Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 92: Jesu Fọ́n Oṣiọ Lẹ

Otàn 92: Jesu Fọ́n Oṣiọ Lẹ

OWHE 12 wẹ viyọnnu he mọ a te tofi lọ tindo. Jesu hẹn alọ etọn go bọ otọ́ etọn po onọ̀ etọn po tin to ote sẹpọ yé. Be a yọ́n nuhewutu yé gọ́ na ayajẹ sọmọ ya? Gbọ mí ni pọ́n.

Jesu to viyọnnu Jailu tọn fọnsọnku

Omẹ titengbe de wẹ otọ́ viyọnnu ehe tọn, yinkọ etọn wẹ Jailu. To gbèdopo, viyọnnu etọn bẹ awutu bọ yé sọ tẹ́ ẹ do adọ́zan ji. Ṣigba awutu lọ ma jo e do. Kakatimọ, e to sinsinyẹn deji. Jailu po asi etọn po to awubla na e taidi dọ viyọnnu pẹvi yetọn na kú janwẹ. Viyọnnu dopo gee he yé tindo lọ niyẹn. Enẹwutu, Jailu tọ́n nado yì dín Jesu. E ko sèhó gando azọ́njiawu he Jesu to wiwà lẹ go.

To whenue Jailu mọ Jesu, gbẹtọ susu wẹ lẹdo e. Ṣigba, Jailu dín ali gbọn gbẹtọ lẹ ṣẹnṣẹn bo yì jẹklo to afọ Jesu tọn lẹ kọ̀n. E sọ vẹvẹ dọmọ: ‘Viyọnnu ṣie to awutu jẹ sinsinyẹn. Jaale, bo wá hẹnazọ̀ngbọna ẹn.’ Jesu sọ yigbe dọ emi na wá.

Dile yé to yìyì, gbẹtọ lẹ to yede sisẹ́ nado sẹpọ Jesu. To ajiji mẹ, Jesu nọte. E kanse dọmọ: ‘Mẹnu wẹ doalọ go e?’ Jesu mọdọ huhlọn tọ́n sọn emi go, enẹ wẹ zọ́n bọ e do yọnẹn dọ mẹde doalọ emi go. Ṣigba mẹnu wẹ? Nawe de he to awutu sinsinyẹn de jẹ sọn owhe 12 die wẹ. E wá bo doalọ awù Jesu tọn go, bosọ jẹgangan!

Ehe hẹn ayiha Jailu tọn jai, na e mọ lehe e bọawuna Jesu nado hẹnazọ̀ngbọna mẹde do. Ṣigba to whelọnu wẹ wẹnsagun de wá. E sọ dọna Jailu dọmọ: ‘A sọ dotukla Jesu blo. Na viyọnnu towe ko kú.’ Ṣigba Jesu gblató nuhe yin didọ lọ bo dọna Jailu dọmọ: ‘A dibu blo, e na jẹgangan.’

Whenuena yé jẹ owhé Jailu tọn gbè, gbẹtọ lẹ to avivi po awubla daho po. Jesu sọ dọmọ: ‘Mì viavi blo. Viyọnnu lọ ma kú, amlọndọ wẹ e te.’ Ṣigba, yé jẹ ṣinṣàn ẹn kò ji, na yé yọnẹn dọ viyọnnu lọ ko kú.

Jesu plan otọ́ viyọnnu lọ tọn po onọ̀ etọn po gọna atọ̀n to devi etọn lẹ mẹ yì ohọ̀ he mẹ viyọnnu lọ yin zize mlọnai do. E hẹn alọ etọn go bo dọmọ: ‘Fọ́n!’ Viyọnnu lọ sọ gọwá ogbẹ̀ dile hiẹ sọgan mọ do tofi. E sọ fọ́n bo jẹ zọnlinzin ji! Nuhe zọ́n bọ onọ̀ etọn po otọ́ etọn po do gọ́ na ayajẹ sọmọ niyẹn.

Ehe ma yin omẹ tintan he Jesu fọnsọnku gba. Omẹ tintan he go Biblu dọho gando wẹ visunnu asuṣiọsi de tọn he nọ nọ̀ tòdaho Naini tọn mẹ. To enẹgodo, Jesu sọ fọ́n Lazalọsi, nọvisunnu Malia po Malta po tọn sọnku. To whenue Jesu na jẹ gandu ji taidi ahọlu dide Jiwheyẹwhe tọn, ewọ na hẹn gbẹtọ susu he ko kú lẹ gọwá ogbẹ̀. Be enẹ ma hẹn homẹ mítọn hùn ya?

Luku 8:40-56; 7:11-17; Johanu 11:17-44.



Kanbiọ lẹ

  • Mẹnu wẹ otọ́ viyọnnu he tin to yẹdide lọ mẹ tọn, podọ naegbọn ayiha ewọ po asi etọn po tọn ma jai?
  • Etẹwẹ Jailu wà to whenuena e mọ Jesu?
  • Etẹwẹ jọ to whenuena Jesu jei owhé Jailu tọn gbè, podọ owẹ̀n tẹwẹ Jailu sè to aliji?
  • Naegbọn mẹhe tin to owhé Jailu tọn gbè lẹ do kò Jesu?
  • To whenuena Jesu hẹn apọsteli etọn atọ̀n gọna otọ́ po onọ̀ viyọnnu lọ tọn po biọ abò viyọnnu lọ tọn mẹ godo, etẹwẹ e wà?
  • Mẹdevo tẹlẹ wẹ Jesu sọ fọnsọnku, podọ etẹwẹ ehe dohia?

Kanbiọ devo lẹ

  • Hia Luku 8:40-56.

    Nawẹ Jesu do awuvẹmẹ po lẹnpọn dagbe po hia yọnnu he to ohùn di lọ gbọn, podọ etẹwẹ Klistiani mẹho agun tọn lẹ sọgan plọn sọn ehe mẹ to egbehe? (Luku 8:43, 44, 47, 48; Lev. 15:25-27; Mat. 9:12, 13; Kọl. 3:12-14)

  • Hia Luku 7:11-17.

    Naegbọn mẹhe hẹn mẹvivẹ yetọn bu to okú mẹ lẹ sọgan mọ homẹmiọnnamẹ daho yí sọn gblọndo he Jesu na asuṣiọsi Naini tọn lọ mẹ? (Luku 7:13; 2 Kọl. 1:3, 4; Heb. 4:15)

  • Hia Johanu 11:17-44.

    Nawẹ Jesu dohia dọ jọwamọnu wẹ e yin nado blawu na okú mẹvivẹ de tọn gbọn? (Joh. 11:33-36, 38; 2 Sam. 18:33; 19:1-4)

Plọnnu Dogọ

Viyọnnu Pẹvi de Gọwá Ogbẹ̀!

Gbẹtọ lẹ jẹ Jesu ṣanko ji to whenue e dọ dọ viyọnnu he ko kú lọ to amlọndọ poun wẹ. Etẹwẹ ewọ yọnẹn bọ yewlẹ ma yọnẹn?

Jesu Fọ́n Visunnu Asuṣiọsi de Tọn Sọnku

Mẹhe mọ azọ́njiawu ehe lẹ mọnukunnujẹ zẹẹmẹ nujọnu tọn etọn mẹ.

Lazalọsi Yin Finfọnsọnku

Adà tangan awe delẹ to nujijọ ehe mẹ zọ́n bọ nukundiọsọmẹtọ Jesu tọn lẹ lọsu ma gán jẹagọdo azọ́njiawu lọ.