Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 91: Jesu Plọnmẹ to Osó de Ji

Otàn 91: Jesu Plọnmẹ to Osó de Ji

PỌ́N Jesu to aisinsin tofi. E to omẹ ehe lẹpo plọn to osó de ji to Galili. Mẹhe sinai sẹpọ ẹ lẹ wẹ devi etọn lẹ. E de yé omẹ 12 nado yin apọsteli etọn lẹ. Apọsteli lẹ wẹ devi vonọtaun Jesu tọn lẹ. Be a yọ́n yinkọ yetọn lẹ ya?

Jesu to mẹplọn

Simọni Pita po Andle nọvisunnu etọn po tin to yé mẹ. Enẹgodo, Jakọbu po Johanu po he yin nọvi-nọvi lẹ. Apọsteli devo sọ nọ yin Jakọbu bọ mẹdevo sọ nọ yin yiylọdọ Simọni. Apọsteli awe to yé mẹ nọ yin Juda. Mẹdopo nọ yin Juda Iskaliọti, podọ omẹ awetọ wẹ Juda he sọ nọ yin yiylọdọ Tade. Filippi, Natanaeli (he sọ nọ yin Batelemi), Matiu po Tọmasi po lọsu tin to yé mẹ.

To whenue Jesu lẹkọ sọn Samalia, e bẹ yẹwhehodidọ etọn jẹeji dọmọ: ‘Ahọluduta olọn tọn ko sẹpọ.’ Be hiẹ yọ́n nuhe ahọluduta lọ yin ya? Gandudu nujọnu tọn Jiwheyẹwhe tọn wẹ? Jesu wẹ yin ahọlu etọn. E na duahọlu sọn olọn mẹ wá bosọ hẹn jijọho wá aigba ji. Aigba blebu na yin hinhẹn zun paladisi whanpẹnọ de gbọn ahọluduta Jiwheyẹwhe tọn dali.

Jesu to mẹplọn tofi gando ahọluduta lọ go. E basi zẹẹmẹ dọmọ: ‘Lehe mì na nọ hodẹ̀ do die: Otọ́ mítọn he tin to olọn mẹ, na oyín towe ni yin kinklandowiwe. Na ahọluduta towe ni wá. Na ojlo towe ni yin wiwà to aigba ji, dile e te to olọn mẹ.’ Mẹsusu nọ ylọ odẹ̀ ehe dọ ‘Odẹ̀ Oklunọ tọn.’ Mẹdevo lẹ nọ ylọ ẹ dọ ‘Otọ́ Mítọn.’ Be a sọgan flin hogbe odẹ̀ lọ tọn lẹpo ya?

Jesu sọ to gbẹtọ lẹ plọn gando lehe yé dona nọ yinuwa hẹ ode awetọ do go. E dọna yé dọmọ: ‘Nuhe mì jlo dọ mẹdevo lẹ ni nọ wà na mì wẹ mì na nọ wà na yé.’ Be homẹ ma nọ hùn we to whenue mẹdevo lẹ yinuwa hẹ we po homẹdagbe po ya? Enẹwutu, Jesu to didọ dọ mí dona nọ yinuwa hẹ mẹdevo lẹ po homẹdagbe po. Be e ma na yin ayajẹnu daho de to paladisi aigba ji tọn mẹ to whenue gbẹtọ lẹpo na wà ehe ya?

Matiu weta 5 jẹ 7; 10:1-4.



Kanbiọ lẹ

  • To yẹdide lọ mẹ, fie wẹ Jesu to mẹplọn te, podọ mẹnu lẹ wẹ sinai sẹpọ ẹ hugan?
  • Etẹwẹ yin yinkọ apọsteli 12 lẹ tọn?
  • Ahọluduta tẹwẹ Jesu to yẹwheho etọn dọ?
  • Etẹwẹ Jesu plọn gbẹtọ lẹ nado nọ hodẹ̀ na?
  • Etẹwẹ Jesu dọ gando aliho he mẹ gbẹtọ lẹ dona nọ yinuwa hẹ ode awetọ te go?

Kanbiọ devo lẹ

  • Hia Matiu 5:1-12.

    Aliho tẹlẹ mẹ wẹ mí sọgan dohia te dọ nuhudo gbigbọmẹ tọn mítọn lẹ nọ duahunmẹna mí? (Mat. 5:3; Lom. 10:13-15; 1 Tim. 4:13, 15, 16)

  • Hia Matiu 5:21-26.

    Nawẹ Matiu 5:23, 24 zinnudeji dọ haṣinṣan mítọn hẹ mẹmẹsunnu mítọn lẹ nọ yinuwado haṣinṣan mítọn hẹ Jehovah ji gbọn? (Mat. 6:14, 15; Ps. 133:1; Kọl. 3:13; 1 Joh. 4:20)

  • Hia Matiu 6:1-8.

    Etẹwẹ yin delẹ to aliho dodonọ jijlá tọn he Klistiani lẹ dona dapana lẹ mẹ? (Luku 18:11, 12; 1 Kọl. 4:6, 7; 2 Kọl. 9:7)

  • Hia Matiu 6:25-34.

    Etẹwẹ Jesu plọnmẹ dogbọn nuhewutu mí dona dejido Jehovah go na nuhudo agbasa tọn mítọn lẹ dali? (Eks. 16:4; Ps. 37:25; Flp. 4:6)

  • Hia Matiu 7:1-11.

    Etẹwẹ apajlẹ ojlofọndotenamẹ tọn he tin to Matiu 7:5 mẹ lọ plọn mí? (Howh. 26:12; Lom. 2:1; 14:10; Jak. 4:11, 12)

Plọnnu Dogọ

JESU—ALIHO LỌ, NUGBO LỌ PO OGBẸ̀ PO

Yẹwhehodidọ Osó ji Tọn Ayidego Tọn Lọ

Mọ zẹẹmẹ nuagokun hodidọ Jesu tọn lẹ tọn.