Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 87: Jọja Jesu to Tẹmpli Mẹ

Otàn 87: Jọja Jesu to Tẹmpli Mẹ

PỌ́N visunnu jọja he to hodọna sunnu mẹho ehelẹ. Mẹplọntọ lẹ wẹ yé yin to tẹmpli Jiwheyẹwhe tọn mẹ to Jelusalẹm. Jesu wẹ visunnu lọ. E ko whẹ́n pẹẹde todin bo tindo owhe 12.

E paṣa mẹplọntọ lọ lẹ tlala dọ Jesu yọ́n nususu gando Jiwheyẹwhe po nuhe yin kinkando Biblu mẹ lẹ po go. Ṣigba, naegbọn Josẹfu po Malia po ma tin tofi po e po? Fie wẹ yé te? Gbọ mí ni pọ́n.

Jọja Jesu to hodọna mẹplọntọ lẹ

To whemẹwhemẹ, Josẹfu nọ plan whẹndo etọn yì Jelusalẹm na hùnwhẹ titengbe de he nọ yin yiylọdọ Juwayi. Gbejizọnlin gaa de wẹ e nọ yin nado tọ́n sọn Nazalẹti yì Jelusalẹm. Mẹdepope ma tindo mọto, mọjanwẹ pinpán ma tin do niyẹn. Onú mọnkọtọn depope ma tin to azán enẹlẹ gbè. Suhugan gbẹtọ lẹ tọn wẹ nọ zọ̀nafọ podọ e nọ yí azán atọ̀n nkọ to yé si nado jẹ Jelusalẹm.

Todin, Josẹfu ko tindo whẹndo daho de. Enẹwutu, yé dona penukundo nọvisunnu po nọviyọnnu Jesu tọn lẹ po go. To owhe ehe mẹ, Josẹfu po Malia po gọna ovi yetọn lẹ lẹkọ ja owhé yetọn gbè to Nazalẹti. Yé lẹndọ Jesu hodo mẹdevo lẹ to gbejizọnlin gaa lọ whenu. Ṣigba, whenuena yé nọte to vivọnu azán lọ tọn gbè, yé ma mọ Jesu. Yé dín in to hẹnnumẹ po họntọn lẹ po ṣẹnṣẹn, ṣigba e ma tin to yé dè! Enẹwutu, yé lẹkọyi Jelusalẹm nado yì dín in.

To godo mẹ, yé wá mọ Jesu tofi po mẹplọntọ lẹ po. E to todoaina yé bosọ to kanbiọ lẹ kanse. Avò vò gbẹtọ lẹ nado mọ lehe Jesu tindo nuyọnẹn do sọ. Ṣigba, Malia dọmọ: ‘Ovi, naegbọn hiẹ do yinuwa hẹ mí dole? Otọ́ towe po yẹn po ko jẹtukla susu nado dín we.’

Jesu sọ gblọn dọmọ: ‘Naegbọn mìwlẹ do to dindin mi? Mì ma yọnẹn dọ yẹn dona tin to ohọ̀ Otọ́ ṣie tọn mẹ wẹ ya?’

Mọwẹ, Jesu yiwanna nado nọ nọ̀ fihe ewọ sọgan plọnnu gando Jiwheyẹwhe go te. Be e ma yin numọtolanmẹ dopolọ wẹ mílọsu dona nọ tindo ya? To otò etọn mẹ to Nazalẹti, Jesu nọ yì opli lẹ na sinsẹ̀n-bibasi to osẹ lẹpo mẹ. Na ewọ nọ dotoai to whepoponu wutu, e plọn nususu sọn Biblu mẹ. Mì gbọ mí ni taidi Jesu bosọ hodo apajlẹ etọn.

Luku 2:41-52; Matiu 13:53-56.



Kanbiọ lẹ

  • Owhe nẹmu wẹ Jesu tindo to yẹdide lọ mẹ, podọ fie wẹ e tin te?
  • Etẹwẹ Josẹfu nọ wà po whẹndo etọn po to whemẹwhemẹ?
  • Naegbọn Josẹfu po Malia po lẹkọyi Jelusalẹm to gbejizọnlin azán dopo tọn lọ godo?
  • Fie wẹ Josẹfu po Malia po mọ Jesu te, podọ naegbọn avò vò mẹhe tin to finẹ lẹ?
  • Etẹwẹ Jesu dọna Malia, onọ̀ etọn?
  • Nawẹ mí sọgan hodo apajlẹ Jesu tọn gbọn na nuhe dù nupinplọn gando Jiwheyẹwhe go?

Kanbiọ devo lẹ

  • Hia Luku 2:41-52.

    Dile etlẹ yindọ sunnu lẹ kẹdẹ si wẹ Osẹ́n Mose tọn biọ te nado nọ yì hùnwhẹ whemẹwhemẹ tọn lẹ tẹnmẹ, apajlẹ dagbe tẹwẹ Josẹfu po Malia po zedai na mẹjitọ lẹ to egbehe? (Luku 2:41; Deut. 16:16; 31:12; Howh. 22:6)

    Nawẹ Jesu ze apajlẹ dagbe dai na jọja lẹ gando lehe yé sọgan yin tonusetọ na mẹjitọ yetọn lẹ do go gbọn to egbehe? (Luku 2:51; Deut. 5:16; Howh. 23:22; Kọl. 3:20)

  • Hia Matiu 13:53-56.

    Nọvisunnu Jesu tọn ẹnẹ tẹlẹ wẹ yinkọ yetọn yin sislẹ to Biblu mẹ, podọ nawẹ awe to yé mẹ wá yin yiyizan to agun Klistiani tọn mẹ to godo mẹ gbọn? (Mat. 13:55; Owalọ 12:17; 15:6, 13; 21:18; Gal. 1:19; Jak. 1:1; Juda 1)