Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 86: Sunwhlẹvu de Deanana Dawe lọ Lẹ

Otàn 86: Sunwhlẹvu de Deanana Dawe lọ Lẹ
Sunwhlẹvu-pọntọ lẹ

BE HIẸ mọ sunwhlẹvu he to sisẹ́ he dopo to dawe ehelẹ mẹ to alọdlẹndo lọ ya? Whenuena yé tọ́n sọn Jelusalẹm wẹ sunwhlẹvu lọ sọawuhia. Dawe ehelẹ wá sọn Whèzẹtẹn, bo nọ plọnnu gando sunwhlẹvu lẹ go. Yé yise dọ sunwhlẹvu yọyọ ehe to anadena yé yì omẹ titengbe de dè.

To whenue dawe lọ lẹ jẹ Jelusalẹm, yé kanse dọmọ: ‘Fie wẹ ovi he na wá yin ahọlu Ju lẹ tọn lọ te?’ “Ju” wẹ yinkọ devo Islaelivi lẹ tọn. Dawe lọ lẹ dọmọ: ‘Mí mọ sunwhlẹvu ovi lọ tọn to whenuena mí tin to Whèzẹtẹn, podọ míwlẹ sọ wá nado litaina ẹn.’

To whenue Hẹlọdi, mẹhe yin ahọlu to Jelusalẹm sè ehe, e biọ bẹwlu mẹ. Ewọ ma jlo dọ ahọlu devo ni yí otẹn etọn gba. Enẹwutu, Hẹlọdi ylọ yẹwhenọgán lẹ bo kanse yé dọmọ: ‘Fitẹ wẹ ahọlu he yè dopagbe etọn lọ na yin jiji te?’ Yé gblọn dọmọ: ‘Biblu dọ dọ Bẹtlẹhẹm wẹ.’

Hẹlọdi sọ ylọ dawe he tọ́n sọn Whèzẹtẹn lọ lẹ bo dọna yé dọmọ: ‘Mì yì dindona fihe visunnu lọ tin te. Podọ to whenuena mì mọ ẹn, mì dike ma sè. Yẹnlọsu na yì litaina ẹn ga.’ Ṣigba, na nugbo tọn, Hẹlọdi jlo na hù visunnu lọ wẹ!

To whenẹnu, sunwhlẹvu lọ jẹnukọnna dawe lọ lẹ yì Bẹtlẹhẹm bosọ nọte to fihe ovi lọ te. Whenuena dawe lọ lẹ biọ ohọ̀ lọ mẹ, yé mọ Malia po ovi pẹvi lọ, Jesu po. Yé de nunina lẹ tọ́n bo na Jesu. Ṣigba, ojlẹ vude to ehe godo, Jehovah gbẹnuna dawe lọ lẹ to odlọ mẹ ma nado lẹkọyi Hẹlọdi dè. Enẹwutu, yé gbọn aliho devo do lẹkọyi otò yetọn mẹ.

Whenuena Hẹlọdi sè dọ dawe he wá sọn Whèzẹtẹn lọ lẹ ko lẹkọyi owhé yetọn gbè, e gblehomẹ taun. Enẹwutu, e degbè dọ visunnu he tindo owhe awe kavi whè humọ to Bẹtlẹhẹm lẹpo ni yin hùhù. Ṣigba, Jehovah na avase Josẹfu jẹnukọn to odlọ de mẹ, podọ Josẹfu tọ́n sọn finẹ po whẹndo etọn po yì Egipti. To godo mẹ, whenuena Josẹfu sè dọ Hẹlọdi ko kú, e hẹn Malia po Jesu po lẹkọwa whégbè to Nazalẹti. Finẹ wẹ yé pọ́n Jesu go whẹ́n te.

Mẹnu wẹ hiẹ lẹndọ e hẹn sunwhlẹvu lọ nado sẹ́? Flindọ dawe lọ lẹ yì Jelusalẹm whẹ́ to whenue yé mọ sunwhlẹvu lọ godo. Satani Lẹgba wẹ jlo na hù Ovi Jiwheyẹwhe tọn, podọ e sọ yọnẹn dọ Ahọlu Hẹlọdi Jelusalẹm tọn na tẹnpọn nado hù i. Matin ayihaawe, Satani wẹ na ko hẹn sunwhlẹvu lọ nado sẹ́.

Matiu 2:1-23; Mika 5:2.



Kanbiọ lẹ

  • Mẹnu wẹ sunnu he tin to yẹdide lọ mẹ lẹ, podọ naegbọn dopo to yé mẹ do to alọdlẹndo sunwhlẹvu he to sisẹ́ de?
  • Naegbọn Ahọlu Hẹlọdi do gblehomẹ, podọ etẹwẹ e wà?
  • Fie wẹ sunwhlẹvu he to sisẹ́ lọ deanana dawe lọ lẹ yì, ṣigba naegbọn yé gbọn aliho devo do lẹkọyi otò yetọn mẹ?
  • Gbedide tẹwẹ Hẹlọdi na, podọ etẹwutu?
  • Etẹwẹ Jehovah dọna Josẹfu nado wà?
  • Mẹnu wẹ hẹn sunwhlẹvu yọyọ lọ nado sẹ́, podọ etẹwutu?

Kanbiọ devo

  • Hia Matiu 2:1-23.

    Nawẹ Jesu ko whẹ́n sọ to whenuena sunwhlẹvu-pọntọ lẹ dla ẹ pọ́n podọ fie wẹ e nọ nọ̀? (Mat. 2:1, 11, 16)

Plọnnu Dogọ

JESU—ALIHO LỌ, NUGBO LỌ PO OGBẸ̀ PO

Sunwhlẹvu-Pọntọ lẹ Wá Dla Jesu Pọ́n

Naegbọn sunwhlẹvu he yé mọ to Whèzẹtẹn lọ ma deanana yé yì Jesu dè to tintan-whenu, ṣigba yì Ahọlu hlọnhutọ lọ Hẹlọdi dè?