Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 77: Yé Ma Na Litai

Otàn 77: Yé Ma Na Litai

BE HIẸ flin sunnu jọja atọ̀n ehelẹ ya? Họntọn atọ̀n Daniẹli tọn he gbẹ́ nado dù núdùdù he ma na wà dagbe na yé lọ wẹ yé yin. Babilọninu lẹ ylọ yé dọ, Ṣadlaki, Mẹṣaki po Abẹdinẹgo po. Ṣigba pọ́n yé todin. Naegbọn yé ma do to taliaina boṣiọ blibata ehe dile mẹlẹpo to wiwà do? Gbọ mí ni dindona.

Be a flin osẹ́n he Jehovah lọsu basi kandai etọn lẹ he nọ yin yiylọdọ Gbedide Ao lẹ ya? Tintan to osẹ́n ehelẹ mẹ wẹ: ‘Hiẹ ma na sẹ̀n yẹwhe devo depope adavo yẹn.’ Sunnu jọja he tofi lọ lẹ setonuna osẹ́n ehe, mahopọnna dọ mọwiwà ma bọawu depope.

Ahọlu Babilọni tọn, Nẹbukadnẹzali ko ylọ omẹ gboogbo susu nado pagigona boṣiọ he e wleawuna ehe lọ. E ma dẹn din bọ e dọna mẹlẹpo dọmọ: ‘Whenuena mì sè nudidọ afinván, ajalẹn po hànjinu he pò lẹ po tọn, mì dona litai bo sẹ̀n boṣiọ sika tọn ehe lọ. Mẹdepope he ma na litai bo sẹ̀n ẹn na yin zizedlan zòhọ miyọ́n hihla tọn lọ mẹ to afọdopolọji.’

Whenuena Nẹbukadnẹzali sè dọ Ṣadlaki, Mẹṣaki po Abẹdinẹgo po ma litai, e gblehomẹ taun. E degbè dọ yè ni plan yé wá emi dè. E na yé dotẹnmẹ devo nado litai. Ṣigba sunnu jọja lọ lẹ dejido Jehovah go. ‘Jiwheyẹwhe mítọn he sẹ̀n míwlẹ te penugo nado whlẹn mí,’ wẹ yé dọna Nẹbukadnẹzali. ‘Ṣigba, eyin e ma tlẹ whlẹn mí janwẹ, mí ma na litaina yẹwhe sika tọn towe.’

Ṣadlaki, Mẹṣaki po Abẹdinẹgo po

Nẹbukadnẹzali sọ gblehomẹ dogọ to whenue e sè ehe. Zòhọ miyọ́n tọn de to yakẹ. E sọ degbè dọmọ: ‘Mì hẹn zòhọ lọ hùnmiyọ́n whla ṣinawe hugan dai tọn!’ Enẹgodo, e biọ to sunnu he yin huhlọnnọ hugan to awhànpa etọn mẹ lẹ si nado blá Ṣadlaki, Mẹṣaki po Abẹdinẹgo po bo ze yé dlan zòhọ lọ mẹ. Zòhọ lọ hùnmiyọ́n sọmọ bọ sunnu huhlọnnọ lọ lẹ kú na yozò miyọ́n lọ tọn wutu. Ṣigba, etẹwẹ jọ do jọja sunnu atọ̀n he yin zizedlan zòhọ lọ mẹ lẹ go?

Ahọlu lọ pọ́n zòhọ lọ mẹ hlan bọ obu daho de sọ jẹeji. E kanse dọmọ: ‘Be e ma yin sunnu atọ̀n wẹ mí blá bo zedlan zòhọ hihla lọ mẹ ya?’

‘Mọwẹ,’ wẹ devi etọn lẹ gblọn.

Ewọ sọ dọmọ: ‘Sunnu ẹnẹ wẹ yẹn mọ bọ yé to zọnlinzin to miyọ́n lọ mẹ. Yè ma blá yé mọ miyọ́n lọ masọ gbleawuna yé. Podọ omẹ ẹnẹtọ lọ taidi yẹwhe de.’ Ahọlu sọ dọnsẹpọ ohọ̀n zòhọ lọ tọn dogọ bo dawhá dọmọ: ‘Ṣadlaki! Mẹṣaki! Abẹdinẹgo! Mì tọ́njẹgbonu wá, mì mẹhe yin devi Jiwheyẹwhe Gigogán tọn lẹ!’

Whenue yé tọ́n, mẹlẹpo mọdọ yé ma gbleawu depope. Ahọlu sọ dọmọ: ‘Jiwheyẹwhe Ṣadlaki, Mẹṣaki po Abẹdinẹgo po tọn ni yin gigopana! E ko do angẹli etọn hlan nado whlẹn yé na yé gbẹ́ nado litai bo sẹ̀n yẹwhe devo depope adavo yetọn lọ kẹdẹ.’

Be ehe ma yin apajlẹ dagbe nugbonọ-yinyin na Jehovah tọn de na mí nado hodo ya?

Eksọdusi 20:3; Daniẹli 3:1-30.



Kanbiọ lẹ

  • Gbedide tẹwẹ Nẹbukadnẹzali, ahọlu Babilọni tọn na gbẹtọ lẹ?
  • Naegbọn họntọn Daniẹli tọn atọ̀n lọ lẹ ma litaina boṣiọ sika tọn lọ?
  • To whenuena Nẹbukadnẹzali na dotẹnmẹ devo jọja Heblu atọ̀n lọ lẹ nado litai, nawẹ yé do jidide hia to Jehovah mẹ gbọn?
  • Etẹwẹ Nẹbukadnẹzali degbena omẹ etọn lẹ nado wà na Ṣadlaki, Mẹṣaki, po Abẹdinẹgo po?
  • Etẹwẹ Nẹbukadnẹzali mọ to whenuena e pọ́n zòhọ lọ mẹ hlan?
  • Naegbọn ahọlu lọ do pagigona Jiwheyẹwhe Ṣadlaki, Mẹṣaki, po Abẹdinẹgo po tọn, podọ apajlẹ tẹwẹ yé zedai na mí?

Kanbiọ devo lẹ

  • Hia Daniẹli 3:1-30.

    Nuyiwa jọja Heblu atọ̀n lọ lẹ tọn tẹwẹ devizọnwatọ Jiwheyẹwhe tọn lẹpo dona hodo apajlẹ etọn to whenue yé pehẹ whlepọn tenọgligo-hinhẹn tọn? (Dan. 3:17, 18; Mat. 10:28; Lom. 14:7, 8)

    Onú titengbe tẹwẹ Nẹbukadnẹzali plọn sọn Jehovah Jiwheyẹwhe dè? (Dan. 3:28, 29; 4:34, 35)