Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 109: Pita Dla Kọneliọsi Pọ́n

Otàn 109: Pita Dla Kọneliọsi Pọ́n

APỌSTELI Pita wẹ to ote to finẹ, podọ delẹ to họntọn etọn lẹ mẹ wẹ ṣite to godona ẹn. Ṣigba naegbọn dawe ehe do to taliaina Pita? Be ewọ dona wàmọ ya? Be a yọ́n mẹhe ewọ yin ya?

Pita yì pé Kọneliọsi

Kọneliọsi wẹ dawe lọ. Awhàngán Lomu tọn de wẹ. Kọneliọsi ma yọ́n Pita, ṣigba angẹli de dọna ẹn dọ ni ylọ Pita wá owhé etọn gbè. Gbọ mí ni dindona lehe enẹ jọ do.

Ju lẹ wẹ hodotọ tintan Jesu tọn lẹ, ṣigba Kọneliọsi ma yin Juvi de. Ṣogan ewọ yiwanna Jiwheyẹwhe, e nọ hodẹ̀ hlan ẹn, e sọ nọ wà dagbe susu na gbẹtọ lẹ. To whèmẹ gbèdopo wẹ angẹli de sọawuhia ẹ bo dọmọ: ‘Homẹ Jiwheyẹwhe tọn hùn do gowe, podọ ewọ nasọ na gblọndo odẹ̀ towe lẹ. Do mẹdelẹ hlan nado yì ylọ dawe de he nọ yin Pita wá. E tin to Jọppa to owhé Simọni tọn gbè, mẹhe nọ nọ̀ huto.’

To afọdopolọji, Kọneliọsi domẹhlan nado yì dín Pita mọ. To wunkẹngbe whenuena omẹ lọ lẹ to sisẹpọ Jọppa, Pita tin to owhé Simọni tọn gbè to petlezìn ji. Finẹ wẹ Jiwheyẹwhe hẹn Pita nado lẹn te dọ ewọ mọ avọ̀ daho de to tejẹ sọn olọn mẹ. Kanlin wunmẹwunmẹ lẹ tin to avọ̀ lọ mẹ. Sọgbe hẹ osẹ́n Jiwheyẹwhe tọn, kanlin ehelẹ ma wé na dùdù, ṣigba ogbè de dọmọ: ‘Fọ́n, Pita. Hù bo dù.’

Pita gblọn bo dọmọ: ‘Lala! Yẹn ma ko dù nuhe yin mawé pọ́n gbede.’ Ṣigba ogbè lọ sọ dọhlan Pita dọmọ: ‘A ylọ nuhe Jiwheyẹwhe hẹn zun wiwe todin dọ mawé blo.’ Whla atọ̀n we ehe sọawuhia. Whenuena Pita to nulẹnpọndo nuhe ehe lẹpo zẹẹmẹdo ji wẹ dawe he Kọneliọsi dohlan lọ lẹ biọ owhé lọ gbè bo kàn Pita biọ.

Pita jẹte sọn petlezìn ji bo dọmọ: ‘Yẹn wẹ mẹhe dín mì te. Etẹwẹ hẹn mì wá?’ Whenuena dawe lọ lẹ basi zẹẹmẹ dọ angẹli de wẹ dọna Kọneliọsi nado ylọ Pita wá owhé etọn gbè, Pita yigbe nado yì hẹ yé. To wunkẹngbe etọn Pita po họntọn etọn lẹ po fọ́n nado yì dla Kọneliọsi pọ́n to Sesalea.

Kọneliọsi ko bẹ hẹnnumẹ etọn po họntọn vivẹ etọn lẹ po pli dopọ. Whenuena Pita wá, Kọneliọsi yì pé e. E jẹklo bo litai to Pita nukọn, dile a to mimọ do tofi. Ṣigba Pita dọmọ: ‘Fọ́n, gbẹtọ hiẹ nkọ wẹ yẹnlọsu.’ Mọwẹ, Biblu dohia dọ e ma sọgbe nado nọ jẹklo bo litaina gbẹtọ. Jehovah ṣokẹdẹ wẹ mí dona litaina.

Pita wá dọyẹwheho na mẹhe pli dopọ lẹ dọmọ: ‘Yẹn mọdọ Jiwheyẹwhe nọ kẹalọyi mẹhe jlo na sẹ̀n ẹn lẹpo.’ Podọ, dile e to hodọ to alọnu, Jiwheyẹwhe do gbigbọ wiwe etọn hlan bọ omẹ lọ lẹ sọ jẹ hodọ ji to ogbè voovo lẹ mẹ. Ehe paṣa devi Ju he hodo Pita lẹ, na yé lẹndọ Juvi lẹ kẹdẹ wẹ Jiwheyẹwhe nọ do nukundagbe etọn hia. Enẹwutu, ehe plọn yé dọ Jiwheyẹwhe ma nọ hò gbẹtọ akọta de tọn pọ́n di mẹhe yọ́n hugan kavi yin titengbe to nukun Jiwheyẹwhe tọn mẹ hú gbẹtọ akọta devo tọn. Be e ma yin nudagbe de wẹ enẹ yin na mímẹpo nado nọ flin ya?

Owalọ lẹ 10:1-48; 11:1-18; Osọhia 19:10.



Kanbiọ lẹ

  • Mẹnu wẹ dawe he to taliai to yẹdide lọ mẹ?
  • Etẹwẹ angẹli de dọna Kọneliọsi?
  • Etẹwẹ Jiwheyẹwhe dohia Pita to numimọ mẹ to whenuena e tin to petlezìn ji to owhé Simọni tọn gbè to Jọppa?
  • Naegbọn Pita do dọna Kọneliọsi dọ e ma dona jẹklo bo litaina emi?
  • Naegbọn awuji devi Ju he hodo Pita lẹ?
  • Onú titengbe tẹwẹ mí dona plọn sọn dlapọn he Pita basi yì Kọneliọsi dè mẹ?

Kanbiọ devo lẹ

  • Hia Owalọ lẹ 10:1-48.

    Etẹwẹ hogbe Pita tọn lẹ he yin mimọ to Owalọ lẹ 10:42 mẹ dohia gando azọ́n wẹndagbe Ahọluduta lọ tọn lilá go? (Mat. 28:19; Malku 13:10; Owalọ 1:8)

  • Hia Owalọ lẹ 11:1-18.

    Nawẹ Pita yinuwa gbọn to whenuena e họnwun dọ Jehovah to anadena Kosi lẹ, podọ nawẹ mí sọgan hodo apajlẹ etọn gbọn? (Owalọ 11:17, 18; 2 Kọl. 10:5; Efe. 5:17)