Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 84: Angẹli de Dla Malia Pọ́n

Otàn 84: Angẹli de Dla Malia Pọ́n

MALIA wẹ yọnnu whanpẹnọ ehe. Islaelivi de wẹ ewọ, bo nọ nọ̀ tòpẹvi Nazalẹti tọn mẹ. Jiwheyẹwhe yọnẹn dọ gbẹtọ dagbe wẹ ewọ yin. Enẹwutu wẹ e do angẹli etọn Gabliẹli hlan nado dọho hẹ ẹ. Be a yọ́n nuhe Gabliẹli wá dọna Malia ya? Gbọ mí ni pọ́n.

Gabliẹli dọna ẹn dọmọ: ‘Kúdo lewhenu, hiẹ mẹhe nukundagbe daho yin didohia. Jehovah tin hẹ we.’ Malia ma ko mọ omẹ mọnkọtọn pọ́n. Obu di i na ewọ ma yọ́n nuhe dọ mẹlọ te gba. Ṣigba, Gabliẹli whiwhẹ ayiha etọn to afọdopolọji.

Malia

E dọna ẹn dọmọ: ‘A dibu blo, Malia. Homẹ Jehovah tọn hùn do gowe taun. Enẹ wẹ zọ́n bọ ewọ jlo na wà onú jiawu de na we. Hiẹ na ji visunnu de to madẹnmẹ. Podọ hiẹ nasọ ylọ ẹ dọ Jesu.’

Gabliẹli zindonukọn dọmọ: ‘Visunnu ehe na klo bo na yin yiylọdọ Visunnu Jiwheyẹwhe Gigogán lọ tọn. Jehovah na yí i do doahọlu taidi Davidi. Ṣigba Jesu na yin ahọlu kakadoi, podọ ahọluduta etọn ma na wá opodo gbede!’

Malia kanse dọmọ: ‘Nawẹ ehe lẹpo sọgan jọ gbọn? Yẹn ma tlẹ ko dà asu. Yẹn masọ nọ po sunnu de po pọ́n, nawẹ yẹn sọgan ji ovi de gbọn?’

Gabliẹli sọ gblọn dọmọ: ‘Huhlọn Jiwheyẹwhe tọn na wá jiwe. Enẹwutu, ovi lọ na yin yiylọdọ Ovi Jiwheyẹwhe tọn.’ Enẹgodo, e dọna Malia dọmọ: ‘Flin hẹnnumẹ towe Elizabẹti. Gbẹtọ lẹ dọ dọ e ko poyọnho bo ma sọgan jivi ba. Ṣigba to madẹnmẹ din, ewọ na ji visunnu de. Enẹwutu, hiẹ sọgan mọdọ nudepope ma glo Jiwheyẹwhe.’

To afọdopolọji, Malia dọmọ: ‘Afanumẹ yọnnu Jehovah tọn wẹ yẹn! Na e ni yì domọ na mi kẹdẹdile a dọ do.’ To whenẹnu wẹ angẹli lọ yì sọn e dè.

Malia sọ yawu nado yì dla Elizabẹti pọ́n. To whenuena Elizabẹti sè ogbè Malia tọn, viyẹyẹ he to ohò etọn mẹ lọ whàngo po ayajẹ po. Elizabẹti sọ gọ́ na gbigbọ Jiwheyẹwhe tọn bo dọmọ: ‘Donanọ wẹ hiẹ to yọnnu lẹ mẹ.’ Malia sọ nọ Elizabẹti dè na nudi osun atọ̀n, podọ enẹgodo, e lẹkọyi owhé etọn gbè to Nazalẹti.

Malia to awuwle nado lẹzun asi na dawe de he nọ yin Josẹfu. Ṣigba, whenuena Josẹfu sè dọ Malia na ji ovi de, e lẹndọ emi ma sọgan wlealọ hẹ ẹ ba. Whenẹnu wẹ angẹli Jiwheyẹwhe tọn dọna ẹn dọmọ: ‘A dibu nado plan Malia taidi asi towe blo. Na Jiwheyẹwhe wẹ na ẹn visunnu lọ.’ Enẹwutu, Malia po Josẹfu po wlealọ bo to tenọpọn jiji Jesu tọn.

Luku 1:26-56; Matiu 1:18-25.



Kanbiọ lẹ

  • Mẹnu wẹ yọnnu he tin to yẹdide lọ mẹ?
  • Etẹwẹ Gabliẹli dọna Malia?
  • Nawẹ Gabliẹli basi zẹẹmẹ na Malia dọ ewọ na jivi dile e ma tlẹ ko tindo asu gbọn?
  • Etẹwẹ jọ to whenuena Malia yì dla hẹnnumẹ etọn Elizabẹti pọ́n?
  • Etẹwẹ Josẹfu lẹn to whenuena e sè dọ Malia to ohò, ṣigba naegbọn e do diọlinlẹn?

Kanbiọ devo lẹ

  • Hia Luku 1:26-56.

    Etẹwẹ Luku 1:35 dohia gando ogú mapenọ-yinyin Adam tọn depope he sọgan tin to ovi-zìn Malia tọn mẹ go to whenuena ogbẹ̀ Ovi Jiwheyẹwhe tọn yin tẹndiọna sọn olọn mẹ? (Hag. 2:11-13; Joh. 6:69; Heb. 7:26; 10:5)

    Nawẹ Jesu yin gigopana etlẹ yin jẹnukọnna jiji etọn gbọn? (Luku 1:41-43)

    Apajlẹ dagbe tẹwẹ Malia zedai na Klistiani he nọ mọ lẹblanulọkẹyi sinsẹ̀nzọn tọn vonọtaun lẹ yí to egbehe lẹ? (Luku 1:38, 46-49; 17:10; Howh. 11:2)

  • Hia Matiu 1:18-25.

    Dile etlẹ yindọ Jesu ma nọ yin yiylọdọ Emmanuẹl, nawẹ nuhe e wà to aigba ji lẹ do zẹẹmẹ yinkọ enẹ tọn hia gbọn? (Mat. 1:22, 23; Joh. 14:8-10; Heb. 1:1-3)

Plọnnu Dogọ

JESU—ALIHO LỌ, NUGBO LỌ PO OGBẸ̀ PO

Owẹ̀n Awe Delẹ He Wá sọn Jiwheyẹwhe Dè

Angẹli Gabliẹli do owẹ̀n he vẹawu nado yise lẹ.

YẸDIDE MẸHE GO BIBLU DONÙ LẸ TỌN

Yẹdide Malia He to Biblu mẹ Tọn

Plọnnu gando fihe Malia ze Jesu yì to whenue e do azán 40 go. Zín yẹdide ehe tọ́n, sán ẹn bo sẹ̀ ẹ do.

HODO APAJLẸ YISE YETỌN TỌN

Malia—“Pọ́n! Afanumẹ Yọnnu Jehovah Tọn!”

Etẹwẹ gblọndo he Malia na angẹli Gabliẹli dohia gando yise etọn go? Jẹhẹnu họakuẹ devo tẹwẹ e dohia?