Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Etẹwẹ Biblu Plọn Mí Taun?

WETA FỌTỌ̀N-NUKUNATỌ̀N

Baptẹm Podọ Haṣinṣan Towe hẹ Jiwheyẹwhe

Baptẹm Podọ Haṣinṣan Towe hẹ Jiwheyẹwhe

Nawẹ baptẹm Klistiani tọn nọ yin bibasi gbọn?

Afọdide tẹlẹ wẹ hiẹ dona ze nado pegan na baptẹm?

Nawẹ mẹde nọ basi klandowiwe hlan Jiwheyẹwhe gbọn?

Etẹwẹ yin whẹwhinwhẹ́n tangan he wutu mí do nọ yí baptẹm?

“PỌ́N, osin tin tofi; etẹwẹ hẹn mi dote nado baptizi?” Ogán họ̀nmẹ Etiopia tọn de to owhe kanweko tintan whenu wẹ kàn kanbiọ mọnkọtọn sè. Klistiani de he nọ yin Filipi ko dohia ẹ dọ Jesu wẹ Mẹssia dopagbe lọ. Na nuhe e ko plọn sọn Owe-wiwe mẹ whàn ẹn wutu, dawe Etiopianu lọ yinuwa. E dohia dọ emi tindo ojlo nado yin bibaptizi!—Owalọ lẹ 8:26-36.

Ogán họ̀nmẹ Etiopia tọn de to owhe kanweko tintan whenu

2 Eyin hiẹ ko yí sọwhiwhe do plọn weta owe ehe tọn he wayi lẹ hẹ dopo to Kunnudetọ Jehovah tọn lẹ mẹ, hiẹ sọgan mọdọ emi ko sọgbe nado kanse, ‘Etẹwẹ hẹnalọdotena mi nado yin bibaptizi?’ Todin, matin ayihaawe hiẹ ko plọnnu gando opagbe ogbẹ̀ madopodo to Paladisi mẹ tọn he Biblu dó go. (Luku 23:43; Osọhia 21:3, 4) Hiẹ ko sọ plọnnu gando ninọmẹ taun oṣiọ lẹ tọn po todido fọnsọnku tọn po go. (Yẹwhehodọtọ 9:5; Johanu 5:28, 29) Hiẹ sọgan ko to awukọndopọ hẹ Kunnudetọ Jehovah tọn lẹ to opli agun tọn yetọn lẹ ji bo ko mọ po nukun po lehe yé nọ basi sinsẹ̀n nugbo lọ gbọn. (Johanu 13:35) Hú popolẹpo, hiẹ sọgan ko jẹ awuwlena haṣinṣan mẹdetiti tọn hẹ Jehovah Jiwheyẹwhe ji.

3Nawẹ hiẹ sọgan dohia dọ a jlo na sẹ̀n Jiwheyẹwhe gbọn? Jesu dọna hodotọ etọn lẹ dọmọ: ‘Mì yì, bo hẹn akọta lẹpo zun nuplọntọ, bosọ nọ baptizi yé.’ (Matiu 28:19) Jesu lọsu ze apajlẹ dai gbọn yinyin bibaptizi to osin mẹ dali. Osin ma yin húnhún do e ji, podọ osin ma yin kinkọ̀n do ota na ẹn poun gba. (Matiu 3:16) Hogbe lọ “baptẹm” wá sọn hodidọ Glẹki tọn de mẹ he zẹẹmẹdo “whèadin.” Enẹwutu baptẹm Klistiani tọn zẹẹmẹdo nado whèadin, kavi nado yin yinylọ́n mlẹnmlẹn do osin mẹ.

4Baptẹm osin tọn yin nubiọtomẹsi de na mẹhe jlo nado tindo haṣinṣan hẹ Jehovah Jiwheyẹwhe lẹpo. Baptẹm nọ do ojlo he a tindo nado sẹ̀n Jiwheyẹwhe hia to gbangba. E nọ dohia dọ homẹ towe hùn nado wà ojlo Jehovah tọn. (Psalm 40:7, 8) Ṣigba, nado pegan na baptẹm, hiẹ dona ze afọdide tangan delẹ.

HIẸ DONA TINDO OYỌNẸN PO YISE PO

5Hiẹ ko jẹ afọdide tintan lọ ze ji todin. Gbọnna? Gbọn tintindo oyọnẹn Jehovah Jiwheyẹwhe po Jesu Klisti po tọn dali, vlavo gbọn oplọn Biblu tọn gbesisọ tọn de dali. (Johanu 17:3) Ṣigba nususu gbẹ́ pò he hiẹ na wá plọn to nukọnmẹ. Ojlo Klistiani lẹ tọn wẹ nado ‘gọ́ na oyọnẹn ojlo Jiwheyẹwhe tọn.’ (Kọlọsinu lẹ 1:9) Opli agun tọn Kunnudetọ Jehovah tọn lẹ tọn yìyì nọ gọalọ taun to whẹho ehe mẹ. Onú titengbe wẹ e yin nado nọ yì opli mọnkọtọn lẹ. (Heblu lẹ 10:24, 25) Opli lẹ yìyì to gbesisọmẹ na gọalọna we nado hẹn oyọnẹn towe gando Jiwheyẹwhe go jideji.

Oyọnẹn nugbo Ohó Jiwheyẹwhe tọn tintindo yin afọdide titengbe de nado pegan na baptẹm

Plọnmẹ Biblu

6Nugbo wẹ dọ, e ma yin nuhe tin to Biblu mẹ lẹpo wẹ hiẹ dona yọnẹn whẹpo do pegan na baptẹm gba. Ogán họ̀nmẹ Etiopia tọn lọ tindo oyọnẹn jẹ obá de mẹ, ṣigba ewọ tindo nuhudo alọgọ tọn nado sọgan mọnukunujẹ adà Owe-wiwe tọn delẹ mẹ. (Owalọ lẹ 8:30, 31) Mọdopolọ, nususu gbẹ́ pò he hiẹ na wá plọn. Na nugbo tọn, hiẹ ma na doalọtena nupinplọn gando Jiwheyẹwhe go pọ́n gbede. (Yẹwhehodọtọ 3:11) Ṣigba, whẹpo hiẹ nado yí baptẹm, e whè gbau a dona tindo oyọnẹn nuplọnmẹ dodonu Biblu tọn lẹ bo kẹalọyi yé. (Heblu lẹ 5:12) Nuplọnmẹ mọnkọtọn lẹ bẹ nugbo lọ yinyọnẹn gando ninọmẹ oṣiọ lẹ tọn, nujọnu-yinyin oyín Jiwheyẹwhe tọn po Ahọluduta etọn tọn po go hẹn.

7Nalete, oyọnẹn kẹdẹ ma ko pé, na “matin yise, e glo nado hẹn homẹ [Jiwheyẹwhe tọn] hùn.” (Heblu lẹ 11:6) Biblu dọna mí dọ whenuena mẹdelẹ to tòdaho hohowhenu Kọlinti tọn mẹ sè owẹ̀n Klistiani tọn, yé “yise, yè sọ baptizi yé.” (Owalọ lẹ 18:8) To aliho dopolọ mẹ, Biblu pinplọn dona hẹn we tindo yise dọ Biblu yin Ohó gbọdo Jiwheyẹwhe tọn. Biblu pinplọn dona gọalọna we nado tindo yise to opagbe Jiwheyẹwhe tọn lẹ mẹ podọ to huhlọn mẹwhlẹngán tọn he avọ́sinsan Jesu tọn tindo mẹ.—Jọṣua 23:14; Owalọ lẹ 4:12; 2 Timoti 3:16, 17.

NUGBO BIBLU TỌN MIMÁ HẸ MẸDEVO LẸ

8Dile yise to hinhẹnai to ahun towe mẹ, e na vẹawuna we ma nado dọ nuhe plọn a te lẹ na mẹdevo lẹ. (Jẹlemia 20:9) Hiẹ na yin whinwhàn sinsinyẹn nado dọho hẹ mẹdevo lẹ gando Jiwheyẹwhe po lẹndai etọn lẹ po go.—2 Kọlintinu lẹ 4:13.

Yise dona whàn we nado dọ nuhe hiẹ yise na mẹdevo lẹ

Dawe de to nuyise etọn mahẹ mẹdevo lẹ

9Hiẹ sọgan jẹ nugbo Biblu tọn má hẹ mẹdevo lẹ ji gbọn wuntuntun yíyí do dọ ẹ na hẹnnumẹ towe lẹ, họntọn lẹ, kọmẹnu lẹ, po azọ́nwatọgbẹ́ lẹ po dali. Enẹgodo, hiẹ sọgan jlo nado tindo mahẹ to azọ́n yẹwhehodidọ tọn he Kunnudetọ Jehovah tọn lẹ nọ wà mẹ. Eyin mọwẹ, voawu nado dọhodeji hẹ Kunnudetọ he to Biblu plọn hẹ we lọ. Eyin e sọawuhia dọ hiẹ pegan na lizọnyizọn gbangba tọn, tito na yin bibasi bọ hiẹ po mẹplọntọ towe po na pli hẹ awe to mẹho agun tọn lẹ mẹ.

10Ehe na hẹn we penugo nado jẹakọ ganji hẹ delẹ to mẹho Klistiani tọn he to lẹngbọpa Jiwheyẹwhe tọn yìn lẹ mẹ. (Owalọ lẹ 20:28; 1 Pita 5:2, 3) Eyin mẹho ehelẹ mọdọ hiẹ mọnukunnujẹ nuplọnmẹ dodonu Biblu tọn lẹ mẹ bo tindo yise to yé mẹ, bo to gbẹnọ sọgbe hẹ nunọwhinnusẹ́n Jiwheyẹwhe tọn lẹ, bosọ jlo nado yin dopo to Kunnudetọ Jehovah tọn lẹ mẹ nugbonugbo, yé na dike a ni yọnẹn dọ hiẹ pegan nado tindo mahẹ to lizọnyizọn gbangba tọn lọ mẹ taidi wẹnlatọ wẹndagbe lọ tọn he ma ko yí baptẹm.

11To alọ devo mẹ, e sọgan biọ dọ hiẹ ni basi diọdo delẹ to aliho gbẹninọ tọn po walọyizan towe lẹ po mẹ nado sọgan pegan na lizọnyizọn gbangba tọn lọ. Ehe sọgan bẹ alọdidotena walọ he a nọ zan to nuglọ delẹ hẹn. Enẹwutu, whẹpo hiẹ nado biọ nado lẹzun wẹnlatọ he ma yí baptẹm de, hiẹ dona ko nọla na ylando sinsinyẹn lẹ, taidi fẹnnuwiwa zanhẹmẹ tọn, ahànnumu, po amasin adínọ ṣiṣizan po.—1 Kọlintinu lẹ 6:9, 10; Galatianu lẹ 5:19-21.

LẸNVỌJỌ PO DIỌDO BIBASI PO

12Afọdide devo delẹ dona yin zize whẹpo hiẹ nido pegan na baptẹm. Apọsteli Pita dọmọ: “Mì lẹnvọjọ…na yè ni diọ mì, na yè nido súnsún ylando mìtọn sẹ̀.” (Owalọ lẹ 3:19) Nado lẹnvọjọ zẹẹmẹdo nado blawu kavi numọtolanmẹ vivẹ́ tintindo gando nuhe hiẹ ko wà go. Lẹnvọjọ tintindo sọgbe eyin mẹlọ ko zan gbẹzan mawé dai, ṣigba e sọ yin dandan eyin mẹlọ tlẹ ko zan nuhe taidi gbẹzan dagbe de. Etẹwutu? Na gbẹtọvi lẹpo wẹ yin ylandonọ bo tindo nuhudo jonamẹ Jiwheyẹwhe tọn. (Lomunu lẹ 3:23; 5:12) Jẹnukọnna Biblu pinplọn towe, hiẹ ma ko yọ́n nuhe yin ojlo Jiwheyẹwhe tọn gba. Enẹwutu nawẹ hiẹ sọgan ko nọgbẹ̀ to kọndopọmẹ hẹ ojlo etọn mlẹnmlẹn gbọn? Gbọnmọ dali, lẹnvọjọ yin dandannu.

13Diọdo bibasi dona bọdo lẹnvọjọ go. Hiẹ dona wà nususu hugan dọ e ni vẹna we poun. Hiẹ dona gbẹ́ aliho gbẹzan hoho tọn towe dai bo magbe mlẹnmlẹn dọ bẹsọn din hiẹ na jẹ nuhe sọgbe wà ji zọnmii. Lẹnvọjọ po diọdo bibasi po yin afọdide he hiẹ dona ze lẹ jẹnukọnna baptẹm.

KLANDOWIWE MẸDETITI TỌN BIBASI

14Afọdide titengbe devo tin he dona yin zize jẹnukọnna baptẹm yíyí. Hiẹ dona basi klandowiwe towe titi hlan Jehovah Jiwheyẹwhe.

15To whenuena hiẹ klan dewe do wiwe hlan Jehovah Jiwheyẹwhe to odẹ̀ vẹkuvẹku de mẹ, hiẹ dopagbe nado ze dewe jo na ẹn mlẹnmlẹn kakadoi. (Deutelonomi 6:15) Ṣigba, naegbọn mẹde na jlo nado wàmọ? Eyọ́n, mí ni dọ dọ sunnu de bẹ họntọnmẹninọ jẹeji hẹ yọnnu de. Lehe ewọ to ayido yọnnu lọ go bo to mimọ dọ e tindo jẹhẹnu dagbe lẹ sọ, mọwẹ owanyi etọn na yọnnu lọ nọ siso dogọ do niyẹn. To ojlẹ vude godo, jọwamọnu wẹ e yin dọ e ni biọ to yọnnu lọ si nado wlealọ hẹ ẹ. Nugbo wẹ dọ, alọwiwle na zẹẹmẹdo alọkikẹyi azọngban lẹ dogọ. Ṣigba owanyi na whàn ẹn nado de afọdide titengbe enẹ.

16To whenuena hiẹ wá yọ́n Jehovah bosọ yiwanna ẹn, hiẹ na yin whinwhàn nado sẹ̀n ẹn po alindọn towe lẹpo po kavi matin dogbó de zizedai to sinsẹ̀n-bibasi towe hlan ẹn mẹ. Mẹdepope he jlo nado hodo Ovi Jiwheyẹwhe tọn, Jesu Klisti, dona “mọ́n ede.” (Malku 8:34) Mí nọ mọ́n míde eyin mí ma na dotẹnmẹ ojlo po yanwle mẹdetiti tọn lẹ po nado glọnalina tonusise mlẹnmlẹn mítọn na Jiwheyẹwhe. To whelọnu lo, whẹpo hiẹ nado yin bibaptizi, ojlo Jehovah Jiwheyẹwhe tọn wiwà wẹ dona yin yanwle towe tintan to gbẹ̀mẹ.—1 Pita 4:2.

DUDUTO OBÚ AWUGBOPO TỌN JI

17Mẹdelẹ nọ dọ̀n yonu do godo nado basi klandowiwe hlan Jehovah na yé nọ dibu nado ze afọdide titengbe mọnkọtọn. Yé sọgan nọ dibu nado dogbè na Jiwheyẹwhe taidi Klistiani he klan ede do wiwe de. Na yé nọ dibu dọ yé sọgan gboawupo bo hẹn Jehovah jẹflumẹ wutu, yé nọ lẹndọ e na yọ́n hugan ma nado basi klandowiwe hlan ẹn.

18Dile hiẹ plọn nado yiwanna Jehovah, hiẹ na yin whinwhàn nado basi klandowiwe hlan ẹn podọ nado wà nuhe go a pé lẹpo nado nọgbẹ̀ sọgbe hẹ ẹ. (Yẹwhehodọtọ 5:4) To klandowiwe bibasi godo, e họnwun dọ hiẹ na jlo nado “to zọnlinzin dole e jẹna [Jehovah] to nukundagbe lẹpo mẹ.” (Kọlọsinu lẹ 1:10) Na owanyi towe na Jiwheyẹwhe wutu, hiẹ ma na lẹndọ ojlo etọn wiwà na sinyẹnawuna we hugan gba. Matin ayihaawe hiẹ na kọngbedopọ hẹ apọsteli Johanu, mẹhe wlan dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn: osẹ́n etọn masọ yin nupẹnagbanmẹ gba.”—1 Johanu 5:3.

19Hiẹ ma dona yin mẹpipe whẹpo do basi klandowiwe hlan Jiwheyẹwhe gba. Jehovah yọ́n dogbó towe lẹ podọ e ma nọ donukun pọ́n gbede dọ hiẹ ni wà hugan nuhe go a pé. (Psalm 103:14) E nọ jlo dọ hiẹ ni tindo kọdetọn dagbe podọ e na nọgodona we bosọ gọalọna we. (Isaia 41:10) Hiẹ sọgan tindo nujikudo dọ eyin hiẹ yí ahun towe lẹpo do dejido Jehovah go, ewọ “nasọ jlọ omọ́ towe.”—Howhinwhẹn lẹ 3:5, 6.

BASI DOHIA KLANDOWIWE TOWE TỌN GBỌN BAPTẸM DALI

20Nulinlẹnpọndo nuhe mí ko plọn wayi todin lẹ ji sọgan gọalọna we nado basi klandowiwe mẹdetiti tọn hlan Jehovah to odẹ̀ mẹ. Mẹhe yiwanna Jiwheyẹwhe nugbonugbo lẹpo dona sọ ‘basi gbeyiyi gbangba tọn hlan whlẹngán’ ga. (Lomunu lẹ 10:10) Nawẹ gbeyiyi gbangba tọn nọ yin bibasi gbọn?

Be hiẹ ko basi klandowiwe mẹdetiti tọn hlan Jiwheyẹwhe to odẹ̀ mẹ ya?

Dawe de to dẹ̀ho

21Hiẹ dona dọna anadenanutọ to pipli mẹho lẹ tọn mẹ to agun towe mẹ dọ a jlo nado yí baptẹm. Ewọ na basi tito bọ mẹho delẹ na gbadopọnna kanbiọ delẹ he sinai do nuplọnmẹ dodonu Biblu tọn lẹ ji hẹ we. Eyin mẹho ehelẹ yigbe dọ hiẹ pegan, yé na dọna we dọ hiẹ sọgan yí baptẹm to dotẹnmẹ hundote he bọdego lọ mẹ.* Hodidọ he nọ gbadopọnna nuhe baptẹm zẹẹmẹdo nọ saba yin didọ to nuwiwa mọnkọtọn lẹ tẹnmẹ. Enẹgodo hodọtọ lọ nọ basi oylọna baptẹm-yitọ lẹpo nado na gblọndo kanbiọ he bọawu awe tọn taidi aliho de nado basi ‘gbeyiyi gbangba’ yise yetọn tọn.

22Baptẹm yíyí wẹ nọ do we hia to gbangba taidi mẹhe ko basi klandowiwe hlan Jiwheyẹwhe podọ ko yin dopo to Kunnudetọ Jehovah tọn lẹ mẹ. Baptẹm-yitọ lẹ nọ yin yinylọ́n do sinmẹ mlẹnmlẹn nado dohia to gbangba dọ yé ko basi klandowiwe hlan Jehovah.

ZẸẸMẸ BAPTẸM TOWE TỌN

23Jesu dọ dọ devi etọn lẹ na yin bibaptizi “do oyín Otọ́ tọn, po Ovi tọn po, po [gbigbọ wiwe] tọn po mẹ.” (Matiu 28:19) Ehe zẹẹmẹdo dọ mẹhe jlo na yí baptẹm de yọ́n aṣẹpipa Jehovah Jiwheyẹwhe po Jesu Klisti po tọn. (Psalm 83:18; Matiu 28:18) E sọ yọ́n azọ́n po nuyiwa gbigbọ wiwe Jiwheyẹwhe tọn, kavi huhlọn-yído-wazọ́n etọn po tọn.—Galatianu lẹ 5:22, 23; 2 Pita 1:21.

Baptẹm zẹẹmẹdo kúkú na gbẹzan dai tọn mítọn podọ gigọwa ogbẹ̀ nado wà ojlo Jiwheyẹwhe tọn

Dawe de to yinyin bibaptizi

24Ṣigba, baptẹm ma yin nuwiwa mẹyinylọ́n do sinmẹ tọn de poun gba. E yin yẹhiadonu onú titengbe de tọn. Osin glọ yìyì yin yẹhiadonu dọ hiẹ ko kú na gbẹzan towe dai tọn. Tintọ́n sọn osin glọ dohia dọ hiẹ gọwá ogbẹ̀ todin nado wà ojlo Jiwheyẹwhe tọn. Flin ga dọ, Jehovah Jiwheyẹwhe lọsu titi wẹ hiẹ ko basi klandowiwe hlan, e ma yin na azọ́n, nuwiwa, gbẹtọ devo lẹ, kavi na titobasinanu de gba. Klandowiwe po baptẹm towe po yin bẹjẹeji họntọnjiji vivẹ de tọn hẹ Jiwheyẹwhe—yèdọ haṣinṣan pẹkipẹki de tọn hẹ ẹ.—Psalm 25:14.

25Baptẹm ma yin gbedewema lọ nado mọ whlẹngán yí gba. Apọsteli Paulu wlan dọmọ: “Mì nọ wazọ́n whlẹngán mìtọn tọn jẹgbonu to osi po sisọsisọ po mẹ.” (Filippinu lẹ 2:12) Bẹjẹeji de poun wẹ baptẹm yin. Ehe fọ́n kanbiọ de dote, Nawẹ hiẹ sọgan gbọṣi owanyi Jiwheyẹwhe tọn mẹ gbọn? Weta godo tọn owe ehe tọn na na gblọndo kanbiọ ehe tọn.

NUHE BIBLU PLỌN MÍ LẸ

  • Baptẹm Klistiani tọn bẹ mẹyinylọ́n do sinmẹ mlẹnmlẹn hẹn, e ma yin osin húnhún domẹji poun gba.—Matiu 3:16.
  • Oyọnẹn tintindo po yise didohia po yin bẹjẹeji afọdide he nọ planmẹ jẹ baptẹm kọ̀n tọn podọ lẹnvọjọ, diọdo bibasi, po mẹdetiti kinklandowiwe hlan Jiwheyẹwhe po nọ bọdego.—Johanu 17:3; Owalọ lẹ 3:19; 18:8.
  • Nado basi klandowiwe hlan Jehovah, hiẹ dona mọ́n dewe, dile gbẹtọ lẹ mọ́n yedelẹ do nado hodo Jesu.—Malku 8:34
  • Baptẹm yíyí yin yẹhiadonu kúkú na gbẹzan dai tọn mẹtọn podọ gigọwa ogbẹ̀ todin nado wà ojlo Jiwheyẹwhe tọn.—1 Pita 4:2.

*  Tito Baptẹm tọn nọ yin bibasi to gbesisọmẹ to plidopọ he Kunnudetọ Jehovah tọn lẹ nọ basi to whemẹwhemẹ lẹ ji.


Kanbiọ Nupinplọn Tọn Lẹ

1. Naegbọn ogán họ̀nmẹ Etiopia tọn de biọ nado yin bibaptizi?

2. Naegbọn hiẹ dona lẹnnupọn sisosiso do baptẹm ji?

3. (a) Gbedide tẹwẹ Jesu na hodotọ etọn lẹ? (b) Nawẹ baptẹm osin tọn nọ yin bibasi gbọn?

4. Etẹwẹ baptẹm osin mẹ tọn nọ dohia?

5. (a) Afọdide tẹwẹ yin tintan nado pegan na baptẹm? (b) Naegbọn opli Klistiani tọn lẹ do yin onú titengbe?

6. Fie wẹ hiẹ sọgan tindo oyọnẹn Biblu tọn jẹ nado sọgan pegan na baptẹm?

7. Nuyiwadomẹji tẹwẹ Biblu pinplọn dona tindo do ji we?

8. Etẹwẹ na whàn we nado dọ nuhe a plọn lẹ na mẹdevo lẹ?

9, 10. (a) Mẹnu lẹ wẹ hiẹ sọgan jẹ nugbo Biblu tọn má hẹ ji? (b) Etẹwẹ hiẹ dona wà eyin a jlo na tindo mahẹ to azọ́n yẹwhehodidọ tọn he Kunnudetọ Jehovah tọn lẹ nọ wà mẹ?

11. Diọdo tẹlẹ wẹ mẹdelẹ dona basi whẹpo do pegan na lizọnyizọn gbangba tọn?

12. Naegbọn lẹnvọjọ do yin dandannu?

13. Etẹwẹ diọdo bibasi yin?

14. Afọdide titengbe tẹwẹ hiẹ dona ze jẹnukọnna baptẹm yíyí?

15, 16. Etẹwẹ dewe kinklandowiwe hlan Jiwheyẹwhe zẹẹmẹdo, podọ etẹwẹ nọ whàn mẹde nado wà ehe?

17. Naegbọn mẹdelẹ nọ dọ̀n yonu do godo nado basi klandowiwe hlan Jiwheyẹwhe?

18. Etẹwẹ sọgan whàn we nado basi klandowiwe hlan Jehovah?

19. Naegbọn klandowiwe hlan Jiwheyẹwhe ma dona nọ dobuna we?

20. Naegbọn klandowiwe hlan Jehovah ma dona gbọṣi nuglọ?

21, 22. Nawẹ hiẹ sọgan basi dohia ‘gbeyiyi gbangba’ yise towe tọn gbọn?

23. Etẹwẹ e zẹẹmẹdo nado yin bibaptizi “do oyín Otọ́ tọn, po Ovi tọn po, po [gbigbọ wiwe] tọn po mẹ”?

24, 25. (a) Yẹhiadonu etẹ tọn wẹ baptẹm yin? (b) Kanbiọ tẹwẹ na mọ gblọndo yí?