Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 103: Yé to Abò He Ohọ̀n Etọn to Súsú de Mẹ

Otàn 103: Yé to Abò He Ohọ̀n Etọn to Súsú de Mẹ

TO WHENUE Pita po Johanu po ko tọ́n sọn yọdò he mẹ oṣiọ Jesu tọn te lọ kọ̀n godo, e pò Malia kẹdẹ to finẹ. E jẹ avivi ji. Whenẹnu wẹ e fẹ yìdo bo pọ́n yọdò lọ mẹ hlan dile mí ko mọ do to yẹdide he wayi lọ mẹ. Finẹ wẹ e mọ angẹli awe te! Yé kanse e dọmọ: ‘Etẹwutu wẹ hiẹ do to avivi?’

Malia gblọn bo dọmọ: ‘Yé ko ze Oklunọ ṣie sọyi, podọ yẹn masọ yọ́n fihe yé ze e do.’ Enẹgodo wẹ Malia lẹkọ bo mọ dawe de. Dawe lọ kanse e dọmọ: ‘Mẹnu dín wẹ a te?’

Malia lẹndọ Jipa-họ́tọ de wẹ yin dawe lọ, podọ e sọgan ko yindọ ewọ wẹ ze oṣiọ Jesu tọn sọyi. E sọ dọhlan ẹn dọmọ: ‘Eyin dọ hiẹ wẹ ze e sọyi, bo dọ fie a ze e do na mi.’ Ṣigba na nugbo tọn, Jesu lọsu wẹ dawe ehe. E ko biọ agbasa he Malia ma sọgan yọnẹn de mẹ. Ṣigba to whenue e ylọ yinkọ Malia tọn godo wẹ e wá yọnẹn dọ Jesu wẹ. E họ̀nwezun bo yì dọna devi lọ lẹ dọmọ: ‘Yẹn ko mọ Oklunọ!’

To ojlẹ de godo to gbènẹgbè, whenuena devi awe jei otò Emausi tọn mẹ, dawe de bọdo yé. Devi lẹ to awubla taun na yè ko hù Jesu wutu. Ṣigba whenuena yé to yìyì, dawe lọ basi zẹẹmẹ nususu tọn na yé sọn Biblu mẹ he miọnhomẹna yé. Whenuena yé nọte nado dùnú, devi lẹ wá yọnẹn todin dọ Jesu wẹ. Whenẹnu wẹ Jesu bu do yé, bọ devi awe enẹlẹ sọ yawu lẹkọyi Jelusalẹm nado dọ nuhe jọ lọ na apọsteli lẹ.

Whenuena yé to enẹ dọ to alọnu, Jesu sọ sọawuhia Pita. E paṣa mẹhe pò lẹ whenuena yé sè ehe. Whenẹnu wẹ devi awe ehelẹ yì Jelusalẹm nado dín apọsteli lẹ mọ. Yé dọna apọsteli lẹ lehe Jesu sọawuhia yé do to aliji. To whenue yé to enẹ dọ to alọnu, be a yọ́n nujiawu he sọ jọ ya?

Pọ́n yẹdide lọ. Jesu sọawuhia to abò lọ mẹ tlọlọ, dile etlẹ yindọ ohọ̀n lọ to súsú gbanun-gbanun. Pọ́n lehe homẹhun devi lẹ do sọ! Be e ma yin azán ayajẹ tọn de wẹ enẹ yin ya? Todin, be hiẹ sọgan hia whla nẹmu he Jesu sọawuhia hodotọ etọn lẹ ya? Be whla atọ́n wẹ a hia ya?

Jesu to awusọhia devi etọn lẹ

Apọsteli Tọmasi ma tin po yé po to whenue Jesu sọawuhia yé. Enẹwutu devi lẹ dọna ẹn dọmọ: ‘Míwlẹ ko mọ Oklunọ!’ Ṣigba Tọmasi dọ dọ e zun whenue emi lọsu na mọ Jesu whẹpo emi nado yise. Enẹgodo, to azán ṣinatọ̀n godo, devi lẹ sọ plido abò he ohọ̀n etọn to súsú de mẹ, podọ Tọmasi to finẹ po yé po to whelọnu. To ajiji mẹ, Jesu sọawuhia yé to abò lọ mẹ. Tọmasi wá yise todin lo.

Johanu 20:11-29; Luku 24:13-43.



Kanbiọ lẹ

  • Etẹwẹ Malia dọna dawe he e lẹndọ jipa-họ́tọ de wẹ lọ, ṣigba etẹwẹ hẹn ẹn nado mọdọ Jesu wẹ mẹlọ na taun tọn?
  • Etẹwẹ jọ do devi awe he to zọnlinzin jei gbétatò Emausi tọn mẹ lọ lẹ go?
  • Onú jiawu tẹwẹ jọ to whenuena devi awe lọ lẹ dọna apọsteli lẹ dọ yé mọ Jesu?
  • Whla nẹmu wẹ Jesu sọawuhia hodotọ etọn lẹ?
  • Etẹwẹ Tọmasi dọ to whenuena e sè dọ devi lẹ mọ Oklunọ, ṣigba etẹwẹ jọ to azán ṣinatọ̀n godo?

Kanbiọ devo lẹ

  • Hia Johanu 20:11-29.

    Sọgbe hẹ nuhe tin to Johanu 20:23 mẹ, be Jesu to didọ dọ gbẹtọvi lẹ tindo aṣẹ nado jo ylando lẹ namẹ wẹ ya? Basi zẹẹmẹ. (Ps. 49:2, 7; Isa. 55:7; 1 Tim. 2:5, 6; 1 Joh. 2:1, 2)

  • Hia Luku 24:13-43.

    Nawẹ mí sọgan jla ahun mítọn do nado kẹalọyi nugbo Biblu tọn lẹ gbọn? (Luku 24:32, 33; Ẹzla 7:10; Mat. 5:3; Owalọ 16:14; Heb. 5:11-14)

Plọnnu Dogọ

Omẹ Kanweko Susu Mọ Ẹn Jẹnukọnna Pẹntikọsti

To fọnsọnku Jesu tọn godo, whẹpo e nido yì olọn mẹ, whlasusu wẹ e zinnudo nuhe devi etọn lẹ na mọyi po lehe yé na zan ẹn do po ji na yé.