Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 116: Lehe Mí Sọgan Nọgbẹ̀ Kakadoi Do

Otàn 116: Lehe Mí Sọgan Nọgbẹ̀ Kakadoi Do

BE A sọgan dọ owe he viyọnnu pẹvi ehe po họntọn etọn lẹ po to hihia ya? Mọwẹ, owe he hia a te lọ wẹ yèdọ—Owe Ṣie He Bẹ Otàn Biblu Tọn lẹ Hẹn. Podọ otàn he hia a te lọ hia wẹ yé te, enẹ wẹ—“Lehe Mí Sọgan Nọgbẹ̀ Kakadoi Do.”

Visunnu de to wehia

Be hiẹ yọ́n nuhe plọn yé te ya? Tintan, dọ mí dona yọ́n Jehovah po Ovi etọn Jesu po eyin mí jlo na nọgbẹ̀ kakadoi. Biblu dọmọ: ‘Ehe wẹ aliho lọ nado nọgbẹ̀ kakadoi. Hiẹ dona plọnnu gando Jiwheyẹwhe nugbo dopo lọ, po Ovi etọn he e dohlan aigba ji lọ, Jesu Klisti po go.’

Nawẹ mí sọgan plọnnu gando Jehovah Jiwheyẹwhe po Ovi etọn Jesu po go gbọn? Aliho dopo wẹ nado hia Owe Ṣie He Bẹ Otàn Biblu Tọn lẹ Hẹn sọn bẹjẹeji jẹ vivọnu. E dọ nususu gando Jehovah po Jesu po go, kavi e ma yin mọ wẹ ya? Podọ e sọ dọ nususu gando nuhe yé ko wà po dehe yé ma ko wà lẹ po go. Ṣigba mí dona wà nususu hugan owe ehe hihia poun.

Biblu

Be hiẹ mọ owe awetọ he tin to aigba enẹ lọ ya? Biblu wẹ. Dọna mẹde nado nọ hia adà he ji otàn owe ehe tọn lẹ sinai do na we sọn Biblu mẹ. Biblu na mí nudọnamẹ gigọ́ he mí tindo nuhudo etọn na mímẹpo nido sọgan sẹ̀n Jehovah to aliho he sọgbe lọ mẹ bo mọ ogbẹ̀ madopodo yí. Enẹwutu, mí dona yí i do basi aṣa nado nọ plọn Biblu to whepoponu.

Ṣigba nupinplọn gando Jehovah Jiwheyẹwhe po Jesu Klisti po go kẹdẹ ma ko pé. Mí sọgan tindo nuyọnẹn susugege gando yewlẹ po nuplọnmẹ yetọn lẹ po go ṣogan bo ma na mọ ogbẹ̀ madopodo. Be hiẹ yọ́n nuhe mí sọ dona wà dogọ ya?

Mí sọ dona nọgbẹ̀ sọgbe hẹ nuhe plọn mí te lẹ. Be hiẹ flin Juda Iskaliọti ya? E yin dopo to omẹ 12 he Jesu de nado yin apọsteli etọn lẹ mẹ. Juda yọ́n nususu gando Jehovah po Jesu po go. Ṣigba etẹwẹ jọ do e go? To ojlẹ vude godo, ewọ lẹzun ṣejannabinọ, bo de Jesu hia kẹntọ etọn lẹ na fataka-kuẹ 30. Enẹwutu, Juda ma na mọ ogbẹ̀ madopodo yí.

Be a flin Gehazi, dawe lọ he go mí plọnnu gando to otàn 69tọ mẹ ya? Ewọ jlo na tindo avọ̀ delẹ po akuẹ he ma yin etọn po. Enẹwutu, e dolalo nado sọgan mọ onú ehelẹ yí. Ṣigba Jehovah domẹplọnlọ e go. Ewọ na domẹplọnlọ mílọsu lẹ go eyin mí ma setonuna osẹ́n etọn lẹ.

Ṣogan, gbẹtọ dagbe susu wẹ ko sẹ̀n Jehovah po nugbonọ-yinyin po. Mí jlo na hodo apajlẹ yetọn, kavi e ma yin mọ wẹ? Visunnu pẹvi lọ, Samuẹli yin apajlẹ dagbe de nado hodo. Flindọ, dile mí mọ do to otàn 55tọ mẹ, owhe ẹnẹ kavi atọ́n poun wẹ e tindo to whenue e jẹ devizọnwa na Jehovah ji to gòhọtúntún etọn mẹ. Enẹwutu, depope he owhe towe na whè sọ, hiẹ sọgan sẹ̀n Jehovah.

Na nugbo tọn, apajlẹ mẹhe tọn mímẹpo jlo na hodo wẹ Jesu Klisti. Etlẹ yin to whenue ewọ yin jọja de, dile otàn 87tọ dohia do, ewọ tin to tẹmpli mẹ bo to hodọna mẹdevo lẹ gando Otọ́ etọn olọn mẹ tọn go. Gbọ mí ni hodo apajlẹ etọn. Gbọ mí ni dọhona gbẹtọ susu gando Jehovah, Jiwheyẹwhe jiawu mítọn po Ovi etọn Jesu Klisti po go dile e sọgan yọnbasi do. Eyin mí wà onú ehelẹ, mí na penugo nado nọgbẹ̀ kakadoi to paladisi yọyọ Jiwheyẹwhe tọn mẹ to aigba ji.

Johanu 17:3; Psalm 145:1-21.



Kanbiọ lẹ

  • Etẹwẹ mí dona yọnẹn eyin mí jlo na nọgbẹ̀ kakadoi?
  • Dile yẹdide viyọnnu pẹvi lọ po họntọn etọn lẹ po tọn dohia do, nawẹ mí sọgan plọnnu gando Jehovah Jiwheyẹwhe po Jesu po go gbọn?
  • Owe devo tẹwẹ a mọ to yẹdide lọ mẹ, podọ naegbọn mí dona nọ hia ẹ whẹwhẹ?
  • To yidogọ mẹ na nupinplọn gando Jehovah po Jesu po go, onú devo tẹwẹ mí dona wà nado mọ ogbẹ̀ madopodo yí?
  • Nuplọnmẹ tẹwẹ mí mọyi sọn Otàn 69tọ mẹ?
  • Etẹwẹ apajlẹ dagbe visunnu pẹvi Samuẹli tọn lọ he tin to Otàn 55tọ mẹ dohia mí?
  • Nawẹ mí sọgan hodo apajlẹ Jesu Klisti tọn gbọn, podọ eyin mí wàmọ etẹwẹ na yin ale mítọn to nukọn mẹ?

Kanbiọ devo lẹ

  • Hia Johanu 17:3.

    Nawẹ Owe-wiwe dohia gbọn dọ oyọnẹn Jehovah Jiwheyẹwhe po Jesu Klisti po tọn tintindo bẹ nususu hẹn hugan onú lẹ pinplọn do tamẹ poun gbọn? (Mat. 7:21; Jak. 2:18-20; 1 Joh. 2:17)

  • Hia Psalm 145:1-21.

    Etẹwẹ delẹ to whẹwhinwhẹ́n susugege he mí tindo nado nọ pagigona Jehovah lẹ mẹ? (Ps. 145:8-11; Osọ. 4:11)

    Nawẹ Jehovah yin “yinyọ́n hlan mẹpopo” gbọn, podọ nawẹ ehe dona hẹn mí dọnsẹpọ ẹ hugan gbede pọ́n gbọn? (Ps. 145:9; Mat. 5:43-45)

    Eyin mí yiwanna Jehovah sisosiso, etẹwẹ ehe na whàn mí nado wà? (Ps. 119:171, 172, 175; 145:11, 12, 21)

Plọnnu Dogọ

Aliho lọ, Nugbo lọ po Ogbẹ̀ Po

Nuplọnmẹ po nuyiwa Jesu tọn lẹ po he tin to owe wẹndagbe tọn lẹ mẹ sọgan diọ gbẹzan towe.

Jesu Plọn Nado Nọ Setonu

Na Jesu yin gbẹtọ pipe de wutu, naegbọn e do plọn tonusise?