Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 83: Adó Jelusalẹm Tọn Lẹ

Otàn 83: Adó Jelusalẹm Tọn Lẹ
Azọ́nwatọ lẹ to adó Jelusalẹm tọn lẹ vọ́ gbá

PỌ́N azọ́n he to yìyì tofi ehe lẹpo. Islaelivi lẹ hẹn alọnu yetọn ján to adó Jelusalẹm tọn lẹ dido mẹ. To whenuena Ahọlu Nẹbukadnẹzali và Jelusalẹm sudo to owhe 152 lẹ die wayi, e họ́ adó lọ lẹ liai bosọ mẹ̀n họngbo tòdaho lọ tọn lẹ. Islaelivi lẹ ma jẹ adó lọ lẹ do ji to kọlilẹ yetọn sọn Babilọni tlolo gba.

Numọtolanmẹ tẹwẹ a lẹndọ gbẹtọ lẹ na tindo nado mọdọ tòdaho yetọn ma tindo adó to owhe enẹ lẹpo gblamẹ? Yé mọdọ emi ma tindo hihọ́. Kẹntọ yetọn lẹ sọgan tọ́nawhàn yé po awubibọ po. Ṣigba todin, dawe ehe, Nẹhemia wẹ wá to alọgọna gbẹtọ lẹ nado vọ́ adó lọ lẹ do. Be hiẹ yọ́n mẹhe yin Nẹhemia ya?

Nẹhemia yin Islaelivi de he wá sọn tòdaho Ṣuṣani tọn mẹ, fihe Mọldekai po Ẹsteli po nọgbẹ̀ te. Nẹhemia nọ wazọ́n to họ̀nmẹ ahọlu tọn, enẹwutu e sọgan ko yin họntọn vivẹ de na Mọldekai po Ahọsi Ẹsteli po. Ṣigba, Biblu ma dọ dọ Nẹhemia wazọ́n na Ahọlu Ahasuelusi, asu Ẹsteli tọn gba. E wazọ́n na ahọlu he bọdego, Ahọlu Altakẹlikesi.

Flindọ Altakẹlikesi wẹ yin ahọlu dagbe lọ he yí akuẹ susu na Ẹzla nado bẹ yì Jelusalẹm nado vọ́ tẹmpli Jehovah tọn gbá. Ṣigba, Ẹzla ma wẹ yin mẹhe do adó he họliai to tòdaho lọ mẹ gba. Gbọ mí ni pọ́n nuhewutu e wá yindọ Nẹhemia wẹ wazọ́n lọ.

E ko yì owhe 13 todin bọ Altakẹlikesi yí akuẹ lọ na Ẹzla nado yì gbá tẹmpli lọ. Nẹhemia wẹ yin ogán kọfohẹntọ Ahọlu Altakẹlikesi tọn todin. Enẹ zẹẹmẹdo dọ, ewọ wẹ nọ ze ahàn na ahọlu bo nọ hẹn ẹn diun dọ mẹdepope ma donú núdùdù mẹ na ẹn. Azọ́n sinsinyẹn de wẹ ehe yin.

To gbèdopo, Hanani, nọvisunnu Nẹhemia tọn po sunnu devo lẹ po wá sọn aigba Islaeli tọn ji nado wá pọ́n Nẹhemia. Yé dọ nuhahun he Islaelivi lẹ to pipehẹ lẹ na ẹn, podọ lehe adó Jelusalẹm tọn he ko họ́ lẹ gbẹ́ pò to kọmẹ do. Ehe hẹn Nẹhemia blawu taun, bọ e sọ hodẹ̀ hlan Jehovah do whẹho lọ ji.

To gbèdopo, ahọlu doayi e go dọ Nẹhemia tin to awubla mẹ, e sọ kanse dọmọ: ‘Etẹwutu a do blawu sọmọ?’ Nẹhemia sọ dọna ẹn dọ na Jelusalẹm tin to ninọmẹ ylankan de mẹ podọ adó etọn lẹ ko yin hihọliai wutu wẹ. ‘Etẹwẹ hiẹ jlo todin?’ wẹ ahọlu lọ kanse.

Nẹhemia to anadena azọ́n họgbigbá tọn lọ

Nẹhemia dọmọ: ‘Gbọ ma yì Jelusalẹm na yẹn nido yì vọ́ adó lọ lẹ do.’ Ahọlu Altakẹlikesi jọmẹ taun. E nagbè Nẹhemia nado yì, e sọ na ẹn atin nado yizan na azọ́n lọ. Ojlẹ vude to whenue Nẹhemia jẹ Jelusalẹm to enẹgodo, e dọ tito etọn lẹ na gbẹtọ lẹ. Yé kẹalọyi linlẹn lọ, bosọ dọmọ: ‘Mì gbọ mí ni jẹ azọ́n lọ ji.’

To whenuena kẹntọ Islaeli tọn lẹ mọdọ adó lọ jẹ agayi ji, yé dọmọ: ‘Mí na yì yé dè bo na hù yé, bosọ hẹn azọ́n lọ dote.’ Ṣigba Nẹhemia sè ehe, bosọ yí ohí po owhán po na azọ́nwatọ lẹ. E sọ dọmọ: ‘Mì dibuna kẹntọ mítọn lẹ blo. Mì hoavùn na mẹmẹsunnu mìtọn lẹ, na ovi mìtọn lẹ, na asi mìtọn lẹ, podọ na owhé mìtọn lẹ.’

Gbẹtọ lọ lẹ gboadọ taun. Yé to aṣeji po awhànfunnu yetọn lẹ po to okle po ozán po bosọ to azọ́nwa. Gbọnmọ dali, yé fó azọ́n lọ to azán 52 gblamẹ. Gbẹtọ lẹ sọgan nọ jijọho mẹ todin to tòdaho lọ mẹ. Nẹhemia po Ẹzla po to osẹ́n Jiwheyẹwhe tọn plọn gbẹtọ lẹ podọ homẹ gbẹtọ lẹ tọn sọ hùn.

Ṣigba, onú lẹ masọ to yìyì do lehe e te do dai whẹpo Islaelivi lẹ do yin bibẹ sọyi kanlinmọgbenu to Babilọni ba. Ahọlu Pẹlsia tọn wẹ to gandu do gbẹtọ lẹ ji bọ yé sọ dona sẹ̀n ẹn. Ṣigba Jehovah dopagbe dọ emi na de ahọlu yọyọ de na yé, podọ ahọlu enẹ na hẹn jijọho wá na gbẹtọ lẹ. Mẹnu wẹ yin ahọlu ehe? Nawẹ e na hẹn jijọho wá aigba ji gbọn? Nudi owhe 450 ko juwayi whẹpo yè do wá yọ́n nudepope gando ehe go. Enẹgodo wẹ ovi titengbe de wá yin jiji. Ṣigba otàn devo pete sọ niyẹn.

Nẹhemia weta 1 jẹ 6.



Kanbiọ lẹ

  • Etẹwẹ yin numọtolanmẹ Islaelivi lẹ tọn to whenuena adó ma tin lẹdo tòdaho yetọn Jelusalẹm?
  • Mẹnu wẹ Nẹhemia?
  • Azọ́n tẹwẹ Nẹhemia nọ wà, podọ naegbọn e do yin nujọnu?
  • Linlin tẹwẹ hẹn Nẹhemia blawu, podọ etẹwẹ e wà?
  • Nawẹ Ahọlu Altakẹlikesi do homẹdagbe hia Nẹhemia gbọn?
  • Nawẹ Nẹhemia basi titona azọ́n adó lọ didó tọn bọ kẹntọ Islaeli tọn lẹ ma penugo nado doalọtena ẹn gbọn?

Kanbiọ devo lẹ

  • Hia Nẹhemia 1:4-6 po 2:1-20 po.

    Nawẹ Nẹhemia dín anademẹ Jehovah tọn gbọn? (Nẹh. 2:4, 5; Lom. 12:12; 1 Pita 4:7)

  • Hia Nẹhemia 3:3-5.

    Etẹwẹ mẹho lẹ po devizọnwatọ lizọnyizọnwiwa tọn lẹ po sọgan plọn sọn vogbingbọn he tin to nuwiwa Tekoinu lẹ po “mẹgboogbo” yetọn lẹ po tọn ṣẹnṣẹn mẹ? (Nẹh. 3:5, 27; 2 Tẹs. 3:7-10; 1 Pita 5:5)

  • Hia Nẹhemia 4:1-23.

    Etẹwẹ na tuli Islaelivi lẹ nado zindonukọn to adó lọ didó mẹ mahopọnna nukundiọsọmẹ sinsinyẹn? (Nẹh. 4:6, 8, 9; Ps. 50:15; Isa. 65:13, 14)

    Aliho tẹ mẹ wẹ apajlẹ Islaelivi lẹ tọn nọ na mí tuli te to egbehe?

  • Hia Nẹhemia 6:15.

    Etẹwẹ nugbo lọ dọ adó Jelusalẹm tọn lẹ yin didó bo yin tadona to osun awe gblamẹ dohia gando huhlọn he yise tindo go? (Ps. 56:3, 4; Mat. 17:20; 19:26)