Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 112: Tọjihun Yetọn Siọ to Lopo de Ji

Otàn 112: Tọjihun Yetọn Siọ to Lopo de Ji

PỌ́N ninọmẹ tọjihun lọ tọn! E to gbigbà do flinflin! Be a mọ mẹhe lọ́n biọ osin mẹ lẹ ya? Mẹdelẹ to sinlin jei tọ̀tó. Be Paulu ma niyẹn to finẹ ya? Gbọ mí ni pọ́n nuhe to jijọ do e go.

Mẹhe luntọ́n sọn húnsiọmẹ lọ mẹ lẹ

Flindọ na owhe awe nkọ wẹ Paulu do nọ gànpamẹ to Sesalea. To enẹgodo ewọ po gàntọ devo lẹ po yin zizedo tọjihun mẹ, podọ yé jẹ gbejizọnlin ji dedo Lomu. To whenue yé gbọn lopo Klete tọn ji wá jei, jẹhọn ylankan de pé yé. Jẹhọn lọ sinyẹn sọmọ bọ húnkùntọ lọ lẹ masọ sọgan kùnhún lọ ba. Podọ yé ma sọgan mọ owhè to okle kavi sunwhlẹvu to zánmẹ ba. To godo mẹ, to azán susu godo, agbọ́ jẹ pipé mẹhe tin to tọjihun lọ mẹ lẹ ji sọmọ bọ yé masọ tindo todido whlẹngán tọn depope ba.

Whenẹnu wẹ Paulu fọnṣite bo dọmọ: ‘Mẹdepope ma na hẹn ogbẹ̀ etọn bu; tọjihun lọ kẹdẹ wẹ na yin hinhẹnbu. Na to osọ zánmẹ, angẹli Jiwheyẹwhe tọn de wá dè e bo dọna mi dọmọ: “A dibu blo, Paulu! Hiẹ dona ṣite to Sesali, togán Lomu tọn nukọn. Podọ Jiwheyẹwhe na whlẹn mẹhe to tọjihun mẹ hẹ we lẹpo.’”

To zánhomẹ azán 14tọ tọn, whenue jẹhọn sinsinyẹn lọ ko bẹjẹeji godo, húnkùntọ lọ lẹ doayi e go dọ osin lọ masọ siso sọmọ ba! Na obu lọ dọ tọjihun lọ sọgan gbà do osé go to zinvlu mẹ wutu, yé dlan húnsingàn yetọn lẹ do osin mẹ. To wunkẹngbe yé mọ ageklo de dohlan. Yé basi dide nado tẹnpọn bo kùn tọjihun lọ jẹ finẹ.

Ṣigba, whenue yé sẹpọ ageklo lọ, ohún lọ hò do pópló tọkẹ́n tọn de go bo masọ sọgan sẹtẹn ba. Enẹgodo agbówhẹn lẹ jẹ hihò dego ji, podọ ohún lọ jẹ gbigbà do flinflin ji. Awhàngán he to nukunpedo yé go lọ dọmọ: ‘Mẹhe sọgan linsin lẹpo ni lọ́n biọ ohù lọ mẹ jẹnukọn bo yì agé ji. Mẹhe pò lẹ ni lọ́n biọ e mẹ hodo yé bo tẹdo owhlẹ ohún gbigbà lọ tọn go.’ Podọ nuhe yé wà lọ niyẹn. Gbọnmọ dali, gbẹtọ 276 he tin to ohún lọ mẹ lẹpo jẹ agé awuyẹyẹ-afọyẹyẹ kẹdẹdile angẹli lọ ko dopagbe etọn do.

Malita wẹ lopo lọ nọ yin. Homẹdagbenọ wẹ omẹ lọ lẹ, podọ yé penukundo mẹhe tọ́n sọn ohún lọ mẹ lẹ go. Whenuena ninọmẹ otọ̀ lọ tọn pọnte, Paulu yin zizedo ohún devo mẹ yì Lomu.

Owalọ lẹ 27:1-44; 28:1-14.



Kanbiọ lẹ

  • Etẹwẹ jọ do tọjihun he mẹ Paulu tin te go dile e gbọn yakẹ lopo Klete tọn ji jei?
  • Etẹwẹ Paulu dọna mẹhe tin to tọjihun lọ mẹ lẹ?
  • Nawẹ ohún lọ gbà do flinflin gbọn?
  • Anademẹ tẹlẹ wẹ awhàngán he to nukunpedo yé go lọ na, podọ gbẹtọ nẹmu wẹ jẹage awuyẹyẹ-afọyẹyẹ?
  • Nawẹ lopo he ji yé jẹ lọ nọ yin, podọ etẹwẹ jọ do Paulu go to whenuena aimẹ pọnte?

Kanbiọ devo lẹ

  • Hia Owalọ lẹ 27:1-44.

    Nawẹ otàn gbejizọnlin Paulu tọn yì Lomu tọn hihia nọ hẹn jide mítọn lodo to gbesisọ-yinyin kandai Biblu tọn mẹ gbọn? (Owalọ 27:16-19, 27-32; Luku 1:3; 2 Tim. 3:16, 17)

  • Hia Owalọ lẹ 28:1-14.

    Eyin tòmẹnu Malita tọn mayisenọ lẹ yin whinwhàn sọmọ nado do “homẹdagbe vonọtaun” hia Paulu po gbẹdohẹmẹtọ etọn he tindo numimọ húnsiọmẹ tọn lẹ po, etẹwẹ Klistiani lẹ dona yin whinwhàn nado wà podọ titengbe to aliho tẹ mẹ? (Owalọ 28:1, 2; Heb. 13:1, 2; 1 Pita 4:9)