Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 107: Yé Dlan Zannu Do Stefani

Otàn 107: Yé Dlan Zannu Do Stefani

STEFANI wẹ dawe he jẹklo lọ nọ yin. Devi nugbonọ Jesu tọn de wẹ ewọ. Ṣigba, pọ́n nuhe to jijọ dego todin! Dawe enẹlẹ to zannu dahodaho lẹ̣ dlan do e. Etẹwutu wẹ yé do gbẹwanna Stefani sọmọ bọ yé to danú ehe wà do e go? Gbọ mí ni pọ́n.

Yé to zannu dlan do Stefani

Jiwheyẹwhe nọ gọalọna Stefani nado wà azọ́njiawu lẹ. Dawe ehelẹ ma yiwanna enẹ, enẹwutu yé jẹ núdọ̀n hẹ ẹ ji gando nugbo he plọnmẹ e te lẹ go. Ṣigba Jiwheyẹwhe na nuyọnẹn susu Stefani, bọ Stefani dohia dọ nuplọnmẹ lalo wẹ omẹ enẹlẹ to pinplọnmẹ. Ehe sọ fọ́n homẹgble yetọn dote dogọ. Enẹ wẹ zọ́n bọ yé wle e bosọ dọna gbẹtọ lẹ nado wá dolalo dokọna ẹn.

Yẹwhegán lọ kanse Stefani dọmọ: ‘Be nugbo wẹ onú ehelẹ ya?’ Stefani na gblọndo gbọn hodidọ dagbe he sinai do Biblu ji de nina dali. To vivọnu hodidọ etọn tọn, e dọ lehe mẹylankan lẹ gbẹwanna yẹwhegán Jehovah tọn lẹ do to hohowhenu. E sọ dọmọ: ‘Mìwlẹ taidi omẹ enẹlẹ. Mì hù Jesu, devizọnwatọ Jiwheyẹwhe tọn bo masọ yìn osẹ́n Jiwheyẹwhe tọn lẹ.’

Ehe sọ hẹn homẹgblena nukọntọ sinsẹ̀n tọn ehelẹ dogọ! Yé dù adúkúnkún po homẹgble po. Whelọnu wẹ Stefani ze nukun etọn lẹ daga bo dọmọ: ‘Pọ́n! Yẹn mọ Jesu to ote to adusilọ Jiwheyẹwhe tọn mẹ to olọn mẹ.’ To ehe sisè mẹ, dawe lọ lẹ yí alọ do sú otó yetọn lẹ, bosọ jẹ Stefani ji. Yé wle e bosọ dọ̀n ẹn tọ́n sọn tòdaho lọ mẹ.

To finẹ, yé de agawu yetọn lẹ bo bẹ na Saulu he yin jọja de nado penukundego. Be hiẹ mọ Saulu ya? Whenẹnu wẹ delẹ to dawe lọ lẹ mẹ jẹ zannu dlan do Stefani ji. Stefani jẹklo dile a sọgan mọ do bo hodẹ̀ hlan Jiwheyẹwhe dọmọ: ‘Jehovah E, a lẹn ylando ehe do okọ̀ na yé blo.’ E yọnẹn dọ nukọntọ sinsẹ̀n tọn lẹ wẹ klọ delẹ to yé mẹ. Enẹgodo Stefani kú.

To whenue mẹde wà nuylankan de do we, be hiẹ nọ tẹnpọn nado yiahọsu, kavi nọ vẹ̀ Jiwheyẹwhe nado suahọ mẹlọ wẹ ya? Stefani kavi Jesu ma wàmọ. Yé nọ do homẹdagbe hia mẹhe ma yin homẹdagbenọ lẹ. Gbọ mí ni tẹnpọn nado hodo apajlẹ yetọn.

Owalọ lẹ 6:8-15; 7:1-60.



Kanbiọ lẹ

  • Mẹnu wẹ Stefani, podọ etẹwẹ Jiwheyẹwhe to alọgọna ẹn nado wà?
  • Etẹwẹ Stefani dọ he hẹn homẹgble nukọntọ sinsẹ̀n tọn lẹ tlala?
  • To whenuena dawe lọ lẹ dọ̀n Stefani jẹgbonu sọn tòdaho lọ mẹ, etẹwẹ yé wà na ẹn?
  • Mẹnu wẹ dẹpẹ he ṣite to agawu lẹ kọ̀n to yẹdide lọ mẹ?
  • Jẹnukọnna okú Stefani tọn, odẹ̀ tẹwẹ e hò hlan Jehovah?
  • To apajlẹ Stefani tọn mẹ, etẹwẹ mí dona wà eyin mẹde wà nuhe ylan do mí go?

Kanbiọ devo lẹ

  • Hia Owalọ lẹ 6:8-15.

    Aliho oklọ tọn tẹlẹ wẹ nukọntọ sinsẹ̀n tọn lẹ nọ yizan nado hẹnalọdotena azọ́n yẹwhehodidọ Kunnudetọ Jehovah tọn lẹ tọn? (Owalọ 6:9, 11, 13)

  • Hia Owalọ lẹ 7:1-60.

    Etẹwẹ gọalọna Stefani nado yiavunlọna wẹndagbe lọ po kọdetọn dagbe po to Whẹdatẹn Daho Ju lẹ tọn nukọn, podọ etẹwẹ mí sọgan plọn sọn apajlẹ etọn mẹ? (Owalọ 7:51-53; Lom. 15:4; 2 Tim. 3:14-17; 1 Pita 3:15)

    Pọndohlan tẹwẹ mí dona wleawuna gando mẹhe nọ jẹagọdo azọ́n mítọn lẹ go? (Owalọ lẹ 7:58-60; Mat. 5:44; Luku 23:33, 34)