Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 81: Yé Dejido Alọgọ Jiwheyẹwhe Tọn Go

Otàn 81: Yé Dejido Alọgọ Jiwheyẹwhe Tọn Go

NUDI gbẹtọ 50 000 wẹ zingbejizọnlin gaa lọ sọn Babilọni yì Jelusalẹm. Ṣigba to whenue yé jẹ Jelusalẹm, aigba lọ ko jẹvọ́ pete. Mẹde ma nọ nọ̀ finẹ. Islaelivi lẹ dona vọ́ nulẹpo gbá whladopo dogọ.

Dopo to onú tintan he yé gbá lẹ mẹ wẹ agbà de. Agbà lọ yin nọtẹn de he ji yé sọgan basi avọ́sinsan kavi nunina kanlin lẹ tọn dohlan Jehovah te. Osun vude godo, Islaelivi lẹ jẹ tẹmpli lọ gbá ji. Ṣigba kẹntọ he tin to aigba he lẹdo yé ji lẹ ma jlo dọ Islaelivi lẹ ni gbá onú mọnkọtọn. Enẹ wẹ zọ́n bọ yé dobuna yé nado hẹnalọdotena yé. To godo mẹ, kẹntọ lọ lẹ biọ to ahọlu Pẹlsia tọn si nado de osẹ́n de tọ́n nado do azọ́n họgbigbá lọ tọn te.

Owhe lẹ to yìyì. E ko yì owhe 17 todin sọn whenue Islaelivi lẹ lẹkọ sọn Babilọni. Jehovah do yẹwhegán etọn lẹ Hagai po Zekalia po hlan nado dọna akọta lọ dọ yé dona vọ́ azọ́n họgbigbá tọn lọ bẹjẹeji. Yé dejido alọgọ Jiwheyẹwhe tọn go bosọ setonuna yẹwhegán lẹ. Yé sọ jẹ ohọ̀ lọ gbá ji mahopọnna dọ osẹ́n de yin didetọn nado doalọtena yé.

Enẹwutu, ahọluzọnwatọ Pẹlsia tọn de he nọ yin Tatenai wá Islaelivi lẹ dè bo kàn jlọjẹ he yé tindo nado gbá tẹmpli lọ sè. Islaelivi lẹ dọna ẹn dọ whenue yé to Babilọni, Ahọlu Kilusi dọna yé dọ: ‘Todin, mì yì Jelusalẹm bo gbá tẹmpli Jehovah Jiwheyẹwhe mìtọn tọn.’

Tatenai do wekanhlanmẹ de hlan Babilọni bo kanse eyin Kilusi he ko kú todin dọ mọ nugbo. To madẹnmẹ, ahọlu yọyọ Pẹlsia tọn lọsu kanwehlan. E dọ dọ Kilusi dọ mọ nugbo. Podọ ahọlu Pẹlsia tọn yidogọ dọmọ: ‘Mì gbọ Islaelivi lẹ ni gbá tẹmpli Jiwheyẹwhe yetọn tọn. Podọ yẹn sọ degbena mì nado gọalọna yé.’ To nudi owhe ẹnẹ godo, tẹmpli lọ yin tadona bọ homẹ Islaelivi lẹ tọn sọ hùn taun.

Owhe susu devo lẹ ko juwayi. E ko diblayi owhe 48 todin bọ tẹmpli lọ yin tadona. Mẹhe to Jelusalẹm lẹ lẹzun hẹntọnọ, bọ tòdaho lọ po tẹmpli Jiwheyẹwhe tọn po masọ yọnwhanpẹ sọmọ ba. Ẹzla he yin Islaelivi de to Babilọni sè dọ tẹmpli Jiwheyẹwhe tọn dona yin vivọjlado. Be a yọ́n nuhe e wà ya?

Ẹzla yì mọ Altakẹlikẹsi, ahọlu Pẹlsia tọn podọ ahọlu dagbe ehe sọ yí nunina susu lẹ na Ẹzla nado bẹ yì Jelusalẹm. Ẹzla biọ to Islaelivi he to Babilọni lẹ si nado gọalọna ẹn nado bẹ nunina lọ lẹ yì Jelusalẹm. Nudi gbẹtọ 6 000 wẹ yigbe nado yì. Yé tindo fataka, sika po onú họakuẹ susu devo lẹ po nado bẹ yì.

Ẹzla to nuhà na mẹylankan delẹ to ali lọ ji. Omẹ ehelẹ sọgan hò fataka po sika yetọn lẹ po yí bosọ hù yé. Enẹwutu, Ẹzla bẹ mẹlẹpo pli dopọ dile hiẹ sọgan mọ to yẹdide lọ mẹ do. Enẹgodo yé sọ hodẹ̀ hlan Jehovah nado basi hihọ́na yé to gbejizọnlin gaa yetọn yì Jelusalẹm whenu.

Ẹzla po gbẹtọ lẹ po to dẹ̀ho

Jehovah sọ họ́ yé nugbo. Podọ to gbejizọnlin osun ẹnẹ tọn godo, yé jẹ Jelusalẹm to jijọho mẹ. Be ehe ma dohia dọ Jehovah sọgan basi hihọ́na mẹhe dejidego na alọgọ lẹ ya?

Ẹzla weta 2 jẹ 8.



Kanbiọ lẹ

  • Omẹ nẹmu wẹ zingbejizọnlin gaa lọ sọn Babilọni yì Jelusalẹm, ṣigba etẹwẹ yé mọ to whenue yé jẹ finẹ?
  • Etẹ whẹ́whẹ́ wẹ Islaelivi lẹ jẹ didó ji to whenuena yé jẹ Jelusalẹm, ṣigba etẹwẹ kẹntọ yetọn lẹ wà?
  • Mẹnu wẹ Hagai po Zekalia po, podọ etẹwẹ yé dọna gbẹtọ lẹ?
  • Naegbọn Tatenai do wekanhlanmẹ de hlan Babilọni, podọ gblọndo tẹwẹ e mọyi?
  • Etẹwẹ Ẹzla wà to whenuena e sè dogbọn nuhudo lọ dali nado yì vọ́ tẹmpli Jiwheyẹwhe tọn jlado?
  • Etẹwẹ Ẹzla to bibiọ to odẹ̀ mẹ to yẹdide lọ mẹ, nawẹ odẹ̀ etọn mọ gblọndo gbọn, podọ etẹwẹ ehe plọn mí?

Kanbiọ devo lẹ

  • Hia Ẹzla 3:1-13.

    Eyin mí mọ míde gbede to lẹdo de mẹ, fie agun omẹ Jiwheyẹwhe tọn lẹ tọn depope ma tin te, etẹwẹ mí dona zindonukọn nado to wiwà? (Ẹzla 3:3, 6; Owalọ 17:16, 17; Heb. 13:15)

  • Hia Ẹzla 4:1-7.

    Apajlẹ tẹwẹ Zelubabẹli zedai na omẹ Jehovah tọn lẹ to whẹho bẹwlu yise tọn mẹ? (Eks. 34:12; 1 Kọl. 15:33; 2 Kọl. 6:14-17)

  • Hia Ẹzla 5:1-5, 17 po 6:1-22 po.

    Naegbọn agọjẹdomẹtọ lẹ ma penugo nado doalọtena azọ́n tẹmpli lọ gbigbá tọn? (Ẹzla 5:5; Isa. 54:17)

    Nawẹ aliho he mẹ mẹho Ju lẹ tọn lẹ yinuwa te na tuli mẹho Klistiani lẹ nado nọ dín anademẹ Jehovah tọn eyin yé pehẹ agọjẹdomẹtọ lẹ gbọn? (Ẹzla 6:14; Ps. 32: 8; Lom. 8:31; Jak. 1:5)

  • Hia Ẹzla 8:21-23, 28-36.

    Whẹpo mí nado jẹ nuwiwa de ji, apajlẹ Ẹzla tọn tẹwẹ e na yọ́n dọ mí ni nọ hodo? (Ẹzla 8:23; Ps. 127:1; Howh. 10:22; Jak. 4:13-15)