Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 79: Daniẹli to Odò Kinnikinni lẹ Tọn Mẹ

Otàn 79: Daniẹli to Odò Kinnikinni lẹ Tọn Mẹ

OJE! E taidi dọ Daniẹli to nuhahun daho de mẹ nkọ. Ṣigba kinnikinni lẹ ma to awugblena ẹn! Be hiẹ yọ́n nuhewutu wẹ ya? Mẹnu wẹ ze Daniẹli dlan fi topọ po kinnikinni ehe lẹpo po? Gbọ mí ni dindona.

Dawe de he nọ yin Daliusi wẹ yin ahọlu Babilọni tọn todin. E yiwanna Daniẹli taun na Daniẹli yin homẹdagbenọ po nuyọnẹntọ po wutu. Daliusi de Daniẹli nado yin ogán daho pete to ahọluduta etọn mẹ. Ehe zọ́n bọ mẹdevo he to ahọluduta lọ mẹ lẹ whànwu Daniẹli, podọ nuhe yé wà die.

Daliusi

Yé yì Daliusi dè bo dọmọ: ‘Ahọlu E míwlẹ kọngbedopọ dọ hiẹ dona de osẹ́n de tọ́n dọ, na azán 30 mẹdepope ma dona hodẹ̀ hlan yẹwhe devo kavi gbẹtọ devo depope adavo hlan hiẹ, ahọlu E. Eyin mẹde ma setonu, ewọ na yin zizedlan odò kinnikinni lẹ tọn mẹ.’ Daliusi ma yọ́n nuhewutu omẹ ehelẹ do jlo dọ osẹ́n ehe ni yin didetọn. Ṣigba e mọdọ linlẹn dagbe de wẹ ehe yin, enẹwutu ewọ hẹn ẹn diun dọ osẹ́n lọ yin kinkàndai. Todin, osẹ́n lọ ma sọgan yin didiọ ba.

Whenue Daniẹli sè dọ osẹ́n lọ ko tọ́n, e yì whégbè bo hodẹ̀ dile e ko nọ wà do dai. Mẹylankan lọ lẹ yọnẹn dọ Daniẹli ma na doalọtena dẹ̀hiho hlan Jehovah. Homẹhun yé na e taidi dọ ayikinkan yetọn nado de Daniẹli sẹ̀ to azọ́nwa nkọ.

Whenuena Daliusi wá yọ́n nuhewutu omẹ ehelẹ jlo dọ osẹ́n ehe ni yin didetọn, e vẹna ẹn taun. Ṣigba e masọ sọgan diọ osẹ́n lọ ba, enẹwutu e dona degbè dọ Daniẹli ni yin zizedlan odò kinnikinni lẹ tọn mẹ. Ahọlu sọ dọna Daniẹli dọmọ: ‘Yẹn deji dọ Jiwheyẹwhe towe, mẹhe hiẹ to sinsẹ̀n, na whlẹn we.’

Daliusi jẹflumẹ sọmọ bọ e ma damlọn to ozán lọ blebu mẹ. E họ̀nwezun yì odò kinnikinni lẹ tọn kọ̀n to wunkẹngbe afọnnu. Hiẹ sọgan mọ ẹn to yẹdide lọ mẹ. E dawhá dọmọ: ‘Daniẹli, devi Jiwheyẹwhe ogbẹ̀nọ lọ tọn! Be Jiwheyẹwhe he sẹ̀n hiẹ te penugo nado whlẹn we sọn kinnikinni lẹ si ya?’

Daniẹli to odò kinnikinni lẹ tọn mẹ

Daniẹli gblọn dọmọ: ‘Jiwheyẹwhe do angẹli etọn hlan bo bọnùdo na kinnikinni lẹ na yé nikaa gbleawuna mi.’

Homẹ ahọlu tọn hùn taun. E degbè dọ Daniẹli ni yin didetọn sọn odò lọ mẹ. Enẹgodo, e degbè dọ mẹylankan he tẹnpọn nado de Daniẹli sẹ̀ lẹ ni yin zizedlan odò kinnikinni lẹ tọn mẹ. Yé ma tlẹ ko jẹ odò lọ mẹ ganji whẹpo kinnikinni lẹ do jẹ yé ji bo gbà ohú yetọn lẹpo.

Enẹgodo, Ahọlu Daliusi kanwehlan mẹhe tin to ahọluduta etọn mẹ lẹpo dọmọ: ‘Yẹn degbè dọ mẹlẹpo ni nọ na sisi Jiwheyẹwhe Daniẹli tọn. E nọ wà azọ́njiawu susu. Ewọ whlẹn Daniẹli sọn kinnikinni lẹ si.’

Daniẹli 6:1-28.



Kanbiọ lẹ

  • Mẹnu wẹ Daliusi, podọ nukun tẹwẹ e do nọ pọ́n Daniẹli?
  • Etẹwẹ sunnu awuwhàntọ delẹ sisẹ́ Daliusi nado wà?
  • Etẹwẹ Daniẹli wà to whenuena e sè dogbọn osẹ́n yọyọ lọ dali?
  • Naegbọn Daliusi jẹflumẹ sọmọ bọ e ma sọgan damlọn, podọ etẹwẹ e wà to wunkẹngbe etọn?
  • Gblọndo tẹwẹ Daniẹli na Daliusi?
  • Etẹwẹ jọ do sunnu kanylantọ he tẹnpọn nado hù Daniẹli lẹ go, podọ etẹwẹ Daliusi kàn hlan mẹhe tin to ahọluduta etọn mẹ lẹpo?

Kanbiọ devo lẹ

  • Hia Daniẹli 6:1-28.

    Nawẹ osé he yin biblá sọta Daniẹli lọ flinnu mí gando nuhe agọjẹdomẹtọ lẹ ko wà nado doalọtena azọ́n Kunnudetọ Jehovah tọn lẹ tọn to egbehe gbọn? (Dan. 6:7; Ps. 94:20; Isa. 10:1; Lom. 8:31)

    Nawẹ devizọnwatọ Jiwheyẹwhe tọn egbezangbe tọn lẹ sọgan hodo apajlẹ Daniẹli tọn na nuhe dù mẹmẹglọ-yinyin na “aṣẹpipa daho lẹ” gbọn? (Dan. 6:5, 10; Lom. 13:1; Owalọ 5:29)

    Nawẹ mí sọgan hodo apajlẹ Daniẹli tọn to Jehovah sinsẹ̀n “whepoponu” mẹ gbọn? (Dan. 6:16, 20; Flp. 3:16; Osọ. 7:15)