yọ́n asisa hùnwhẹ lọ tọn. Dindona nuhewutu Kunnudetọ Jehovah tọn lẹ ma nọ wàmọ.