Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 78: Alọvi de Kannu Do Adó Go

Otàn 78: Alọvi de Kannu Do Adó Go
Alọvi de kannu do adó go

ETẸWẸ to jijọ tofi? Gbẹtọ lẹ to hùnwhẹ daho de basi. Ahọlu Babilọni tọn ko ylọ jonọ nukundeji fọtọ́n delẹ. Yé to kọfo sika po fataka tọn po gọna agbán he yin bibẹ sọn tẹmpli Jehovah tọn mẹ to Jelusalẹm lẹ zan. Ṣigba, to ajiji mẹ, alọvi mẹde tọn sọawuhia to jẹhọn mẹ bo jẹ núkan do adó go ji. Obu jẹ mẹlẹpo ji.

Bẹlṣazali po jonọ etọn lẹ po

Ovivi Nẹbukadnẹzali tọn, Bẹlṣazali wẹ yin ahọlu to whenẹnu. E dawhá ylọ dawe nuyọnẹntọ etọn lẹ bo dọmọ: ‘Mẹdepope he na hia nukinkan enẹ bosọ basi zẹẹmẹ etọn na mọ nunina susu yí bo nasọ yin dide taidi ogán atọ̀ntọ to ahọluduta ṣie mẹ.’ Ṣigba depope to nuyọnẹntọ ehelẹ mẹ ma penugo nado hia nukinkan adógo tọn lọ kavi basi zẹẹmẹ etọn gba.

Onọ̀ ahọlu tọn sè awhágbe lọ bosọ wá núdùdù họsa daho lọ. E dọna ahọlu dọmọ: ‘Jaale, a dibu blo. Dawe de he yọ́n yẹwhe wiwe lẹ tin to ahọluduta towe mẹ. Whenuena babadaho towe Nẹbukadnẹzali yin ahọlu, ewọ wẹ e de taidi ogán nuyọnẹntọ etọn lẹpo tọn. Daniẹli wẹ e nọ yin. Dowẹn hlan ẹn bọ ewọ nasọ dọ nuhe ehe lẹpo zẹẹmẹdo na we.’

Yè sọ plan Daniẹli wá to afọdopolọji. Whenue Daniẹli ko gbẹ́ nunina ahọlu tọn lẹpo godo, e jẹ nuhewutu Jehovah do de Nẹbukadnẹzali babadaho Bẹlṣazali tọn sọn gánzinpo ji dọ ji. Daniẹli dọmọ: ‘Goyitọ daho de wẹ ewọ, enẹ wẹ zọ́n bọ Jehovah domẹplọnlọ e go.’

Daniẹli sọ dọna Bẹlṣazali dọmọ: ‘Mahopọnna dọ hiẹ sè nuhe jọ do ewọ go lẹpo, a gbẹsọ to goyi di Nẹbukadnẹzali. A ko hẹn kọfo po agbán he yin bibẹ sọn tẹmpli Jehovah tọn mẹ lẹ po wá bọ hiẹ sọ yí yé do to ahànnu. Hiẹ ko na pipà yẹwhe he yè yí atin po zannu po do basi lẹ, podọ hiẹ masọ pagigona Mẹdatọ Daho mítọn. Enẹ wẹ zọ́n bọ Jiwheyẹwhe do alọviyẹyẹ lọ hlan nado wlan hogbe ehelẹ.’

Daniẹli zindonukọn dọmọ: ‘Nuhe yin kinkàn lọ die: MENE, MENE, TEKẸLI, UFALSINI.’

‘MENE zẹẹmẹdo dọ Jiwheyẹwhe ko lẹn azán ahọluduta towe lẹ tọn bo ko sọ dotana ẹn. TEKẸLI zẹẹmẹdo dọ yè ko dà we pọ́n to nujlẹgàn ji bosọ mọdọ hiẹ gbogàn. UFALSINI zẹẹmẹdo dọ yè ko jo ahọluduta towe hlan Medianu lẹ po Pẹlsianu lẹ po.’

Daniẹli ma ko bọnùdo whẹpo Medianu lẹ po Pẹlsianu lẹ po tọ́nawhàn Babilọni. Yé yí otò lọ bo hù Bẹlṣazali. Nukinkan alọviyẹyẹ tọn lọ mọ hẹndi to ozán enẹ dopolọ mẹ! Todin, etẹwẹ na jọ do Islaelivi lẹ go? Mí na yọnẹn to madẹnmẹ, ṣigba gbọ mí ni pọ́n nuhe jọ do Daniẹli go whẹ́.

Daniẹli 5:1-31.



Kanbiọ lẹ

  • Etẹwẹ jọ to whenuena ahọlu Babilọni tọn basi hùnwhẹ daho de bo to kọfo po agbánvla he yin bibẹ sọn tẹmpli Jehovah tọn mẹ to Jelusalẹm lẹ po yizan?
  • Etẹwẹ Bẹlṣazali dọna dawe nuyọnẹntọ etọn lẹ, ṣigba etẹwẹ yé ma penugo nado wà?
  • Etẹwẹ onọ̀ ahọlu lọ tọn dọna ẹn nado wà?
  • Sọgbe hẹ nuhe Daniẹli dọna ahọlu lọ, etẹwutu wẹ Jiwheyẹwhe do do alọ lọ hlan nado wlanwe do adó go?
  • Nawẹ Daniẹli basi zẹẹmẹ hogbe he tin to adó go lọ lẹ tọn gbọn?
  • Etẹwẹ jọ to whenuena Daniẹli gbẹ́ pò to hodọ?

Kanbiọ devo lẹ

  • Hia Daniẹli 5:1-31.

    Do vogbingbọn he tin to obu Jiwheyẹwhe tọn po obu he jẹ Bẹlṣazali ji to whenuena e mọ nukinkan adó go tọn lọ po ṣẹnṣẹn hia. (Dan. 5:6, 7; Ps. 19:9; Lom. 8:35-39)

    Nawẹ Daniẹli do adọgbigbo daho de hia gbọn to whenuena e to hodọna Bẹlṣazali po gbẹtọ klogán-klogán etọn lẹ po? (Dan. 5:17, 18, 22, 26-28; Owalọ 4:29)

    Nawẹ weta 5tọ owe Daniẹli tọn zinnudo nupojipetọ-yinyin wẹkẹ tọn Jehovah tọn ji gbọn? (Dan. 4:17, 25; 5:21)