Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 89: Jesu Klọ́ Tẹmpli lọ Wé

Otàn 89: Jesu Klọ́ Tẹmpli lọ Wé

JESU gblehomẹ tlala tofi, kavi e ma yin mọ wẹ? Be a yọ́n nuhewutu e do gblehomẹ sọmọ ya? Nuhe zọ́n lọ wẹ yindọ dawe he tin to tẹmpli Jiwheyẹwhe tọn mẹ to Jelusalẹm ehelẹ yin nukunkẹnnọ taun. Yé to tintẹnpọn nado duale susu to mẹhe nọ wá basi sinsẹ̀n hlan Jiwheyẹwhe to finẹ lẹ ji.

Jesu takitina tafo akuẹdiọtọ lẹ tọn

Be hiẹ mọ oyìn pẹvipẹvi lẹ, lẹngbọ po apoe lẹ po ya? Dawe lọ lẹ to kanlin ehelẹ sà to tẹmpli lọ mẹ. Be hiẹ yọ́n nuhewutu wẹ ya? Nuhe zọ́n lọ wẹ yindọ Islaelivi lẹ nọ tindo nuhudo kanlin po ohẹ̀ lẹ po tọn nado sanvọ́ hlan Jiwheyẹwhe.

Osẹ́n Jiwheyẹwhe tọn dọ dọ eyin Islaelivi de waylando, ewọ dona sanvọ́ hlan Jiwheyẹwhe. Ojlẹ devo lẹ sọ tin ga he mẹ Islaelivi lẹ dona nọ sanvọ́ hlan Jiwheyẹwhe te. Ṣigba, fie wẹ Islaelivi de sọgan mọ ohẹ̀ po kanlin lẹ po te nado sanvọ́ hlan Jiwheyẹwhe?

Islaelivi delẹ tindo ohẹ̀ po kanlin lẹ po. Enẹwutu, yé sọgan yí ehelẹ do sanvọ́. Ṣigba, susu Islaelivi lẹ tọn wẹ ma tindo kanlin kavi ohẹ̀ depope. Podọ mẹdevo lẹ nọ nọ̀ fihe dẹn do Jelusalẹm bo ma sọgan hẹn dopo to kanlin yetọn lẹ mẹ wá tẹmpli lọ mẹ. Enẹwutu, gbẹtọ lẹ nọ wá họ̀ kanlin kavi ohẹ̀ he yé tindo nuhudo etọn lẹ tofi. Ṣigba, dawe ehelẹ nọ sà yé akuẹ vivẹ na gbẹtọ lẹ. Yé to gbẹtọ lẹ tafu. Gbọnvona enẹ, yé ma dona nọ sanu to tẹmpli Jiwheyẹwhe tọn mẹ.

Ehe lọ wẹ hẹn homẹgble Jesu. Enẹwutu, e takitina tafo dawe lọ lẹ tọn bo bẹ akuẹ yetọn lẹ kọnyingbe. E sọ yí okàn tlẹ́lẹ de do basi obá bosọ yàn kanlin lẹpo tọ́n sọn tẹmpli lọ mẹ. E degbena dawe he to apoe sà lẹ dọmọ: ‘Mì bẹ yé sọn fi! Mì sọ yí ohọ̀ Otọ́ ṣie tọn do basi nusatẹn nado bẹ akuẹ susu pli blo.’

Delẹ to hodotọ Jesu tọn lẹ mẹ tin po e po to tẹmpli lọ mẹ to Jelusalẹm. Nuhe wà Jesu te lọ paṣa yé. To whelọnu wẹ yé flin fihe Biblu dọho gando Ovi Jiwheyẹwhe tọn go te dọmọ: ‘Owanyina ohọ̀ Jiwheyẹwhe tọn na to jiji to ohò etọn mẹ di miyọ́n.’

To whenue Jesu tin tofi to Jelusalẹm na hùnwhẹ Juwayi tọn, e wà azọ́njiawu susu. Enẹgodo, Jesu tọ́n sọn Jude bo jẹ gbejizọnlin etọn ji nado lẹkọyi Galili. Ṣigba, to kọlilẹ etọn whenu, e gbọn agbegbe Samalia tọn mẹ. Gbọ mí ni pọ́n nuhe jọ to finẹ.

Johanu 2:13-25; 4:3, 4.



Kanbiọ lẹ

  • Naegbọn kanlin lẹ to yinyin sisà to tẹmpli mẹ?
  • Etẹwẹ hẹn homẹgble Jesu?
  • Dile hiẹ sọgan mọ do to yẹdide lọ mẹ, etẹwẹ Jesu wà, podọ gbedide tẹwẹ e na mẹhe to apoe sà lẹ?
  • Etẹwẹ hodotọ Jesu tọn lẹ flin to whenuena yé mọ nuhe e to wiwà?
  • Agbegbe tẹ mẹ wẹ Jesu jugbọn to whenuena e lẹkọ jei Galili?

Kanbiọ devo

  • Hia Johanu 2:13-25.

    Eyin mí lẹnnupọndo homẹgble he Jesu dohia na akuẹdiọtọ tẹmpli mẹ tọn lẹ wutu ji, pọndohlan he sọgbe tẹwẹ mí dona tindo gando nuwiwa ajọwiwa tọn lẹ to Plitẹnhọ Ahọluduta tọn mẹ go? (Joh. 2:15, 16; 1 Kọl. 10:24, 31-33)

Plọnnu Dogọ

Jesu Do Zohunhun Hia Na Sinsẹ̀n-Bibasi Nugbo

To whenuena e yindọ Osẹ́n Jiwheyẹwhe tọn kẹalọyi dọ gbẹtọ lẹ ni họ̀ kanlin lẹ to Jelusalẹm nado sanvọ́, naegbọn Jesu do gblehomẹ do ajọwatọ lẹ go to tẹmpli mẹ?