Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 101: Jesu Yin Hùhù

Otàn 101: Jesu Yin Hùhù

PỌ́N onú ylankan he to jijọ! Jesu hù wẹ yé te. Yé ze e plá do atin de go. Yé whè oṣó do alọ po afọ etọn lẹ po mẹ. Naegbọn mẹde sọgan wà onú mọnkọtọn na Jesu?

Jesu kú

Na mẹdelẹ gbẹwanna Jesu wutu wẹ. Be hiẹ yọ́n yé ya? Dopo to yé mẹ wẹ angẹli ylankan lọ, Satani Lẹgba. Ewọ wẹ mẹhe hẹn Adam po Evi po nado vẹtolina Jehovah. Podọ Satani sọ wẹ omẹ lọ he hẹn kẹntọ Jesu tọn lẹ nado wà danú mọnkọtọn hẹ ẹ.

Whẹpo Jesu do yin whiwhè do atin go, kẹntọ etọn lẹ wà nuylankan lẹ hẹ ẹ. Be a flin lehe yé wá jipa Gẹtsemani tọn mẹ bo wle e sọyi do ya? Mẹnu wẹ kẹntọ enẹlẹ? Yewlẹ wẹ nukọntọ sinsẹ̀n tọn lẹ. Eyọn, gbọ mí ni pọ́n nuhe wá jọ bọdego.

To whenue nukọntọ sinsẹ̀n tọn lẹ wle Jesu, apọsteli etọn lẹ họnyi. Yé jo Jesu kẹdẹ do alọ kẹntọ etọn lẹ tọn mẹ, na obu di yé wutu. Ṣigba, apọsteli Pita po Johanu po ma yì fihe dẹn do e gba. Yé hodo gbẹtọgun lọ nado pọ́n nuhe na jọ do Jesu go.

Yẹwhenọ lẹ plan Jesu yì Annas, dawe yọnhonọ lọ dè, mẹhe ko yin yẹwhenọ daho dai. Gbẹtọgun lẹ ma nọte dẹn to finẹ. Yé sọ ze Jesu yì owhé Kaifa tọn gbè, mẹhe yin yẹwhenọ daho todin. Nukọntọ sinsẹ̀n tọn susu ko pli do owhé etọn gbè.

To owhé Kaifa tọn gbè wẹ yé dawhẹ na Jesu te. Yé hẹn gbẹtọ lẹ wá nado dolalo dokọna ẹn. Nukọntọ sinsẹ̀n tọn lẹpo sọ dọmọ: ‘Jesu dona yin hùhù dandan.’ Enẹgodo, yé túntán do nukunmẹ na ẹn bosọ linú i.

To whenue ehe lẹpo to jijọ, Pita tin to gbonu awánu lọ tọn. Avivọ tin to ozán lọ mẹ, enẹwutu, gbẹtọ lẹ flọ miyọ́n. Dile yé to miyọ́n lọ hú, devi yọnnu de pọ́n Pita bo dọmọ: ‘Dawe ehe lọsu nọ zọnhẹ Jesu.’

Pita sọ gblọn dọmọ: ‘Lala, e ma yin yẹn!’

Whla atọ̀n wẹ gbẹtọ lẹ dọna Pita dọ e nọ zọnhẹ Jesu. Ṣigba whla atọ̀n lẹpo wẹ Pita gbẹ́ dọ e ma yinmọ. Whla atọ̀ntọ he Pita dọ ehe wẹ Jesu lẹkọ bo pọ́n ẹn hlan. Lalo he Pita do ehelẹ vẹna ẹn taun, e sọ tọ́n bo yì viavi.

Dile owhè jẹ tintọ́n ji to Ahọluzangbe (vendredi) afọnnu, yẹwhenọ lẹ dọ̀n Jesu yì fihe hagbẹ Whẹdatẹn Daho Ju lẹ tọn nọ pli do. To finẹ, yé lẹnnupọndo nuhe yé na wà na ẹn ji. Yé sọ plan ẹn yì Pọntiu Pilati dè, mẹhe to gandu do agbegbe Jude tọn ji.

Yẹwhenọ lọ lẹ dọna Pilati dọmọ: ‘Mẹylankan de wẹ dawe ehe. E dona yin hùhù.’ To kanbiọ lẹ kinkanse Jesu godo, Pilati dọmọ: ‘Yẹn ma mọdọ e wà nuylankan de gba.’ Enẹgodo, Pilati do e hlan Hẹlọdi Antipa dè. Hẹlọdi wẹ to gandu to Galili, ṣigba Jelusalẹm wẹ e nọ nọ̀. Hẹlọdi lọsu ma mọ nuylankan he Jesu wà, enẹwutu e lẹkọna ẹn hlan Pilati dè.

Pilati jlo na tún Jesu dote. Ṣigba, kẹntọ Jesu tọn lẹ jlo dọ gàntọ devo ni yin tuntundote do otẹn Jesu tọn mẹ. Omẹ enẹ wẹ Balabas ajotọ lọ. To whèmẹ, Pilati hẹn Jesu tọ́njẹgbonu. E dọna gbẹtọ lẹ dọmọ: ‘Mì pọ́n ahọlu mìtọn!’ Ṣigba, yẹwhenọgán lẹ dawhá dọmọ: ‘Mì de e sẹ̀! Mì hù i! Mì hù i!’ Enẹwutu, Pilati jo Balabas do nado yì, podọ yé sọ dọ̀n Jesu dedo hùhù gbé.

To Ahọluzangbe whèmẹ wẹ yé whè Jesu do atin go. Yé sọ whè ylanwatọ awe do atin go ga to adusiwhé po amiyọnwhé Jesu tọn po, ṣigba hiẹ ma sọgan mọ yé to yẹdide lọ mẹ. Ojlẹ vude jẹnukọnna okú Jesu tọn, dopo to ylanwatọ lọ lẹ mẹ dọna ẹn dọmọ: ‘Flin mi to whenue hiẹ na biọ ahọluduta towe mẹ.’ Jesu sọ gblọn bo dọmọ: ‘Yẹn dopagbe na we dọ hiẹ na nọ hẹ mi to Paladisi mẹ.’

Be e ma yin opagbe jiawu de wẹ enẹ ya? Be hiẹ yọ́n Paladisi he hodọ wẹ Jesu te ya? Fie wẹ Jiwheyẹwhe basi Paladisi de do to bẹjẹeji? Mọwẹ, to aigba ji. Podọ to whenue Jesu na jẹ gandu ji to olọn mẹ, ewọ na hẹn dawe ehe gọwá ogbẹ̀ nado duvivi Paladisi yọyọ lọ tọn to aigba ji. Be e ma jẹ dọ homẹ mítọn ni hùn na enẹ ya?

Matiu 26:57-75; 27:1-50; Luku 22:54-71; 23:1-49; Johanu 18:12-40; 19:1-30.



Kanbiọ lẹ

  • Mẹnu wẹ yin omẹ tintan he doalọ to okú Jesu tọn mẹ?
  • Etẹwẹ apọsteli lẹ wà to whenuena Jesu yin wiwle gbọn nukọntọ sinsẹ̀n tọn lẹ dali?
  • Etẹwẹ jọ to owhé Kaifa, yẹwhenọ daho lọ tọn gbè?
  • Naegbọn Pita tọ́n bo yì viavi?
  • To whenuena Jesu yin hinhẹn lẹkọyi Pilati dè, nawẹ yẹwhenọ daho lẹ dawhá dọ?
  • Etẹwẹ jọ do Jesu go to Ahọluzangbe (vendredi) whèmẹ, podọ opagbe tẹwẹ e do na dopo to ylanwatọ he yin whiwhè do atin go to apá etọn lẹ mẹ?
  • Fie wẹ Paladisi he Jesu dọho etọn lọ na tin te?

Kanbiọ devo lẹ

  • Hia Matiu 26:57-75.

    Aliho tẹ mẹ wẹ hagbẹ Whẹdatẹn Daho Ju lẹ tọn lẹ dohia te dọ ahun yetọn ylan? (Mat. 26:59, 67, 68)

  • Hia Matiu 27:1-50.

    Naegbọn mí sọgan dọ dọ e ma yin lẹnvọjọ nujọnu tọn wẹ Juda dohia? (Mat. 27:3, 4; Malku 3:29; 14:21; 2 Kọl. 7:10, 11)

  • Hia Luku 22:54-71.

    Etẹwẹ mí sọgan plọn sọn lehe Pita mọ́n Jesu gbọn to ozán he mẹ e yin didehia bo yin wiwle te lọ mẹ? (Luku 22:60-62; Mat. 26:31-35; 1 Kọl. 10:12)

  • Hia Luku 23:1-49.

    Nawẹ Jesu yinuwa hlan oylan he yin wiwà do e lẹ gbọn, podọ etẹwẹ mí sọgan plọn sọn ehe mẹ? (Luku 23:33, 34; Lom. 12:17-19; 1 Pita 2:23)

  • Hia Johanu 18:12-40.

    Etẹwẹ dohia dọ dile obu gbẹtọ tọn tlẹ duto Pita ji na ojlẹ gli de, e sọ mọ huhlọn yí bo lẹzun apọsteli ayidego tọn de? (Joh. 18:25-27; 1 Kọl. 4:2; 1 Pita 3:14, 15; 5:8, 9)

  • Hia Johanu 19:1-30.

    Pọndohlan jlẹkaji tọn tẹwẹ Jesu tindo gando agbasanu lẹ go? (Joh. 2:1, 2, 9, 10; 19:23, 24; Mat. 6:31, 32; 8:20)

    Nawẹ hogbe godo tọn he Jesu dọ jẹnukọnna okú etọn lẹ yin hodidọ awhàngbigba tọn he dohia dọ e ko suwhẹna nupojipetọ-yinyin Jehovah tọn gbọn? (Joh. 16:33; 19:30; 2 Pita 3:14; 1 Joh. 5:4)

Plọnnu Dogọ

Yè Plan Jesu Yì Annas Dè, Enẹgodo Yì Kaifa Dè

Owhẹ̀ agọ̀ wẹ yin didá na Jesu.

Whẹdatẹn Daho lọ Dawhẹna Jesu, bo Plan Ẹn Yì Pilati Dè

Sinsẹ̀ngán Ju lẹ de linlẹn yetọn lẹ hia.

Ahọlu Homẹvọnọ de Jiya to Pòtin Ji

Jesu do opagbe he na mọ hẹndi to sọgodo de na dopo to sẹ́nhẹngbatọ he yin whiwhè do pòtin go hẹ ẹ lẹ mẹ.

Plọn Johanu 3:16 Do Tamẹ

Mì plọn nuhe Johanu 3:16 dọ bo yí i zan to whenue mì na wá yì kunnudegbe.