Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 114: Opodo Ylanwiwa Lẹpo Tọn

Otàn 114: Opodo Ylanwiwa Lẹpo Tọn

ETẸWẸ a mọ tofi? Awhànpa de to osọ́ wewe lẹ ji. Ṣigba doayi fie yé to tintọ́n sọn lọ go. Osọ́ lọ lẹ to linlọ́n sọn olọn mẹ ja to aslọ lẹ mẹ! Be osọ́ lẹ ka tin to olọn mẹ nugbo wẹ ya?

Jesu yin Ahọlu to olọn mẹ

Lala, e ma yin osọ́ jọ osọ́ wẹ ehelẹ gba. Mí yọ́n ehe na osọ́ lẹ ma sọgan họ̀nwezun to aslọ lẹ mẹ, kavi yé sọgan wàmọ wẹ? Ṣigba, Biblu dọho gando osọ́ lẹ go to olọn mẹ. Be a yọ́n nuhewutu wẹ ya?

Nuhe zọ́n wẹ yindọ, to ojlẹ delẹ mẹ, osọ́ lẹ nọ yin yiyizan nado funawhàn. Enẹwutu, Biblu dọho gbẹtọ he to osọ́ kùn ja sọn olọn mẹ lẹ tọn nado dohia dọ Jiwheyẹwhe tindo awhàn de nado fùn hẹ gbẹtọ lẹ to aigba ji. Be hiẹ yọ́n yinkọ fie awhàn lọ na yin fùnfùn te tọn ya? Amagẹdọni wẹ. Awhàn enẹ wẹ na hẹn opodo wá na ylanwiwa lẹpo to aigba ji.

Jesu wẹ Mẹhe na yin nukọntọ awhàn lọ tọn to Amagẹdọni. Flindọ, Jesu wẹ mẹhe Jehovah de nado yin ahọlu to gandudu Etọn mẹ. Enẹwutu wẹ Jesu do ṣinyọ́n jẹgbakun. Podọ ohí lọ dohia dọ ewọ na hù kẹntọ Jiwheyẹwhe tọn lẹpo sudo. Be e na paṣa mí dọ Jiwheyẹwhe na và gbẹtọ ylankan lẹpo sudo wẹ ya?

Pọ́n otàn 10tọ lọ whladopo dogọ. Etẹwẹ a mọ to finẹ. Singigọ daho lọ he hù mẹylankan lẹ sudo. Mẹnu wẹ hẹn Singigọ enẹ wá? Jehovah Jiwheyẹwhe wẹ. Todin, pọ́n otàn 15tọ. Etẹwẹ to jijọ to finẹ? Sọdọmi po Gọmọla po to yinyin vivasudo gbọn miyọ́n Jehovah tọn dali.

Lẹkọyi otàn 33tọ. Pọ́n nuhe to jijọ do osọ́ po awhànkẹkẹ Egiptinu lẹ tọn po go. Mẹnu wẹ zọ́n bọ osin lọ do và yé sudo? Jehovah wẹ. E wàmọ nado basi hihọ́na omẹ etọn lẹ. Sọ pọ́n otàn 76tọ. Hiẹ na mọ to finẹ dọ Jehovah tlẹ dike omẹ etọn Islaelivi lẹ ni yin vivasudo na ylanwiwa yetọn wutu.

Enẹwutu, e ma dona paṣa mí dọ Jehovah na do awhànpa etọn olọn mẹ tọn lẹ hlan nado hẹn opodo wá na ylanwiwa lẹpo to aigba ji. Ṣigba, lẹnnupọndo nuhe enẹ na zẹẹmẹdo ji! Hùn weda he bọdego lọ bo gbọ mí ni pọ́n.

Osọhia 16:16; 19:11-16.



Kanbiọ lẹ

  • Naegbọn Biblu dọho gando osọ́ lẹ go to olọn mẹ?
  • Nawẹ awhàn he Jiwheyẹwhe na fùn sọta mẹylankan he tin to aigba ji lẹ nọ yin yiylọdọ, podọ etẹwẹ yin lẹndai awhàn enẹ tọn?
  • Sọgbe hẹ yẹdide lọ, Mẹnu wẹ na yin nukọntọ to awhàn lọ mẹ, naegbọn e ṣinyọ́n jẹgbakun, podọ etẹwẹ ohí etọn zẹẹmẹdo?
  • Eyin mí lẹkọyi Otàn 10tọ, po 15tọ po mẹ, naegbọn e ma dona paṣa mí dọ Jiwheyẹwhe na và mẹylankan lẹ sudo?
  • Nawẹ Otàn 33, 36, po 76tọ po dohia mí dọ Jiwheyẹwhe na và mẹylankan lẹ sudo eyin yé tlẹ sọalọakọ́n dọ yé to sinsẹ̀n ẹn gbọn?

Kanbiọ devo lẹ

  • Hia Osọhia 19:11-16.

    Nawẹ Owe-wiwe hẹn ẹn họnwun dọ Jesu Klisti wẹ yin mẹhe to osọ́ wewe lọ kùn gbọn? (Osọ. 1:5; 3:14; 19:11; Isa. 11:4)

    Nawẹ ohùn he húnhún do agawu Jesu tọn go dohia dọ ayihaawe matin dọ e na duto awhàn lọ ji mlẹnmlẹn gbọn? (Osọ. 14:18-20; 19:13; Isa. 63:1-6)

    Mẹnu lẹ wẹ na ko kọnawudopọ to awhànpa he hodo Jesu to osọ́ wewe etọn ji lẹ mẹ? (Osọ. 12:7; 19:14; Mat. 25:31, 32)