Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 95: Lehe Jesu Nọ Plọnmẹ Do

Otàn 95: Lehe Jesu Nọ Plọnmẹ Do

TO GBÈDOPO, Jesu dọna dawe de dọ ewọ dona yiwanna kọmẹnu etọn. Dawe lọ kanse Jesu dọmọ: ‘Mẹnu wẹ yin kọmẹnu ṣie?’ Jesu yọ́n nuhe lẹn dawe lọ te ganji. Dawe lọ lẹndọ mẹhe tin to akọ̀ po sinsẹ̀n emitọn po mẹ lẹ kẹdẹ wẹ yin kọmẹnu emitọn lẹ. Enẹwutu gbọ mí ni pọ́n nuhe Jesu dona ẹn.

To whedelẹnu, Jesu nọ plọnmẹ gbọn otàn de yiyizan dali. Nuhe e wà todin niyẹn. E dọ otàn de he gando Ju de po Samalianu de po go. Mí ko plọn wayi dọ suhugan Ju lẹ tọn ma yiwanna Samalianu lẹ. Otàn he Jesu dọ lọ die:

To gbèdopo, Ju de gbọn aliho osó tọn de ji jei Jẹliko. Ṣigba ajotọ lẹ jẹ e ji. Yé yí akuẹ etọn lẹpo bosọ hò e bọ e dibla kú.

To ojlẹ de godo, yẹwhenọ Ju de gbọn aliho lọ ji bo mọ dawe he yè hò kúdaa-gbẹ̀daa lọ. Etẹwẹ hiẹ lẹndọ e wà? E haji lẹkọ gbọn awà awetọ ji bo yì. Enẹgodo, dawe sinsẹ̀nnọ de sọ gbọn filọ. Levinu de wẹ ewọ. Be e nọte ya? Lala, ewọ lọsu ma nọte nado gọalọna dawe he yè hò kúdaa-gbẹ̀daa lọ gba. Hiẹ sọgan mọ yẹwhenọ lọ po Levinu lọ po he to yìyì to aganu to aliho lọ ji.

Ṣigba pọ́n mẹhe tofi hẹ dawe he yè hò kúdaa-gbẹ̀daa lọ. Samalianu de wẹ. Podọ ewọ to alọgọna Ju lọ. E to amasin delẹ kọ̀n do apà dawe lọ tọn lẹ mẹ. Enẹgodo, e ze Ju lọ yì fihe yè sọgan penukundo e go te na nido jẹgangan.

Samalianu he yin kọmẹnu dagbe lọ

Whenuena e dotana otàn etọn, Jesu dọna dawe he kàn kanbiọ sè e lọ dọmọ: ‘Mẹnu to omẹ atọ̀n ehelẹ mẹ wẹ hiẹ lẹndọ e do ede hia taidi kọmẹnu de na dawe he yè hò kúdaa-gbẹ̀daa lọ? Be yẹwhenọ lọ, Levinu lọ kavi Samalianu lọ wẹ ya?’

Dawe lọ gblọn dọmọ: ‘Samalianu lọ wẹ. E do homẹdagbe hia dawe he yè hò kúdaa-gbẹ̀daa lọ.’

Jesu dọmọ: ‘Hiẹ dọ dagbe. Enẹwutu, yì bo nọ wà nudopolọ na mẹdevo lẹ.’

Be hiẹ ma yiwanna lehe Jesu nọ plọnmẹ do ya? Mí sọgan plọn onú titengbe susu eyin mí nọ dotoaina nuhe Jesu dọ to Biblu mẹ lẹ, kavi e ma yin mọ wẹ?

Luku 10:25-37.



Kanbiọ lẹ

  • Kanbiọ tẹwẹ dawe de kanse Jesu, podọ etẹwutu?
  • Etẹwẹ Jesu nọ yizan to whedelẹnu nado plọnnumẹ, podọ etẹwẹ mí ko plọn gando Ju lẹ po Samalianu lẹ po go?
  • Etẹwẹ jọ do Ju he zingbejizọnlin jei Jẹliko lọ go to otàn Jesu tọn mẹ?
  • Etẹwẹ jọ to whenuena yẹwhenọ Ju de po Levinu de po jugbọn finẹ?
  • Mẹnu wẹ to alọgọna Juvi he yin awugblena lọ to yẹdide lọ mẹ?
  • To whenuena Jesu dotana otàn etọn godo, kanbiọ tẹwẹ e kanse, podọ etẹwẹ yin gblọndo dawe lọ tọn?

Kanbiọ devo lẹ

  • Hia Luku 10:25-37.

    Kakati nado na gblọndo tlọlọ, nawẹ Jesu gọalọna dawe he yọ́n Osẹ́n ganji de nado lẹnnupọndo whẹho de ji gbọn? (Luku 10:26; Mat. 16:13-16)

    Nawẹ Jesu yí apajlẹ lẹ zan nado duto nuvẹun todoaitọ etọn lẹ tọn ji gbọn? (Luku 10:36, 37; 18:9-14; Titu 1:9)

Plọnnu Dogọ

Samalianu de Do Mẹhe Yin Kọmẹnu Nujọnu Tọn de Hia

Nawẹ Jesu yí oló kọmẹnu Samalianu lọ kavi “Samalianu dagbe” lọ tọn zan nado na nuplọnmẹ he whànmẹ taun de gbọn?

Visunnu He Ko Bu lọ Lẹkọwa

Etẹlẹ wẹ mí sọgan plọn sọn apajlẹ Jesu tọn gando visunnu duvanọ lọ go mẹ?