Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 102: Jesu to Ogbẹ̀

Otàn 102: Jesu to Ogbẹ̀

BE HIẸ yọ́n mẹhe nawe ehe po dawe awe ehelẹ po yin ya? Malia Magdaleni, dopo to họntọn Jesu tọn lẹ mẹ wẹ nawe lọ. Podọ angẹli lẹ wẹ dawe he tin to awù wewe mẹ lẹ. Abò pẹvi he mẹ Malia to pinpọnhlan lọ wẹ fie yé tẹ́ oṣiọ Jesu tọn do. Yé nọ ylọ ẹ dọ yọdò. Ṣigba, todin oṣiọ etọn masọ tofi ba! Mẹnu wẹ ze e? Gbọ mí ni pọ́n.

Angẹli lẹ to hodọna Malia Magdaleni

To okú Jesu tọn godo, yẹwhenọ lẹ dọna Pilati dọmọ: ‘To whenue Jesu tin to ogbẹ̀, e dọ dọ emi na fọ́n to azán etọn atọ̀ntọ gbè. Enẹwutu, degbè na yè nido nọ ṣọ́ yọdò lọ. Whenẹnu devi etọn lẹ ma na wá fìn oṣiọ etọn bo na wá dọ dọ e ko fọ́n!’ Pilati degbè dọ yẹwhenọ lẹ ni do awhànfuntọ lẹ hlan nado to yọdò lọ ṣọ́.

Ṣigba to azán atọ̀ntọ gbè afọnnu fuu to okú Jesu tọn godo wẹ angẹli Jehovah tọn de wá to ajiji mẹ. E bli zannu lọ sẹ̀ sọn yọdò lọ ji. Obu jẹ awhànfuntọ lẹ ji sọmọ bọ yé ma sọgan sẹtẹn. Enẹgodo, whenue yé pọ́n yọdò lọ mẹ, yé masọ mọ oṣiọ lọ ba! Delẹ to awhànfuntọ lọ lẹ mẹ yì tòhò lọ mẹ bo yì dọna yẹwhenọ lẹ. Be a yọ́n nuhe yẹwhenọ ylankan lọ lẹ basi ya? Yé na akuẹ awhànfuntọ lọ lẹ nado dolalo. Yẹwhenọ lẹ sọ dọna awhànfuntọ lọ lẹ dọmọ: ‘Mì dọ dọ amlọndọ mí te to zánmẹ bọ devi etọn lẹ wá bo fìn oṣiọ etọn yì.’

To ojlẹ enẹ mẹ, nawe delẹ he yin họntọn Jesu tọn lẹ yì yọdò lọ kọ̀n. Lehe e yin nupaṣamẹ na yé do nado mọdọ yọdò lọ ko jẹvọ́! Malia Magdaleni họ̀nwezun to afọdopolọji nado yì dọna Pita po Johanu po. To ajiji mẹ wẹ angẹli awe he do awù he to sisẹ́ lẹ sọawuhia nawe he pò lẹ. Yé kanse dọmọ: ‘Etẹwutu wẹ mì do to Jesu dín tofi? Ewọ ko fọ́n. Mì yawu yì dọna devi etọn lẹ.’ E họnwun dọ nawe lọ lẹ na ko họ̀nwezun taun nado yì dọ. Ṣigba dawe de do yé te to aliji. Be hiẹ yọ́n mẹhe do yé te lọ ya? Jesu wẹ! E dọmọ: ‘Mì yì dọna devi ṣie lẹ.’

Whenuena nawe lọ lẹ dọna devi lẹ dọ Jesu tin togbẹ̀, podọ emi ko sọ mọ ẹn, e vẹawuna devi lẹ nado yise. Pita po Johanu po họ̀nwezun yì yọdò lọ kọ̀n nado pọ́n ẹn na yede, ṣigba yọdò lọ ko jẹvọ́! To whenue Pita po Johanu po tọ́n sọn finẹ, Malia Magdaleni he ko lẹkọwa yọdò lọ kọ̀n to whenẹnu nọte to finẹ. To ojlẹ enẹ mẹ wẹ e pọ́n yọdò lọ mẹ dohlan bo mọ angẹli awe lẹ.

Be hiẹ yọ́n nuhe jọ do oṣiọ Jesu tọn go ya? Jiwheyẹwhe wẹ wà azọ́njiawu bọ e do busẹ. Jiwheyẹwhe ma fọ́n Jesu do agbasa he mẹ e te whẹpo do kú gba. E na Jesu agbasa yọyọ gbigbọ tọn, agbasa wunmẹ he angẹli lẹ nọ tindo to olọn mẹ. Ṣigba nado dohia devi etọn lẹ dọ emi tin togbẹ̀, Jesu sọgan ze agbasa he gbẹtọ sọgan mọ de dó, ehe mí na plọnnu deji to nukọn mẹ.

Matiu 27:62-66; 28:1-15; Luku 24:1-12; Johanu 20:1-12.



Kanbiọ lẹ

  • Mẹnu wẹ nawe he tin to yẹdide lọ mẹ, mẹnu sọ wẹ dawe awe lọ lẹ, podọ fie wẹ yé te?
  • Naegbọn Pilati do dọna yẹwhenọ lẹ nado do awhànfuntọ lẹ hlan nado ṣọ́ yọdò Jesu tọn?
  • Etẹwẹ angẹli de wà to afọnnu fuu to azán atọ̀ntọ okú Jesu tọn godo, ṣigba etẹwẹ yẹwhenọ lẹ wà?
  • Naegbọn e paṣa yọnnu delẹ to whenuena yé yì yọdò Jesu tọn kọ̀n?
  • Naegbọn Pita po Johanu po do họ̀nwezun yì yọdò Jesu tọn kọ̀n, podọ etẹwẹ yé mọ?
  • Etẹwẹ jọ do agbasa Jesu tọn go, ṣigba etẹwẹ e wà nado dohia devi etọn lẹ dọ emi tin to ogbẹ̀?

Kanbiọ devo lẹ

  • Hia Matiu 27:62-66 po 28:1-15 po.

    Nawẹ yẹwhenọ daho lẹ, Falesi lẹ, po mẹho Ju lẹ tọn lẹ po waylando do gbigbọ wiwe go to fọnsọnku Jesu tọn whenu gbọn? (Mat. 12:24, 31, 32; 28:11-15)

  • Hia Luku 24:1-12.

    Nawẹ kandai fọnsọnku Jesu tọn dohia dọ Jehovah nọ pọ́n yọnnu lẹ hlan taidi kunnudetọ he go yè sọgan dejido lẹ gbọn? (Luku 24:4, 9, 10; Mat. 28:1-7)

  • Hia Johanu 20:1-12.

    Nawẹ Johanu 20:8, 9 gọalọna mí nado mọdọ e nọ biọ homẹfa to whenuena mí ma mọnukunnujẹ hẹndi dọdai Biblu tọn de mẹ ganji gbọn? (Howh. 4:18; Mat. 17:22, 23; Luku 24:5-8; Joh. 16:12)

Plọnnu Dogọ

Jesu He Yin Finfọnsọnku lọ Sọawuhia Mẹsusu

Nawẹ Jesu dohia devi etọn lẹ dọ ewọ ko yin finfọnsọnku gbọn?

Agbasa Gbẹtọ Tọn Wẹ Jesu Tindo to Fọnsọnku Godo Ya Kavi E Lẹzun Gbigbọ De?

Biblu dọ dọ Jesu “yin hinhẹnwa ogbẹ̀ to gbigbọ mẹ.” Eyin mọ wẹ, etẹwẹ hẹn ẹn yọnbasi na devi lẹ nado mọ ẹn bo doalọ e go to whenue e fọ́n sọn oṣiọ lẹ mẹ godo?