Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 94: E Yiwanna Yọpọvu Lẹ

Otàn 94: E Yiwanna Yọpọvu Lẹ

PỌ́N lehe Jesu dọ̀n yọpọvu ehe dogo do. Hiẹ sọgan mọdọ Jesu nọ hò yọpọvu lẹ tọn pọ́n nugbonugbo. Dawe he to pinpọn ẹn lẹ wẹ apọsteli etọn lẹ. Etẹ dọna yé wẹ Jesu te? Gbọ mí ni pọ́n.

Jesu po apọsteli etọn lẹ po ṣẹṣẹ lẹkọ sọn gbejizọnlin gaa de mẹ. To gbejizọnlin lọ whenu, apọsteli lẹ to núdọ̀n to yedelẹ ṣẹnṣẹn. Enẹwutu, Jesu wá kanse yé to gbejizọnlin lọ godo dọmọ: ‘Etẹ dọ̀n wẹ mì te to aliji?’ Na nugbo tọn, Jesu yọ́n nuhe ji yé to núdọ̀n do lọ. Ṣigba, e kàn kanbiọ lọ sè nado pọ́n eyin apọsteli lẹ sọgan dọ ẹ na ẹn.

Jesu po ovi pẹvi de po

Apọsteli lẹ ma na gblọndo, na yé to núdọ̀n to aliji nado yọ́n mẹhe klohugan to ṣẹnṣẹn yetọn. Apọsteli delẹ jlo na yin mẹjọmẹ hugan mẹhe pò lẹ. Nawẹ Jesu sọgan dohia yé gbọn dọ e ma sọgbe nado jlo nado yin mẹhe klohugan?

E ylọ visunnu pẹvi de, bo ze e dote to yemẹpo nukọn. Enẹgodo, e dọna devi etọn lẹ dọmọ: ‘Yẹn jlo dọ mì ni yọnẹn na nugbo tọn dọ, eyin mì ma diọ bo taidi yọpọvu lẹ, mì ma sọgan biọ ahọluduta Jiwheyẹwhe tọn mẹ gbede. Na mẹhe klohugan to ahọluduta lọ mẹ wẹ mẹhe taidi yọpọvu ehe.’ Be hiẹ yọ́n nuhewutu Jesu do dọmọ ya?

Nado yin mẹhe klohugan kavi mẹjọmẹ hugan mẹdevo lẹ ma nọ duahunmẹna yọpọvu lẹ. Enẹwutu, apọsteli lẹ dona plọn nado taidi yọpọvu lẹ to aliho ehe mẹ, bo ma na nọ dọjlẹ gando kiklo-yinyin kavi mẹjọmẹ-yinyin go.

Jesu sọ do lehe ewọ nọ hò yọpọvu lẹ tọn pọ́n do hia to ojlẹ devo lẹ mẹ ga. Osun kleun delẹ godo, mẹdelẹ plan ovi yetọn lẹ wá Jesu dè. Apọsteli lẹ tẹnpọn nado yàn yé. Ṣigba, Jesu dọna apọsteli lẹ dọmọ: ‘Mì jo yọpọvu lẹ do yé ni wá dè e, mì glọnalina yé blo, na gbẹtọ taidi yewlẹ nkọ wẹ ahọluduta Jiwheyẹwhe tọn tin na.’ Jesu sọ dọ̀n yọpọvu lẹ do awà etọn mẹ bo dona yé. Be e ma yin onú dagbe wẹ nado yọnẹn dọ Jesu yiwanna yọpọvu lẹ ya?

Matiu 18:1-4; 19:13-15; Malku 9:33-37; 10:13-16.



Kanbiọ lẹ

  • Etẹ ji wẹ apọsteli lẹ to núdọ̀n do to kọlilẹ yetọn sọn gbejizọnlin gaa de whenu?
  • Naegbọn Jesu ylọ ovi pẹvi de bo ze e dote to ṣẹnṣẹn apọsteli lẹ tọn?
  • Aliho tẹ mẹ wẹ apọsteli lẹ dona plọn nado taidi yọpọvu lẹ te?
  • Nawẹ Jesu dohia to osun vude godo dọ emi yiwanna yọpọvu lẹ gbọn?

Kanbiọ devo lẹ

  • Hia Matiu 18:1-4.

    Naegbọn Jesu do nọ yí apajlẹ lẹ zan nado plọnnumẹ? (Mat. 13:34, 36; Malku 4:33, 34)

  • Hia Matiu 19:13-15.

    Jẹhẹnu yọpọvu lẹ tọn tẹwẹ mí dona wleawuna eyin mí na tindo mahẹ to dona Ahọluduta lọ tọn lẹ mẹ? (Ps. 25:9; 138:6; 1 Kọl. 14:20)

  • Hia Malku 9:33-37.

    Etẹwẹ Jesu plọn devi etọn lẹ gando ojlo tintindo na otẹn diyin lẹ go? (Malku 9:35; Mat. 20:25, 26; Gal. 6:3; Flp. 2:5-8)

  • Hia Malku 10:13-16.

    Nawẹ Jesu yọ́n dọnsẹpọ sọ, podọ etẹwẹ mẹho agun tọn lẹ sọgan plọn sọn apajlẹ etọn mẹ? (Malku 6:30-34; Flp. 2:1-4; 1 Tim. 4:12)

Plọnnu Dogọ

Nuplọnmẹ Gando Gbẹdai po Wanyina Yọpọvu lẹ po Go

Pọndohlan Jesu tọn gando yọpọvu lẹ go gbọnvona devi etọn lẹ tọn taun. Gbọnna?