Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 93: Jesu Na Núdùdù Gbẹtọ Susu

Otàn 93: Jesu Na Núdùdù Gbẹtọ Susu

ONÚ ylankan de jọ. Johanu Baptizitọ ṣẹṣẹ yin hùhù. Hẹlọdia, asi ahọlu lọ tọn ma yiwanna ẹn. Podọ e penugo nado hẹn ahọlu lọ nado gbòtana Johanu.

To whenue Jesu sè ehe, e blawu taun. E yì fihe to olá de nado sọgan nọ edeṣo. Ṣigba, gbẹtọ lẹ hodo e. To whenuena Jesu mọ gbẹtọgun lẹ, onú yetọn wàlẹblanuna ẹn. Enẹwutu, e dọhona yé gando ahọluduta Jiwheyẹwhe tọn go bosọ hẹnazọ̀ngbọna omẹ yetọn he to azọ̀njẹ lẹ.

To whèjai enẹ, devi etọn lẹ wá e dè bo dọmọ: ‘Ozán ko kú, podọ filọ jẹ gblolo mẹ. Do gbẹtọ lẹ hlan na yé nido yì họ̀ nuhe yé na dù lẹ na yede to gbétatò he sẹpọ lẹ mẹ.’

Jesu to núdùdù na gbẹtọgun de

Jesu sọ gblọn dọmọ: ‘E ma biọ dọ yé ni yì gba. Mì na nude yé nado dù.’ Jesu lẹhlan Filippi dè bo kanse dọmọ: ‘Fie wẹ mí sọgan họ̀ núdùdù he na pé gbẹtọ ehe lẹpo te?’

Filippi gblọn dọmọ: ‘E na biọ akuẹ susu nado họ̀ núdùdù he na pé eyin gbẹtọ lẹ dopodopo na tlẹ mọ pẹvide dù.’ Andle sọ dọmọ: ‘Visunnu ehe, he nọ hẹn núdùdù mítọn tindo blẹdi atọ́n po whèvi awe po. Ṣigba, enẹ ma na jẹ fide na omẹ ehe lẹpo.’

Jesu dọmọ: ‘Mì dọna gbẹtọ lẹ nado sinai to ogbé lẹ ji.’ E hodẹ̀ hlan Jiwheyẹwhe do núdùdù lọ ji, bosọ má ẹn do flinflin. Enẹgodo, devi etọn lẹ má blẹdi po whèvi lọ po na gbẹtọ lẹpo. Sunnu 5 000 gọna yọnnu po yọpọvu po fọtọ́n lẹ wẹ tin to finẹ. Yemẹpo wẹ dù bosọ gọ́ho. Podọ to whenue devi lẹ bẹ núdùdù he pò lọ pli godo, ohà 12 wẹ gọ́!

Todin, Jesu degbena devi etọn lẹ nado biọ tọjihun mẹ bo dasá Ohù Galili tọn. To ozán lọ mẹ, jẹhọn sinsinyẹn de fọ́n, bọ agbówhẹn lẹ to bibli po adán po. Obu daho de jẹ devi lẹ ji. To zánhomẹ, yé mọ mẹde he to zọnlinzin to osin ji ja yé dè. Yé sọ dawhá po obu po, na yé ma yọ́n nuhe mọ yé te lọ wutu.

Jesu dọmọ: ‘Mì dibu blo. Yẹn wẹ!’ Etomọṣo, yé ma yise. Enẹwutu, Pita dọmọ: ‘Eyin hiẹ wẹ nugbonugbo, Oklunọ, dọna mi na yẹn ni zinzọnlin to osin lọ ji wá dè we.’ Jesu gblọn dọmọ: ‘Wá!’ Pita sọ jẹte bo zinzọnlin to osin lọ ji! Obu sọ jẹ didi i ji bọ e jẹ sisiọ ji, ṣigba Jesu wá whlẹn ẹn.

To godo mẹ, Jesu sọ na núdùdù gbẹtọ fọtọ́n susu whladopo dogọ. To ojlẹ ehe mẹ, blẹdi ṣinawe po whèvi flinflin vude po wẹ e do na núdùdù gbẹtọ lẹ. Podọ núdùdù sọ sù to aimẹ na mẹlẹpo. Be aliho he mẹ Jesu penukundo gbẹtọ lẹ go te ma jiawu na we ya? To whenue ewọ na jẹ gandu ji taidi ahọlu dide Jiwheyẹwhe tọn, mí ma na jẹtukla nudepope tọn!

Matiu 14:1-32; 15:29-38; Johanu 6:1-21.



Kanbiọ lẹ

  • Onú ylankan tẹwẹ jọ do Johanu Baptizitọ lọ go, podọ etẹwẹ yin numọtolanmẹ Jesu tọn?
  • Nawẹ Jesu na núdùdù gbẹtọgun he hodo e lọ gbọn, podọ nawẹ núdùdù he pò lọ sù sọ?
  • Naegbọn devi lẹ to budi to zánmẹ, podọ etẹwẹ jọ do Pita go?
  • Nawẹ Jesu na núdùdù fọtọ́n susu gbẹtọ lẹ tọn whla awetọ gbọn?
  • Naegbọn e na yin ojlẹ awuvivi tọn de to whenuena Jesu na dugán do aigba ji taidi Ahọlu dide Jiwheyẹwhe tọn?

Kanbiọ devo lẹ

  • Hia Matiu 14:1-32.

    Hinhọ́n tẹwẹ kandai he tin to Matiu 14:23-32 mẹ tá do gbẹtọ-yinyin Pita tọn ji?

    Nawẹ kandai Owe-wiwe tọn lẹ dohia dọ Pita wá whèwhín bo duto jijọ sọmawhe tọn etọn ji gbọn? (Mat. 14:27-30; Joh. 18:10; 21:7; Owalọ 2:14, 37-40; 1 Pita 5:6, 10)

  • Hia Matiu 15:29-38.

    Nawẹ Jesu do sisi hia na onú agbasa tọn he Otọ́ etọn wleawuna lẹ gbọn? (Mat. 15:37; Joh. 6:12; Kọl. 3:15)

  • Hia Johanu 6:1-21.

    Nawẹ Klistiani lẹ sọgan hodo apajlẹ Jesu tọn na nuhe gando gandudu lẹ go gbọn to egbehe? (Joh. 6:15; Mat. 22:21; Lom. 12:2; 13:1-4)