Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 108: To Aliji Jei Damasku

Otàn 108: To Aliji Jei Damasku

BE HIẸ yọ́n mẹhe to aigba enẹ ya? Saulu wẹ. Flindọ ewọ wẹ hẹn awù mẹhe dlan zannu do Stefani lẹ tọn go. Pọ́n hinhọ́n he to sisẹ́ enẹ! Etẹwẹ to jijọ?

To okú Stefani tọn godo, Saulu wẹ yin nukọntọ to hodotọ Jesu tọn lẹ dindin mẹ nado sọgan wà danú do yé go. E nọ yì sọn whégbè jẹ whégbè bo nọ dọ̀n yé jẹgbonu bosọ nọ ze yé dlan gànpamẹ. Susu devi lẹ tọn wẹ họnyi tòdaho devo lẹ mẹ, bosọ jẹ “wẹndagbe” lọ lá ji to finẹ. Ṣigba Saulu lọsu yì tòdaho devo lẹ mẹ nado dín hodotọ Jesu tọn lẹ mọ. Todin, Saulu to aliji jei Damasku. Ṣigba, to aliho lọ ji, nujiawu he jọ die:

To ajiji mẹ wẹ hinhọ́n de tọ́n sọn agahomẹ bo họ́n lẹdo Saulu. E jai dile a sọgan mọ ẹn do tofi. Whenẹnu wẹ ogbè de dọmọ: ‘Saulu, Saulu! Naegbọn a do to danú wà do go e?’ Dawe he zọ̀n po Saulu po lẹ mọ hinhọ́n lọ bosọ sè nudidọ ogbè lọ tọn, ṣigba yé ma mọnukunnujẹ nuhe ogbè lọ to didọ mẹ.

Hinhọ́n tọ́nnukunna Saulu

‘Hiẹ mẹnu wẹ, Oklunọ?’ wẹ Saulu kanse.

‘Yẹn Jesu wẹ, mẹhe go hiẹ to danú wà do,’ wẹ ogbè lọ dọ. Jesu dọ ehe, na to whenue Saulu to danú wà do hodotọ Jesu tọn lẹ go, Jesu tindo numọtolanmẹ lọ dọ ewọ go wẹ e to danú wà do.

Saulu kanse todin dọ: ‘Etẹwẹ yẹn na wà, Oklunọ?’

‘Tite bo yì Damasku,’ wẹ Jesu dọ. ‘Finẹ wẹ yè na dọ nuhe hiẹ na wà na we te.’ To whenue Saulu tite, bo hùn nukun, e ma sọgan mọ nudepope ba. E ko tọ́nnukun! Enẹwutu dawe he zọ̀n po e po lẹ hẹn alọ na ẹn bo plan ẹn sọyi Damasku.

Todin Jesu dọna dopo to devi etọn lẹ mẹ to Damasku dọmọ: ‘Tite Anania. Yì alihogbó he yè nọ ylọdọ Jijlọ ji. Eyin a jẹ owhé Juda tọn gbè, kàn mẹhe nọ yin Saulu biọ. Yẹn ko de e nado yin devi titengbe de hlan mi.’

Anania wàmọ. Whenuena e mọ Saulu, e zealọ etọn do e ji bo dọmọ: ‘Oklunọ wẹ do mi hlan na hiẹ nido sọgan mọnú bo gọ́ na gbigbọ wiwe.’ To afọdopolọji wẹ nuhe taidi ohán lẹ flẹ sọn nukun Saulu tọn lẹ ji, ehe zọ́n bọ e do sọgan mọnú.

Saulu yin yiyizan to aliho he klo de mẹ nado dọyẹwheho na akọta susu. E wá yin yinyọnẹn di apọsteli Paulu, mẹhe go mí na plọnnu susu gando to nukọn mẹ. Ṣigba jẹnukọn whẹ́, gbọ mí ni pọ́n nuhe Jiwheyẹwhe de Pita nado wà.

Owalọ lẹ 8:1-4; 9:1-20; 22:6-16; 26:8-20.



Kanbiọ lẹ

  • Etẹwẹ Saulu wà to okú Stefani tọn godo?
  • Nujiawu tẹwẹ jọ to whenue Saulu to aliji jei Damasku?
  • Etẹwẹ Jesu dọna Saulu nado wà?
  • Anademẹ tẹlẹ wẹ Jesu na Anania, podọ nawẹ Saulu penugo nado mọnú whladopo dogọ gbọn?
  • Yinkọ tẹwẹ wá yiaga na Saulu, podọ nawẹ ewọ yin yiyizan gbọn?

Kanbiọ devo lẹ

  • Hia Owalọ lẹ 8:1-4.

    Nawẹ homẹkẹn sinsinyẹn he fọ́n do agun Klistiani tọn yọyọ he yin didoai lọ ji gọalọ nado hẹn yise Klistiani tọn gbayipe gbọn, podọ onú mọnkọtọn tẹwẹ jọ to egbehe? (Owalọ 8:4; Isa. 54:17)

  • Hia Owalọ lẹ 9:1-20.

    Azọ́ndenamẹ atọ̀n-to-pọmẹ tẹwẹ Jesu dohia dọ emi tindo to linlẹn mẹ na Saulu? (Owalọ 9:15; 13:5; 26:1; 27:24; Lom. 11:13)

  • Hia Owalọ lẹ 22:6-16.

    Nawẹ mí sọgan taidi Anania gbọn, podọ naegbọn enẹ do yin nujọnu? (Owalọ 22:12; 1 Tim. 3:7; 1 Pita 1:14-16; 2:12)

  • Hia Owalọ lẹ 26:8-20.

    Nawẹ lehe Saulu lẹzun Klistiani gbọn sọgan yin tulinamẹnu de na mẹhe tindo alọwlemẹ mayisenọ lẹ to egbehe gbọn? (Owalọ 26:11; 1 Tim. 1:14-16; 2 Tim. 4:2; 1 Pita 3:1-3)