Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 111: Visunnu de He Damlọn

Otàn 111: Visunnu de He Damlọn

OJE! Etẹwẹ to jijọ tofi? Be visunnu he to aimimlọn to kọmẹ ehe gbleawu susu wẹ ya? Pọ́n! Paulu yin dopo to dawe he tọ́n sọn họmẹ ja lẹ mẹ! Be a mọ Timoti lọsu to finẹ ya? Be e ma yindọ visunnu lọ flẹ gbọn fleṣe nù wẹ ya?

Paulu ja Eutiku fọnsọnku gbé

Mọwẹ, nuhe jọ lọ pẹpẹ niyẹn. Paulu to hodọna devi delẹ he pli dopọ to Tloa. E yọnẹn dọ emi ma nasọ mọ yé na whenu dindẹn na e dona do tọjihun yì sọn yé dè to wunkẹngbe. Enẹ wẹ zọ́n bọ e dlẹnkanna hodidọ etọn kakajẹ zánhomẹ.

Visunnu he nọ yin Eutiku ehe sinai to fleṣe nù, bọ amlọn yí i. E sọ flẹ gbọn fleṣe nù sọn petlezìn atọ̀ntọ ji aga wá odò! Enẹwutu a sọgan mọ nuhe zọ́n bọ gbẹtọ lẹ do blawu sọmọ. Whenuena yé ze visunnu lọ, obu jẹ yé ji. E ko kú!

To whenue Paulu mọdọ visunnu lọ ko kú, e dẹ́ do e ji, bo gbò e fán. Enẹgodo e dọmọ: ‘Mì dibu blo. E ko jẹgangan!’ Podọ e jẹgangan nugbo! Azọ́njiawu nankọ die! Paulu ko hẹn ẹn gọwá ogbẹ̀! Gbẹtọgun lọ sọ gọ́ na ayajẹ.

Yemẹpo sọ gọyì petlezìn lọ ji nado yì dùnú. Paulu sọ zindonukọn to hodidọ etọn mẹ kakajẹ afọnnu. Ṣigba hiẹ sọgan deji dọ Eutiku masọ damlọn ba! Enẹgodo wẹ Paulu, Timoti po mẹhe to gbejizọnlin ji hẹ yé lẹ po biọ tọjihun mẹ. Be hiẹ yọ́n fie yé jei ya?

Paulu ṣẹṣẹ dotana gbejizọnlin yẹwhehodidọ tọn etọn atọ̀ntọ wẹ bo lẹkọ jei whégbè. To gbejizọnlin ehe whenu, Paulu nọ otò Efesu tọn mẹ na owhe atọ̀n. Enẹwutu wẹ gbejizọnlin ehe do dite hugan awetọ lọ.

To tintọ́n sọn Tloa godo, tọjihun lọ nọte to Miletu na whenu pẹẹde. To whenuena e yindọ kilomẹtlu vude wẹ Efesu te do yé, Paulu dowẹn hlan mẹho agun lọ tọn lẹ nado wá Miletu na ewọ nido sọgan dọho godo tọn po yé po. Enẹgodo, whenue ojlẹ lọ sọ̀ na tọjihun lọ nado sún, pọ́n lehe yé na ko blawu do sọ nado mọ yìyì Paulu tọn!

To godo mẹ, tọjihun lọ lẹkọwa Sesalea. Whenue Paulu tin to finẹ to owhé devi Filippi tọn gbè, yẹwhegán Agabu na avase Paulu. E dọna Paulu dọ yè na ze e do gànpamẹ eyin e jẹ Jelusalẹm. Podọ, nuhe jọ lọ pẹpẹ niyẹn. To gànpamẹninọ na owhe awe to Sesalea godo, Paulu yin didohlan Lomu nado yì owhẹ̀ nukọn to Sesali togán Lomu tọn nukọn. Gbọ mí ni pọ́n nuhe jọ to gbejizọnlin etọn yì Lomu whenu.

Owalọ lẹ weta 19 jẹ 26.



Kanbiọ lẹ

  • Mẹnu wẹ visunnu he tin to aigba to yẹdide lọ mẹ, podọ etẹwẹ jọ do e go?
  • Etẹwẹ Paulu wà to whenuena e mọdọ visunnu lọ ko kú?
  • Fie wẹ Paulu, Timoti, po mẹhe to gbejizọnlinzin hẹ yé lẹ po jei, podọ etẹwẹ jọ to whenue yé nọte to Miletu?
  • Avase tẹwẹ yẹwhegán Agabu na Paulu, podọ nawẹ nuhe yẹwhegán lọ dọ lẹ mọ hẹndi gbọn?

Kanbiọ devo lẹ

  • Hia Owalọ lẹ 20:7-38.

    Sọgbe hẹ hogbe Paulu tọn he tin to Owalọ lẹ 20:26, 27 mẹ, nawẹ mí sọgan “wé sọn ohùn gbẹtọ lẹpo tọn mẹ” gbọn? (Ezek. 33:8; Owalọ 18:6, 7)

    Nawẹ mẹho agun tọn lẹ dona nọ “tẹdo ohó nugbo lọ go gligli” to mẹpinplọn whenu gbọn? (Owalọ 20:17, 29, 30; Titu 1:7-9; 2 Tim. 1:13)

  • Hia Owalọ lẹ 26:24-32.

    Nawẹ Paulu yí tòvi-yinyin Lomu tọn etọn zan nado hẹn azọ́ndenamẹ yẹwhehodidọ tọn he e mọyi sọn Jesu dè lọ di gbọn? (Owalọ 9:15; 16:37, 38; 25:11, 12; 26:32; Luku 21:12, 13)