Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 104: Jesu Lẹkọyi Olọn Mẹ

Otàn 104: Jesu Lẹkọyi Olọn Mẹ

DILE azán lẹ to yìyì, Jesu do ede hia hodotọ etọn lẹ whlasusu. To gbèdopo, diblayi devi 500 wẹ mọ ẹn. Whenuena e sọawuhia yé, be hiẹ yọ́n nuhe ji e dọhodo na yé ya? Ahọluduta Jiwheyẹwhe tọn ji wẹ. Jehovah wẹ do Jesu hlan aigba ji nado plọnmẹ dogbọn Ahọluduta lọ dali. E sọ zindonukọn to ehe wiwà mẹ etlẹ yin to whenue e fọ́n sọn oṣiọ lẹ mẹ godo.

Jesu lẹkọ jei olọn mẹ

Be hiẹ flin nuhe Ahọluduta Jiwheyẹwhe tọn yin ya? Ahọluduta lọ yin gandudu nujọnu tọn Jiwheyẹwhe tọn to olọn mẹ, podọ Jesu wẹ yin Mẹhe Jiwheyẹwhe de nado yin ahọlu etọn. Dile mí plọn do wayi, Jesu do ahọlu jiawu he nkọ ewọ na wá yin hia gbọn núdùdù nina mẹhe huvẹ to hùhù lẹ, awutunọ lẹ hinhẹn jẹgangan, podọ etlẹ yin oṣiọ lẹ finfọn dogbẹ̀ dali!

Enẹwutu, to whenue e na dugán to olọn mẹ na owhe fọtọ́n, nawẹ nulẹ na te do to aigba ji? Mọwẹ, aigba lọ blebu na yin hinhẹn zun paladisi whanpẹnọ de. Awhàn ma nasọ tin ba, kavi ylanwiwa, kavi awutu, etlẹ yin okú lọsu ma nasọ tin ba. Míwlẹ yọnẹn dọ nugbo wẹ ehe, na Jiwheyẹwhe dá aigba ehe nado yin paladisi na gbẹtọ nido duvivi etọn. Enẹ wẹ zọ́n bọ e do basi jipa Edẹni tọn to tintan whenu. Podọ, Jesu nasọ hẹn ẹn diun dọ ojlo Jiwheyẹwhe tọn wá mọ hẹndi.

Ojlẹ lọ ko wá todin na Jesu nado lẹkọyi olọn mẹ. Azán 40 wẹ ewọ yí do do ede hia devi etọn lẹ. Enẹwutu, yé deji dọ ewọ to ogbẹ̀ whladopo dogọ. Ṣigba, whẹpo e do jo devi etọn lẹ do e dọna yé dọmọ: ‘Mì nọte to Jelusalẹm kakajẹ whenue mì na mọ gbigbọ wiwe yí.’ Gbigbọ wiwe lọ wẹ yin huhlọn-yido-wazọ́n Jiwheyẹwhe tọn, e taidi yìnyìn jẹhọn tọn, podọ enẹ wẹ na nọ gọalọna hodotọ etọn lẹ nado wà ojlo Jiwheyẹwhe tọn. To godo mẹ, Jesu dọmọ: ‘Mìwlẹ na dọ yẹwheho gando go e jẹ opodo aigba tọn.’

To whenue Jesu dọ ehe pokẹn, nujiawu de jọ. E dedo olọn mẹ, dile hiẹ sọgan mọ ẹn do tofi. Aslọ de ṣinyọ́n Jesu, bọ devi lẹ masọ sọgan mọ ẹn ba. Jesu lẹkọyi olọn mẹ, e sọ jẹ gandu do hodotọ etọn lẹ ji to aigba ji.

Devi lẹ to agahomẹ pọ́n

1 Kọlintinu lẹ 15:3-8; Osọhia 21:3, 4; Owalọ lẹ 1:1-11.



Kanbiọ lẹ

  • Devi nẹmu wẹ mọ Jesu to nujijọ de whenu, podọ etẹ ji wẹ e dọhodo na yé?
  • Etẹwẹ Ahọluduta Jiwheyẹwhe tọn yin, podọ nawẹ gbẹninọ na te to aigba ji to gandudu owhe fọtọ́n Jesu tọn whenu?
  • Azán nẹmu wẹ Jesu do sọawuhia devi etọn lẹ, ṣigba etẹwẹ ojlẹ ko sọ̀ na ẹn todin nado wà?
  • Whẹpo Jesu do jo devi etọn lẹ do nado yì olọn mẹ, etẹwẹ e dọna yé nado wà?
  • Etẹwẹ to jijọ to yẹdide lọ mẹ, podọ nawẹ Jesu bu do yé gbọn?

Kanbiọ devo lẹ

  • Hia 1 Kọlintinu lẹ 15:3-8.

    Etẹwẹ gọalọna apọsteli Paulu nado dọho gando fọnsọnku Jesu tọn go po jide po sọmọ, podọ etẹlẹ ji wẹ Klistiani lẹ sọgan dọhodo po jide po to egbehe? (1 Kọl. 15:4, 7, 8; Isa. 2:2, 3; Mat. 24:14; 2 Tim. 3:1-5)

  • Hia Owalọ lẹ 1:1-11.

    Nawẹ azọ́n yẹwhehodidọ tọn lọ ko gbayipe sọ dile e yin didọdai do to Owalọ lẹ 1:8 mẹ? (Owalọ 6:7; 9:31; 11:19-21; Kọl. 1:23)

Plọnnu Dogọ

Klisti to Adusilọ Jiwheyẹwhe Tọn Mẹ

Etẹwẹ Jesu na to wiwà dile e na to tepọn ojlẹ he mẹ e na yinuwa sọta kẹntọ etọn lẹ?