Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 113: Paulu to Lomu

Otàn 113: Paulu to Lomu

PỌ́N Paulu to gẹdẹ mẹ, podọ awhànfuntọ Lomu tọn de to ṣiṣọ́ ẹ. Gàntọ de wẹ Paulu yin to Lomu. E to tepọn Sesali Lomu tọn nado basi nudide de do e ji. Whenuena ewọ tin to gànpamẹ, gbẹtọ lẹ yin dotẹnmẹna nado yì dla ẹ pọ́n.

To azán atọ̀ntọ gbè whenue Paulu jẹ Lomu godo, e dowẹn hlan delẹ to nukọntọ Ju lẹ tọn mẹ nado wá e dè. To ehe sisè mẹ, susu Ju he tin to Lomu lẹ tọn wẹ wá. Paulu dọyẹwheho na yé gando Jesu po ahọluduta Jiwheyẹwhe tọn po go. Mẹdelẹ yise bo lẹzun Klistiani lẹ, ṣigba mẹdevo lẹ ma yise.

Paulu to gànpamẹ

Paulu sọ dọyẹwheho na awhànfuntọ voovo he tindo azọngban nado nọ ṣọ́ ẹ lẹ. Na owhe awe he e yizan taidi gàntọ de, Paulu dọyẹwheho na mẹlẹpo. Taidi kọdetọn de, etlẹ yin whédo Sesali tọn lọsu sè wẹndagbe Ahọluduta tọn lọ, podọ mẹdelẹ sọ lẹzun Klistiani to yé mẹ.

Ṣigba mẹnu wẹ mẹdlapọntọ he to wekan to tafo ji ehe ka yin? Be a sọgan dọ ya? Timoti wẹ. Timoti lọsu ko yin zizedo gànmẹ pọ́n na wẹndagbe Ahọluduta lọ tọn wutu, ṣigba ewọ ko yin tuntundote. Podọ e wá file nado gọalọna Paulu wẹ. Be a yọ́n nuhe kàn Timoti te ya? Gbọ mí ni pọ́n.

Be hiẹ flin nude gando tòdaho Filippi po Efesu po tọn go to Otàn 110tọ lọ mẹ ya? Paulu gọalọ nado do agun Klistiani tọn ai to tòdaho enẹlẹ mẹ. To whenue Paulu tin to gànpamẹ din, e kanwehlan Klistiani ehelẹ. Wekanhlanmẹ lọ lẹ tin to Biblu mẹ, podọ yé nọ yin yiylọdọ Efesunu lẹ po Filippinu lẹ po. Paulu to didọna Timoti todin nuhe e dona kàn hlan Klistiani họntọn yetọn he tin to Filippi lẹ.

Filippinu lẹ ko do homẹdagbe susu hia Paulu. Yé do nunina hlan ẹn to gànpamẹ, podọ Paulu to nudọdo yé na enẹwutu. Epafloditu wẹ yin dawe he hẹn nunina lọ wá. Ṣigba e jẹazọ̀n bo dibla kú. Todin, e ko jẹgangan bo to awuwle nado gọyì whé. Ewọ wẹ na bẹ wekanhlanmẹ ehelẹ sọn Paulu po Timoti po dè lẹkọyi Filippi.

Whenue Paulu tin to gànmẹ, e kàn wekanhlanmẹ awe devo lẹ he tin to Biblu mẹ. Dopo hlan Klistiani lẹ to tòdaho Kọlọsi tọn mẹ. Be a yọ́n yinkọ owe lọ tọn ya? Kọlọsinu lẹ wẹ. Awetọ lọ wẹ wekanhlanmẹ mẹdetiti tọn de hlan họntọn etọn vivẹ he nọ yin Filemọni he nọ nọ̀ Kọlọsi ga. Wekanhlanmẹ lọ dọho gando devi Filemọni tọn he nọ yin Onesimu go.

Onesimu họnyi sọn Filemọni dè bo yì Lomu. To ninọmẹ de mẹ, Onesimu sè dọ Paulu yin zizedo gànmẹ tofi. E wá nado dla ẹ pọ́n bọ Paulu sọ dọyẹwheho na ẹn. To madẹnmẹ, Onesimu lọsu lẹzun Klistiani. Todin e wá vẹna Onesimu dọ emi ko họnyi. Enẹwutu, be a yọ́n nuhe Paulu wlan do wekanhlanmẹ etọn mẹ hlan Filemọni ya?

Paulu dọhlan Filemọni dọ ni jona Onesimu. ‘Yẹn to dido e hlan we,’ wẹ Paulu wlan. ‘Ṣigba todin e masọ to devi towe kẹdẹ yin ba. E ko lẹzun mẹmẹsunnu Klistiani dagbe de.’ To whenuena Onesimu lẹkọ jei Kọlọsi, e ze wekanhlanmẹ awe ehelẹ yì, dopo na Kọlọsinu lẹ podọ awetọ na Filemọni. Mí sọgan yí nukun homẹ tọn do pọ́n lehe Filemọni na gọ́ na ayajẹ do to whenue e sè dọ devi etọn ko lẹzun Klistiani.

To whenuena Paulu wlanwe hlan Filippinu lẹ po Filemọni po, ewọ tindo owẹ̀n dagbe delẹ na yé nugbo. Paulu dọna Filippinu lẹ dọmọ: ‘Yẹn to Timoti dohlan mì. Ṣigba yẹnlọsu na wá dla mì pọ́n to madẹnmẹ.’ Podọ, e sọ kanwehlan Filemọni dọmọ: ‘Dín fide dai na mi nado nọ.’

Whenuena Paulu yin tuntundote, e yì dla Klistiani mẹmẹsunnu po mẹmẹyọnnu etọn lẹ po pọ́n to awà voovo lẹ ji. Ṣigba to enẹgodo, Paulu sọ yin zizedo gànpamẹ to Lomu. To ojlẹ ehe mẹ e yọnẹn dọ emi na yin hùhù. Enẹwutu, e kanwehlan Timoti bo dọna ẹn nado yawu wá. Paulu kanwe bo dọmọ: ‘Yẹn ko yin nugbonọ na Jiwheyẹwhe, podọ Jiwheyẹwhe nasọ suahọ etọn mi.’ Owhe vude to whenuena yé hù Paulu godo, Jelusalẹm yin vivasudo gbọn Lomunu lẹ dali.

Ṣigba nususu gbẹsọ pò to Biblu mẹ. Jehovah Jiwheyẹwhe hẹn apọsteli Johanu nado kanwe godo tọn etọn lẹ, gọna owe Osọhia tọn. Owe Biblu tọn ehe dọho gando sọgodo go. Todin, gbọ mí ni plọnnu gando nuhe sọgodo bẹhẹn lẹ go.

Owalọ lẹ 28:16-31; Filippinu lẹ 1:13; 2:19-30; 4:18-23; Heblu lẹ 13:23; Filemọni 1-25; Kọlọsinu lẹ 4:7-9; 2 Timoti 4:7-9.



Kanbiọ lẹ

  • Mẹnu wẹ Paulu dọyẹwheho na to whenue e tin to gànpamẹ to Lomu?
  • To yẹdide lọ mẹ, mẹnu wẹ mẹdlapọntọ he to wekan to tafo ji lọ, podọ etẹ wà na Paulu wẹ e te?
  • Mẹnu wẹ Epafloditu yin, podọ etẹwẹ e hẹn to whenuena e lẹkọyi Filippi?
  • Naegbọn Paulu do kanwehlan họntọn vivẹ etọn Filemọni?
  • Etẹwẹ Paulu wà to whenuena e yin tuntundote, podọ etẹwẹ jọ do e go to godo mẹ?
  • Mẹnu wẹ Jehovah yizan nado kàn owe Biblu tọn godo tọn lẹ, podọ etẹ ji wẹ owe Osọhia tọn dọhodo?

Kanbiọ devo lẹ

  • Hia Owalọ lẹ 28:16-31 po Filippinu lẹ 1:13 po.

    Nawẹ Paulu yí whenu etọn zan to whenuena e tin to gànpamẹ to Lomu gbọn, podọ nuyiwadomẹji tẹwẹ yise mawhango etọn tindo do agun Klistiani tọn ji? (Owalọ 28:23, 30; Flp. 1:14)

  • Hia Filippinu lẹ 2:19-30.

    Hogbe pinpẹn-nutọn-yinyọnẹn tọn tẹwẹ Paulu yizan na Timoti po Epafloditu po, podọ nawẹ mí sọgan hodo apajlẹ Paulu tọn gbọn? (Flp. 2:20, 22, 25, 29, 30; 1 Kọl. 16:18; 1 Tẹs. 5:12, 13)

  • Hia Filemọni 1-25.

    Dodonu tẹ ji wẹ Paulu dotuhomẹna Filemọni nado wà nuhe sọgbe te, podọ nawẹ ehe sọgan deanana mẹho agun tọn lẹ to egbehe gbọn? (File. 9; 2 Kọl. 8:8; Gal. 5:13)

    Nawẹ hogbe Paulu tọn he yin mimọ to Filemọni 13, 14 mẹ lẹ dohia dọ e nọ na sisi ayihadawhẹnamẹnu mẹdevo lẹ tọn to agun mẹ gbọn? (1 Kọl. 8:7, 13; 10:31-33)

  • Hia 2 Timoti 4:7-9.

    Taidi apọsteli Paulu, nawẹ mí sọgan tindo jide dọ Jehovah na dona mí eyin mí gbọṣi nugbonọ-yinyin mẹ kakajẹ opodo gbọn? (Mat. 24:13; Heb. 6:10)