Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 80: Omẹ Jiwheyẹwhe Tọn lẹ Tọ́n sọn Babilọni

Otàn 80: Omẹ Jiwheyẹwhe Tọn lẹ Tọ́n sọn Babilọni

NUDI owhe awe ko juwayi sọn whenue Medianu lẹ po Pẹlsianu lẹ po gbawhàn Babilọni tọn. Bo pọ́n nuhe to jijọ todin! Mọwẹ, Islaelivi lẹ to tintọ́n sọn Babilọni. Nawẹ yé mọ tundote lọ yí gbọn? Mẹnu wẹ tún yé dote?

Ahọlu Pẹlsia tọn, Kilusi wẹ wàmọ. Ojlẹ dindẹn jẹnukọnna jiji Kilusi tọn, Jehovah dọ gbọn yẹwhegán etọn Isaia ji dọmọ: ‘Nuhe yẹn jlo kẹdẹ wẹ hiẹ na wà. Họngbo lọ lẹ na yin jijodo nùvo na we nado gbawhàn tòdaho lọ tọn.’ Podọ, Kilusi wẹ sọ deanana awhànpa he duto Babilọni ji nugbo. Medianu lẹ po Pẹlsianu lẹ po zọ̀n ozán wá tòdaho lọ mẹ gbọn họngbo he yin jijodo nùvo lọ lẹ nù.

Ṣigba yẹwhegán Jehovah tọn Isaia sọ dọ dọ Kilusi na degbè dọ Jelusalẹm po tẹmpli etọn po ni yin vivọgbá. Be Kilusi wàmọ ya? Mọwẹ. Kilusi dọna Islaelivi lẹ dọmọ: ‘Todin, mì yì Jelusalẹm bo vọ́ tẹmpli Jehovah Jiwheyẹwhe mìtọn tọn gbá.’ Podọ nuhe Islaelivi lẹ jei wiwà gbé todin niyẹn.

Islaelivi lẹ to tintọ́n sọn Babilọni

Ṣigba e ma yin Islaelivi he to Babilọni lẹpo wẹ sọgan zingbejizọnlin lọ lẹkọyi Jelusalẹm gba. Aliho lọ dẹn taun sọ kilomẹtlu 800 podọ mẹsusu ko poyọnho kavi to azọ̀njẹ sọmọ bọ yé ma sọgan zingbejizọnlin gaa enẹ. Whẹwhinwhẹ́n devo lẹ sọ tin he wutu mẹdelẹ ma sọgan yì. Kilusi dọna mẹhe ma yì lẹ dọmọ: ‘Mì yí fataka po sika po gọna nunina devo lẹ na mẹhe lẹkọ jei nado yì vọ́ Jelusalẹm po tẹmpli etọn po gbá lẹ.’

Enẹwutu, Islaelivi he jei Jelusalẹm lẹ mọ nunina susu yí. Kilusi sọ yí agbán po kọfo he Ahọlu Nẹbukadnẹzali bẹsọn tẹmpli Jehovah tọn mẹ to whenue e và Jelusalẹm sudo lẹ po na yé. Gbẹtọ lẹ tindo nususu todin nado bẹ lẹkọyi whé.

To nudi gbejizọnlin osun ẹnẹ tọn godo, Islaelivi lẹ jẹ Jelusalẹm to ojlẹ he sọgbe lọ mẹ. E ko yì owhe 70 pẹpẹ bọ tòdaho lọ yin vivasudo, podọ aigba etọn sọ yin hinhẹn jẹvọ́ mlẹnmlẹn. Ṣigba, dile etlẹ yindọ Islaelivi lẹ wá otò yetọn titi mẹ todin, yé na pannukọn ninọmẹ sinsinyẹn delẹ dile mí na mọ do to nukọn mẹ.

Isaia 44:28; 45:1-4; Ẹzla 1:1-11.



Kanbiọ lẹ

  • Dile e yin didohia do to yẹdide lọ mẹ, etẹwẹ Islaelivi lẹ to wiwà?
  • Nawẹ Kilusi hẹn dọdai he Jehovah dọ gbọn Isaia gblamẹ di gbọn?
  • Etẹwẹ Kilusi dọna Islaelivi he ma sọgan lẹkọyi Jelusalẹm lẹ?
  • Etẹwẹ Kilusi na Islaelivi lẹ nado hẹn yì Jelusalẹm?
  • Nawẹ gbejizọnlin Islaelivi lẹ tọn nado lẹkọyi Jelusalẹm dẹnsọ?
  • Owhe nẹmu wẹ ko wayi sọn whenue gbọ́n aigba lọ ko yin hinhẹn jẹvọ́ matin gbẹtọ depope?

Kanbiọ devo lẹ

  • Hia Isaia 44:28 po 45:1-4 po.

    Nawẹ Jehovah zinnudeji dọ dọdai he gando Kilusi go lọ na mọ hẹndi dandan gbọn? (Isa. 55:10, 11; Lom. 4:17)

    Etẹwẹ dọdai he Isaia dọ do Kilusi ji dohia gando nugopipe Jehovah Jiwheyẹwhe tọn nado dọ nuhe na jọ to nukọn mẹ lẹ go? (Isa. 42:9; 45:21; 46:10, 11; 2 Pita 1:20)

  • Hia Ẹzla 1:1-11.

    To apajlẹ mẹhe ma sọgan lẹkọyi Jelusalẹm lẹ tọn hihodo mẹ, nawẹ mí sọgan ‘na huhlọn alọ’ mẹhe penugo nado biọ sinsẹ̀nzọn whenu-gigọ́ tọn mẹ lẹ tọn gbọn? (Ẹzla 1:4, 6; Lom. 12:13; Kọl. 4:12)