Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 90: Jesu po Yọnnu de po to Dotọ̀ Tó

Otàn 90: Jesu po Yọnnu de po to Dotọ̀ Tó

JESU nọte nado gbọjẹ to dotọ̀ de tó to Samalia. Devi etọn lẹ ko yì tòhomẹ nado họ̀ núdùdù. Nawe he Jesu to hodọ hẹ lọ wá nado dà osin. E dọna ẹn dọmọ: ‘Na mi sìnnùnù.’

Jesu to hodọna yọnnu Samalianu de

Ehe paṣa nawe lọ taun. Be a yọ́n nuhewutu wẹ ya? Na Ju de wẹ Jesu, bọ nawe lọ yin Samalianu de wutu. Podọ susu Ju lẹ tọn ma yiwanna Samalianu lẹ. Yé ma tlẹ nọ dọho hẹ yé! Ṣigba, Jesu yiwanna gbẹtọ wunmẹ lẹpo. Enẹwutu, e dọmọ: ‘Eyin hiẹ ko yọ́n mẹhe to sìnnùnù biọ we, hiẹ na ko biọ ẹ, bọ ewọ nasọ na we osin ogbẹ̀ tọn.’

Nawe lọ dọna ẹn dọmọ: ‘Mẹdaho, dotọ̀ lọ siso, podọ hiẹ masọ tindo sindànu de. Fie wẹ hiẹ na mọ osin ogbẹ̀ tọn ehe sọn?’

Jesu basi zẹẹmẹ dọ: ‘Eyin hiẹ nùsin sọn dotọ̀ ehe mẹ, ovẹ́ nasọ hú we. Ṣigba osin he yẹn na namẹ sọgan hẹn mẹde dogbẹ̀ kakadoi.’

Nawe lọ sọ dọmọ: ‘Mẹdaho, na mi osin ehe! Na ovẹ́ ni masọ hú mi ba blo. Whenẹnu, yẹn ma nasọ wáfi nado wá dà osin.’

Nawe lọ lẹndọ osin nujọnu tọn hodọ wẹ Jesu te. Ṣigba, nugbo he gando Jiwheyẹwhe po ahọluduta etọn po go hodọ wẹ e te. Nugbo ehe taidi osin ogbẹ̀ tọn. E sọgan na mẹde ogbẹ̀ madopodo.

Jesu wá dọna nawe lọ todin dọmọ: ‘Yì ylọ asu towe na mì ni wáfi.’

Ewọ sọ dọna ẹn dọmọ: ‘Yẹn ma tindo asu de.’

Jesu sọ dọna ẹn dọmọ: ‘Hójọhó wẹ a dọ. Na hiẹ ko dà asu atọ́n, podọ sunnu he po hiẹ po topọ todin ma yin asu towe.’

E paṣa nawe lọ taun, na nuhe e dọ lẹpo wẹ yin nugbo. Nawẹ Jesu wagbọn do yọ́n onú ehelẹ? Na Jesu wẹ yin Mẹhe yè Dopagbe etọn lọ he Jiwheyẹwhe dohlan, podọ Jiwheyẹwhe wẹ na ẹn nudọnamẹ ehe. To ojlẹ enẹ mẹ, devi Jesu tọn lẹ ko wá, podọ e sọ paṣa yé dọ ewọ to hodọ hẹ nawe Samalianu de.

Etẹwẹ mí plọn sọn ehe lẹpo mẹ? E dohia dọ Jesu yin homẹdagbenọ hlan gbẹtọ akọta lẹpo tọn. E jẹ dọ mílọsu lẹ ni nọ wàmọ ga. Mí ma dona nọ lẹndọ mẹdelẹ ylan na yé wá sọn akọta devo mẹ wutu gba. Jesu jlo dọ gbẹtọ lẹpo ni yọ́n nugbo he nọ planmẹ yì ogbẹ̀ madopodo mẹ lọ. Mílọsu dona gọalọna gbẹtọ lẹ nado plọn nugbo lọ.

Johanu 4:5-43; 17:3.



Kanbiọ lẹ

  • Naegbọn Jesu do nọte to dotọ̀ de tó to Samalia, podọ etẹwẹ e to didọna yọnnu de to finẹ?
  • Naegbọn e do paṣa yọnnu lọ, etẹwẹ Jesu dona ẹn, podọ etẹwutu?
  • Osin wunmẹ tẹ ji wẹ yọnnu lọ lẹndọ Jesu to hodọdo, ṣigba osin tẹ hodọ wẹ Jesu te taun?
  • Naegbọn awuji yọnnu lọ dogbọn nuhe Jesu yọnẹn gando e go lẹ dali, podọ fiẹ wẹ Jesu mọ nudọnamẹ ehelẹ sọn?
  • Nuplọnmẹ tẹwẹ mí sọgan mọyi sọn kandai yọnnu he tin to dotọ̀ tó lọ tọn mẹ?

Kanbiọ devo lẹ

  • Hia Johanu 4:5-43.

    To apajlẹ Jesu tọn hihodo mẹ, nawẹ mí dona nọ yinuwa hẹ mẹhe sinmẹ agbasa tọn kavi akọ̀ yetọn gbọnvo na mítọn lẹ gbọn? (Joh. 4:9; 1 Kọl. 9:22; 1 Tim. 2:3, 4; Titu 2:11)

    Ale gbigbọmẹ tọn tẹlẹ wẹ mẹhe lẹzun devi Jesu tọn de nọ mọyi? (Joh. 4:14; Isa. 58:11; 2 Kọl. 4:16)

    Nawẹ mí sọgan do pinpẹn-nutọn-yinyọnẹn hia taidi yọnnu Samalianu lọ, he to jejeji nado dọ nuhe e ko plọn lẹ na mẹdevo lẹ gbọn? (Joh. 4:7, 28; Mat. 6:33; Luku 10:40-42)

Plọnnu Dogọ

E Plọnnu Yọnnu Samalianu De

Jesu dọ nude na ẹn he e ma ko dọna mẹdevo de pọ́n.