Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 97: Jesu Wá Taidi Ahọlu

Otàn 97: Jesu Wá Taidi Ahọlu

OJLẸ vude to whenue nukuntọ́nnọ nubiọtọ awe lọ lẹ ko jẹgangan godo, Jesu wá gbétatò pẹvi de he sẹpọ Jelusalẹm mẹ. E dọna awe to devi etọn lẹ mẹ dọmọ: ‘Mì yì gbétatò enẹ mẹ, mì nasọ mọ kẹtẹkẹtẹvu de. Mì tún in bosọ hẹn ẹn wá na mi.’

To whenuena yé hẹn kẹtẹkẹtẹ lọ wá na ẹn, Jesu sinai do e ji. Enẹgodo e kùn in yì Jelusalẹm he ma dẹn do finẹ. Whenue e sẹpọ tòdaho lọ, gbẹtọgun daho de tọ́n nado pé e. Suhugan yetọn de awù yetọn lẹ bo tẹ́ yé do aliji. Mẹdevo lẹ sán odéma lẹ. Yé sọ tẹ́ ehelẹ lọsu do aliji ga, bosọ dawhá dọmọ: ‘Donanọ wẹ ahọlu lọ he ja to oyín Jehovah tọn mẹ!’

Gbẹtọ lẹ to kuavọdona Jesu

To hohowhenu to Islaeli, ahọlu yọyọ lẹ nọ kùn kẹtẹkẹtẹvu de biọ Jelusalẹm nado do yede hia gbẹtọ lẹ. Nuhe wà Jesu te lọ niyẹn. Podọ gbẹtọ ehelẹ to didohia dọ yé jlo dọ Jesu ni yin ahọlu yetọn. Ṣigba, e ma yin gbẹtọ lẹpo wẹ jlo domọ gba. Mí sọgan mọ ehe gbọn nuhe jọ to whenuena Jesu yì tẹmpli lọ mẹ dali.

To tẹmpli lọ mẹ, Jesu hẹnazọ̀ngbọna nukuntọ́nnọ po sẹkunọ lẹ po. To whenue yọpọvu lẹ mọ ehe, yé dawhá bo pagigona Jesu. Ṣigba ehe hẹn yẹwhenọ lẹ gblehomẹ, bọ yé sọ dọna Jesu dọmọ: ‘Be a sè nuhe dọ ovi lẹ te ya?’

Jesu sọ gblọn dọmọ: ‘Mọwẹ, yẹn sè. Be mì ma ko hia gbede to Biblu mẹ dọ, “Sọn onù yọpọvu lẹ tọn mẹ wẹ Jiwheyẹwhe na hẹn pipà wá te ya?”’ Mọ wẹ yọpọvu lẹ zindonukọn to ahọlu dide Jiwheyẹwhe tọn pipà mẹ do niyẹn.

Mí jlo na taidi yọpọvu enẹlẹ, kavi e ma yin mọ wẹ? Mẹdelẹ sọgan tẹnpọn nado doalọtena mí sọn hodidọ gando ahọluduta Jiwheyẹwhe tọn go mẹ. Ṣigba, mí na zindonukọn nado to hodọna mẹdevo lẹ gando onú jiawu he Jesu na wà na gbẹtọ lẹ go.

To whenue Jesu tin to aigba ji, ojlẹ lọ ma ko sọ̀ na ẹn nado jẹ gandu ji taidi ahọlu de gba. Whetẹnu wẹ ojlẹ ehe lọ na wá? Devi Jesu tọn lẹ jlo na yọnẹn. Mí na plọnnu gando ehe go to otàn he na bọdego mẹ.

Matiu 21:1-17; Johanu 12:12-16.



Kanbiọ lẹ

  • Etẹwẹ Jesu dọna devi etọn lẹ nado wà to whenuena e wá gbétatò pẹvi de mẹ sẹpọ Jelusalẹm?
  • To yẹdide lọ mẹ, etẹwẹ jọ to whenuena Jesu sẹpọ tòdaho Jelusalẹm tọn?
  • Etẹwẹ ovi pẹvi lẹ wà to whenuena yé mọ bọ Jesu to azọ̀nhẹngbọna nukuntọ́nnọ lẹ po sẹkunọ lẹ po?
  • Etẹwẹ Jesu dọna yẹwhenọ he gblehomẹ lọ lẹ?
  • Nawẹ mí sọgan taidi ovi pẹvi he pagigona Jesu lẹ gbọn?
  • Etẹwẹ devi lẹ jlo nado yọnẹn?

Kanbiọ devo lẹ

  • Hia Matiu 21:1-17.

    Nawẹ Jelusalẹm bibiọ Jesu tọn taidi Ahọlu gbọnvo na awhàngbigba awhàngán lẹ tọn to ojlẹ Lomunu lẹ tọn mẹ gbọn? (Mat. 21:4, 5; Zek. 9:9; Flp. 2:5-8; Kọl. 2:15)

    Etẹwẹ jọja lẹ sọgan plọn sọn apajlẹ visunnu Islaeli tọn he yihodọ sọn Psalm 118 mẹ to whenuena Jesu biọ tẹmpli mẹ lọ lẹ tọn mẹ ? (Mat. 21:9, 15; Ps. 118:25, 26; 2 Tim. 3:15; 2 Pita 3:18)

  • Hia Johanu 12:12-16.

    Etẹwẹ odéma he gbẹtọ lẹ yizan nado pagigona Jesu lọ lẹ nọtena? (Joh. 12:13; Flp. 2:10; Osọ. 7:9, 10)

Plọnnu Dogọ

JESU—ALIHO LỌ, NUGBO LỌ PO OGBẸ̀ PO

Ahọlu lọ Biọ Jelusalẹm to Kẹtẹkẹtẹvu de Ji

E hẹn dọdai he ko yin didọ sọn owhe 500 die gbọ́n di.