Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 110: Timoti—Alọgọtọ Yọyọ Paulu Tọn

Otàn 110: Timoti—Alọgọtọ Yọyọ Paulu Tọn

VISUNNU jọja he a mọ tofi po apọsteli Paulu po wẹ Timoti. Timoti po whẹndo etọn po nọ nọ̀ Listla. Euniki wẹ onọ̀ etọn podọ onọ̀ daho etọn nọ yin Loisi.

Whla atọ̀ntọ die bọ Paulu to Listla dlapọn. E ko diblayi owhe dopo bọ Paulu po Balnaba po zingbejizọnlin wáfi whla tintan nado dọyẹwheho. Todin, Paulu ko sọ lẹkọwa finẹ po họntọn etọn Sila po.

Timoti po Paulu po

Be hiẹ yọ́n nuhe Paulu to didọna Timoti ya? E kanse dọmọ: ‘Be hiẹ na jlo nado hodo yẹn po Sila po ya? Hiẹ sọgan gọalọna mí nado dọyẹwheho na gbẹtọ lẹ to aigba he dẹn taun lẹ ji.’

Timoti yigbe dọ, ‘Yẹn na yì.’ E masọ dẹn bọ Timoti jo whẹndo etọn do bo yì hẹ Paulu po Sila po. Ṣigba whẹpo mí nado plọnnu gando gbejizọnlin yetọn go, gbọ mí ni dindona nuhe ko jọ do Paulu go wayi. E ko yì nudi owhe 17 todin he Jesu sọawuhia ẹ to aliho Damasku tọn ji.

Eyin a flin, Paulu jei Damasku nado yì wà danú do devi Jesu tọn lẹ go wẹ, ṣigba todin ewọ lọsu ko lẹzun devi! To enẹgodo, kẹntọ delẹ dewé nado hù Paulu na yé ma yiwanna nuplọnmẹ etọn gando Jesu go wutu. Ṣigba devi lẹ gọalọna Paulu nado họ̀ngán. Yé ze e do ohà de mẹ bo de e jẹte do adó tòdaho lọ tọn godo.

Enẹgodo, Paulu yì Antioku nado dọyẹwheho. Finẹ whẹ́whẹ́ wẹ hodotọ Jesu tọn lẹ yin yiylọ te dọ Klistiani. Paulu po Balnaba po yin didohlan sọn Antioku yì otò dindẹn devo lẹ mẹ nado yì dọyẹwheho. Dopo to tòdaho he mẹ yé yì lẹ wẹ Listla, otò Timoti tọn.

To owhe dopo godo, Paulu sọ lẹkọwa Listla to gbejizọnlin awetọ whenu. To whenue Timoti yì hẹ Paulu po Sila po, be a yọ́n fie yé pànta ya? Pọ́n yẹdide otò tọn ehe bo gbọ mí ni plọn delẹ to nọtẹn lọ lẹ mẹ.

Tintan whẹ́, yé yì otò he ma dẹn de mẹ, enẹ wẹ Ikonioni, enẹgodo otò awetọ devo he nọ yin Antioku. Bọdo enẹ go, yé yì Tloa, Filippi, Tẹsalonika po Belea po. Be hiẹ mọ Atẹni to yẹdide otò tọn lọ mẹ ya? Paulu dọyẹwheho to finẹ ga. Enẹgodo yé dọyẹwheho na owhe dopo daa to Kọlinti. To godo mẹ, yé nọte pẹẹde to Efesu. Enẹgodo, yé do tọjihun bo lẹkọ do Sesalea bosọ yì Antioku, fie Paulu gbọṣi.

Mọ wẹ Timoti zingbejizọnlin kilomẹtlu kanweko susu lẹ do to alọgigọna Paulu nado dọyẹwheho “wẹndagbe” lọ tọn bo do agun Klistiani tọn susu lẹ ai mẹ do niyẹn. Eyin a wá whẹ́n, be hiẹ na gbẹ́ yin devizọnwatọ nugbonọ Jiwheyẹwhe tọn taidi Timoti ya?

Owalọ lẹ 9:19-30; 11:19-26; weta 13 jẹ 17; 18:1-22.

Yẹdide alidohiamẹ tọn de

1. Lomu; 2. Malita; 3. Belea; 4. Tẹsalonika; 5. Kọlinti; 6. Filippi; 7. Atẹni; 8. Klete; 9. Tloa; 10. Efesu; 11. Miletu; 12. Kọlọsi; 13. Antioku; 14. Ikonioni; 15. Listla; 16. Kiplu; 17. Antioku; 18. Sesalea; 19. Jọppa; 20. Damasku; 21. Jelusalẹm; 22. Ohù Daho Lọ (Meditelane)



Kanbiọ lẹ

  • Mẹnu wẹ sunnu jọja he tin to yẹdide lọ mẹ, fie wẹ e nọ nọ̀, podọ nawẹ onọ̀ etọn po onọ̀ daho etọn po nọ yin?
  • Etẹwẹ Timoti dọ to whenuena Paulu kanse e eyin e jlo na kọnawudopọ hẹ Sila po Paulu po nado dọyẹwheho na gbẹtọ lẹ to aigba he dẹn taun lẹ ji?
  • Fie whẹ́whẹ́ wẹ hodotọ Jesu tọn lẹ yin yiylọdọ Klistiani te?
  • Tòdaho tẹlẹ wẹ Paulu, Sila po Timoti po dlapọn tlolo he yé tọ́n sọn Antioku?
  • Nawẹ Timoti gọalọna Paulu gbọn, podọ kanbiọ tẹwẹ jọja egbezangbe tọn lẹ dona nọ kanse yede?

Kanbiọ devo lẹ

  • Hia Owalọ lẹ 9:19-30.

    Nawẹ apọsteli Paulu do wuntuntun hia to whenuena e pehẹ nukundiọsọmẹtọ wẹndagbe lọ tọn lẹ gbọn? (Owalọ 9:22-25, 29, 30; Mat. 10:16)

  • Hia Owalọ lẹ 11:19-26.

    Nawẹ kandai he tin to Owalọ lẹ 11:19-21, 26 mẹ dohia dọ gbigbọ Jehovah tọn to anadena azọ́n yẹwhehodidọ tọn lọ gbọn?

  • Hia Owalọ lẹ 13:13-16, 42-52.

    Nawẹ Owalọ lẹ 13:51, 52 dohia dọ devi lẹ ma dike homẹkẹn ni hẹn yé gbọjọ gbọn? (Mat. 10:14; Owalọ 18:6; 1 Pita 4:14)

  • Hia Owalọ lẹ 14:1-6, 19-28.

    Nawẹ hogbe lọ “yé ze yé do alọmẹ na Jehovah” nọ gọalọna mí ma nado yin magbọjẹnọ to whenuena mí to alọgọna mẹyọyọ lẹ gbọn? (Owalọ 14:21-23; 20:32; Joh. 6:44)

  • Hia Owalọ lẹ 16:1-5.

    Nawẹ ojlo dagbe he Timoti dohia nado gboadà dohia dọ nujọnu wẹ e yin nado nọ wà “onú lẹpo na wẹndagbe lọ tọn wutu” gbọn? (Owalọ 16:3; 1 Kọl. 9:23; 1 Tẹs. 2:8)

  • Hia Owalọ lẹ 18:1-11, 18-22.

    Etẹwẹ Owalọ lẹ 18:9, 10 dohia gando adà he Jesu lọsu nọ yiwà to anadidena azọ́n yẹwhehodidọ tọn lọ mẹ go, podọ jide tẹwẹ enẹ na mí to egbehe? (Mat. 28:20)

Plọnnu Dogọ

PLỌN OVI TOWE LẸ

Timoti Jlo Na Gọalọna Gbẹtọ Lẹ

Taidi Timoti, nawẹ a sọgan tindo ayajẹ to gbẹ̀mẹ gbọn?