Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 88: Johanu Baptizi Jesu

Otàn 88: Johanu Baptizi Jesu

PỌ́N apoe he to tejẹ do ota dawe ehe tọn. Jesu wẹ dawe lọ. E tindo owhe 30 nkọ todin. Podọ dawe he tin po e po lọ wẹ Johanu. Mí ko plọnnu wayi gando ewọ go. Be hiẹ flin whenue Malia yì dla hẹnnumẹ etọn Elizabẹti pọ́n bọ viyẹyẹ he tin to ohò etọn mẹ lọ whàngo po ayajẹ po ya? Viyẹyẹ he yè ma ko ji enẹ wẹ Johanu. Ṣigba, etẹ wà wẹ Johanu po Jesu po te todin?

Baptẹm Jesu tọn

Johanu ṣẹṣẹ ylọn Jesu do Tọ̀sisa Jọdani mẹ. Lehe mẹde nọ yin bibaptizi do niyẹn. Jẹnukọn whẹ́ yè nọ ylọn mẹlọ do osin mẹ, podọ enẹgodo yè nọ gọ̀ ẹ wá aga. Na nuhe Johanu nọ wà na gbẹtọ lẹ niyẹn wutu, yè nọ ylọ ẹ dọ Johanu Baptizitọ. Ṣigba naegbọn Johanu do baptizi Jesu?

Johanu wàmọ na Jesu lọsu wẹ wá dọna ẹn dọ ni baptizi emi wutu. Johanu nọ baptizi mẹhe jlo na dohia dọ nuylankan he yé ko wà wayi lẹ vẹna yé lẹ. Ṣigba, be Jesu wà nuylankan de pọ́n gbede he wá vẹna ẹn ya? Lala, Jesu ma wàmọ pọ́n gbede, na Ovi Jiwheyẹwhe lọsu tọn he wá sọn olọn mẹ wẹ e yin. Enẹwutu, whẹwhinwhẹ́n devo wutu wẹ e dọna Johanu nado baptizi i. Gbọ mí ni pọ́n whẹwhinwhẹ́n he wutu wẹ.

Whẹpo Jesu do wá Johanu dè tofi, whlẹpatọ de wẹ ewọ yin. Whlẹpatọ de yin mẹhe nọ yí atin do basi onú susu lẹ taidi tafo, oján po aisinnu devo lẹ po. Whlẹpatọ de wẹ Josẹfu asu Malia tọn, podọ ewọ plọn Jesu nado lẹzun whlẹpatọ de ga. Ṣigba, Jehovah ma do Ovi etọn hlan aigba ji nado yin whlẹpatọ de gba. Ewọ tindo azọ́n vonọtaun de na ẹn nado wà, podọ ojlẹ ko sọ̀ na Jesu nado bẹ azọ́n lọ jẹeji. Enẹwutu, nado dohia dọ emi ko wá todin nado wà ojlo Otọ́ emitọn tọn wẹ zọ́n bọ Jesu do biọ to Johanu si nado baptizi i. Be ehe hẹn homẹ Jiwheyẹwhe tọn hùn ya?

Gbau, na to whenue Jesu tọ́n sọn osin lọ mẹ godo, ogbè de wá sọn olọn mẹ bo dọmọ: ‘Ehe wẹ Visunnu ṣie, mẹhe mẹ homẹ ṣie vivi te tlala.’ Mọdopolọ, e taidi dọ olọn lẹ hùndonuvo bọ apoe ehe sọ jẹte do ota na Jesu. Ṣigba, e ma yin apoe nujọnu tọn de gba. Awusọhia etọn poun wẹ di apoe. Na nugbo tọn, gbigbọ wiwe Jiwheyẹwhe tọn wẹ.

Todin, Jesu dona lẹnnupọndo nususu ji, enẹwutu, e yì fihe e sọgan nọ ewọ ṣokẹdẹ na azán 40. Finẹ wẹ Satani wá e dè te. Whla atọ̀n wẹ Satani tẹnpọn nado hẹn Jesu nado wà nuhe jẹagọdo osẹ́n Jiwheyẹwhe tọn lẹ. Ṣigba, Jesu ma wàmọ.

To enẹgodo, Jesu lẹkọ bo wá pé sunnu delẹ he lẹzun hodotọ kavi devi etọn tintan lẹ. Yinkọ delẹ tọn to yé mẹ wẹ Andle, Pita (he sọ nọ yin Simọni), Filippi po Natanaeli (he sọ nọ yin Batelemi) po. Jesu po devi yọyọ ehelẹ po yì agbegbe Galili tọn ji. To Galili, yé nọte to Kana otò Natanaeli tọn mẹ. To finẹ, Jesu yì hùnwhẹ alọwle tọn daho de bosọ wà azọ́njiawu etọn tintan. Be hiẹ yọ́n nuhe e wà lọ ya? E diọ osin zun vẹnhàn.

Matiu 3:13-17; 4:1-11; 13:55; Malku 6:3; Johanu 1:29-51; 2:1-12.



Kanbiọ lẹ

  • Mẹnu wẹ sunnu awe he tin to yẹdide lọ mẹ lẹ?
  • Nawẹ mẹde nọ yin bibaptizi gbọn?
  • Gbẹtọ nankọ lẹ wẹ Johanu nọ baptizi?
  • Whẹwhinwhẹ́n vonọtaun tẹ wutu wẹ Jesu biọ to Johanu si nado baptizi i?
  • Nawẹ Jiwheyẹwhe dohia gbọn dọ homẹ Emitọn hùn gando baptẹm Jesu tọn go?
  • Etẹwẹ jọ to whenuena Jesu yì nọtẹn ṣokẹdẹninọ tọn de na azán 40?
  • Dọ mẹdelẹ to hodotọ kavi devi Jesu tọn tintan lẹ mẹ, podọ etẹwẹ yin azọ́njiawu tintan he e wà?

Kanbiọ devo lẹ

  • Hia Matiu 3:13-17.

    Apajlẹ tẹwẹ Jesu zedai na baptẹm devi etọn lẹ tọn? (Ps. 40:7, 8; Mat. 28:19, 20; Luku 3:21, 22)

  • Hia Matiu 4:1-11.

    Nawẹ aliho he mẹ Jesu yí Owe-wiwe zan po azọ́nyinyọnẹn po te na mí tuli nado nọ plọn Biblu to gbesisọ mẹ gbọn? (Mat. 4:5-7; 2 Pita 3:17, 18; 1 Joh. 4:1)

  • Hia Johanu 1:29-51.

    Mẹnu dè wẹ Johanu Baptizitọ lọ deanana devi etọn lẹ hlan, podọ nawẹ mí sọgan hodo apajlẹ etọn gbọn to egbehe? (Joh. 1:29, 35, 36; 3:30; Mat. 23:10)

  • Hia Johanu 2:1-12.

    Nawẹ azọ́njiawu Jesu tọn tintan lọ dohia dọ Jehovah ma nọ tẹ̀ onú dagbe depope devizọnwatọ Etọn lẹ gbọn? (Joh. 2:9, 10; Ps. 84:11; Jak. 1:17)

Plọnnu Dogọ

Johanu Baptizitọ lọ Jla Aliho lọ Do

To whenue Falesi po Sadusi delẹ po wá Johanu dè, e gblewhẹdo yé. Etẹwutu?

Jesu Wà Azọ́njiawu Etọn Tintan

Jesu dohia onọ̀ etọn dọ Otọ́ olọn mẹ tọn emitọn wẹ to anadena emi todin, e ma yin ewọ gba.